[1] ᑖᓂᓯ ᒫᑲ ᑫ ᐃᑌᐧᔭᕽ? ᒪᒋᐃᑎᐃᐧᓂᕽ ᒋ ᑭ ᑲ ᐃᑕᓯ ᐊᔮᓈᓇᐤ, ᑭᓭᐋᐧᑎᓯᐃᐧᐣ ᑭᑕ ᐁᐧᔪᒋᐸᔨᐠ?
[2] ᓇᒪᐃᐧᔭ ᑭᑕ ᑭ ᐃᐦᑭᐣ. ᑭᔮᓇᐤ ᑳ ᑭ ᓂᐱᔭᕽ ᒪᒋᐃᑎᐃᐧᓂᕽ ᐃᓯ, ᑖᓂᓯ ᑫ ᑭ ᐃᓯ ᑫᔮᐱᐨ ᐁᑯᑕ ᐱᒫᑎᓯᔭᕽ?
[3] ᐊᐦᐳ ᒋ ᑭ ᐊᐧᓀᔨᑌᓈᓇᐤ ᑲᐦᑭᔭᐤ ᑭᔮᓇᐤ ᑳ ᑭ ᐸᑊᑕᐃᓯᐃᐧᐃᑲᐃᐧᔭᕽ ᙭ ᒋᓴᐢ ᐃᓯ, ᐅ ᓂᐳᐃᐧᓂᕽ ᑭ ᑭ ᐃᓯ ᐹᑊᑕᐃᓯᐃᐧᐃᑲᐃᐧᓈᓇᐤ?
[4] ᐁᑯᓯ ᒫᑲ ᑭ ᑭ ᐊᓯᒋ ᓇᐃᓂᑲᐃᐧᓈᓇᐤ ᐁᐊᐧᑯ ᐹᑊᑕᐃᓯᐃᐧᐃᐧᐣ ᐅᐦᒋ ᓂᐳᐃᐧᓂᕽ: ᑖᐱᐢᑯᐨ ᙭ ᑳ ᑭ ᐋᐧᓂᐢᑳᓂᐦᐟ ᓂᐳᐃᐧᓂᕽ ᐅᐦᒋ ᐅ ᑭᐢᑌᔨᑖᑯᓯᐃᐧᓂᔨᕽ ᐁᐧᔪᑖᐃᐧᕽ, ᐁᑯᓯ ᑭᔮᓇᐤ ᒥᓇ ᑭᑕ ᐱᒧᐦᑌᔭᕽ ᐅᐢᑭ ᐱᒫᑎᓯᐃᐧᓂᕽ.
[5] ᒋᑫᒫ ᑭᐢᐱᐣ ᑭ ᑭ ᑕᑯ ᐃᐧᒉᐋᐧᓇᐤ ᐁ ᐃᓯᓈᑳᐧᓂᔨᐠ ᐅ ᓂᐳᐃᐧᐣ, ᐁᑯᓯ ᒥᓇ ᑫ ᐃᓯ ᐊᔮᔭᕽ ᐁ ᐃᓯᓈᑲᐧᓂᔨᐠ ᐅᐟ ᐋᐱᓯᓯᓄᐃᐧᐣ ᐅᐦᒋ:
[6] ᐁ ᑭᐢᑫᔨᑕᒪᕽ ᐅᒪ, ᑲᔮᐢ ᑭᐟ ᐃᓯ ᐊᔨᓯᔨᓂᐃᐧᐃᐧᓂᓇᐤ ᐁ ᑭ ᒋᐢᑕᐦᐋᐢᑳᐧᒋᑳᓱᐟ ᑭᑭ ᐃᐧᔭ, ᐁ ᒥᔭᐃᐧᒪᑲᕽ ᒪᒋᐃᑎᐃᐧᐣ ᑭᑕ ᓇᒪ ᑕᑲᐧᕽ, ᐁᑯᓯ ᐁᑳ ᐊᔨᐊᐧᐠ ᑭᑕ ᑎᐯᔨᒥᑯᔭᕽ ᒪᒋᐃᑎᐃᐧᐣ;
[7] ᒋᑫᒫ ᐊᓇ ᑳ ᑭ ᓂᐱᐟ ᐸᐢᐱᐋᐤ ᒪᒋᐃᑎᐃᐧᓂᕽ ᐅᐦᒋ.
[8] ᒫᑲ ᑭᐢᐱᐣ ᐃᐧᒋ ᓂᐳᒫᔭᕽ ᙭, ᑭ ᑖᐯᐧᑌᓈᓇᐤ ᒥᓇ ᑭᑕ ᐃᐧᒋ ᐱᒫᑎᓯᒫᔭᕽ;
[9] ᐁ ᑭᐢᑫᔨᑕᒪᕽ ᙭ ᐁ ᑭ ᐊᐧᓂᐢᑳᓂᐦᐟ ᓂᐳᐃᐧᓂᕽ ᐅᐦᒋ ᓇᒪᐃᐧᔭ ᒥᓇ ᑭᑕ ᓂᐱᐤ; ᓇᒪᐃᐧᔭ ᐊᐊᐧᓯᒣ ᑎᐯᔨᒥᐠ ᓂᐳᐃᐧᐣ.
[10] ᒋᑫᒫ ᐊᓂᒪ ᓂᐳᐃᐧᐣ ᑳ ᑭ ᓂᐱᐟ, ᑭ ᓂᐱᐤ ᒪᒋᐃᑎᐃᐧᓂᕽ ᐃᓯ ᐯᔭᑳᐧᐤ: ᒫᑲ ᐱᒫᑎᓯᐃᐧᐣ ᑳ ᐱᒫᑎᓯᐟ, ᑭᓭᒪᓂᑐᕽ ᐃᓯ ᐱᒫᑎᓯᐤ.
[11] ᐁᑯᓯ ᐃᓯ ᑭᐢᑕᐋᐧᐤ ᐃᑕᑭᒥᓱᐠ ᐁ ᓂᐱᔦᐠ ᒪᒋᐃᑎᐃᐧᓂᕽ ᐃᓯ, ᒫᑲ ᐁ ᐱᒫᑎᓯᔦᐠ ᑭᓭᒪᓂᑐᕽ ᐃᓯ ᑭᑭ ᙭ ᒋᓴᐢ.
[12] ᐁᑳᐃᐧᔭ ᒫᑲ ᒪᒋᐃᑎᐃᐧᐣ ᑭᑕ ᐃᐧ ᑎᐯᔨᐦᒋᑫᒪᑲᐣ ᑭᔭᐃᐧᐋᐧᕽ ᑳ ᓂᐳᒪᑲᕽ, ᑭᑕ ᓇᓇᐃᑕᒣᐠ ᐁ ᐃᓯ ᒧᐢᑕᐁᐧᔨᑕᒧᒪᑲᕽ:
[13] ᐁᑳᐃᐧᔭ ᒥᓇ ᐸᑭᑎᓇᒧᐠ ᑳ ᑕᐦᑐ ᐸᐯᐢᑭᐢ ᐃᑖᐸᑕᑭ ᑭᔭᐃᐧᐋᐧᐊᐧ ᒪᒋᐃᑎᐃᐧᓂᕽ ᑖᐱᐢᑯᐨ ᐁᑳ ᑲᐧᔭᐢᑭᑖᑎᓯᐃᐧ ᐋᐸᒋᒋᑲᓇ; ᒫᑲ ᐸᑭᑎᓂᓱᐢᑖᕽ ᑭᓭᒪᓂᑐ, ᑖᐱᐢᑯᐨ ᐁ ᐱᒫᑎᓯᔦᐠ ᓂᐳᐃᐧᓂᕽ ᐅᐦᒋ, ᒥᓇ ᑳ ᑕᐦᑐ ᐸᐯᐢᑭᐢ ᐃᑖᐸᑕᐦᑭ ᑭᔭᐃᐧᐋᐧᐊᐧ ᑖᐱᐢᑯᐨ ᑲᐧᔭᐢᑭᑖᑎᓯᐃᐧ ᐋᐸᒋᒋᑲᓇ ᐸᑭᑎᓇᒫᕽ ᑭᓭᒪᓂᑐ.
[14] ᒋᑫᒫ ᒪᒋᐃᑎᐃᐧᐣ ᓇᒪᐃᐧᔭ ᑭ ᑲ ᑎᐯᔨᒥᑯᓈᐋᐧᐤ: ᐃᐧᔭ ᐁᑳ ᐅᔭᓱᐁᐧᐃᐧᓂᕽ ᐁ ᑎᐯᔨᑖᑯᓯᔦᐠ, ᒫᑲ ᑭᓭᐋᐧᑎᓯᐃᐧᓂᕽ ᐁ ᑎᐯᔨᑖᑯᓯᔦᐠ.
[15] ᑖᓂᓯ ᒫᑲ? ᑭ ᑲ ᐊᐧᓂᑐᑌᓈᓇᐤ ᒋ, ᒋᑫᒫ ᐁᑳ ᐅᔭᓱᐁᐧᐃᐧᓂᕽ ᐁ ᑎᐯᔨᑖᑯᓯᔭᕽ, ᒫᑲ ᑭᓭᐋᐧᑎᓯᐃᐧᓂᕽ ᐁ ᑎᐯᔨᑖᑯᓯᔭᕽ? ᓇᒪᐃᐧᔭ ᑭᑕ ᑭ ᐃᐦᑭᐣ.
[16] ᓇᒪ ᒋ ᑭ ᑭᐢᑫᔨᑌᓈᐋᐧᐤ, ᐊᓇ ᑳ ᐸᑭᑎᓂᓱᔦᐠ ᑖᐱᐢᑯᐨ ᐊᑐᐢᑫᔮᑲᓇᐠ ᑭᑕ ᐊᑎ ᓇᓇᐃᑕᐋᐧᔦᐠ, ᐁᐊᐧᑳᐧᓇ ᐁᐧᑕᑐᐢᑫᔮᑲᓂᒥᑯᔦᐠ ᐊᓇ ᑳ ᓇᓇᐃᑕᐋᐧᔦᐠ; ᑭᐢᐱᐣ ᒪᒋᐃᑎᐃᐧᐣ ᓂᐳᐃᐧᓂᕽ ᐃᓯ, ᐊᐦᐳ ᓈᓇᐃᑕᒧᐃᐧᐣ ᑲᐧᔭᐢᑭᑖᑎᓯᐃᐧᓂᕽ ᐃᓯ?
[17] ᒫᑲ ᑭᑕ ᑭ ᓇᓈᐢᑯᒥᐦᐟ ᑭᓭᒪᓂᑐ, ᐋᑕ, ᐁ ᑭ ᐅᐟ ᐊᑐᐢᑫᔮᑲᓂᒥᑯᔦᐠ ᒪᒋᐃᑎᐃᐧᐣ, ᑭ ᑭ ᓇᓇᐃᑌᓈᐋᐧᐤ ᑭ ᑌᐃᐋᐧᕽ ᐅᐦᒋ ᐊᓂᒪ ᐃᓯ ᑭᐢᑭᓄᐦᐊᒫᑐᐃᐧᐣ ᐃᑕ ᑳ ᑭ ᐃᓯ ᐸᑭᑎᓂᑲᐃᐧᔦᐠ;
[18] ᐁᑯᓯ ᐁ ᐃᓯ ᐸᐢᐱᐃᑲᐃᐧᔦᐠ ᐁᑳ ᒪᒋᐃᑎᐃᐧᐣ ᑭᑕ ᑎᐯᔨᒥᑯᔦᐠ, ᑭ ᑭ ᐊᑎ ᐅᐟ ᐊᑐᐢᑫᔮᑲᓂᒥᑯᓈᐋᐧᐤ ᑲᐧᔭᐢᑭᑖᑎᓯᐃᐧᐣ.
[19] ᐊᔨᓯᔨᓂᐊᐧᐠ ᑳ ᐃᓯ ᐱᑭᐢᑫᐧᒋᐠ ᓂᐟ ᐃᓯ ᐱᑭᐢᑳᐧᐣ ᒋᑫᒫ ᐁ ᓀᓱᐊᐧᕽ ᑭ ᐃᐧᔮᓯᐋᐧᐤ: ᒋᑫᒫ ᑳ ᑭ ᐃᓯ ᐸᑭᑎᓇᒣᑯᐸᐣ ᑳ ᑕᐦᑐ ᐸᐯᐢᑭᐢ ᐃᑖᐸᑕᑭ ᑭᔭᐃᐧᐋᐧᕽ ᐁ ᐅᐟ ᐊᑐᐢᑫᔮᑲᓂᒥᑯᔦᐠ ᐃᐧᓂᐅᐃᐧᐣ ᒥᓇ ᒪᒋᐃᑎᐃᐧᐣ ᒪᒋᐃᑎᐃᐧᓂᕽ ᐊᑎ, ᐁᑯᓯ ᐁᑲᐧ ᐸᑭᑎᓇᒧᐠ ᑳ ᑕᐦᑐ ᐸᐯᐢᑭᐢ ᐃᑖᐸᑕᑭ ᑭᔭᐃᐧᐋᐧᕽ ᑭᑕ ᐅᐟ ᐊᑐᐢᑫᔮᑲᓂᒥᑯᔦᐠ ᑲᐧᔭᐢᑭᑖᑎᓯᐃᐧᐣ ᑲᓈᑎᓯᐃᐧᓂᕽ ᐊᑎ.
[20] ᒋᑫᒫ ᒣᑳᐧᐨ ᐁ ᐅᐟ ᐊᑐᐢᑫᔮᑲᓂᒥᑯᔦᐠ ᒪᒋᐃᑎᐃᐧᐣ, ᑭ ᑭ ᑎᐯᔨᒥᓱᓈᐋᐧᐤ ᐃᐧᔭ ᑲᐧᔭᐢᑭᑖᑎᓯᐃᐧᓂᕽ ᐃᓯ.
[21] ᑫᑯ ᒥᓂᓯᐃᐧᐃᐧᐣ ᒫᑲ ᑳ ᐅᐦᑎᓇᒣᐠ ᐁᑯᐢᐱ ᐊᓂᐦᐃ ᐁᑲᐧ ᑳ ᓇᓀᐯᐃᐧᐃᑯᔦᐠ? ᒋᑫᒫ ᐁ ᐃᓯ ᑭᓯᐱ ᐊᔮᑭ ᐁᐊᐧᑯᓂ ᐁᐊᐧᑯ ᓂᐳᐃᐧᐣ.
[22] ᒫᑲ ᐁᑲᐧ ᐁ ᑎᐯᔨᒥᓱᐃᑲᐃᐧᔦᐠ ᒪᒋᐃᑎᐃᐧᓂᕽ ᐃᓯ, ᒥᓇ ᐁ ᐅᐟ ᐊᑐᐢᑫᔮᑲᓂᒥᑯᔦᐠ ᑭᓭᒪᓂᑐ, ᑭᐟ ᐊᔮᓈᐋᐧᐤ ᑭ ᒥᓂᓯᐃᐧᐃᐧᓂᐋᐧᐤ ᑲᓈᒋᐅᐃᐧᓂᕽ, ᒥᓇ ᐁ ᑭᓯᐱ ᐊᔮᐠ ᐁᐊᐧᑯ ᑳᑭᑫ ᐱᒫᑎᓯᐃᐧᐣ.
[23] ᒋᑫᒫ ᐁ ᐃᓯ ᑭᐢᐱᓇᒋᑫᒪᑲᕽ ᒪᒋᐃᑎᐃᐧᐣ ᐁᐊᐧᑯ ᓂᐳᐃᐧᐣ; ᒫᑲ ᐅ ᒧᐦᒋ ᒣᑭᐃᐧᐣ ᑭᓭᒪᓂᑐ ᐁᐊᐧᑯ ᑳᑭᑫ ᐱᒫᑎᓯᐃᐧᐣ ᙭ ᒋᓴᐢ ᑳ ᑎᐯᔨᒥᑯᔭᕽ ᐅᐦᒋ.