[1] ᐁᑯᓯ ᒫᑲ ᓇᒪᐃᐧᔭ ᑭᑕ ᑭ ᑭᐧᑕᐃᐧ ᐃᑌᐧᔭᐣ, ᐋ ᐊᔨᓯᔨᓂᐤ, ᐱᑯ ᐊᐃᐧᔭᐠ ᑭᔭ ᑳ ᐅᔭᓱᐁᐧᔭᐣ: ᒋᑫᒫ ᐃᑕ ᑳ ᐅᔭᓱᐋᐧᑕᐟ ᑯᑕᐠ, ᑭ ᓈᓂᐳᒥᓱᐣ; ᒋᑫᒫ ᑭᔭ ᑳ ᐅᔭᓱᐁᐧᔭᐣ ᐁᑯᓯ ᑭᐢᑕ ᐁᑐᑕᒪᐣ.
[2] ᐁᑯᓯ ᑭ ᑭᐢᑫᔨᑌᓈᓇᐤ ᐅᔭᓱᐁᐧᐃᐧᐣ ᑭᓭᒪᓂᑐ ᑖᐯᐧᐃᐧᓂᕽ ᐁ ᐃᑕᐢᑌᔨᐠ ᐁ ᐃᑕᓱᐋᐧᑖᐟ ᐊᓂᐦᐃ ᐁᑯᓯ ᑳ ᐃᑐᑕᒥᔨᐟ.
[3] ᐅᒥᓯ ᒋ ᒫᑲ ᑭᐟ ᐃᑕᑭᒋᑳᐣ, ᐋ ᐊᔨᓯᔨᓂᐤ, ᑳ ᐅᔭᓱᐋᐧᑕᒋᐠ ᐊᓂᑭ ᐁᑯᑐᐊᐧ ᑳ ᐃᑐᑕᐦᑭᐠ, ᐁᑯᓯ ᒫᑲ ᑭᐢᑕ ᑳ ᐃᑐᑕᒪᐣ, ᑭᑕ ᑭ ᑕᐸᓯᑖᐊᐧᐟ ᐅᔭᓱᐁᐧᐃᐧᐣ ᑭᓭᒪᓂᑐ?
[4] ᐊᐦᐳ ᒋ ᑭᐟ ᐋᑕᐁᐧᔨᑕᒫᐧᐣ ᐁ ᐃᓯ ᐁᐧᔪᑕᓂᔨᐠ ᐅ ᒥᔮᐧᑎᓯᐃᐧᐣ ᒥᓇ ᐅ ᓯᐯᔨᑕᒧᐃᐧᐣ, ᐁᑳ ᐁ ᑭᐢᑫᔨᑕᒪᐣ ᐅ ᒥᔮᐧᑎᓯᐃᐧᐣ ᑭᓭᒪᓂᑐ ᐁ ᑭᐢᑭᓄᑕᐃᑯᔭᐣ ᑭᑕ ᑫᐧᐢᑭᐱᒫᑎᓯᔭᐣ?
[5] ᒫᑲ ᐁ ᐃᓯ ᒪᐢᑲᐋᐧᐠ ᒥᓇ ᐁᑳ ᐁ ᑫᐧᐢᑳᑎᓯᒪᑲᕽ ᑭᑌᐦ ᑭ ᒫᐊᐧᒋᑕᒫᓱᐣ ᑭᓯᐋᐧᓯᐃᐧᐣ ᑭᓯᐋᐧᓯᐃᐧᓂ ᑭᓯᑳᐤ ᐅᑎᐦᒋᐸᔨᑭ ᒥᓇ ᓄᑳᐧᓂᔨᑭ ᑳ ᑲᐧᔭᐢᑲᐧᓂᔨᐠ ᐅᔭᓱᐁᐧᐃᐧᐣ ᑭᓭᒪᓂᑐ;
[6] ᐊᓇ ᑫ ᒥᔮᐟ ᑲᐦᑭᔭᐤ ᐊᔨᓯᔨᓂᐊᐧ ᐁ ᐃᓯ ᑲᐢᑭᑕᒫᑯᔨᐟ ᐅᐟ ᐃᓯᐦᒋᑫᐃᐧᓂᔨᐊᐧ:
[7] ᐊᓂᐦᐃ ᐁ ᓯᐯᔨᑕᒥᔨᐟ ᒥᔪ ᑐᑕᒧᐃᐧᓂᕽ ᑳ ᓇᑐᓇᒥᔨᐟ ᑭᐢᑌᔨᑖᑯᓯᐃᐧᐣ ᒥᓇ ᑭᐦᒑᔨᐃᐧᐃᐧᐣ ᒥᓇ ᐁᑳ ᑭᑕ ᓂᓯᐊᐧᓈᒋᐦᐅᕽ, ᑭᑕ ᒥᔮᐟ ᑳᑭᑫ ᐱᒫᑎᓯᐃᐧᐣ:
[8] ᒫᑲ ᐊᓂᐦᐃ ᑳ ᐋᔨᒥᓯᔨᐟ, ᒥᓇ ᐁᑳ ᑳ ᓇᓇᐃᑕᒥᔨᐟ ᑖᐯᐧᐃᐧᐣ, ᒫᑲ ᑳ ᓇᓇᐃᑕᒥᔨᐟ ᒪᒋ ᐃᓯᐁᐧᐱᓯᐃᐧᐣ, ᑭᑕ ᐊᔮᔨᐟ ᑭᓯᐋᐧᓯᐃᐧᐣ ᒥᓇ ᑭᓯᐢᑖᑯᐃᐧᐣ,
[9] ᐋᔨᒥᓯᐃᐧᐣ ᒥᓇ ᑯᑕᑭᑖᐃᐧᐣ, ᑲᐦᑭᔭᐤ ᐅᐟ ᐊᐦᒑᐦᑲᐧ ᐊᔨᓯᔨᓂᐤ ᑳ ᐊᑐᐢᑳᑕᕽ ᒪᒋᑎᐃᐧᐣ, ᑳ ᒍᐃᐃᐧᐟ ᓂᑳᐣ ᒥᓇ ᐊᓇ ᑲᕒᐃᐠ;
[10] ᒫᑲ ᑭᐢᑌᔨᑖᑯᓯᐃᐧᐣ ᒥᓇ ᑭᐦᒑᔨᐃᐧᐃᐧᐣ ᒥᓇ ᐯᔭᑕᑫᔨᒧᐃᐧᐣ ᑲᐦᑭᔭᐤ ᐊᔨᓯᔨᓂᐤ ᑳ ᐊᑐᐢᑳᑕᕽ ᒥᔪ ᑫᑲᐧᐩ, ᑳ ᒍᐃᐃᐧᐟ ᓂᑳᐣ, ᐁᑯᓯ ᒥᓇ ᐊᓇ ᑲᕒᐃᐠ:
[11] ᒋᑫᒫ ᓇᒪᐃᐧᔭ ᐊᐃᐧᔭ ᑭᓭᒪᓂᑐ ᓇᐊᐧᓱ ᑭᐢᑌᔨᒣᐤ.
[12] ᒋᑫᒫ ᑕᐦᑐ ᑳ ᑭ ᒪᒋᑐᑕᑭᐠ ᐁᑳ ᐅᔭᓱᐁᐧᐃᐧᐣ ᐁ ᐊᔮᒋᐠ ᑭᑕ ᓂᓯᐊᐧᓈᑎᓯᐊᐧᐠ ᐁᑳ ᐅᔭᓱᐁᐧᐃᐧᐣ ᐁ ᐊᔮᒋᐠ: ᒥᓇ ᑕᐦᑐ ᐁ ᑭ ᒪᒋᑐᑕᑭᐠ ᐁ ᐊᔮᒋᐠ ᐅᔭᓱᐁᐧᐃᐧᐣ ᑭᑕ ᐅᔭᓱᐋᐧᑎᑲᐧᐠ ᐅᔭᓯᐁᐧᐃᐧᐣ;
[13] ᒋᑫᒫ ᓇᒪᐃᐧᔭ ᐊᓂᑭ ᑳ ᐯᐦᑕᐦᑭᐠ ᐅᔭᓱᐁᐧᐃᐧᐣ ᑳ ᑲᐧᔭᐢᑭᑖᑎᓯᐊᐧᑭᒥᐦᒋᐠ ᐁ ᐃᓯ ᑭᑖᐸᑕᕽ ᑭᓭᒪᓂᑐ, ᒫᑲ ᑳ ᐃᑐᑕᐦᑭᐠ ᐅᔭᓱᐁᐧᐃᐧᐣ ᑭᑕ ᑲᐧᔭᐢᑭᑖᑎᓯᐊᐧᑭᒫᐊᐧᐠ:
[14] ᒋᑫᒫ ᐃᐢᐱ ᒉᐣᑕᐃᓬᐊᐠ ᐁᑳ ᑳ ᐊᔮᒋᐠ ᐅᔭᓱᐁᐧᐃᐧᐣ ᐁᑐᑕᑳᐧᐃᐧ ᐃᐧᔭᐋᐧᐤ ᑎᐱᔭᐤ ᐅᐦᒋ ᐊᓂᐦᐃ ᐅᔭᓱᐁᐧᐃᐧᓂᕽ ᑳ ᐊᔮᑭ, ᐅᑭ ᐋᑕ ᐁᑳ ᐁ ᐊᔮᒋᐠ ᐅᔭᓱᐁᐧᐃᐧᐣ, ᐃᐧᔭᐋᐧᐤ ᐅᔭᓱᐋᐧᑎᓱᐊᐧᐠ;
[15] ᐃᐧᔭ ᐁ ᐋᐧᐸᐦᑕᐦᐃᐁᐧᒋᐠ ᐁ ᐊᑐᐢᑫᒪᑲᓂᔨᐠ ᐅᔭᓱᐁᐧᐃᐧᐣ ᑳ ᒪᓯᓇᐃᑳᑌᔨᐠ ᐅᑌᐦᐃᐋᐧᕽ, ᐅ ᑭᐢᑫᔨᑕᒫᐃᐧᓂᐋᐧᐊᐧ ᐁ ᐋᒋᒧᐢᑖᑯᒋᐠ, ᒥᓇ ᐅ ᒥᑐᓀᔨᒋᑲᓂᐋᐧᐊᐧ ᒫᒥᐢᑯᐨ ᐁ ᒪᒥᓯᒥᑯᒋᐠ ᐊᐦᐳ ᐁ ᑲᐧᔭᐢᑯᐢᑕᒫᑯᒋᐠ;
[16] ᐊᓂᒪ ᑭᓯᑳᐤ ᐅᑎᐦᒋᐸᔨᑭ ᐃᑕ ᑭᓭᒪᓂᑐ ᑫ ᐅᔭᓱᐋᐧᑕᒫᐧᐟ ᐅ ᑭᒧᒋ ᐃᓯᐦᒋᑫᐃᐧᓂᔨᐊᐧ ᐊᔨᓯᔨᓂᐊᐧ, ᐁ ᐃᑕᐢᑌᐠ ᓂ ᒥᔮᐧᒋᒧᐃᐧᐣ, ᒋᓴᐢ ᙭ ᐅᐦᒋ.
[17] ᒫᑲ ᑭᐢᐱᐣ ᐅ ᐃᐧᔪᐃᐧᐣ ᒍ ᑭᐟ ᐊᔮᐣ, ᒥᓇ ᑭ ᑭᑎᓯᒧᐣ ᐅᔭᓱᐁᐧᐃᐧᐣ, ᒥᓇ ᑭ ᒪᒥᒋᒧᐣ ᑭᓭᒪᓂᑐ ᐅᐦᒋ,
[18] ᒥᓇ ᑭ ᑭᐢᑫᔨᑕᒫᐧᐣ ᐅᐟ ᐃᓯ ᓇᑕᐁᐧᔨᑕᒧᐃᐧᐣ, ᒥᓇ ᑭ ᓂᓯᑕᐃᐧᓀᐣ ᐊᓂᐦᐃ ᑳ ᒥᔮᐧᓯᑭ, ᐃᐧᔭ ᐁ ᑭᐢᑭᓄᐦᐊᒫᑲᐃᐧᔭᐣ ᐅᔭᓱᐁᐧᐃᐧᓂᕽ ᐅᐦᒋ,
[19] ᒥᓇ ᐁ ᑌᐸᑫᔨᒧᔭᐣ ᑭᔭ ᐁ ᑲᐢᑭᑖᔭᐣ ᑭᑕ ᑭᐢᑭᓄᑕᐊᐟ ᐁᑳ ᑳ ᐋᐧᐱᐟ, ᐁ ᐋᐧᐢᑌᓇᒪᐊᐧᒋᐠ ᐊᓂᑭ ᐊᐧᓂᑎᐱᐢᑳᕽ ᑳ ᐊᔮᒋᐠ,
[20] ᐁ ᑲᑫᐢᑭᒪᒋᐠ ᐁᑳ ᑳ ᐃᔨᓂᓯᒋᐠ, ᐁ ᑭᐢᑭᓄᐦᐊᒫᐊᐧᒋᐠ ᐅᐢᑲᐋᐧᓯᓴᐠ, ᐁ ᐊᔮᔭᐣ ᐅᔭᓱᐁᐧᐃᐧᓂᕽ ᐁ ᑭᐢᑭᓇᐋᐧᓯᓈᑲᐧᕽ ᑭᐢᑫᔨᑕᒧᐃᐧᐣ ᒥᓇ ᑖᐯᐧᐃᐧᐣ;
[21] ᑭᔭ ᒫᑲ ᑳ ᑭᐢᑭᓄᐦᐊᒫᐊᐧᐟ ᑯᑕᐠ, ᓇᒪ ᒋ ᑭ ᑭᐢᑭᓄᐦᐊᒫᓱᐣ? ᑭᔭ ᑳ ᐃᓯ ᐃᐧᐦᑕᒪᐊᐧᐟ ᐊᔨᓯᔨᓂᐤ ᐁᑳ ᑭᑕ ᑭᒧᑎᐟ, ᑭ ᑭᒧᑎᐣ ᒋ ᑭᔭ?
[22] ᑭᔭ ᑳ ᐃᑌᐧᔭᐣ ᐊᔨᓯᔨᓂᐤ ᐁᑳ ᑭᑕ ᐃᑐᑕᕽ ᐱᓯᑳᐧᑎᓯᐃᐧᐣ, ᑭᐟ ᐃᑐᑌᐣ ᒋ ᑭᔭ ᐱᓯᑳᐧᑎᓯᐃᐧᐣ? ᑭᔭ ᑳ ᐸᑳᐧᑕᒋᐠ ᒪᓂᑐᑳᓇᐠ, ᑭ ᒪᓂᐊᐧᑖᑕᒫᐧᐣ ᒋ ᐅᐟ ᐊᔭᒥᐦᐁᐃᐧᑲᒥᑯᐋᐧᐊᐧ?
[23] ᑭᔭ ᑳ ᒪᒥᒋᒧᔭᐣ ᐅᔭᓱᐁᐧᐃᐧᐣ ᐅᐦᒋ, ᐁ ᐱᑯᓇᒪᐣ ᐅᔭᓱᐁᐧᐃᐧᐣ ᑭ ᐱᐁᐧᔨᑖᑯᐋᐤ ᒋ ᑭᓭᒪᓂᑐ?
[24] ᒋᑫᒫ ᐅ ᐃᐧᔪᐃᐧᐣ ᑭᓭᒪᓂᑐ ᐹᐢᑖᒧᐃᐧ ᐱᑭᐢᑳᐧᑕᒫᐧᐣ ᒣᑲᐧ ᒉᐣᑕᐃᓬᐃᓈᕽ ᑭᔭᐋᐧᐤ ᐅᐦᒋ, ᑖᐱᐢᑯᐨ ᑳ ᐃᑕᓯᓇᐦᐃᑳᑌᐠ.
[25] ᒋᑫᒫ ᓴᕒᑲᑦᓴᐃᓯᐃᐧᐃᐧᐣ ᑖᐯᐧ ᐋᐸᑕᐣ ᑭᐢᐱᐣ ᑭᐟ ᐃᑐᑌᐣ ᐅᔭᓱᐁᐧᐃᐧᐣ: ᒫᑲ ᑭᐢᐱᐣ ᑭ ᐱᑯᓀᐣ ᐅᔭᓱᐁᐧᐃᐧᐣ, ᑭ ᓴᕒᑲᑦᓴᐃᓯᐃᐧᐃᐧᐣ ᐃᓯ ᐊᔮᐤ ᑖᐱᐢᑯᐨ ᐁᑳ ᐁ ᓴᕒᑲᑦᓴᐃᓯᐃᐧᔭᐣ.
[26] ᑭᐢᐱᐣ ᒫᑲ ᐁᑳ ᑳ ᓴᕒᑲᑦᓴᐃᓯᐃᐧᐟ ᑲᓇᐁᐧᔨᐦᑕᐦᑭ ᐃᑕᐢᒋᑫᐃᐧᓇ ᐅᔭᓱᐁᐧᐃᐧᓂᕽ, ᓇᒪ ᒋ ᐁᑳ ᑳ ᓴᕒᑲᑦᓴᐃᓯᐃᐧᐟ ᑭᑕ ᐃᑕᑭᑕᒫᐧᐣ ᑖᐱᐢᑯᐨ ᐁ ᓴᕒᑲᑦᓴᐃᓯᐃᐧᐟ?
[27] ᓇᒪ ᒋ ᒥᓇ ᐊᓂᒪ ᓴᕒᑲᑦᓴᐃᓯᐃᐧᐃᐧᐣ ᑳ ᐃᓯᐃᑯᐃᐧᓯᕽ, ᑭᐢᐱᐣ ᑎᐱᑐᑕᒧᒪᑲᑭ ᐅᔭᓱᐁᐧᐃᐧᐣ, ᑭ ᑲ ᐅᔭᓱᐋᐧᑎᑯᐣ ᑭᔭᐣ ᐋᑕ ᐁ ᐊᔮᔭᐣ ᒪᓯᓇᐦᐃᑲᐣ ᒥᓇ ᐅᔭᓱᐁᐧᐃᐧᐣ ᑳ ᐱᑯᓇᒪᐣ ᐅᔭᓯᐁᐧᐃᐧᐣ?
[28] ᒋᑭᒫ ᓇᒪᔦᐤ ᐊᓇ ᒍ, ᑌᐱᔮᕽ ᐊᐧᐢᑭᐨ ᑳ ᐁᑯᑐᐃᐧᐃᐧᐟ ᒥᓇ ᓇᒪᔦᐤ ᐊᓂᒪ ᓴᕒᑲᑦᓴᐃᓯᐃᐧᐃᐧᐣ, ᐊᐧᐢᑭᐨ ᐃᐧᔮᓯᕽ ᑳ ᐊᔮᐠ:
[29] ᒫᑲ ᐁᐊᐧᑯ ᐊᓇ ᒍ, ᑳ ᐁᑯᑐᐃᐧᐃᐧᐟ ᐱᒑᔨᕽ; ᒥᓇ ᓴᕒᑲᑦᓴᐃᓯᐃᐧᐃᐧᐣ ᐁᐊᐧᑯ ᐊᓂᒪ ᑳ ᐊᔮᐠ ᒥᑌᐃᕽ, ᐊᐦᒑᐦᑯᕽ, ᓇᒪᐃᐧᔭ ᒪᓯᓇᐦᐃᑲᓂᕽ; ᑳ ᒪᒥᒋᑕᒥᕽ ᓇᒪᐃᐧᔭ ᐊᔨᓯᔨᓂᕽ ᐅᐦᒋ, ᒫᑲ ᑭᓭᒪᓂᑐ ᐅᐦᒋ.