[1] Yaa Yawe Yɛnŋɛlɛ li sɔnni, yaa li mɛgɛ ki yinri! Yaa li kagbɔgɔlɔ pyewe pi sɛnrɛ yuun cɛngɛlɛ sanŋgala ke sɔgɔwɔ!
[2] Yaa yuuro koo li kan, yaa sɔnmɔ yuuro koo yaa li gbogo; yaa li kagbɔgɔlɔ ke ni fuun ke yari!
[3] Yaa ye yɛɛ gbogo li mɛgɛ kpoyi ki kala na, mbele fuun pe yɛn na Yawe Yɛnŋɛlɛ li lagajaa, paa yɔgɔri!
[4] Yaa wele Yawe Yɛnŋɛlɛ lo yeri, yaa li fanŋga ki lagajaa, yaa li lagajaa sanga pyew!
[5] Yaa ye yɛɛ nawa tuun kajɛŋgɛ kagbɔgɔlɔ ŋgele lì pye ke na, yaa ye yɛɛ nawa tuun li kafɔnŋgɔlɔ naa li kiti kɔnkagala ke na,
[6] yoro Abirahamu setirige piile, yoro mbele li tunmbyeele wele, yoro Zhakɔbu setirige piile, yoro mbele lì wɔ we!
[7] Lo li yɛn Yawe Yɛnŋɛlɛ, we Yɛnŋɛlɛ le. Lo li yɛn fanŋga ki na tara ti lagapyew ki ni.
[8] Li jatere wi yɛn li yɔn finliwɛ pi na sanga pyew, li sɛnrɛ nda lì kan setirige piile yirisaga lɛgɛrɛ yeri we.
[9] Làa ki yɔn finliwɛ pi le Abirahamu wi ni, ma wugu pi wogo na ma Izaki wi kan.
[10] Làa ki yɔn finliwɛ pi gbegele maa le naa Zhakɔbu wi ni, maa pye kondɛgɛlɛ wi kan, maa pye yɔn finliwɛ mbakɔɔ wo ŋa Izirayɛli wi kan.
[11] Làa yo fɔ: «Mi yaa Kana tara ti kan ye yeri, ti yaa pye ye kɔrɔgɔ ŋga ki kan ye yeri.»
[12] Ki wagati wi ni, pàa pye jɛgɛlɛ, pe sila lɛgɛ, pàa pye nambanmbala ma cɛn wa tara ti ni.
[13] Pàa pye na yanri cɛngɛlɛ ke sɔgɔwɔ na toro, pe ma yiri wunluwɔ tara ta ni mbe kari ta ni.
[14] Ɛɛn fɔ Yɛnŋɛlɛ li sila yere ki na lere wa mbege kan pe na mbe pe jɔlɔ, làa para wunlumbolo pele na pe kala na.
[15] Làa pe pye fɔ: «Mbele mì wɔ na yɛɛ kan, yaga ka jiri pe na, yaga ka kapege pye na yɔn sɛnrɛ yofɛnnɛ pe na.»
[16] Làa fuŋgo wa wa tara ti ni, a yarilire tì kɔ leele pe yeri pew.
[17] Làa lere wa torogo wa pe yɛgɛ, wo wi yɛn Zhozɛfu we, wo ŋa pàa pɛrɛ, a wì pye kulo.
[18] Pàa wi tɔɔrɔ ti pɔ yɔngɔwɔ ni, ma tugurɔn ŋgbɛɛrɛ le wa wi yɔlɔgɔ,
[19] fɔ ma saa gbɔn pilige ŋga ni sɛnrɛ nda wìla yo, a tì saa ti yɛɛ yɔn fili; a Yawe Yɛnŋɛlɛ li sɛnrɛ tì tanga kan wi yeri.
[20] Kì pye ma, a wunlunaŋa wì si konɔ kan ma yo poo wa, wo ŋa tara ti kundigi wì sho fɔ poo wɔ wa kaso.
[21] A wunlunaŋa wì suu tɛgɛ to wi go ki go na, maa tɛgɛ wi kɛɛ yaara ti ni fuun ti go na;
[22] jaŋgo wila wunlunaŋa wi legbɔɔlɔ pe nari, mbe yala wi yɛɛra nandanwa kala li ni, wila lelɛɛlɛ pe nari kajɛnmɛ ni.
[23] Ko puŋgo na, a Izirayɛli wì si kari wa Ezhipiti tara, wo ŋa Zhakɔbu, a wì si saa cɛn wa to nda ti yɛn Kamu tara ti ni.
[24] Yɛnŋɛlɛ làa ti, a li woolo pè se ma lɛgɛ fɔ jɛŋgɛ, mɛɛ fanŋga kan pe yeri ma wɛ pe juguye pe na.
[25] Puŋgo na, a lì si kaa Ezhipiti tara fɛnnɛ pe jatere wi kanŋga pe na, ma ti a Yɛnŋɛlɛ li woolo pe kala li pe mbɛn; a paa poro mbele Yɛnŋɛlɛ li tunmbyeele pe java.
[26] Kona, a lì sili tunmbyee Moyisi wi tun wa pe yeri, konaa Arɔn ni, wo ŋa làa wɔ we.
[27] Pàa kacɛn kagbɔgɔlɔ pye Yɛnŋɛlɛ li fanŋga na wa Ezhipiti tara fɛnnɛ pe sɔgɔwɔ, ma kafɔnŋgɔlɔ pye wa to nda ti yɛn Kamu tara ti ni.
[28] Yɛnŋɛlɛ làa diwi wi leŋge wa tara ti ni, a diwi wì ye tara ti lagapyew ki ni; lere kpɛ sila je li sɛnrɛ ti na.
[29] Làa pe lɔrɔ tɔnmɔ pi kanŋga kasanwa, ma pe ŋgbanra ti gbo.
[30] Pe tara tìla yin ŋgbeye pe ni lagapyew, fɔ ma saa ye wa pe wunlumbolo pe wɔnlɔ yinrɛ ti ni.
[31] Yɛnŋɛlɛ làa para, a nakɔɔnrɔ nda ti yɛn shɔnrɔ ni to naa namara pan, ma tara ti tɔn lagapyew.
[32] Làa ti, a sinndɛɛrɛ tisaga pan tisaga jɛŋgɛ ki yɔnlɔ, ma ti a yɛnŋɛlɛ gbanlaga kasɔn ki to wa tara ti ni.
[33] Làa pe ɛrɛzɛn tiire naa figiye tire ti jɔgɔ, ma pe tara tire ti kaari kaari.
[34] Làa para, a kambɛɛrɛ pan, a gbatɔ lɛgɛrɛ pan, ŋa wi saa ya mbe jiri;
[35] tìla pe tara yan ki ni fuun ki ka, ma pe tara yarilire ti ka pew.
[36] Làa pe pinambiile koŋgbanmbala pe ni fuun pe gbo, poro mbele pàa pye pe fanŋga ki ni fuun ki yaraga koŋgbanŋga ye.
[37] Làa ti, a li woolo pè yiri wa Ezhipiti tara warifuwe naa tɛ ni, pe cɛngɛlɛ ke ni, wa kpɛ sila te mbe koro puŋgo na.
[38] Pe yinriwɛ wa tara ti ni kìla yɔgɔrimɔ kan Ezhipiti tara fɛnnɛ pe yeri, katugu pe kala làa sunndo kɔngɔ wa Ezhipiti tara fɛnnɛ pe na.
[39] Yɛnŋɛlɛ làa kambaaga yirige ma li woolo pe tɔn, ma kasɔn mu na yanwa yinrigi pe kan.
[40] Pàa li yɛnri kara ni, a lì si siriŋgbangala torogo pe kan, ma yaakara kan pe yeri ma yiri wa yɛnŋɛlɛ na, a pè ka ma tin.
[41] Làa walaga ki yɔn yɛngɛ, a tɔnmɔ pì yiri na fuun, pìla yiri na fuun paa gbaan yɛn wa gbinri wi ni.
[42] Katugu li jatere wìla pye li sɛnrɛ kpoyi nda làa yo ti na, konaa li tunmbyee Abirahamu wi na.
[43] Làa li woolo pe yirige wa tara ti ni yɔgɔrimɔ ni, poro mbele li woolo làa pe yirige nayinmɛ gbɔɔ ni.
[44] Làa cɛngɛlɛ kele yɛgɛ tara kan pe yeri, ma leele pele yɛgɛ kɛɛ tunŋgo tɔnli kan pe yeri,
[45] jaŋgo paa tanri li kondɛgɛŋgɛlɛ ke na konaa pe lasiri sɛnrɛ ti lɛ paa tanri ti na. Yaa Yawe Yɛnŋɛlɛ li sɔnni!