[1] ᒣᐧᐢᑕᐢ ᐃᔨᑯᕽ ᒫᑲ ᐅᐦᐃ ᒋᓴᐢ ᒥᓇ ᑭ ᓄᑯᐦᐃᓱᐢᑕᐁᐧᐤ ᐅ ᑭᐢᑭᓄᐦᐊᒪᐋᐧᑲᓇ ᑖᐃᐱᕒᐃᔮᐢ ᓵᑲᐦᐃᑲᓂᕽ; ᐁᑯᓯ ᒫᑲ ᐅᒪ ᑳ ᑭ ᐃᓯ ᓄᑯᐦᐃᓱᐢᑕᐋᐧᐟ.
[2] ᑭ ᒫᒪᐃᐧ ᐊᔮᐊᐧᐠ ᓵᐃᒪᐣ ᐱᑕᕒ, ᒥᓇ ᑖᒪᐢ ᑎᑎᒪᐢ ᑳ ᐃᓯᔨᐦᑳᓱᐟ, ᒥᓇ ᓈᑖᓂᔭᓬ ᑫᓇ ᑳᓬᐊᓬᐃᕽ ᑯᐦᒋᐟ, ᒥᓇ ᐅᑯᓯᓴ ᓭᐱᑎ, ᒥᓇ ᓂᓱ ᑯᑕᑲ ᐅ ᑭᐢᑭᓄᐦᐊᒪᐋᐧᑲᓇ.
[3] ᓵᐃᒪᐣ ᐱᑕᕒ ᐃᑌᐤ, ᓂ ᐃᐧ ᓇᑕᐃᐧ ᓄᒋᑭᓄᓭᐋᐧᐣ. ᐃᑌᐊᐧᐠ, ᓂᔭᓈᐣ ᒥᓇ ᑭ ᑲ ᐃᐧᒉᐃᐧᑎᓈᐣ. ᑭ ᓯᐯᐧᑌᐊᐧᐠ, ᑭ ᐳᓯᐊᐧᐠ ᒫᑲ ᐅᓯᕽ; ᐁᐊᐧᑯ ᒫᑲ ᐁ ᑎᐱᐢᑳᐠ ᓇᒪ ᑫᑲᐧᐩ ᑭ ᐅᑕᐋᐧᔨᐊᐧ.
[4] ᒫᑲ ᐃᐢᐱ ᐁᑎ ᐋᐧᐸᓂᔨᐠ, ᒋᓴᐢ ᑭ ᓂᐸᐃᐧᐤ ᒋᑭᐯᐠ: ᒫᑲ ᑭᐢᑭᓄᐦᐊᒪᐋᐧᑲᓇᐠ ᓇᒪᐃᐧᔭ ᑭ ᑭᐢᑫᔨᒣᐊᐧᐠ ᐁᐊᐧᑲᐧᓂᐃ ᒋᓴᓴ.
[5] ᒋᓴᐢ ᒫᑲ ᐃᑌᐤ, ᐊᐋᐧᓯᓯᑎᐠ, ᑭᐟ ᐊᔮᓈᐋᐧ ᒋ ᑭᑕ ᒥᒋᔦᐠ? ᑭ ᓇᐢᑫᐧᐊᐧᓯᒣᐊᐧᐠ, ᓇᒪᐃᐧᔭ.
[6] ᐁᑯᓯ ᑭ ᐃᑌᐤ, ᐸᑲᐢᑕᐁᐧᐅᕽ ᐊᔭᐱ ᑭᐦᒋᓂᐢᑭᕽ ᐃᑌᑫ ᐅᓯᕽ, ᐁᑯᓯ ᑭ ᑳ ᒥᐢᑲᐋᐧᐋᐧᐊᐧᐠ. ᑭ ᐸᑲᐢᑕᐁᐧᐁᐧᐊᐧᐠ ᒫᑲ, ᐁᑲᐧ ᒫᑲ ᓇᒪᐃᐧᔭ ᑭ ᐅᒋᐱᑌᐊᐧᐟ ᐁ ᐃᓯ ᒥᐦᒉᑎᔨᐟ ᑭᓄᓭᐊᐧ.
[7] ᐊᓇ ᑭᐢᑭᓄᐦᐊᒪᐋᐧᑲᐣ ᒫᑲ ᒋᓴᐢ ᑳ ᓵᑭᐋᐟ ᐃᑌᐤ ᐱᑕᕒᐊ, ᐁᐊᐧᑲᐧᓇ ᑳ ᑎᐱᔨᒋᑫᐟ. ᐁᑯᓯ ᓵᐃᒪᐣ ᐱᑕᕒ ᐃᐢᐱ ᐱᔦᐦᑕᕽ ᐁᐊᐧᑲᐧᓂᐃ ᑳ ᑎᐯᔨᐦᒋᑫᔨᐟ, ᑭ ᐸᑲᐧᑌᐦᐅᑐᑕᑦ ᐅᐢᑯᑖᑲᐩ (ᒋᑫᒫ ᑭ ᒧᓭᐢᑲᑌᐤ), ᐁ ᑭ ᐸᑲᐢᑕᐁᐧᑳᐧᐢᑯᑎᐟ ᒫᑲ ᓵᑲᐃᑲᓂᕽ.
[8] ᑯᑕᑲᐠ ᒫᑲ ᑭᐢᑭᓄᐦᐊᒪᐋᐧᑲᓇᐠ ᑭ ᐯ ᓈᑕᑳᒣᐊᒪᐧᐠ ᐅᓯᕽ (ᒋᑫᒫ ᓇᒪᐃᐧᔭ ᑖᐃᐧᐨ ᐊᔮᐊᐧᐠ, ᓈᐣᑕᐤ ᓂᔮᓇᓄᒥᑕᓇᐤ ᑕᐦᑐᓂᐢᐠ), ᐁ ᐅᑖᐯᒋᐠ ᐊᔭᐱᔭ ᑭᑭ ᑭᓄᓭᐊᐧ.
[9] ᐃᐢᐱ ᒫᑲ ᑳ ᑲᐹᒋᐠ, ᐋᐧᐸᐦᑕᒪᐧᐠ ᐃᐢᑯᑌᐤ ᑲᐢᑲᐢᑲᓭᑳᓇ ᐅᐦᒋ, ᒥᓇ ᑭᓄᓭᐊᐧ ᐁᑯᑕ ᐁ ᐊᐱᔨᐟ, ᐊᓯᒋ ᐸᑫᐧᓯᑲᓇ.
[10] ᒋᓴᐢ ᐃᑌᐤ, ᐯᓯᑯᐠ ᐋᑎᐦᐟ ᑭᓄᓭᐊᐧᐠ ᐊᓄᐦᐨ ᑳ ᑭ ᐅᑎᓈᔦᑯᐠ.
[11] ᓵᐃᒪᐣ ᐱᑕᕒ ᒫᑲ ᑭ ᐃᑐᐦᑌᐤ, ᒥᓇ ᑭ ᓈᑕᑳᓯᐱᑌᐤ ᐊᔭᐱᔭ, ᐁ ᒧᐢᑭᓀᔨᐟ ᑭᐦᒋ ᑭᓄᓭᐊᐧ, ᒥᑖᑕᐦᑐᒥᑕᓇᐤ ᓂᔮᓇᓄᒥᑕᓇᐤ ᒥᓇ ᓂᐢᑐ ᐊᔨᐋᐧᐠ: ᐁᑯᓯ ᐁ ᐋᑕ ᐃᓯ ᒥᐦᒉᑎᒋᐠ, ᓇᒪᐃᐧᔭ ᐱᑯᐸᔨᐤ ᐊᔭᐱ.
[12] ᒋᓴᐢ ᐃᑌᐤ, ᐯ ᓇᑕᐃᐧ ᑫᑭᓭᐹ ᒥᒋᓱᐠ. ᓇᒪᐋᐧᐨ ᒫᑲ ᐊᐃᐧᔭᐠ ᑭᐢᑭᓄᐦᐊᒪᐋᐧᑲᓇᐠ ᑭ ᑲᑫᐧᒋᒣᐊᐧᐠ, ᐊᐁᐧᓇ ᑭᔭ? ᐁ ᑭᐢᑫᔨᑕᐦᑭᐠ ᐁᐊᐧᑲᐧᓂ ᑳ ᑎᐯᔨᐦᒋᑫᔨᐟ.
[13] ᒋᓴᐢ ᐯ ᐃᑐᐦᑌᐤ, ᒥᓇ ᐅᑎᓀᐤ ᐸᑫᐧᓯᑲᓇ, ᒥᓇ ᒥᔦᐤ, ᐁᑯᓯ ᑫᔮᐱᐨ ᑭᓄᓭᐊᐧ.
[14] ᐁᐊᐧᑯ ᐅᒪ ᓂᐢᑖᐧᐤ ᒋᓴᐢ ᐁ ᑭ ᓄᑯᐦᐃᓱᐢᑕᐋᐧᐟ ᑭᐢᑭᓄᐦᐊᒪᐋᐧᑲᓇ, ᐁ ᑭ ᐊᐧᓂᐢᑳᐟ ᓂᐳᐃᐧᓂᕽ ᐅᐦᒋ.
[15] ᐃᐢᐱ ᒫᑲ ᑳ ᑫᑭᓭᐸ ᒥᒋᓱᒋᐠ, ᒋᓴᐢ ᐃᑌᐤ ᓵᐃᒪᐣ ᐱᑕᕒᐊ, ᓵᐃᒪᐣ, ᐅᑯᓯᓴ ᒑᐣ ᑭ ᓵᑭᐃᐣ ᒋ ᐊᐊᐧᓯᒣ ᐃᔨᑯᕽ ᐅᑭ? ᐃᑌᐤ, ᐁᐦᐁ ᑌᐯᔨᐦᒋᑫᔭᐣ; ᑭ ᑭᐢᑫᔨᑌᐣ ᐁ ᓵᑭᐃᑖᐣ. ᐁᑯᓯ ᑭ ᐃᑌᐤ, ᐊᓴᒥᐠ ᓂ ᒫᔭᑎᐦᑯᓯᓯᒪᐠ.
[16] ᐃᑌᐤ ᒥᓇ ᐁᑲᐧ ᓂᓵᐧᐤ, ᓵᐃᒪᐣ, ᐅᑯᓯᓴ ᒑᐣ, ᑭ ᓵᑭᐃᐣ ᒋ? ᐁᑯᓯ ᐃᑌᐤ, ᐁᐦᐁ, ᑌᐯᔨᐦᒋᑫᔭᐣ; ᑭ ᑭᐢᑫᔨᑌᐣ ᐁ ᓵᑭᐃᑖᐣ. ᐁᑲᐧ ᐃᑌᐤ, ᑲᓇᐁᐧᔨᒥᐠ ᓂ ᒫᔭᑎᐦᑯᒪᐠ.
[17] ᐃᑌᐤ ᒥᓇ ᐁᑲᐧ ᓂᐢᑖᐧᐤ, ᓵᐃᒪᐣ ᐅ ᑯᓯᓴ ᒑᐣ, ᑭ ᓵᑭᐃᐣ ᒋ? ᐱᑕᕒ ᒥᐢᑕᐦᐃ ᒧᓯᑖᐤ ᒋᑫᒫ ᓂᐢᑖᐧᐤ ᐁᑲᐧ ᐁ ᐃᑎᑯᐟ ᑭ ᓵᑭᐃᐣ ᒋ? ᐁᑯᓯ ᑭ ᐃᑌᐤ, ᑌᐯᔨᐦᒋᑫᔭᐣ, ᑭ ᑭᐢᑫᔨᑌᐣ ᑲᐦᑭᔭᐤ ᑫᑲᐧᐩ; ᑭ ᑭᐢᑫᔨᑌᐣ ᐁ ᓵᑭᐃᑖᐣ. ᒋᓴᐢ ᐃᑌᐤ, ᐊᓴᒥᐠ ᓂ ᒫᔨᑎᑯᒪᐠ.
[18] ᑖᐯᐧ, ᑖᐯᐧ, ᑭᐟ ᐃᑎᐣ, ᒣᑳᐧᐨ ᐁ ᐅᐢᑭᓂᑭᔭᐣ, ᑭ ᑭ ᐸᑲᐧᑌᐦᐅᓱᐣ, ᒥᓇ ᑭ ᑭ ᐃᑐᐦᑖᐣ ᐱᑯ ᐃᑌ ᐁ ᐃᑌᔨᑕᒪᐣ: ᒫᑲ ᐃᐢᐱ ᑭᓭᔨᓂᐃᐧᔭᓂ, ᑭ ᑲ ᓱᐃᐧᓂᐢᑫᔨᐣ, ᑯᑕᐠ ᒫᑲ ᑭ ᑲ ᐸᑲᐧᑌᐦᐅᐠ, ᒥᓇ ᑭ ᑲ ᐃᑐᑕᐃᐠ ᐃᑌ ᐁᑳ ᐁ ᐃᐧ ᐃᑐᑌᔭᐣ.
[19] ᐅᒪ ᒫᑲ ᑭ ᐃᑌᐧᐤ, ᐁ ᑭᐢᑭᓇᐋᐧᒋᒫᐟ ᑫᑯ ᓂᐳᐃᐧᐣ ᑫ ᐃᓯ ᑭᐢᑌᔨᑖᑯᐦᐋᐟ ᑭᓭᒪᓂᑐᐊᐧ. ᐃᐢᐱ ᒫᑲ ᐅᒪ ᑳ ᐃᑌᐧᐟ, ᐃᑌᐤ, ᐱᒥᑎᓴᐦᐅᐣ.
[20] ᐱᑕᕒ ᒫᑲ, ᐁ ᑫᐧᐢᑭᑳᐸᐃᐧᐟ, ᐋᐧᐸᒣᐤ ᐊᓂᐦᐃ ᑭᐢᑭᓄᐦᐊᒪᐋᐧᑲᓇ ᒋᓴᐢ ᑳ ᓵᑭᐋᐟ ᐁ ᐯ ᐱᒥᑎᓴᐃᑫᔨᐟ; ᐊᓇ ᒥᓇ ᑳ ᑭ ᐋᓱᓯᒧᐟ ᐋᐧᐢᑭᑲᓂᔨᕽ ᐁ ᑎᐱᐢᑭᓀᑫᐧᒋᐠ, ᒥᓇ ᑳ ᑭ ᐃᑌᐧᐟ, ᑌᐯᔨᐦᒋᑫᔭᐣ, ᐊᐁᐧᓇ ᑳ ᐊᐧᔦᓯᐸᑭᑎᓂᐢᐠ?
[21] ᐱᑕᕒ ᒫᑲ ᐁ ᐋᐧᐸᒫᐟ ᐃᑌᐤ ᒋᓴᓴ, ᑌᐯᔨᐦᒋᑫᔭᐣ, ᑫᑲᐧᐩ ᒫᑲ ᐊᐊᐧ ᓈᐯᐤ ᑫ ᐃᑐᑕᕽ.
[22] ᒋᓴᐢ ᐃᑌᐤ, ᑭᐢᐱᐣ ᐃᑌᔨᑕᒫᐣ ᑭᑕ ᐯᐅᐟ ᐃᔨᑯᕽ ᑭᑕ ᑕᑯᓯᓈᐣ, ᑫᑲᐧᐩ ᑭᔭ ᐁᑯᑕ ᑫᓇᐋᐧᐸᒥᑯᔭᐣ? ᐯ ᐱᒥᑎᓴᐦᐅᐣ ᑭᔭ.
[23] ᐅᒪ ᐃᑌᐧᐃᐧᐣ ᒫᑲ ᑭ ᐸᐸᒥᐸᔨᐤ ᒣᑳᐧᐨ ᐅᑭ ᑯᒋᐋᐧᒥᑐᒋᐠ, ᐊᓇ ᑭᐢᑭᓄᐦᐊᒪᐋᐧᑲᐣ ᐁᑳ ᑭᑕ ᓂᐱᐟ: ᒫᑲ ᒋᓴᐢ ᓇᒪᐃᐧᔭ ᐅᐦᒋ ᐃᑌᐤ, ᐁᑳ ᑭᑕ ᓂᐱᔨᐟ; ᒫᑲ, ᑭᐢᐱᐣ ᐃᑌᔨᑕᒫᐣ ᑭᑕ ᐯᐅᐟ ᐃᔨᑯᕽ ᑭᑕ ᑕᑯᓯᓈᐣ, ᑫᑲᐧᐩ ᑭᔭ ᐁᑯᑕ ᑫᓇᐋᐧᐸᒥᑯᔭᐣ?
[24] ᐁᐊᐧᑯ ᐊᐊᐧ ᑭᐢᑭᓄᐦᐊᒪᐋᐧᑲᐣ ᑳ ᐋᑐᑕᕽ ᐅᐦᐃ, ᒥᓇ ᑳ ᑭ ᒪᓯᓇᐦᐊᕽ ᐅᐦᐃ: ᐁᑯᓯ ᑭ ᑭᐢᑫᔨᑌᓈᓇᐤ ᐅᐟ ᐋᒋᒧᐃᐧᐣ ᐁ ᑖᐯᐧᒫᑲᓂᔨᐠ.
[25] ᐊᔮᐊᐧ ᒫᑲ ᒥᐦᒉᐟ ᑯᑕᑲ ᒋᓴᐢ ᑳ ᑭ ᑐᑕᕽ, ᐁᐊᐧᑲᐧᓂ ᑭᐢᐱᐣ ᑲᐦᑭᔭᐤ ᒪᓯᓇᐃᑳᑌᑭ ᐊᐦᐳ ᐁᑐᑫ ᓇᒪᐋᐧᐨ ᐊᐢᑭᕽ ᑭᑕ ᑌᐸᐢᑎᐋᐧ ᒪᓯᓇᐦᐃᑲᓇ ᑭᑕ ᒪᓯᓇᐃᑳᑌᑭ.