[1] ᐊᓇ ᑳ ᓀᓱᐃᐧᓯᐟ ᑖᐯᐧᔦᔨᑕᒧᐃᐧᓂᕽ ᐅᑎᓂᕽ, ᒫᑲ ᓇᒪᐃᐧᔭ ᐃᑕ ᐁ ᐊᐧᐋᐧᓀᔨᑕᒧᐃᐧ ᓇᓈᐢᑫᐧᐊᐧᓯᐃᑐᕽ.
[2] ᐯᔭᐠ ᐊᔨᓯᔨᓂᐤ ᐊᔮᐤ ᑖᐯᐧᔦᔨᑕᒧᐃᐧᐣ ᑭᑕ ᒥᒋᐟ ᑲᐦᑭᔭᐤ ᑫᑲᐧᐩ; ᒫᑲ ᐊᓇ ᑳ ᓀᓱᐃᐧᓯᐟ ᒥᒋᐤ ᓂᐦᑖᐃᐧᑭᒋᑲᓇ.
[3] ᑭᔮᑦ ᐊᓇ ᑳ ᒥᒋᐟ ᐁᑳᐃᐧᔭ ᑭᑕ ᐱᐁᐧᔨᒣᐤ ᐊᓂᐦᐃ ᐁᑳ ᑳ ᒥᒋᔨᐟ; ᒥᓇ ᐁᑳᐃᐧᔭ ᐊᓇ ᐁᑳ ᑳ ᒥᒋᐟ ᑭᑕ ᐅᔭᓱᐋᐧᑌᐤ ᐊᓂᐦᐃ ᑳ ᒥᒋᔨᐟ: ᒋᑫᒫ ᑭᓭᒪᓂᑐᐊᐧ ᑭ ᐅᑎᓂᐠ.
[4] ᐊᐁᐧᓇ ᑭᔭ ᑳ ᐅᔭᓱᐋᐧᑕᒪᐊᐧᐟ ᑯᑕᐠ ᐊᐃᐧᔭᐠ ᐅᐟ ᐊᑐᐢᑫᔮᑲᓇ? ᐃᐧᔭ ᑎᐱᔭᐤ ᐅᐟ ᐅᑭᒫᒪ ᑭᑕ ᐅᐦᒋ ᓂᐸᐃᐧᐤ ᐊᐦᐳ ᑭᑕ ᐸᐦᑭᓯᐣ. ᐁᐦᐁ, ᐊᐦᐳ ᑭᑕ ᓂᐸᐃᐧᐋᐤ, ᒋᑫᒫ ᑳ ᑎᐯᔨᐦᒋᑫᐟ ᑲᐢᑭᑖᐤ ᑭᑕ ᓂᐸᐃᐧᐋᐟ.
[5] ᐯᔭᐠ ᐊᔨᓯᔨᓂᐤ ᐊᔨᐋᐧᐠ ᑭᐢᑕᑭᑕᑦ ᐯᔭᐠ ᑭᓯᑳᐤ ᐃᔨᑯᕽ ᑯᑕᑲ ᑭᓯᑳᐊᐧ: ᑯᑕᐠ ᐊᔨᓯᔨᓂᐤ ᐯᔭᑲᐧᐣ ᐁᑕᑭᑕᕽ ᑲᐦᑭᔭᐤ ᑭᓯᑳᐊᐧ. ᑭᔮᑦ ᑲᐦᑭᔭᐤ ᐊᔨᓯᔨᓂᐤ ᒥᑐᓂ ᑭᑕ ᑭᓭᔨᑕᑦ ᐃᐧᔭ ᑎᐱᔭᐤ ᐅ ᒫᒥᑐᓀᔨᒋᑲᓂᕽ.
[6] ᐊᓇ ᑳ ᓈᑲᑕᐁᐧᔨᑕᕽ ᑭᓯᑳᐤ, ᑳ ᑎᐯᔨᐦᒋᑫᔨᐟ ᐃᓯ ᓈᑲᑕᐁᐧᔨᑕᑦ: ᐁᑯᓯ ᐊᓇ ᑳ ᒥᒋᐟ, ᑳ ᑎᐯᔨᐦᒋᑫᔨᐟ ᐃᓯ ᒥᒋᐤ, ᒋᑫᒫ ᓇᓈᐢᑯᒣᐤ ᑭᓭᒪᓂᑐᐊᐧ; ᐁᑯᓯ ᐊᓇ ᐁᑳ ᑳ ᒥᒋᐟ, ᓇᒪᐃᐧᔭ ᑳ ᑎᐯᔨᐦᒋᑫᔨᐟ ᐃᓯ ᒥᒋᐤ, ᒫᑲ ᓇᓈᐢᑯᒣᐤ ᑭᓭᒪᓂᑐᐊᐧ.
[7] ᒋᑫᒫ ᓇᒪᐃᐧᔭ ᐊᐃᐧᔭᐠ ᑭᔮᓇᐤ ᐃᐧᔭ ᑎᐱᔭᐤ ᐅᐦᒋ ᐱᒫᑎᓯᐤ, ᒥᓇ ᓇᒪᐃᐧᔭ ᐊᐃᐧᔭᐠ ᐃᐧᔭ ᑎᐱᔭᐤ ᐅᐦᒋ ᓂᐱᐤ.
[8] ᒋᑫᒫ ᑭᐢᐱᐣ ᑭ ᐱᒫᑎᓯᓈᓇᐤ, ᑳ ᑎᐯᔨᐦᒋᑫᐟ ᑯᐦᒋ ᐱᒫᑎᓯᔭᕽ; ᐊᐦᐳ ᑭᐢᐱᐣ ᑭ ᓂᐱᓈᓇᐤ, ᑳ ᑎᐯᔨᐦᒋᑫᐟ ᑯᐦᒋ ᓂᐱᔭᕽ: ᐁᑯᓯ ᒫᑲ ᑭᐢᐱᐣ ᑭ ᐱᒫᑎᓯᓈᓇᐤ, ᐊᐦᐳ ᑭ ᓂᐱᓈᓇᐤ, ᑳ ᑎᐯᔨᐦᒋᑫᐟ ᑭ ᑎᐯᔨᒥᑯᓇᐤ.
[9] ᒋᑫᒫ ᐁᐊᐧᑯᒪ ᐅᐦᒋ ᙭ ᑳ ᑭ ᓂᐱᐟ, ᐁᑯᓯ ᒥᓇ ᑳ ᑭ ᐱᒫᑎᓯᐟ ᑭᑕ ᑎᐯᔨᒫᐟ ᑖᐱᐢᑯᐨ ᐅᓂᐱᐊᐧ ᒥᓇ ᐅᐱᒫᑎᓯᐊᐧ.
[10] ᒫᑲ ᑭᔭ, ᑖᓀᑭ ᑳ ᐅᔭᓱᐊᐧᑕᐟ ᑭᒋᐋᐧᑦ? ᐊᐦᐳ ᒥᓇ ᑖᓀᑭ ᑳ ᐱᐁᐧᔨᒪᐟ ᑭᒋᐋᐧᑦ? ᒋᑫᒫ ᑲᐦᑭᔭᐤ ᑭ ᑲ ᐅᑎᐢᑲᐃᐧᑳᐸᐃᐧᐢᑕᒫᐧᓈᐤ ᐅᔭᓱᐁᐧᐊᐧᐱᐃᐧᐣ ᑭᓭᒪᓂᑐ.
[11] ᒋᑫᒪ ᐃᑕᓯᓇᐦᐃᑳᑌᐤ, ᐁ ᐃᓯ ᐱᒫᑎᓯᔮᐣ, ᐃᑌᐧᐤ ᑳ ᑎᐯᔨᐦᒋᑫᐟ, ᑲᐦᑭᔭᐤ ᒥᒋᑲᐧᓇ ᓂ ᑲ ᐅᒋᐦᒋᐦᑲᐧᓂᐢᑖᑯᐣ, ᒥᓇ ᑲᐦᑭᔭᐤ ᒥᑌᔭᓂ ᑭᑕ ᐋᒋᒥᓱᐢᑖᐠ ᑭᓭᒪᓂᑐ.
[12] ᐁᑯᓯ ᒫᑲ ᑲᐦᑭᔭᐤ ᐁ ᐃᑕᓯᔭᕽ ᑭ ᑲ ᐊᒋᒥᓱᐢᑕᐋᐧᓇᐤ ᑭᓭᒪᓂᑐ.
[13] ᐁᑳᐃᐧᔭ ᒫᑲ ᐊᐊᐧᓯᒣ ᐅᔭᓱᐋᐧᑎᑐᑖᐠ: ᒫᑲ ᐅᒪ ᓇᐊᐧᐨ ᐅᔭᓱᐋᐧᑕᒧᐠ, ᐁᑳ ᐊᐃᐧᔭᐠ ᑭᑕ ᐊᐢᑖᐋᐧᐟ ᐱᓱᑫᓯᓄᐃᐧᐣ ᐅᒋᐋᐧᒪ ᐅ ᒣᐢᑲᓈᔨᕽ, ᐊᐦᐳ ᓈᐣᑕᐤ ᑫᑲᐧᐩ ᑭᑕ ᐅᐦᒋ ᐸᐦᑭᓯᓂᔨᐟ.
[14] ᓂ ᑭᐢᑫᔨᑌᐣ, ᒥᓇ ᓂ ᑫᒋᓈᐅᐣ ᑳ ᑎᐯᔨᐦᒋᑫᐟ ᒋᓴᐢ ᐅᐦᒋ, ᐁᑳ ᑫᑲᐧᐩ ᑫᐦᒋᐋᐧᐠ ᐁᑳ ᐁ ᐯᑲᕽ: ᐱᑯ ᐊᓇ ᓇᒪᐃᐧᔭ ᐯᑲᐣ ᑳ ᐃᑕᑭᑕᕽ, ᐁᐊᐧᑯ ᑖᐯᐧ ᓇᒪᐃᐧᔭ ᐯᑲᓂᔨᐤ.
[15] ᒋᑫᒫ ᑭᐢᐱᐣ ᒥᒋᐃᐧᐣ ᐅᐦᒋ ᑭᒋᐋᐧᑦ ᓇᒪᐃᐧᔭ ᓇᐁᔨᑕᑦ, ᓇᒪᐃᐧᔭ ᐁᑲᐧ ᓵᑭᐦᐃᐁᐧᐃᐧᓂᕽ ᑭ ᐱᒧᑖᐣ. ᐁᑳᐃᐧᔭ ᓂᓯᐊᐧᓈᒋ ᑭ ᒥᒋᐃᐧᐣ ᐅᐦᒋ ᐊᓇ ᑳ ᑭ ᓂᐳᐢᑕᒫᑯᐟ ᙭ᐊ.
[16] ᑭᔮᑦ ᐁᑳᐃᐧᔭ ᑭ ᒥᔪ ᑐᑕᒧᐃᐧᓂᐋᐧᐤ ᑭᑕ ᒫᔮᑐᒋᑳᑌᐤ:
[17] ᒋᑫᒫ ᐅᐟ ᐅᑌᓇᐃᐧᐃᐧᐣ ᑭᓭᒪᓂᑐ ᓇᒪᔦᐤ ᒥᒋᐃᐧᐣ ᒥᓇ ᒥᓂᑫᐧᐃᐧᐣ, ᒫᑲ ᑲᐧᔭᐢᑭᑖᑎᓯᐃᐧᐣ ᒥᓇ ᐯᔭᑕᑫᔨᒧᐃᐧᐣ ᒥᓇ ᒪᒪᐦᑖᑯᓯᐃᐧᐣ ᑳ ᑲᓈᑎᓯᐟ ᐊᐦᒑᕽ ᐅᐦᒋ.
[18] ᒋᑫᒫ ᐊᓇ ᐅᒥᓯ ᐃᓯ ᑳ ᐊᑐᐢᑲᐋᐧᐟ ᙭ᐊ ᒥᔪᔭᐁᐧᐁᐤ ᑭᓭᒪᓂᑐᐊᐧ, ᒥᓇ ᓇᐁᔨᒥᐠ ᐊᔨᓯᔨᓂᐊᐧ
[19] ᐁᑯᓯ ᒫᑲ ᐱᒥᑎᓴᐦᐊᑖᐠ ᐊᓂᐦᐃ ᐯᔭᑕᑫᔨᒧᐃᐧᓂᕽ ᑳ ᐃᑕᐢᑌᑭ, ᒥᓇ ᐊᓂᐦᐃ ᐃᑕ ᑭᑕ ᑭ ᐅᐦᒋ ᒥᔪ ᐋᐧᐸᐦᑕᐃᑐᔭᕽ.
[20] ᐁᑳᐃᐧᔭ ᒥᒋᐃᐧᐣ ᐅᐦᒋ ᓂᓯᐊᐧᓈᒋᑖᐋᐧᕽ ᐅᐟ ᐊᑐᐢᑫᐃᐧᐣ ᑭᓭᒪᓂᑐ. ᑲᐦᑭᔭᐤ ᑫᑲᐧᐩ ᐋᑕᐃᐧᔭ ᐯᑲᐣ; ᒫᑲ ᐁᔨᐁᐧᕽ ᒫᔮᑕᓂᔨᐤ ᐊᓇ ᐊᔨᓯᔨᓂᐤ ᑳ ᒥᒋᐟ ᓇᔦᑖᐤ ᐃᓯ.
[21] ᒥᔮᐧᓯᐣ ᐁᑳ ᑭᑕ ᒥᒋᕽ ᐃᐧᔮᐢ, ᐊᐦᐳ ᐁᑳ ᑭᑕ ᒥᓂᑫᐧᕽ ᓱᒥᓈᐳ, ᐊᐦᐳ ᐁᑳ ᑭᑕ ᐃᑐᑕᒥᕽ ᑫᑲᐧᐩ ᐃᑕ ᑭᑕ ᐅᐦᒋ ᐱᓱᑫᓯᕽ ᑭᒋᐋᐧᑦ.
[22] ᐊᓂᒪ ᑖᐯᐧᔦᔨᑕᒧᐃᐧᐣ ᑳ ᐊᔮᔭᐣ, ᑲᓇᐁᐧᔨᑕᒫᓱ ᐁ ᐃᓯ ᑭᑖᐸᑕᕽ ᑭᓭᒪᓂᑐ. ᒥᔪ ᐊᔮᐤ ᐊᓇ ᐁᑳ ᑳ ᓈᓂᐳᒥᓱᐟ ᐊᓂᒪ ᐅᐦᒋ ᑳ ᐃᐧᒋᐃᐁᐧᐠ.
[23] ᒫᑲ ᐊᓇ ᑭᓵᐢᑕᐤ ᑳ ᓵᑫᐧᔨᒧᐟ ᓈᓂᐳᒥᑯᐃᐧᓯᐤ ᑭᐢᐱᐣ ᒥᒋᓱᒋ, ᒋᑫᒫ ᐱᑯ ᑫᑲᐧᐩ ᐁᑳ ᑖᐯᐧᔦᔨᑕᒧᐃᐧᓂᕽ ᐁ ᐅᐦᒋᐠ ᒪᒑᔨᐊᐧᐣ.