[1] Gara xumuratti, yaa obboleeyyan keenya, qoowliin Gooftaa hatattamaan baballattee akkuma isin biratti fudhatamtetti, bakka iyyuttuu ulfinaan akka fudhatamtuuf Rabbi nuuf maganfadhaa!
[2] Namni hundinuu Qoowlii Rabbii ni amana jechuu miti; kanaaf Rabbi warra jallaa fi mujrimoota harkaa, akka nu eewaluuf nuuf kadhadhaa!
[3] Gooftaan ammoo amanamaa dha; inni isin ni jajjabeeysa, isa hamaa saniis isin irraa ni eega.
[4] Waan isin eemarre raawwachaa akka jirtanii fi ammaas itti furtanii akka raawwachuuf deemtaniis, Gooftaa biraa isin irratti amantaa dha qabna.
[5] Gooftaan mee qalbii teeysan, gara jaalala Rabbii tii fi gara obsa Kiristoositti qaceelchee haa galchu!
[6] Ammaas yaa obboleeyyan keenya, isin amantoota keeysaa warra masluufoota kanneen haala barsiisa nu irraa fudhattanitti hin jiraanne irraa akka fagaattan, maqaa Gooftaa keenya Yesuus Kiristoosiin isin ajajna.
[7] Nuti wayta isin bira turre san masluufa akka hin turin, isiniis fakkii teenya duukaa bu'uun akka isin irraa eegamu ifii fuu ni beeytan.
[8] Nam tokkotti illee ba'aa akka hin taaneef jecha, halkanii fi guyyaas hojitti jabaannee ti dalayne malee, odoo gatii hin kafalin nama tokko illee irraa huu biddeena illee hin nyaanne.
[9] Nuti tana wanni gooneef, waan nu barbaachise gaafachuuf mirga dhabnee odoo hin tahin, isiniif fakkeenya taanee, akka isin duukaa keenya buutaniif jecha ture.
[10] Wayta isin bira turre illee, “Namni hojii hojjachuu hin barbaanne, midhaaniis hin nyaatin!” jennee isin ajajnee ti turre.
[11] Amma ammoo isinuma keeysaa huu namoonni hangi tokko dalagaa dhiisanii, masluufummaan jiraachaa dubbii isaan hin galchine keeysaas seenaa akka jiran dhageenya.
[12] Namoota akkasii kana sirna qabaatanii dalaganii akka if nyaachisan maqaa Gooftaa Yesuus Kiristoosiin isaan ni ajajna, ni gorsinaasi.
[13] Yaa obboleeyyan keenya, isin ammoo keeyrii dalaguu irratti hin laafinaa!
[14] Nama eemara nuti xalayaa tanaan kannineef hin ajajamne, addaan baasaa tii laalaa! Akka inni qaanfatu godhuuf gola isaa tahuu dhiisaa!
[15] Haa tahu malee, akka diinatti isa hin laalinaa, akkuma obboleeysatti isa gorsaa!
[16] Gooftaan, Abbaan nagayaa, wayta hundumaa fi karaa hundumaaniis nagaya isiniif haa kannu! Gooftaan hunduma keeysanii wajjiin haa tahu.
[17] Ani Phaawulos nagaya kiyya kana harka kiyyaaniin isiniif barreeysa. Akkiniin ani itti katabuus akkuma kana; milikkinni ittiin beekamu kuniis ergaan ani barreeyse hundumaa irra jira.
[18] Ni'imaan Gooftaa keenyaa Yesuus Kiristoos hunduma keeysanii wajjiin haa taatu!