[1] Nama umriin jaarsa tahe, akka abbaa kee tahetti laalii gorsi malee, hin oofin! Warra umriin xixiqqoo tahaniis akkuma obboleeyyan keetitti ifitti qabi!
[2] Dubartoota dullootaas akka haawwanitti, warra shamarraniis garaa xaliilaan akka obbolleeyyanitti gorsi!
[3] Gursummeeytoota warra dhugumaan gursummeeyyii tahaniif kabajaa godhi!
[4] Ammoo dubartiin gursummeeytiin yoo ilmaan qabaatte, yookiin yoo joollee akkoo taatuuf qabaatte, joolleen san akka amantiin isaan irraa eeydutti, haawwan isaanii tii fi akkoo isaanii tiif waan barbbaachisu godhuuf haa baratanii, galata isaanii tiis hanga takka deebisanii haa kafalanii; gochi kun Rabbii durattiis fudhatama qaba.
[5] Dubartiin dhugumaan gursumeeytii taatee hadiyyotti hafte, gargaarsaaf abdii isii Rabbi irra kaayattee, halkanii fi guyyaas himataa fi kadhata isii itti haa furtuu.
[6] Durbartiin gursummeeytiin, tan jaarsi isii irraa duunaan, jiruu bashannanaatti if gadi dhiifte ammoo, isiin nama jiruun du'e.
[7] Warra waan ittiin baanan hin qabne tahanii akka arkamaniif, qaceelfama kanneen isaanitti kanni!
[8] Namtichi firoottan isaa tiif waan isaan barbaachisu hin gooneef ammoo, keeysumaa huu haaskaa isaa tiif yoo yaaduu baate, inni nama amanticha kaade, ammaas nama kaafira irraa huu hammaatuu dha.
[9] Dubartiin [tajaajila waldaya tiif jecha] tarree warra gursummeeytootatti galmeeyfamtu, umriin isii bara jahaatamaa gadi hin tahin; duraan ammoo niitii jaarsuma tokkoo tan turte haa taatuu.
[10] Dalagaa gaarii hojjachutti tan beekamte, joollee isii naamusaan tan gurguddifatte, keeysummootaas tan akka gaaritti simatte, miila amantootaa tan dhiiyxe, warra rakkatan tan gargaarte, karaa hundumaanuu hojii gaariif tan if kannitee maqaa gaarii qabdu tahuu tu isii irraa eegama.
[11] Haa tahu malee, gursummeeytoota warra umriin hin bilchaatin, tarree tanatti galchuu didi. Isaan deebi'anii heerumuu yoo barbaadan, wa'ada Yesuusuma qofa kaadamuuf galan san caphsuun ni mala.
[12] Wa'ada duraan takka isaaf galan san caphsuu isaanii tiifiis yakki itti murama.
[13] Kana malees, kashlabummaas ni baru, mana tokkoo kaanitti ni labu; kashlabummaa qofa odoo hin tahin, namaas ni hamatu, dubbii isaan hin galchine keeysaas ni seenu, waan isaan irraa hin eegamnees ni odeeysu.
[14] Kanaaf jecha diinni maqaa nu balleeysuuf karaa akka hin arkanne godhuuf, gursummeeytoonni umriin joollummaa qaban heerumanii, joollees horanii, mana isaanii tiis haalaan akka kaadamaniin isaan gorsa.
[15] Isaan keeysaa hangi tokko duruun Sheeyxaana duukaa bu'uuf karaa irraa maqanii ti jiru.
[16] Dubartiin kiristaanni takka gursummeeytoota haaskaa isii keeysaa yoo qabaatte, isummaan isaan haa gargaartu malee, ba'aa waldaya kiristaanaa irratti hin dabalin! Haala kanatti waldayaniis gursummeeytoota warra hadiyyootti hafan qofa gargaaruu dha qabdi.
[17] Manguddoonni warri akka gaaritti hojii waldaya geggeeysan, keeysumaahuu warra lallabaa fi barsiisatti fardeeyfatanii kaadamaniif ujuraa dadhabbii isaanii dachaa lama ulfina arkachuu tu isaaniif mala.
[18] Kitaaba keeysatti, “Haraashii midhaan tumaa jirtu afaan hin hidhin!” jedha; akkasumatti ammaas, “Hojjataan gatii dadhabbii isaa arkachuu tu irra jira” kan jedhu dubbatamee ti jira.
[19] Ragaa lama yookiin sadih yoo qabaatte malee, kissii manguddoo tokko irratti dhihaatte hin fudhatin!
[20] Warra dilii itti deddeebi'anii hojjatan ammoo, warri hafan kaan sodaatanii akka if eeganiif jecha, hunduma isaanii duratti loliini!
[21] Eemara kanneen nama odoo wal hin caalchisin, fuula laaltee gama tokkootti odoo hin jigin, haqatti akka eeyduuf jechaan, fuula Rabbii tii fi, kan Yesuus Kiristoos, ammaas kan maleeykoota warra filatamanii durattiin sitti kanna.
[22] Harka mataa namaa irra kaahutti hin jerjerin, dilii nama biraattiis hin seenin! Ati xaliilummatti if eegi.
[23] Garaa kee tii fi da'iifummaa sitti deddeebituuf jecha, xiqqo cuunfaa inabaa itti fudhadhu malee, asii achi bishaanuma qofa hin dhugin!
[24] Diliin nama tokko tokkoo, durumaan zaahiritti mullatti, gara firdiittiis isaan dura dheeyxi; diliin warra kaanii ammoo, isaan booddee dheeyxi.
[25] Hojiin gaariiniis haaluma kana fakkaatuun mullatti, warrummaan silaa zaahiritti hin mullanne illeen, dhooysatti hafuu hin dandayan.