[1] Zamaan aakir, namoonni hangi tokko amantii gatanii, ruuhaanota kijiboo fi barsiisa Sheeyxaanotaa duukaa bu'uuf taa'u, jedhee ti Ruuhal Qudus zaahiritti dubbate.
[2] Barsiisni akkanaa kun, warra fakkeeysituu kijiboo, kanneen xalaliin isaanii sibiila ibiddatti diimatee finiineen waadaman keeysaahi dhufa.
[3] Jarreen kun, fuudhaa fi heerumaas nama dhoorku, ammaas nyaata akkanaa tii fi kan akkasii nyaachuun dhoorkaa dha jedhu; Rabbi ammoo, nyaata adda addaa kanneen, warri amananii ammaas dhugaa beekuu bira gayan, hamduma galchanii akka nyaataniif uume.
[4] Wanni Rabbi uume hundinuu gaarii dha, hamdii galchuun fudhannaan wanni keeysaa balfamu hin jiru.
[5] Qoowliin Rabbii tii fi kadhannaan, isa ni qulqulleeysa.
[6] Ati, warra amananiif, barsiisa kanneen yoo kanniteef, Yesuus Kiristoosiif kaadamaa gaarii taata. Ifii kee tiis qoowlii amantii tii fi, ammaas barsiisa dhugaa kan duukaa buute saniin, if soortee guddachaa ti jirta.
[7] Sheekko sheekkoo faaydaa hin qabne jette-jettee dubartii dullootaa hin fudhatin; nama Rabbii taatee jiraachuuf if qopheeysi!
[8] Jasada qaamaa jajjabeeysuuf shaakaluun hanga tokko faaydaa qaba; ammoo nama Rabbii tahanii jiraachuun karaa hundumaanuu faaydaa dha qaba; jireenya ammaafiis taanaan, ammaas jireenya hegereefiis, abdiin jireenyaa tanuma keeysa jirti.
[9] Jechi kun amanamaa dha, guutummatti fudhatamuu tu irra jiraasi.
[10] Rabbi, naja-baasoo nama hundumaa ti, keeysumaa huu ammoo naja-baasoo warra amantootaa ti; nuti abdii teenya Rabbii jiraataa irra kaayannee ti jirra; kanaafiis tattaafannee jabaannee ti carraayna.
[11] Barsiisa kanneen ajajii tii ammaas isaan barsiisi!
[12] Ati umriin, nama xiqqaa waan taateef jecha, nam tokko illeenuu si hin tuffatin! Ammoo dubbii teetitti, haala kee tiiniis, jaalala tee tiiniis, amantii fi qulqullummattiis warra amantootaaf fakkii gaarii tahi!
[13] Hangaan ani dhufuu, Barreeyfama Qulqulluu namootaaf dubbisutti, gorsutti, barsiisuttiis jabaadhuu tii if kanni!
[14] Kannaa Ruuhaanii tan si keeysa jirtu saniis hin dagatin; isiin saniis tan wayta nabiyyoonni dubbatanii, manguddoonni niis harka isaanii mataa kee tii irra si keenyaan arkattee dha.
[15] Namoonni hundinuu itti guddachaa deemuu kee akka arkan, kannaa kanaan hojjadhu! Ittiis if gadi dhiisi!
[16] Ati mataa kee tii fi barsiisa kee tiis caqeellotti eeggadhu, ittiis jabaadhu! Yoo akkana goote, ifii kee tii fi warra si dhaggeeyfataniis najaa dha baafta.