[1] Ani Phaawulos, ajaja Rabbii naja-baasoo keenyaa tiin, ammaas Yesuus Kiristoos abdii teenyaaniis, ergamaa Yesuus Kiristoos kan tahe,
[2] gara Ximotewoos kan amantii dhaan dhugumaan ilma kiyya tahetti barreeysuu kiyya. Rabbi Abbaan, Yesuus Kiristoos Gooftaan keenyaas ni'imaa, rahamataa fi nagayaas siif haa kannu.
[3] Waytaan Maqedooniyaa dhaquuf ka'e san, namoonni tokko tokko barsiisa biraa akka hin barsiifne akka dhoorkituuf jecha, “Efesoon turi!” jedhee cimsee sitti himee tiin ture.
[4] Sheekko sheekkoo fi, lakkooysa abaabuu dhuma hin qabnee lakkaawuus akka dhiisan godhi! Wanni isaan godhan kun falamaa kaasuu qofaaf malee, akeeka Rabbii kan amantii dhaan fudhatamu saniif faaydaa hin qabu.
[5] Akeekni ajaja kanaa, jaalala garaa qulqulluu, xalalii xaliilaa fi ammaas amantii dhugaa irraa tan dhuftu kakaasuu dhaafi.
[6] Namoonni hangi tokko kanneen irraa maqanii, gara dubbii duwwaa ma'aanaa hin qabnetti galanii ti jiru.
[7] Isaan kanneen warra barsiisoota seeraa tahuu barbaadu tahani illee garuu, isaan waanuma ifii dubbatan sanuu tanaan yookiin waan mirkani irraa qabna jedhan saniis warra hin beeynee dha.
[8] Namni sirnaan yoo itti hojjate, seerri gaarii akka tahe nuti ni beeyna.
[9] Seerri nama qaceelaaf odoo hin tahin, warra seera malee jiraataniif, warra hin ajajamneef, warra sodaa Rabbii hin qabneef, warra dilaawoof, warra karaa Rabbii jibbaniif, warra mujrimootaaf, warra haawwan isaanii ajjeesaniif, warra nama ajjeesuuf,
[10] warra zinaa godhaniif, warra wal fafeeysuuf, warra nama gurguraniif, warra kijiboof, warra kijibaan kakataniif, ammaas warruma waanuma barsiisa sirrii taheen mormaniifi tumame.
[11] Barsiisni sirrii dhaa kun ammoo, Wangeela kan waan durrii ulfina Rabbii eeybifamaa dhaa dubbatuu dha; Wangeelli kuniis akkaan ani lallabuuf jecha, hadaraa anatti kannamee ti jira.
[12] Ani, Yesuus Kiristoos Gooftaa keenya, kan hojii kiyya kanaaf humna anaaf kanne, akka amanamaattiis kan na lakkaawee hojii isaa irrattiis na ramadeef, hamdii dhaan galcha.
[13] Duri illee, ani nama maqaa namaa balleeysu, kan nama arihu, ammaas mujrima tokkoon ture; ammoo amantii fudhachuu kiyyaan dur wallaalummatti waan kanneen waaniin godheef jecha, Rabbi araara anaaf buuse.
[14] Ni'imaan Gooftaa keenyaa amantii fi, jaalala Yesuus Kiristoos keeysatti arkamaniin wajjiin, haddiin maletti anaaf dhangalaafamtee ti jirti.
[15] Jechi “Yesuus Kiristoos dilaawoota najaa baasuuf jecha gara biyya addunyaa dhaa dhufe” jedhu sun, dhugumaan amanamaa dha, fudhatamaas ni qaba; warra dilaawoota keeysaa gad-aantiin, ana mataa koo ti.
[16] Haa tahu malee, Yesuus Kiristoos ana namticha dilitti beekamaa duraa tahe kana keeysaani, obsa isaa kan hizaaba hin qabne mullisee warra jireenya abad arkachuuf isatti amananiif fakkeenya akka isaaniif tahuuf jecha, araara isaa na agarsiisee ti jira.
[17] Mootii abad, kan hin duune, kan ija namaattiis hin mullanne, Rabbi tokkichaaf durriin ulfinaa bara baraaf isumaaf haa taatu! Aammiin.
[18] Yaa ilma koo Ximotewoos! Waan qoowliin raajii waa'ee kee tiif kanaan dura dubbatte san duukaa buutee, gaarii gootee akka ittiin qabsooytuufiin ajaja kana cimsee hadaraa sitti kanna.
[19] Kanaaf jecha amantitti jabaadhu, xalalii xaliilaas qabaadhu! Namoonni tokko tokko xalalii isaanii jalaa diduu irraa kan ka'e amantiin isaanii turaab jalaa taate.
[20] Himenewoosii fi Iskindir, warra jara akkasii san keeysa jiru; ani ammoo isaan, Rabbi arrabsuu dhiisuu akka barsiifamaniif jechaan, harka Sheeyxaanatti, adabaaf dabarsee isaan kannee tiin jira.