[1] ᐹᓬ, ᐅᐟ ᐊᑐᐢᑫᔮᑲᓇ ᒋᓴᐢ ᙭, ᑳ ᑭ ᓇᑐᒥᐦᐟ ᑭᑕ ᐊᐹᐢᑎᓬᐃᐃᐧᐟ, ᐁ ᑭ ᐱᐢᑭᑕᐃᐦᐟ, ᑭᓭᒪᓂᑐ ᐅ ᒥᔮᐧᒋᒧᐃᐧᓂᕽ,
[2] ᑳ ᑭ ᐊᓱᑕᒫᑫᐟ ᑲᔮᐢ ᐅᑭᐢᑭᐁᐧᐦᐃᑫᒪ ᐅᐦᒋ ᑲᑖᒋ ᑭᐦᒋ ᒪᓯᓇᐦᐃᑫᐃᐧᓂᕽ,
[3] ᐃᑕ ᐁ ᐋᒋᒥᒥᐦᐟ ᐅᑯᓯᓴ, ᑳ ᑭ ᓂᐦᑖᐃᐧᑭᐟ ᐅᐟ ᐊᐋᐧᓯᒥᓴ ᑌᐱᐟ ᐅᐦᒋ ᐃᐧᔮᓯᐃᐧᐃᐧᓂᕽ, ᐅᑎ ᐃᓯ,
[4] ᑳ ᑭ ᐋᒋᒥᐦᐟ ᑭᑕ ᑭᓭᒪᓂᑐᐃᐧᑯᓯᓵᓂᐃᐧᐟ ᑭᑭ ᑲᐢᑭᐦᐁᐃᐧᓯᐃᐧᐣ, ᑲᓈᑎᓯᐃᐧ ᐊᐦᒑᕽ ᐁ ᐃᓯ ᐋᐧᐸᐦᑕᐦᐃᐁᐧᐟ, ᐋᐱᓯᓯᓄᐃᐧᐣ ᓂᐳᐃᐧᓂᕽ ᐅᐦᒋ; ᐊᓇ ᐅᑎ ᒋᓴᐢ ᙭ ᑳ ᑎᐯᔨᒥᑯᔭᕽ,
[5] ᐁᐊᐧᑯ ᑳ ᑭ ᒥᔨᑯᔮᕽ ᑭᓭᐋᐧᑎᓯᐃᐧᐣ ᒥᓇ ᐊᐸᐢᑎᓬᐃᐃᐧᐃᐧᐣ, ᑭᑕ ᓇᓇᐦᐃᐦᑕᐦᑭᐠ ᑖᐯᐧᔦᔨᑕᒧᐃᐧᐣ ᑲᐦᑭᔭᐤ ᐁ ᐃᑕᐢᑳᓀᓯᒋᐠ ᐊᔨᓯᔨᓂᐊᐧᐠ, ᐃᐧᔭ ᐅ ᐃᐧᔪᐃᐧᐣ ᐅᐦᒋ:
[6] ᐃᑕ ᑭᐢᑕᐋᐧᐤ ᑳ ᐊᓯᑕᑭᒋᑳᓱᔦᐠ, ᐁ ᓇᑐᒥᑲᐃᐧᔦᐠ ᒋᓴᐢ ᙭ ᑭᑕ ᐊᔮᐃᐧᑯᔦᐠ:
[7] ᑲᐦᑭᔭᐤ ᑭᔭᐋᐧᐤ ᕒᐅᒥᕽ ᑳ ᐊᔮᔦᐠ, ᑳ ᓵᑭᐦᐃᑯᔦᐠ ᑭᓭᒪᓂᑐ, ᑳ ᓇᑐᒥᑲᐃᐧᔦᐠ ᑭᑕ ᑲᓈᑎᓯᔦᐠ; ᑭᓭᐋᐧᑐᑖᑫᐃᐧᐣ ᒥᓇ ᐯᔭᑕᑫᔨᒧᐃᐧᐣ ᑭ ᑲ ᐃᐧ ᒥᔨᑯᐋᐧᐤ ᑭᓭᒪᓂᑐ ᑯᑖᐃᐧᓇᐤ ᒥᓇ ᑳ ᑎᐯᔨᒥᑯᔭᕽ ᒋᓴᐢ ᙭,
[8] ᓂᑳᐣ, ᓂ ᓇᓈᐢᑯᒫᐤ ᓂ ᑭᓭᒪᓂᑐᑦ ᐃᐧᔭ ᐅᐦᒋ ᒋᓴᐢ ᙭ ᑭᔭᐋᐧᐤ ᐁ ᓇᓈᐢᑯᒧᐢᑕᒫᑕᑯᐠ ᑭ ᑖᐯᐧᔦᔨᑕᒧᐃᐧᓂᐋᐧᐤ ᐁ ᐃᐧᒋᑳᑌᐠ ᒥᓯᐁᐧᐢᑲᒥᐠ.
[9] ᒋᑫᒫ ᑭᓭᒪᓂᑐ ᓂ ᑭᐢᑫᔨᒥᐠ, ᐊᓇ ᑳ ᐊᑐᐢᑲᐊᐧᐠ ᓂᐟ ᐊᐦᒑᑯᕽ ᐅ ᒥᔮᐧᒋᒧᐃᐧᓂᔨᕽ ᐅᑯᓯᓴ, ᐁ ᐃᓯ ᐁᑳ ᐃᐧᑳᐨ ᐳᓂ ᒫᒥᐢᑯᒥᑕᑯᐠ.
[10] ᑳᑭᑫ ᓂᐟ ᐊᔭᒥᐦᐋᐃᐧᓂᕽ ᐁ ᓇᑐᑕᒫᐣ, ᑭᐢᐱ ᓈᐣᑕᐤ ᐃᓯ ᐁᑲᐧ ᑭᑕ ᑭ ᐱᔨᐢ ᓇᓇᐃᐸᔨᐃᑯᔮᐣ ᐃᑌᔨᑕᑭ ᑭᓭᒪᓂᑐ ᑭᑕ ᑭ ᐅᑎᑎᑕᑯᐠ.
[11] ᒋᑫᒫ ᑭ ᓄᐦᑌ ᐋᐧᐸᒥᑎᓈᐋᐧᐤ, ᑭᑕ ᑭ ᐊᓱᐃᐧᒥᔨᑕᑯᐠ ᓈᐣᑕᐤ ᐊᐦᒑᐦᑯᐃᐧ ᒣᑭᐃᐧᐣ, ᑭᑕ ᐅᐦᒋ ᓱᑭᑳᐸᐃᐧᔦᐠ;
[12] ᐁᑯᓯ ᐃᓯ, ᑭᑕ ᑭ ᑭᑭ ᑭᔭᐋᐧᐤ ᒥᔪᑌᐁᐢᑲᐃᐧᔦᐠ, ᑖᐱᐢᑯᐨ ᑭ ᑖᐯᐧᔦᔨᑕᒧᐃᐧᓂᓇᐤ ᐅᐦᒋ, ᑭᔭᐋᐧᐤ ᒥᓇ ᓂᔭᓈᐣ.
[13] ᒥᓇ ᓇᒪᐃᐧᔭ ᑭ ᓇᑕᐁᐧᔨᒥᑎᓈᐋᐧᐤ ᑭᑕ ᐁᑳ ᑭᐢᑫᔨᑕᒣᐠ, ᓂᒋᐋᐧᒥᑎᐠ, ᒥᒉᑖᐧᐤ ᓂ ᑭ ᐋᑕ ᐃᑌᔨᑌᐣ ᑭᑕ ᐯ ᓇᑕᐋᐧᐸᒥᑕᑯᐠ (ᐁᑯᓯ ᓂ ᑭ ᐅᑕᒥᐃᑲᐃᐧᐣ ᐊᓄᐦᐨ ᐃᐢᑯ), ᑭᑕ ᑭ ᐊᔮᔮᐣ ᒥᓂᓯᐃᐧᐃᐧᐣ ᑭᔭᐋᐧᐤ ᒥᓇ ᐅᐦᒋ, ᑖᐱᐢᑯᐨ ᒥᓇ ᑯᑕᑲᐠ ᒉᐣᑕᐃᓬᐊᐠ.
[14] ᐃᑕᐢᑌᐤ ᑭᑕ ᐅᐦᒋᐢᑕᒪᐊᐧᑭᐠ ᑳᕒᐃᑲᐠ ᒥᓇ ᐹᕒᐯᕒᐃᔭᓇᐠ, ᑳ ᐃᔨᓂᓯᒋᐠ ᒥᓇ ᐁᑳ ᑳ ᐃᔨᓂᓯᒋᐠ
[15] ᐁᑯᓯ, ᐁ ᐃᓯ ᑲᐢᑭᑖᔮᐣ, ᓇᒪᐃᐧᔭ ᓂ ᐹᐧᐢᑕᐁᐧᔨᑌᐣ ᑭᑕ ᑲᑫᐢᑭᒥᑕᑯᐠ ᒥᔮᐧᒋᒧᐃᐧᐣ ᑭᔭᐋᐧᐤ ᒥᓇ ᕒᐅᑦ ᑳ ᐊᔮᔦᐠ.
[16] ᒋᑫᒫ ᓇᒪᐃᐧᔮ ᓂ ᓇᓀᐯᐃᐧᐃᑯᐣ ᒥᔮᐧᒋᒧᐃᐧᐣ: ᐃᐧᔭ ᐁᐊᐧᑫᐧᔨᐤ ᐅ ᒪᐢᑲᐃᐧᓯᐃᐧᐣ ᑭᓭᒪᓂᑐ ᐱᒫᒋᐦᐃᐁᐧᐃᐧᓂᕽ ᐃᓯ ᑲᐦᑭᔭᐤ ᐊᐃᐧᔭᐠ ᑳ ᑖᐯᐧᑕᕽ; ᑳ ᒍᐃᐃᐧᐟ ᓂᑳᐣ, ᐁᑯᓯ ᒥᓇ ᐊᓇ ᑲᕒᐃᐠ.
[17] ᒋᑫᒫ ᐁᑯᑕ ᑭᓭᒪᓂᑐ ᐅ ᑲᐧᔭᐢᑭᑖᑎᓯᐃᐧᐣ ᐁ ᑭᐢᑫᔨᑖᑲᐧᓂᔨᐠ ᑖᐯᐧᔦᔨᑕᒧᐃᐧᐣ ᐅᐦᒋ ᒥᓇ ᑖᐯᐧᔦᔨᑕᒧᐃᐧᓂᕽ ᐃᓯ: ᐁ ᐃᑕᓯᓇᐦᐃᑳᑌᐠ, ᒫᑲ ᐅᑲᐧᔭᐢᑭᑖᑎᓯᐤ ᑖᐯᐧᔦᔨᑕᒧᐃᐧᐣ ᑭᑕ ᐅᐦᒋ ᐱᒫᑎᓯᐤ.
[18] ᒋᑫᒫ ᐅ ᑭᓯᐋᐧᓯᐃᐧᐣ ᑭᓭᒪᓂᑐ ᑭᐢᑫᔨᑖᑲᐧᓂᔨᐤ ᑭᐦᒋ ᑭᓯᑯᕽ ᐅᐦᒋ ᐊᔨᓯᔨᓂᐊᐧ ᐁᑳ ᑳ ᐊᔭᒥᐦᐋᐋᐧᑎᓯᔨᐟ ᒥᓇ ᐁᑳ ᑳ ᑲᐧᔭᐢᑭᑖᑎᓯᔨᐟ, ᑳ ᐹᑕᑯᓇᑭᐠ ᑖᐯᐧᐃᐧᐣ ᐁᑳ ᐁ ᑲᐧᔭᐢᑭᑖᑎᓯᒋᐠ;
[19] ᒋᑫᒫ ᐊᓂᒪ ᑭᑕ ᑭ ᐋᑕ ᐃᓯ ᑭᐢᑫᔨᒥᐦᐟ ᑭᓭᒪᓂᑐ ᓄᑲᐧᓂᔨᐤ; ᐃᐧᔭ ᑭᓭᒪᓂᑐᐊᐧ ᐁ ᑭ ᐋᐧᐸᐦᑕᐦᐃᑯᒋᐠ.
[20] ᒋᑫᒫ ᐊᓂᐦᐃ ᐁᑳ ᑳ ᓄᑲᐧᓂᔨᑭ ᐅᐟ ᐃᓯ ᐊᔮᐃᐧᐣ ᐊᐢᐱᐣ ᑳ ᑭ ᐅᓯᒋᑳᑌᐠ ᐊᐢᑭ ᐅᐦᒋ ᒧᓯᐢ ᓄᑲᐧᓂᔨᐊᐧ, ᐁ ᓂᓯᑕᐃᐧᓂᑳᑌᑭ ᐊᓂᐦᐃ ᐅᐦᒋ ᑳ ᑭ ᐅᓯᒋᑳᑌᑭ, ᐅ ᑳᑭᑫ ᒪᐢᑲᐃᐧᓯᐃᐧᐣ ᐅᑎ ᒥᓇ ᐅ ᒪᓂᑐᐃᐧᐃᐧᐣ; ᐁᑳ ᑭᑕ ᑭ ᑭᐧᑕᐃᐧ ᐃᑌᐧᒋᐠ:
[21] ᒋᑫᒫ ᐋᑕ, ᐁ ᑭᐢᑫᔨᒫᒋᐠ ᑭᓭᒪᓂᑐᐊᐧ, ᓇᒪᐃᐧᔭ ᑭᐢᑕᑭᒣᐊᐧᐠ ᐁ ᐃᓯ ᑭᓭᒪᓂᑐᐃᐧᔨᐟ, ᓇᒪᐃᐧᔭ ᒥᓇ ᓇᓈᐢᑯᒣᐊᐧᐠ; ᒫᑲ ᐸᑲᐧᓇᑕ ᑭ ᐃᓯ ᒫᒥᑐᓀᔨᑕᒪᐧᐠ, ᒥᓇ ᐁᑳ ᐁ ᐃᔨᓂᓯᒪᑲᓂᔨᐠ ᐅᑌᐦᐃᐋᐧᐤ ᑭ ᐊᐧᓂᑎᐱᐢᑳᔨᐤ.
[22] ᐁ ᐃᔨᓂᓯᐊᐧᑫᔨᒥᓱᒋᐠ, ᑭ ᐊᑎ ᒧᐦᒍᐃᐧᐊᐧᐠ,
[23] ᐁᑯᓯ ᐊᓂᒪ ᐅ ᑭᐢᑌᔨᑖᑯᓯᐃᐧᓂᔨᐤ ᐁᑳ ᑳ ᓂᓯᐊᐧᓈᑎᓯᔨᐟ ᑭᓭᒪᓂᑐᐊᐧ ᑭ ᒥᐢᑯᑕᐢᑖᐊᐧᐠ ᐅᐟ ᐃᓯᓈᑯᓯᐃᐧᓂᔨᐤ ᑳ ᓂᓯᐊᐧᓈᑎᓯᔨᐟ ᐊᔨᓯᔨᓂᐊᐧ, ᒥᓇ ᐱᔦᓯᐊᐧ, ᒥᓇ ᑳ ᓀᐅᑳᑌᔨᐟ ᐱᓯᐢᑭᐊᐧ, ᒥᓇ ᑳ ᐸᐹᒥᑖᒋᒧᔨᐟ.
[24] ᐁᑯᓯ ᒫᑲ ᑭᓭᒪᓂᑐᐊᐧ ᑭ ᐸᑭᑎᓂᑲᐧᐠ ᐁ ᐃᓯ ᒪᒋ ᒧᐢᑕᐁᐧᔨᑕᒧᒪᑲᓂᔨᑭ ᐅᑌᐦᐃᐋᐧᐊᐧ ᑭᑕ ᐊᑐᐢᑳᑕᐦᑭᐠ ᐁᑳ ᑳ ᐯᑲᓂᔨᐠ, ᐃᐧᔭᐃᐧᐋᐧᐊᐧ ᐃᐧᔭᐋᐧᐤ ᑫᐦᒋᐋᐧᐠ ᑭᑕ ᓇᓂᐯᐃᐧᑖᒋᐠ:
[25] ᒋᑫᒫ ᐁ ᑭ ᒥᐢᑯᑐᓇᒫᐧᒋᐠ ᐅ ᑖᐯᐧᐃᐧᓂᔨᐤ ᑭᓭᒪᓂᑐᐊᐧ ᑭᔮᐢᑭᐃᐧᐣ ᑭᑕ ᐊᔮᒋᐠ, ᒥᓇ ᐁ ᑭ ᐸᑕᐱᐢᑕᐋᐧᒋᐠ ᒥᓇ ᐁ ᑭ ᐊᑐᐢᑲᐋᐧᒋᐠ ᐅᓯᐦᒋᑲᓇ ᔮᔭᐤ ᐃᔨᑯᕽ ᐃᐧᔭ ᐅᓯᐃᐁᐧᐊᐧ, ᑳ ᒪᒥᒋᒥᑯᐃᐧᓯᐟ ᑳᑭᑫ. ᐋᒣᐣ.
[26] ᐁᐊᐧᑯ ᐅᒪ ᐅᐦᒋ ᑭᓭᒪᓂᑐᐊᐧ ᑭ ᐸᑭᑎᓂᑲᐧᐠ ᒪᒋ ᓇᑕᐁᐧᔨᑕᒧᐃᐧᓂᕽ: ᒋᑫᒫ ᐅᐟ ᐃᐢᑫᐧᒥᐋᐧᐊᐧ ᑭ ᑫᐧᐢᑭᐊᐧᐠ ᑭᑕ ᐱᑐᐢ ᐃᓯᐦᒋᑫᒋᐠ ᐊᓂᒪ ᑳ ᑭ ᐃᓯᐃᑯᐃᐧᓯᒋᐠ:
[27] ᐁᑯᓯ ᒥᓇ ᐃᐧᐢᑕᐋᐧᐤ ᓈᐯᐊᐧᐠ, ᐁ ᓇᑲᑕᐦᑭᐠ ᐊᓂᒪ ᑳ ᑭ ᐃᓯᐃᑯᐃᐧᓯᔨᐟ ᐃᐢᑫᐧᐊᐧ, ᐃᐧᔭᐋᐧᐤ ᑫᐦᒋᐋᐧᐠ ᑭ ᓇᑕᐁᐧᔨᒥᑐᐊᐧᐠ, ᓈᐯᐊᐧᐠ ᑭᑭ ᓈᐯᐊᐧᐠ ᐁ ᐊᑐᐢᑳᑕᐦᑭᐠ ᐁᑳ ᑳ ᒥᔮᐧᓯᓂᔨᐠ, ᐁᑯᓯ ᐁ ᑎᐸᐦᐊᒫᑯᐃᐧᓯᒋᐠ ᐊᓂᒪ ᐁ ᐃᓯ ᑲᐢᑭᑕᒫᑯᒋᐠ ᐅ ᐊᐧᓂᑐᑕᒧᐃᐧᓂᐋᐧᐤ.
[28] ᑖᐱᐢᑯᐨ ᒫᑲ ᑳ ᑭ ᐃᓯ ᐋᓀᐧᑕᑭᐠ ᑭᑕ ᐊᔮᐋᐧᒋᐠ ᑭᓭᒪᓂᑐᐊᐧ ᐅ ᒥᑐᓂᔨᒋᑲᓂᐋᐧᕽ, ᑭᓭᒪᓂᑐᐊᐧ ᑭ ᐸᑭᑎᓂᑲᐧᐠ ᒪᒋ ᒫᒥᑐᓂᔨᒋᑲᓂᕽ, ᑭᑕ ᐃᑐᑕᐦᑭᐠ ᐊᓂᐦᐃ ᐁᑳ ᑳ ᓇᐃᐸᔨᑭ;
[29] ᐁ ᒧᐢᑭᓀᐢᑳᑯᒋᐠ ᑲᐦᑭᔭᐤ ᐁᑳ ᑲᐧᔭᐢᐠ ᑳ ᐃᑖᑎᓯᕽ, ᒪᒑᑎᓯᐃᐧᐣ, ᒧᐢᑕᐃᐧᓇᒫᑫᐃᐧᐣ, ᒪᒋ ᐃᑌᔨᒥᑐᐃᐧᐣ; ᐁ ᒧᐢᑭᓀᒋᐠ ᐃᓴᐋᐧᓇᑫᔨᒧᐃᐧᐣ, ᓂᐸᑖᑫᐃᐧᐣ, ᓄᑎᓂᑐᐃᐧᐣ, ᑲᑲᔦᔨᓯᐃᐧᐣ, ᐸᑳᐧᑎᑐᐃᐧᐣ; ᑳᑭᒧᒋ ᐊᔭᒥᐃᐧᐣ,
[30] ᐸᑯᓄᒥᑐᐃᐧᐣ ᐁ ᐸᑳᐧᑖᒋᐠ ᑭᓭᒪᓂᑐᐊᐧ, ᐁ ᒫᔦᔨᒥᐁᐧᒋᐠ, ᐁ ᑭᐢᑌᔨᒧᒋᐠ, ᐁ ᑲᑭᒋᒧᐢᑭᒋᐠ, ᐁ ᒥᐢᑫᐧᔨᑕᐦᑭᐠ ᒪᒋ ᑫᑲᐧᔭ, ᐁ ᓴᓯᐱᑕᐋᐧᒋᐠ ᐅ ᓂᑭᐃᑯᐋᐧᐊᐧ,
[31] ᐁᑳ ᐁ ᐅ ᓂᓯᑐᐦᑕᒧᐃᐧᓂᒋᐠ, ᐁ ᐱᑯᓇᑭᐠ ᑭᐢᑭᒥᐁᐧᐃᐧᓇ, ᐁᑳ ᐁ ᐅ ᑭᓭᐋᐧᑎᓯᐃᐧᓂᒋᐠ, ᐁᑳ ᐁ ᑭᑎᒫᑭᓈᑫᒋᐠ:
[32] ᐁᐊᐧᑯᓂᐠ, ᐁ ᑭᐢᑫᔨᑕᐦᑭᐠ ᐅᔭᓱᐁᐧᐃᐧᓂᔨᐤ ᑭᓭᒪᓂᑐᐊᐧ, ᐊᓂᑭ ᐁᑯᑐᐊᐧ ᑳ ᐃᑐᑕᐦᑭᐠ ᐁ ᑲᐢᑭᑕᒫᓱᒋᐠ ᓂᐱᐃᐧᐣ, ᐁᑳ ᐱᑯ ᑳ ᐃᑐᑕᐦᑭᐠ ᐃᐧᔭᐋᐧᐤ, ᒫᑲ ᑳ ᐃᐧᒋᐦᐋᒋᐠ ᐊᓂᐦᐃ ᑳ ᓀᑳᒥ ᐃᑐᑕᒥᔨᐟ.