[1] Ani Phaawulos, kan fedhii Rabbii tiin ergamaa Yesuus Kiristoos tahe, akkaataa abdii jireenyaa tan Yesuus Kiristoos keeysa jirtutti xalayaa tana katabuu kiyya.
[2] Haa gahu gara Ximotewoos, ilma ruuhaanii kiyya jaalatamaa! Rabbi Abbaan, Yesuus Kiristoos Gooftaan keenyaas ni'imaa, rahamataa fi nagayaas siif haa kannu!
[3] Rabbi, kaniin ani akkuma abboottan kiyya godhanitti, xalalii xaliilaan kaadamu san, wayta hundumaa halkanii fi guyyaas, hugguun kadhata kiyya keeysatti si yaadadhu, isa niin galateeyfadha.
[4] Imimmaan kee hugguun yaadadhuus, suma arkee gammachuun akkaan guutamuufiin dharra'a.
[5] Amantii tee xaliila tan akka amantii Loyis akkoo tee tii, ammaas tanuma akka haadha tee Ewuniiqee keeysa turtee san yaadachiifamee, ammaan tana amantummaan san akka si keeysa jirtuus naaf mirkana.
[6] Kanaaf jecha, kannaa Rabbii tan hogguun harka kiyya mataa kee ti irra kaaye siif kannamte san, itti hafarsitee akka ibiddaatti akka ammaas qabsiiftuun si yaadachiisa.
[7] Rabbi Ruuhaa qiwwaa, tan jaalalaa tii fi tan naamusaan if eeguuti nutti kanne malee, ruuhaa sodaa dhaan battisuu, nuuf hin laanne.
[8] Eegasuu, Gooftaa keenyaaf ragaa bahutti if hin qaanfatin! Ammaas, anuma kan isaaf jecha hidhamaa tahe kanatti illee if hin qaafatin! Tanaa mannaa, qiwwaa Rabbi siif kannuun, wangeelaaf jecha rakkachuu irraa qooda qabaadhu!
[9] Rabbi, najaa nu baasee ti waamicha qulqulluu dhaani nu yaame; kanaas gocha keenya kam illee fuu odoo hin tahin, akkaatuma akeeka isaa tii fi ni'imaa isaatitti godhe. Ni'imaan tuniis karaa Yesuus Kiristoosiin zamaanaan dura nuuf kannamtee ti turte.
[10] Amma ammoo, dhufa naja-baasoo keenya Yesuus Kiristoosiin, ni'imaan tun nutti mullifamte; isa, kan du'a dhabamsiisee, karaa wangeelaa tiin jireenya du'a hin qabne kan ifatti baase.
[11] Ani wangeela kanaafiin lallabaa, ergamaa fi barsiisaa tahee Rabbiin shuumame.
[12] Hiraar ammaa kuniis, kanaaf jecha na irra gahaa jira; ani ammoo inniin ani itti amane eenyu akka inni tahe waaniin beekuuf hin qaanfadhu; kana qofaa miti, inni waan imaanaa anatti kanname kana, hanga guyyaa deebi'ee dhufa isaatti, eeguu akka dandayu niin amana.
[13] Qoowlii bu'ura amantii dhugaa, tan ana irraa dhageeyse san fakkii godhadhuu qabii, ittiin qaceelfamaa amantii fi jaalala Yesuus Kiristoos keeysatti jiraadhu.
[14] Waan gaarii imaanaa sitti kanname san, gargaarsa Ruuhal Qudus kan nu keeysa jiraatuun eegi!
[15] Warri kutaa Asiyaa keeysaa hundinuu, Feegelusii fi Hermogenes illeen, akka ana irraa dheeysan, atuu ni beeyta.
[16] Oneesiforos ammoo, shanshalataan ittiin hidhametti odoo hin qaanfatin, deddeebi'ee waan ana jajjabeeyseef jecha, Gooftaan haaskaa isaatiif haa tolu!
[17] Gara kaaniin ammaas, akkuma magaalaa Roomaa gaheeni fardeeyfatee hanga ana arkutti, na barbaade.
[18] Magaalaa Efesoonittiis taanaan, karaa meeqaan akka inni na gargaare atuu akka gaaritti beeyta. Gooytaan guyyaa sanitti rahamata isaa akka kannuuf, fedhii isaa haa tahuuf!