[1] ᑭᔮᓇᐤ ᒫᑲ ᑳ ᒪᐢᑲᐃᐧᓯᔭᕽ ᑭ ᑲ ᓇᔭᑕᒫᐧᑖᓇᐤ ᐅ ᓀᓱᐋᐧᑎᓯᐃᐧᓂᐋᐧᐊᐧ ᐊᓂᑭ ᐁᑳ ᑳ ᒪᐢᑲᐃᐧᓯᒋᐠ, ᐁᑳ ᒫᑲ ᑭᔮᓇᐤ ᑭᑕ ᓇᐦᐃᔭᐁᐧᐃᓱᔭᕽ.
[2] ᑭᔮᑦ ᑲᐦᑭᔭᐤ ᑳ ᐃᑕᓯᔭᕽ ᑭ ᑲ ᐃᐧ ᓇᐦᐃᔭᐁᐧᐋᓇᐤ ᑭᒋ ᐊᔨᓯᔨᓂᓇᐤ ᑳ ᒥᔮᐧᓯᓂᔨᐠ ᐃᓯ, ᑭᑕ ᑭᐢᑭᓄᐦᐊᒫᑯᐃᐧᓯᐟ.
[3] ᒋᑫᒫ ᙭ ᒥᓇ ᓇᒪᐃᐧᔭ ᑭ ᓇᐦᐃᔭᐁᐧᐃᓱ ᐃᐧᔭ; ᒫᑲ, ᑳ ᐃᑕᓯᓇᐦᐃᑳᑌᐠ, ᐅ ᒪᒪᒋ ᐃᑌᐧᐃᐧᓂᐋᐧᐊᐧ ᐊᓂᑭ ᑳ ᒪᒋ ᐃᑎᐢᑭᐠ ᓂᔭ ᓂ ᑭ ᐸᑲᒥᐢᑳᑯᐣ.
[4] ᒋᑫᒫ ᑕᐦᑐ ᑫᑲᐧᔭ ᑲᔮᐢ ᑳ ᑭ ᒪᓯᓇᐃᑳᑌᑭ ᑭ ᒪᓯᓇᐃᑳᑌᐊᐧ ᑭᔮᓇᐤ ᑭᑕ ᑭᐢᑭᓄᐦᐊᒫᑯᔭᕽ, ᐁᑯᓯ ᓯᐯᔨᑕᒧᐃᐧᐣ ᒥᓇ ᒥᔪᑌᐁᐃᑯᐃᐧᐣ ᑭᐦᒋ ᒪᓯᓇᐦᐃᑫᐃᐧᓂᕽ ᐁ ᐅᐦᑎᓇᒪᕽ ᑭᑕ ᑭ ᐅᐦᒋ ᐊᔮᔭᕽ ᐊᐢᐯᔨᒧᐃᐧᐣ.
[5] ᐁᑲᐧ ᒫᑲ ᑭᓭᒪᓂᑐ ᑳ ᐅᐦᒋᐢᑕᒫᑫᐟ ᓯᐯᔨᑕᒧᐃᐧᐣ ᒥᓇ ᒥᔪᑌᐁᐃᐁᐧᐃᐧᐣ ᑭ ᑲ ᐃᐧ ᐸᑭᑌᔨᑕᒫᑯᐋᐧᐤ ᑭᑕ ᐯᔭᑯᑖᔦᐠ ᐁ ᐃᓯ ᒫᒥᑐᓀᔨᒥᑐᔦᐠ ᑖᐱᐢᑯᐨ ᙭ ᒋᓴᐢ:
[6] ᐯᔭᐠ ᐃᑌᔨᑕᒧᐃᐧᐣ ᒥᓇ ᐯᔭᐠ ᒥᑐᐣ ᐅᐦᒋ ᑭᑕ ᑭᐢᑕᑭᒫᔦᐠ ᐅ ᑭᓭᒪᓂᑐᒪ ᒥᓇ ᐅᑖᐃᐧᔭ ᑳ ᑎᐯᔨᒥᑯᔭᕽ ᒋᓴᐢ ᙭.
[7] ᐁᑯᓯ ᒫᑲ ᐅᑎᓂᑐᐠ, ᑖᐱᐢᑯᐨ ᙭ ᑳ ᑭ ᐃᓯ ᐅᑎᓂᑯᔦᐠ, ᐅ ᑭᐢᑕᑭᒥᑯᐃᐧᓂᕽ ᐃᓯ ᑭᓭᒪᓂᑐ.
[8] ᒋᑫᒫ ᓂᐟ ᐃᑖᐧᐣ ᙭ ᐁ ᑭ ᐊᑐᐢᑳᑕᕽ ᓴᕒᑲᑦᓴᐃᓯᐃᐧᐃᐧᐣ ᐅ ᑖᐯᐧᐃᐧᐣ ᑭᓭᒪᓂᑐ ᐅᐦᒋ, ᑭᑕ ᑎᐱᑐᑕᕽ ᐊᓱᑕᒫᑫᐃᐧᓇ ᑳ ᑭ ᒥᔨᐦᒋᐠ ᐅᑖᐃᐧᒫᐊᐧᐠ,
[9] ᒥᓇ ᒉᐣᑕᐃᓬᐊᐠ ᑭᑕ ᑭᐢᑕᑭᒫᒋᐠ ᑭᓭᒪᓂᑐᐊᐧ ᐅ ᑭᓭᐋᐧᑎᓯᐃᐧᓂᔨᐤ ᐅᐦᒋ; ᑳ ᐃᑕᓯᓇᐦᐃᑳᑌᐠ, ᐁᐊᐧᑯ ᐅᐦᒋ ᑭ ᑲ ᒪᒥᒋᒥᑎᐣ ᒣᑳᐧᐨ ᐃᑕ ᐁ ᐊᔮᒋᐠ ᒉᐣᑕᐃᓬᐊᐠ, ᒥᓇ ᓂ ᑲ ᓂᑲᒧᐢᑌᐣ ᑭ ᐃᐧᔪᐃᐧᐣ.
[10] ᒥᓇ ᒫᑲ ᐃᑌᐧᐤ, ᒪᒪᐦᑖᑯᓯᐠ ᑭᔭᐋᐧᐤ ᒉᐣᑕᐃᓬᐃᑎᐠ, ᑭᑭ ᐅᐟ ᐃᔨᓂᒪ.
[11] ᐁᑯᓯ ᒥᓇ, ᒪᒥᒋᒥᕽ ᑳ ᑎᐯᔨᐦᒋᑫᐟ, ᑭᔭᐋᐧᐤ ᒉᐣᑕᐃᓬᐃᑎᐠ, ᒥᓇ ᑭᔮᑦ ᑲᐦᑭᔭᐤ ᐊᔨᓯᔨᓂᐊᐧ ᑭᑕ ᒪᒥᒋᒥᐠ.
[12] ᒥᓇ ᒫᑲ, ᐊᐩᓵᔭ ᐃᑌᐧᐤ, ᑭᑕ ᐃᐦᑕᑲᐧᓂᔨᐤ ᐅᒉᐱᑭᐃᐧᐃᐧᐣ ᒉᓯ, ᐁᑯᓯ ᐊᓇ ᑫ ᐸᓯᑯᐟ ᑭᑕ ᑎᐯᔨᒫᐟ ᒉᐣᑕᐃᓬᐊ; ᐁᐊᐧᑯᓂ ᒉᐣᑕᐃᓬᐊᐠ ᑫ ᐊᐢᐯᔨᒧᑐᑕᐋᐧᒋᐠ.
[13] ᐁᑲᐧ ᒫᑲ ᑭᓭᒪᓂᑐ ᑳ ᐅᐦᒋᐢᑕᒫᑫᐟ ᐊᐢᐯᔨᒧᐃᐧᐣ ᑭ ᑲ ᐃᐧ ᒧᐢᑭᓀ ᒥᔨᑯᐋᐧᐤ ᑲᐦᑭᔭᐤ ᒪᒪᐦᑖᑯᓯᐃᐧᐣ ᒥᓇ ᐯᔭᑕᑫᔨᒧᐃᐧᐣ ᐁ ᑖᐯᐧᑕᒣᐠ, ᑭᑕ ᐁᐧᔪᒋ ᐊᔮᔦᐠ ᐊᐢᐯᔨᒧᐃᐧᐣ, ᐅ ᒪᐢᑲᐃᐧᓯᐃᐧᓂᕽ ᑳ ᑲᓈᑎᓯᐟ ᐊᐦᒑᕽ.
[14] ᐁᑯᓯ ᓂᔭ ᒥᓇ ᑭᐟ ᐃᓯ ᑫᒋᓈᐃᑎᓈᐋᐧᐤ, ᓂᒋᐋᐧᒥᑎᐠ, ᑭᔭᐋᐧᐤ ᒥᓇ ᐁ ᒧᐢᑭᓀᐢᑳᑯᔦᐠ ᒥᔮᐧᑎᓯᐃᐧᐣ, ᒥᓇ ᐁ ᒧᐢᑭᓀᔦᐠ ᑭᐢᑫᔨᑕᒧᐃᐧᐣ, ᐁ ᑲᐢᑭᑖᔦᐠ ᑭᑕ ᑲᑫᐢᑭᒥᑐᔦᐠ.
[15] ᒫᑲ ᒥᓇ ᑭᓵᐢᑕᐤ ᑭ ᓱᑫᔨᒧᑐᑖᑎᓈᐋᐧᐤ ᐁ ᒪᓯᓇᐦᐊᒫᑕᑯᐠ, ᐁ ᐃᐧ ᒥᐢᑲᐋᐧᓱᒥᑕᑯᐠ, ᒋᑫᒫ ᓂᓱᑲᒫᑯᐃᐧᐣ ᑳ ᒥᔨᐟ ᑭᓭᒪᓂᑐ,
[16] ᑭᑕ ᐊᔭᒥᐦᐁᐃᐧᔨᓂᐃᐧᔮᐣ ᙭ ᒋᓴᐢ ᐅᐦᒋ ᒉᐣᑕᐃᓬᐃᓈᕽ, ᐁ ᐊᑐᐢᑳᑕᒪᐧᐠ ᐅ ᒥᔮᐧᒋᒧᐃᐧᐣ ᑭᓭᒪᓂᑐ, ᐅ ᐸᑭᑎᓂᑯᐃᐧᓂᐋᐧᐤ ᒉᐣᑕᐃᓬᐊᐠ ᑭᑕ ᒥᔪ ᐅᑎᓂᑳᑌᔨᐠ, ᐁ ᑲᓈᒋᐃᑯᒋᐠ ᑳ ᑲᓈᑎᓯᔨᐟ ᐊᐦᒑᐦᑲᐧ.
[17] ᓂᐟ ᐊᔮᐣ ᒫᑲ ᐊᓂᒪ ᑳ ᐅᐦᒋ ᒪᒪᐦᑖᑯᒧᔮᐣ ᙭ ᒋᓴᐢ ᐃᓯ ᐊᓂᐦᐃ ᐅᐦᒋ ᑳ ᐊᔮᐟ ᑭᓭᒪᓂᑐ.
[18] ᓇᒪᐃᐧᔭ ᒫᑲ ᑭᑕ ᑭ ᑕᓯᑕᒫᐣ ᓈᐣᑕᐤ ᑫᑲᐧᔭ ᐱᑯ ᐊᓂᐦᐃ ᙭ ᑳ ᑭ ᐊᑐᐢᑳᑕᕽ ᓂᔭ ᐅᐦᒋ, ᑭᑕ ᐅᐦᒋ ᓇᓇᐦᐃᐦᑕᐦᑭᐠ ᒉᐣᑕᐃᓬᐊ, ᐱᑭᐢᑫᐧᐃᐧᐣ ᒥᓇ ᐊᑐᐢᑫᐃᐧᐣ ᐅᐦᒋ.
[19] ᐁ ᐃᓯ ᒪᐢᑲᐃᐧᓯᒪᑲᑭ ᑭᐢᑭᓇᐋᐧᒋ ᐋᐧᐸᐦᑕᐦᐃᐁᐧᐃᐧᓇ ᒥᓇ ᒪᒫᑖᐃᐧ ᐃᓯᐦᒋᑫᐃᐧᓇ ᐅ ᑲᐢᑭᐦᐁᐃᐧᓯᐃᐧᓂᕽ ᑳ ᑲᓈᑎᓯᐟ ᐊᐦᒑᕽ; ᐁᑯᓯ ᒉᕒᐅᓴᓬᐊᒥᕽ ᐅᐦᒋ, ᒥᓇ ᐋᐧᓴᑳᑦ ᐱᔨᐢ ᐃᓬᐃᕒᐃᑲᑦ ᐃᐢᑯ, ᒥᑐᓂ ᓂ ᑭ ᐋᐧᐃᐧᑌᐣ ᐅ ᒥᔮᐧᒋᒧᐃᐧᐣ ᙭;
[20] ᐁᐦᐁ, ᐁ ᑲᑫᐧ ᐃᑐᑕᒫᐣ ᑭᑕ ᐋᐧᐃᐧᑕᒫᐣ ᒥᔮᐧᒋᒧᐃᐧᐣ, ᓇᒪᐃᐧᔭ ᐃᑕ ᓵᓴᐩ ᐁ ᑭ ᐃᐧᔨᐦᐟ ᙭, ᐁᑳ ᑭᑕ ᐋᐧᐢᑳᐃᑫᔮᐣ ᐃᑕ ᑯᑕᐠ ᐊᔨᓯᔨᓂᐤ ᐁ ᑭ ᐅᔭᐢᒋᑫᐟ;
[21] ᒫᑲ, ᑳ ᐃᑕᓯᓇᐦᐃᑳᑌᐠ, ᑭᑕ ᐋᐧᐸᐦᑕᒪᐧᐠ, ᐊᓂᑭ ᐁᑳ ᐋᒋᒧᐃᐧᐣ ᑳ ᑭ ᐅᐦᒋ ᐅᑎᐦᑎᑯᒋᐠ, ᒥᓇ ᐊᓂᑭ ᐁᑳ ᑳ ᑭ ᐅᐦᒋ ᐯᐦᑕᐦᑭᐠ ᑭᑕ ᓂᓯᑐᐦᑕᒪᐧᐠ.
[22] ᐁᑯᓯ ᐅᒪ ᒥᓇ ᐁᑲᐧ ᒥᒉᑖᐧᐤ ᓂ ᑭᑎᓂᑲᐃᐧᐣ ᐁ ᐋᑕ ᑭ ᐃᐧ ᐯ ᓇᑕᐋᐧᐸᒥᑕᑯᐠ:
[23] ᒫᑲ ᐁᑲᐧ, ᐁᑳ ᓈᐣᑕᐤ ᐁ ᐊᔮᔮᐣ ᐅᑌ ᐃᑌᑫᐢᑲᒥᐠ, ᒥᓇ ᒥᐦᒉᐟ ᐊᐢᑭ ᐁᑲᐧ ᐁ ᓄᐦᑌ ᓇᑕᐋᐧᐸᒥᑕᑯᐠ,
[24] ᐱᑯ ᐃᔨᑯᕽ ᐊᓂᑕ ᐃᐢᐯᐣ ᐃᑐᐦᑌᔮᓂ (ᒋᑫᒫ ᓂᐟ ᐃᓯ ᐸᑯᓭᔨᒧᐣ ᑭᑕ ᐋᐧᐸᒥᑕᑯᐠ ᐊᑎ ᐃᑐᐦᑌᔮᓂ, ᒥᓇ ᑭᑕ ᓄᒪᑫ ᐃᐧᒉᐃᐧᔦᐠ ᐁᑯᑕ, ᑭᐢᐱᐣ ᐅᑎ ᐁᑳ ᓭᒫᐠ ᑌᐱ ᐃᐧᒉᐃᐧᑕᑳᐧᐃᐧ);
[25] ᒫᑲ ᐁᑲᐧ, ᓂᐟ ᐃᑖᐧᐣ, ᓂᐟ ᐃᑐᐦᑖᐣ ᒉᕒᐅᓴᓬᐊᒥᕽ, ᐁ ᐊᑐᐢᑲᐊᐧᑭᐠ ᐅᑲᓈᑎᓯᐊᐧᐠ.
[26] ᒋᑫᒫ ᑭ ᐃᓯ ᒥᔦᐧᔨᑕᒪᐧ ᐊᓂᑭ ᒫᓯᑖᓂᔭ ᒥᓇ ᐁᑳᔭ ᐅᐦᒋ ᑭᑕ ᒫᐊᐧᒋᐦᑭᑫᐢᑕᒪᐋᐧᒋᐠ ᐅᑭᑎᒫᑭᓯᐊᐧ ᒉᕒᐅᓴᓬᐊᒥᕽ ᑳ ᐊᔭᔨᐟ.
[27] ᒋᑫᒫ, ᑭ ᐃᓯ ᒣᔦᐧᔨᑕᒪᐧᐠ; ᒥᓴᐋᐧᐨ ᒫᑲ ᒪᓯᓇᐦᐊᒪᐁᐧᐊᐧᐠ. ᐃᐧᔭ ᑭᓵᐢᐱᓀ ᒉᐣᑕᐃᓬᐊᐠ ᑭ ᐸᑫᐧᓇᒪᐋᐧᐊᐧᐠ ᐊᐦᒑᐦᑯᐃᐧ ᑫᑲᐧᔭ ᑳ ᐊᔮᔨᐟ, ᐃᑕᐢᑌᐤ ᑭᑕ ᐅᒋᐢᑕᒪᐋᐧᒋᐠ ᐊᐢᑭᐃᐧ ᑫᑲᐧᔭ.
[28] ᐃᐢᐱ ᒫᑲ ᐅᒪ ᑭ ᑎᐱᑐᑕᒫᓂ, ᒥᓇ ᑭ ᑭᓯᑕᒪᐊᐧᑳᐧᐃᐧ ᐅᒪ ᒥᓂᓯᐃᐧᐃᐧᐣ, ᓂ ᑲ ᐊᑎ ᐃᑐᐦᑖᐣ ᐃᑕ ᑭᔭᐋᐧᐤ ᑳ ᐊᔮᔦᐠ ᐁᑯᓯ ᐱᔨᐢ ᐊᓂᑕ ᐃᐢᐯᐣ.
[29] ᓂ ᑭᐢᑫᔨᑌᐣ ᒫᑲ, ᐃᐢᐱ ᐅᑎᑎᑕᑳᐧᐃᐧ, ᓂ ᑲ ᐯ ᑭᑭᐣ ᐁ ᐃᓯ ᒫᒪᐁᐧᔨᑖᑲᐧᓂᔨᐠ ᐅ ᓴᐁᐧᔨᒋᑫᐃᐧᐣ ᙭.
[30] ᐁᑲᐧ ᒫᑲ ᑭ ᐸᑯᓭᔨᒥᑎᓈᐋᐧᐤ ᓂᒋᐋᐧᒥᑎᐠ, ᐁ ᐊᐢᐱᒧᔮᐣ ᑳ ᑎᐯᔨᒥᑯᔭᕽ ᒋᓴᐢ ᙭ ᒥᓇ ᐅ ᓵᑭᐦᐃᐁᐧᐃᐧᐣ ᐊᐦᒑᕽ, ᑭᑕ ᒫᒪᐃᐧ ᐃᐧᒋᐃᔦᐠ ᐁ ᐊᔭᒥᐦᐁᐢᑕᐋᐧᔦᐠ ᑭᓭᒪᓂᑐ ᓂᔭ ᐅᐦᒋ;
[31] ᑭᑕ ᐸᐢᐱᐃᑲᐃᐧᔮᐣ ᐊᓂᑭ ᒍᑎᔭᐃᕽ ᐁᑳ ᑳ ᑖᐯᐧᑕᐦᑭᐠ, ᒥᓇ ᒫᑲ ᓂᐟ ᐊᑐᐢᑫᐃᐧᐣ ᑳ ᐃᐧ ᐃᑐᑕᒫᐣ ᒉᕒᐅᓴᓬᐊᒥᕽ ᑭᑕ ᑭ ᓇᐦᐃᔭᐁᐧᐃᑯᒋᐠ ᐅᑲᓈᑎᓯᐊᐧᐠ;
[32] ᑭᑕ ᑭ ᐅᑎᑎᑕᑯᐠ ᒪᒪᐦᑖᑯᓯᐃᐧᓂᕽ ᐃᑌᔨᑕᑭ ᑭᓭᒪᓂᑐ, ᐁᑯᓯ ᐃᐧᒋ ᐊᔮᒥᑕᑳᐧᐃᐧ ᑭᑕ ᒥᐢᑲᒫᐣ ᐊᔦᐧᐱᐃᐧᐣ.
[33] ᐁᑲᐧ ᒫᑲ ᑭᓭᒪᓂᑐ ᑳ ᐅᐦᒋᐢᑕᒫᑫᐟ ᐯᔭᑕᑫᔨᒧᐃᐧᐣ ᑭ ᑲ ᐃᐧ ᐃᐧᒉᐃᐧᑯᐋᐧᐤ ᑲᐦᑭᔭᐤ. ᐋᒣᐣ.