[1] Yurukɔɔlɔ to wi sɛwɛ yurugo, ŋga pe maa koo na ŋgɔni maŋgala kɔlɔtaanri woo gbɔɔn. Davidi Yɛnŋɛlɛ gbɔgɔyurugo.
[2] Yawe Yɛnŋɛlɛ maga kanla jɛrɛgi naŋgbanwa ni! Maga kanla le jɔlɔgɔ naŋgbanwa gbɔɔ ni!
[3] Yawe Yɛnŋɛlɛ, na yinriwɛ ta, katugu fanŋga si koro na ni! Na sagala, katugu na wire lombondo tila seri na na!
[4] Na jatere wì piri na na fɔ ma saa toro; ɛɛn fɔ Yawe Yɛnŋɛlɛ, ko yaa pye ma fɔ sa gbɔn wagati wiwiin?
[5] Yawe Yɛnŋɛlɛ, sɔngɔrɔ ma pan mala shɔ; mala go yirige ma kagbaraga ki kala na!
[6] Katugu mbele pè ku, pe se ya mbaa jatere piin ma na naa; wa kuulo tara ambɔ wi yaa lɔɔn sɔnni?
[7] Na fanŋga kì saa kɔ, naa mì koro na jɛɛn we; yembinɛ pyew mi ma gbele fɔ mala sinlɛyaraga ki yinŋgi pɔtɔɔ, na yɛntunwɔ pi mala sinlɛsaga ki yinŋgi pɔtɔɔ.
[8] Na yɛgɛ kì tiletile jatere pirindorogo ki na, na yɛngɛlɛ ke woro na yaan naa jɛŋgɛ na winfɛnnɛ pe ni fuun pe kala na.
[9] Ye laga na na tanla, yoro kapere pyefɛnnɛ ye ni fuun, katugu Yawe Yɛnŋɛlɛ lìlan gbelege ki logo.
[10] Yawe Yɛnŋɛlɛ lìlan yɛnrɛwɛ gbɔɔ pi logo, lì yɛnlɛ na yɛnrɛwɛ pi na.
[11] Na juguye pe ni fuun pe yaa fɛrɛ shɔ mbaa fyɛ fɔ jɛŋgɛ, fɛrɛ ti yaa pe go sogo, pe sɔngɔrɔ fyaw.