[1] Davidi Yɛnŋɛlɛ gbɔgɔyurugo. Yoro naayeri fanŋga fɛnnɛ, yaa Yawe Yɛnŋɛlɛ li gbogo! Yaa li gbogo yaa li fanŋga ki sɔnni!
[2] Ye Yawe Yɛnŋɛlɛ li mɛgɛ ki gbɔgɔ! Ye fɔli ye ye yɛrɛ ti jiile wa tara Yawe Yɛnŋɛlɛ li yɛgɛ sɔgɔwɔ yeli gbɔgɔ, li yɛn kpoyi yɛgɛ ŋga na ki kala!
[3] Yawe Yɛnŋɛlɛ li magala li yɛn na yinrigi wa tɔnmɔ pi go na, Yɛnŋɛlɛ na gbɔgɔwɔ wolo li yɛn na yɛnŋɛlɛ gbaanra piin; Yawe Yɛnŋɛlɛ li yɛn tɔnŋgbɔɔ pi go na.
[4] Yawe Yɛnŋɛlɛ li magala li yɛn fanŋga ni, Yawe Yɛnŋɛlɛ li magala li yɛn fanŋga gbɔgɔ ni.
[5] Yawe Yɛnŋɛlɛ li magala li ma sɛdiri tire ti walagi, Yawe Yɛnŋɛlɛ li ma Liban tara sɛdiri tire ti walagi mari jaanri.
[6] Li ma ti Liban tara yanwira ti maa yeni na kanni paa napɛnɛ yirifɔnmbɔlɔ yɛn; li ma ti Ɛrimɔ yanwira ti maa yeni na kanni paa yannɔ yirifɔnmbɔlɔ yɛn.
[7] Yawe Yɛnŋɛlɛ li magala li maa kasɔn ŋgbanli janri na yinrigi.
[8] Yawe Yɛnŋɛlɛ li magala li maa gbinri wi tigile, Yawe Yɛnŋɛlɛ li maa Kadɛshi gbinri wi tigile.
[9] Yawe Yɛnŋɛlɛ li magala li ma safuwe wi ŋgbanga wi ma se; li magala li ma ti kɔɔrɔ ti ma koro waga. Wa li gbɔgɔgo ki ni, pe ni fuun pe yɛn na yuun fɔ: «Gbɔgɔwɔ yɛn Yɛnŋɛlɛ li woo!»
[10] Yawe Yɛnŋɛlɛ làa pye wunluwɔ tɔnŋgbɔɔ pi pansanga wi ni, Yawe Yɛnŋɛlɛ li yɛn wunluwɔ fɔ sanga pyew.
[11] Yawe Yɛnŋɛlɛ li fanŋga kan li woolo pe yeri; li duwaw pe na, li yɛyinŋge kan pe yeri!