[1] Ammaas waan hundumaa dura kadhataan gaafachuu, kadhachuu, ammaas warra kaaniif maganfachuu fi Rabbi galateeyfachuun, namoota hundumaa fuu akka godhamuun jabeeysee isin gorsa.
[2] Nagaya qabbanaatti, ibaadaa Rabbitti, jireenya kabajaa qabuus jiraachuu akka dandeenyuuf, mootootaa fi warra amri-qabeeysa biyya bulchan hundumaafiis kadhadhaa!
[3] Tana godhuun gaarii dha, ammaas Rabbi naja-baasoo keenya durattiis, fudhatamaa dha.
[4] Rabbi, namni hundinuu akka najaa bahuu fi, dhugaa beekuu biraas akka gahu ni fedha.
[5] Rabbi tokkuma, ammaas araar-qaboon Rabbii fi nama walitti fiduus tokko; inni niis Yesuus Kiristoos kan nama tahee mullate sani.
[6] Inni kan namoota hundumaaf jecha gumaa godhee dabarsee if kannee dha; kuniis waytumatti ragaan kanname.
[7] Akeeka kanaafiin, ani lallabaa fi ergamaas tahee shuumame, ammaas warra saba Israa'el hin tahiniif barsiisaa amantii dhugaa ti; ani dhugaa dhaan dubbachutti malee, kijibutti hin jiru.
[8] Bakka kadhataa hundumattuu, warri dhiiraa aaraa fi wal-diddaan maleetti, harka qulqulluu akka ol qabaniin barbaada.
[9] Warri dubartootaa ammoo, sirna naamusaatti uffata kabaja-qabeeysa haalaaf tahu haa uffatan malee, rifeensa shurrubeeysuun, uffata qaqaaliin, lu'ulu'aa fi ziqeeyaan if faayuu fi if miidheeysuu irraa akka if qusataniin barbaada.
[10] Ammoo dalagaa gaggaarii kanneen dubartoota warra Rabbi abdanna jedhan irraa eeggamu haa agarsiisanii!
[11] Dubartiin, naamusaan ustee ajaja fudhattee haa barattuu.
[12] Dubartiin, naamusa haa qabaattu malee, akka barsiiftuu fi amrii qabaattee akka dhiira ajajju, ani hayyama hin kannuuf.
[13] Aadamii tu dura uumame, Haawa isa booda uumamte.
[14] Ammaas dubartittii tu gawwoomfamee seera caphse malee, Aadamii miti kan gawwoomfame.
[15] Haa tahu malee, dubartittiin ilmaan dhadhaluu dhaani eewalamti; kuniis amantiitti, jaalalatti, qulqullummattii fi ammaas naamusaan if eeydee yoo tan jiraattu taate taha.