[1] ᒫᑲ ᒋᓴᐢ ᑭ ᐃᑐᐦᑌᐤ ᐋᓬᐃᑊᐢ ᐊᐧᒋᕽ.
[2] ᐃᐧᐸᐨ ᑫᑭᓭᑊ ᒫᑲ ᒥᓇ ᑭ ᐯ ᐃᑐᐦᑌᐤ ᑭᐦᒋ ᐊᔭᒥᐦᐁᐃᐧᑲᒥᑯᕽ, ᑲᐦᑭᔭᐤ ᒫᑲ ᐊᔨᓯᔨᓂᐊᐧᐠ ᑭ ᐯ ᓈᑌᐊᐧᐠ; ᐁᑯᓯ ᑭ ᓇᐦᐊᐱᐤ, ᐁ ᑭ ᑭᐢᑭᓄᐦᐊᒪᐋᐧᐟ.
[3] ᒪᓯᓇᐦᐃᑫᐃᐧᔨᓂᐊᐧᐠ ᒫᑲ, ᒥᓇ ᐸᕒᐊᓯᔭᐠ ᑭ ᐯᑕᒪᐁᐧᐊᐧᐠ ᐃᐢᑫᐧᐊᐧ ᐁ ᑭ ᐅᑎᓂᐦᐟ ᒣᑲᐧ ᐱᓯᑳᐧᑎᓯᐃᐧᓂᕽ, ᐃᐢᐱ ᒫᑲ ᑖᐊᐧᔨᕽ ᑳ ᐸᑭᑎᓈᒋᐠ,
[4] ᐅᒥᓯ ᑭ ᐃᑌᐊᐧᐠ, ᐅᑭᐢᑭᓄᐦᐊᒫᑫᐤ, ᐊᐊᐧ ᐃᐢᑫᐧᐤ ᑭ ᐅᑎᓈᐤ ᐱᓯᑳᐧᑎᓯᐃᐧᓂᕽ, ᒥᑐᓂ ᐃᓯᐦᒋᑫᐃᐧᓂᕽ.
[5] ᒧᓯᐢ ᒫᑲ ᓂ ᑭ ᐃᑎᑯᓈᐣ ᐅᔭᓱᐁᐧᐃᐧᓂᕽ, ᐊᐊᐧ ᑐᐃᐧᑳᐣ ᑭᑕ ᐱᒪᐧᐱᐢᑲᐅᐦᐟ: ᑖᓂᓯ ᒫᑲ ᑭᔭ ᐁᑌᐧᔭᐣ?
[6] ᐁᐊᐧᑯ ᐅᒪ ᐁ ᑭ ᐃᑖᒋᐠ ᐁ ᐃᐧ ᑯᑌᔨᒫᒋᐠ, ᐁ ᐃᐧ ᐃᐧᑲᐧᒋᑖᒋᐠ ᑫ ᐅᐦᒋ ᓂᓯᐊᐧᓈᒋᒫᒋᐠ. ᒋᓴᐢ ᒫᑲ ᑭ ᓇᐊᐧᑭᐤ, ᐅ ᒋᐦᒋ ᐅᐦᒋ ᐁ ᒪᓯᓇᐦᐃᑫᐟ ᒧᒋᕽ, ᑖᐱᐢᑯᐨ ᐁᑳ ᐁ ᐯᑕᐋᐧᐟ.
[7] ᑫᔮᐱᐨ ᒫᑲ ᐁ ᑲᑫᐧᒋᒫᒋᐠ, ᑭ ᑕᓱᑳᐸᐃᐧᐤ, ᐅᒥᓯ ᐁ ᑭ ᐃᑖᐟ, ᐊᐃᐧᔭᐠ ᐁᑳ ᐃᐧᑳᐨ ᑭᔭᐋᐧᐤ ᒣᒋᐃᓯᒋᑫᑫᐧ ᑳ ᐃᑕᓯᔦᐠ, ᑭᔮᑦ ᐁᐊᐧᑯ ᓂᑳᐣ ᑭᑕ ᐱᒪᐧᐱᐢᑲᐁᐧᐤ.
[8] ᒥᓇ ᒫᑲ ᑭ ᓇᐊᐧᑭᐤ, ᐁ ᒪᓯᓇᐦᐃᑫᐟ ᒧᒋᕽ.
[9] ᐊᓂᑭ ᒫᑲ ᑳ ᐯᐦᑕᐦᑭᐠ, ᐁ ᑭᐢᑫᔨᒥᓱᒋᐠ ᐁ ᑭ ᒪᒋ ᐃᓯᐦᒋᑫᒋᐠ, ᑭ ᐅᑎ ᐹᐯᔭᑯ ᐊᐧᔭᐃᐧᐊᐧᐠ, ᓂᐢᑕᑦ ᐊᓇ ᐁ ᑲᔭᑌᔮᑎᓯᐟ, ᐱᔨᐢ ᐊᓇ ᐃᐢᑳᐧᔮᐨ: ᒋᓴᐢ ᒫᑲ ᑭ ᐯᔭᑯ ᓇᑲᑖᐤ, ᑖᐊᐧᔨᕽ ᐁ ᓂᐸᐃᐧᐟ ᐊᓇ ᐃᐢᑫᐧᐤ.
[10] ᐃᐢᐱ ᒫᑲ ᒋᓴᐢ ᑳ ᐅᐱᐢᑫᐧᔨᐟ, ᓇᒪᐋᐧᐨ ᐊᐃᐧᔭ ᐊᔨᓯᔨᓂᐊᐧ ᐋᐧᐸᒣᐤ ᐱᑯ ᐊᓂᐦᐃ ᐃᐢᑫᐧᐊᐧ, ᐅᒥᓯ ᒫᑲ ᑭ ᐃᑌᐤ, ᐃᐢᑫᐧᐤ, ᑕᓂᐁᐧᑳ ᑳ ᒪᒥᓯᒥᐢᑭᐠ, ᓇᒪ ᒋ ᐊᐃᐧᔭᐠ ᑯᐦᒋ ᐅᔭᓱᐋᐧᑎᐠ?
[11] ᐅᒥᓯ ᒫᑲ ᑭ ᐃᑌᐤ, ᓇᒪᐃᐧᔭ ᐊᐃᐧᔭᐠ, ᑌᐯᔨᐦᒋᑫᔭᐣ, ᒋᓴᐢ ᒫᑲ ᐅᒥᓯ ᑭ ᐃᑌᐤ, ᓇᒪᐃᐧᔭ ᓂᐢᑕ ᑯᔭᓱᐋᐧᑎᑎᐣ; ᓯᐯᐧᐦᑌ, ᐁᑳᐃᐧᔭ ᒫᑲ ᒥᓇ ᐃᐧᑳᐨ ᒪᒋ ᐃᓯᐦᒋᑫ.
[12] ᒋᓴᐢ ᒫᑲ ᒥᓇ ᑭ ᐊᔭᒥᐁᐤ, ᐅᒥᓯ ᐁ ᐃᑌᐧᐟ, ᓂᔭ ᓂ ᐊᐧᓭᐢᑫᐣ ᐅᒪ ᐊᐢᑭ: ᐊᓇ ᒫᑲ ᐯᒥᑎᓴᐅᐟ ᓇᒪᐃᐧᔭ ᐊᐧᓂᑎᐱᐢᑳᕽ ᑭᑕ ᐱᒧᐦᑌᐤ, ᒫᑲ ᑭᑕ ᐊᔮᐤ ᐱᒫᑎᓯᐃᐧ ᐋᐧᐢᑌᐤ.
[13] ᐸᕒᐊᓯᔭᐠ ᒫᑲ ᑭ ᐃᑌᐊᐧᐠ, ᑭᔭ ᑭᐟ ᐋᒋᒥᓱᐣ; ᓇᒪᐃᐧᔭ ᒫᑲ ᑖᐯᐧᒪᑲᐣ ᑳ ᐃᑖᒋᒧᔭᐣ.
[14] ᒋᓴᐢ ᑭ ᓇᐢᑫᐧᐊᐧᓯᒣᐤ ᐅᒥᓯ ᐁ ᑭ ᐃᑖᐟ, ᐋᑕᐃᐧᔭ ᓂᔭ ᓂᐟ ᐋᒋᒥᓱᐣ, ᐁᔨᐁᐧᕽ ᒫᑲ ᑖᐯᐧᒪᑲᐣ ᓂᐟ ᐋᒋᒧᐃᐧᐣ; ᒋᑫᒪ ᓂ ᑭᐢᑫᔨᑌᐣ ᐃᑌ ᐁᐧᒋᔮᐣ, ᒥᓇ ᐃᑌ ᐁᑐᑌᔮᐣ; ᒫᑲ ᓇᒪᐃᐧᔭ ᑭ ᑳ ᑭ ᐃᐧᑌᓈᐋᐧᐤ ᐃᑌ ᐁᐧᒋᔮᐣ, ᒥᓇ ᐃᑌ ᐁᑐᑌᔮᐣ.
[15] ᐃᐧᔮᓯᕽ ᑭᔭᐋᐧᐤ ᑭᐟ ᐃᓯ ᐅᔭᓱᐋᐧᓯᐊᐧᓈᐋᐧᐤ; ᓇᒪ ᐊᐃᐧᔭᐠ ᓂᔭ ᓄᔭᓱᐊᐧᑕᐤ.
[16] ᑭᐢᐱᐣ ᒫᑲ ᐅᔭᓱᐋᐧᓯᐁᐧᔮᓂ ᑖᐯᐧᒪᑲᐣ ᐁᓯ ᐅᔭᓱᐁᐧᔮᐣ; ᒋᑫᒫ ᓇᒪᐃᐧᔭ ᓂ ᐯᔭᑯᐣ, ᒫᑲ ᓂᔭ ᒥᓇ ᐁᐧᔪᑖᐃᐧᕽ ᑳ ᐯ ᐃᓯᑎᓴᐦᐅᐟ.
[17] ᒥᓇ ᐁᑯᓯ ᐃᑕᓯᓇᐦᐃᑳᑌᐤ ᑯᔭᓱᐁᐧᐃᐧᓂᐋᐧᕽ, ᐁ ᑖᐯᐧᒪᑲᓂᔨᐠ ᐅᐟ ᐋᒋᒧᐃᐧᓂᐋᐧᐤ ᓂᓱ ᐊᔨᓯᔨᓂᐊᐧᐠ.
[18] ᓂᔭ ᐯᔭᐠ ᑳ ᐊᒋᒥᓱᔮᐣ, ᒥᓇ ᐁᐧᔪᑖᐃᐧᕽ ᑳ ᐯ ᐃᓯᑎᓴᐦᐅᐟ ᓂᐟ ᐋᒋᒥᐠ.
[19] ᐅᒥᓯ ᒫᑲ ᑭ ᐃᑌᐊᐧᐠ, ᑖᓂᐋᐧ ᑯᑖᐃᐧ? ᒋᓴᐢ ᑭ ᓇᐢᑫᐧᐊᐧᓯᒣᐤ: ᓇᒪᐃᐧᔭ ᑭ ᑭᐢᑫᔨᒥᓈᐋᐧᐤ, ᐊᐦᐳ ᓄᑖᐃᐧ, ᑭ ᑭᐢᑫᔨᒥᐁᐧᑯᐸᓀ, ᑭ ᑳ ᑭ ᑭᐢᑫᔨᒫᑖᐋᐧᐤ ᓄᑖᐃᐧ ᒥᓇ.
[20] ᐁᐊᐧᑲᐧᓂ ᐅᐦᐃ ᐃᑌᐧᐃᐧᓇ ᑳ ᐊᔨᑌᐧᐟ ᒋᓴᐢ ᓱᓂᔮᐃᐧ ᐸᑭᑎᓈᓱᐃᐧᑲᒥᑯᕽ, ᐁ ᒣᑳᐧ ᑭᐢᑭᓄᐦᐊᒫᑫᐟ ᑭᐦᒋ ᐊᔭᒥᐦᐁᐃᐧᑲᒥᑯᕽ: ᓇᒪ ᒫᑲ ᐊᐃᐧᔭ ᑭ ᐅᐦᒋ ᐅᑎᑎᓂᐠ; ᒋᑫᒪ ᓇᒣᐢᑲᐧ ᑭ ᐅᑎᐦᒋᐸᔨᔨᐤ ᐃᔨᑯᕽ ᑭᑕ ᐅᑎᓂᐦᐟ.
[21] ᒋᓴᐢ ᒫᑲ ᒥᓇ ᑭ ᐃᑌᐧᐤ, ᓂ ᓯᐯᐧᑕᐣ ᑭ ᑳ ᓇᓈᑐᓇᐃᐧᓈᐋᐧᐤ ᒫᑲ, ᒥᓇ ᑭ ᑳ ᓂᐱᓈᐋᐧᐤ ᑭ ᒪᒋᐃᑎᐃᐧᓂᐋᐧᕽ; ᐃᑌ ᐁᑐᑌᔮᐣ, ᓇᒪᐃᐧᔭ ᑭ ᑳ ᑲᐢᑭᑖᓈᐋᐧᐤ ᑭᑕ ᐯ ᐃᑐᑌᔦᐠ.
[22] ᑭ ᐃᑌᐧᐊᐧᐠ ᒫᑲ ᒍᐊᐧᐠ, ᑭᑕ ᓂᐸᐃᓱ ᒋ? ᑳ ᐅᐦᒋ ᐃᑌᐧᐟ, ᐃᑌ ᐁᑐᑌᔮᐣ, ᓇᒪᐃᐧᔭ ᑭ ᑳ ᑲᐢᑭᑖᓈᐋᐧᐤ ᑭᑕ ᐯ ᐃᑐᑌᔦᐠ?
[23] ᐅᒥᓯ ᒫᑲ ᑭ ᐃᑌᐤ, ᓂᒑᔨᕽ ᑭᔭᐋᐧᐤ ᑯᒋᓈᐋᐧᐤ; ᓂᔭ ᒫᑲ ᐃᐢᐱᒥᕽ ᓂ ᐯ ᐅᑐᑖᐣ; ᑭᔭᐋᐧᐤ ᐊᐢᑭᕽ ᑭ ᑎᐯᔨᑖᑯᓯᓈᐋᐧᐤ; ᓇᒪᐃᐧᔭ ᓂᔭ ᐊᐢᑭᕽ ᓂ ᑎᐯᔨᑖᑯᓯᐣ.
[24] ᐁᐊᐧᑯ ᒫᑲ ᑳ ᐅᐦᒋ ᐃᑎᑕᑯᐠ, ᑭ ᑳ ᓂᐱᓈᐋᐧᐤ ᑭ ᒪᒋᐃᑎᐃᐧᓂᐋᐧᕽ; ᑭᐢᐱᐣ ᐁᑳ ᑖᐯᐧᑕᒣᑯ ᓂᔭ ᐁ ᐊᐃᐧᔮᐣ, ᑭ ᑳ ᓂᐱᓈᐋᐧᐤ ᑭ ᒪᒋᐃᑎᐃᐧᓂᐊᐧᕽ.
[25] ᐅᒥᓯ ᒫᑲ ᑭ ᐃᑌᐊᐧᐠ, ᐊᐁᐧᓇ ᑭᔭ? ᒋᓴᐢ ᒫᑲ ᐅᒥᓯ ᐃᑌᐤ, ᐊᓇ ᑫᔮᐱᐨ ᑳ ᑭ ᐃᐧᐦᑕᒫᑕᑯᐠ ᒥᒋᒪᐨ ᐅᐦᒋ.
[26] ᒥᐦᒉᐟ ᑫᑲᐧᔭ ᓂᐟ ᐊᔮᐣ ᑭᑕ ᐃᑌᐧᔮᐣ, ᒥᓇ ᑭᑕ ᐃᓯ ᐅᔭᓱᐋᐧᑎᑕᑯᐠ; ᒫᑲ ᐊᓇ ᑳ ᐯ ᐃᓯᑎᓴᐦᐅᐟ ᑖᐯᐧᐃᐧᓂᐃᐧᐤ; ᓂ ᐃᐧᐦᑕᒪᐊᐧᐊᐧᐠ ᒫᑲ ᐊᐢᑭᕽ ᑳ ᐊᔮᒋᐠ ᑳ ᐃᓯ ᐯᑕᐊᐧᐠ
[27] ᓇᒪᐃᐧᔭ ᒫᑲ ᓂᓯᑐᐦᑕᐁᐧᐊᐧᐠ ᐁ ᐃᑕᓯᒫᔨᐟ ᐁᐧᔪᑖᐃᐧᕽ.
[28] ᐁᑲᐧ ᒫᑲ ᒋᓴᐢ ᑭ ᐃᑌᐤ, ᐃᐢᐱ ᑭ ᐅᐹᐢᑯᓈᔦᑯ ᐃᔨᓂᐃᐧᑯᓯᓵᐣ, ᐁᑲᐧ ᑫ ᑭᐢᑫᔨᑕᒣᐠ ᓂᔭ ᐁ ᐊᐃᐧᔮᐣ, ᒥᓇ ᐁᑳ ᓂᔭ ᑫᑲᐧᐩ ᐁ ᐯᔭᑯ ᐃᑐᑕᒫᐣ: ᒫᑲ ᐱᑯ ᑳ ᐃᓯ ᑭᐢᑭᓄᐦᐊᒫᐃᐧᐟ ᓄᑖᐃᐧ, ᐁᐊᐧᑯᓂ ᐅᐦᐃ ᑳ ᐊᔨᑌᐧᔮᐣ.
[29] ᑳ ᐯ ᐃᓯᑎᓴᐦᐅᐟ ᒫᑲ ᓂ ᐃᐧᒉᐃᐧᐠ: ᓇᒪᐃᐧᔭ ᓂ ᐯᔭᑯ ᓇᑲᑎᐠ; ᒋᑫᒪ ᑲᑭᑫ ᓂᐟ ᐃᑐᑌᐣ ᐊᓂᐦᐃ ᑳ ᓇᐦᐃᔭᐁᐧᐃᑯᐟ.
[30] ᒣᑳᐧᐨ ᒫᑲ ᐁ ᐊᐧᐃᐧᑕᕽ ᐅᐦᐃ ᐃᑌᐧᐃᐧᓇ, ᒥᐦᒉᐟ ᑭ ᑖᐯᐧᔦᔨᒥᐠ.
[31] ᒋᓴᐢ ᒫᑲ ᐅᒥᓯ ᑭ ᐃᑌᐤ ᐊᓂᐦᐃ ᒍᐊᐧ ᑳ ᑖᐯᐧᔦᔨᒥᑯᐟ, ᑭᐢᐱᐣ ᐊᔮᔦᑯ ᓂᐟ ᐃᑌᐧᐃᐧᓂᕽ, ᑖᐯᐧ ᑭᔭᐋᐧᐤ ᑭ ᑳ ᐅᑭᐢᑭᓄᐊᒪᐋᐧᑲᓂᒥᑎᓈᐋᐧᐤ;
[32] ᑭ ᑳ ᑭᐢᑫᔨᑌᓈᐋᐧᐤ ᒫᑲ ᑖᐯᐧᐃᐧᐣ, ᒥᓇ ᑖᐯᐧᐃᐧᐣ ᑭ ᑳ ᑎᐯᔨᒥᓱᐃᑯᓈᐋᐧᐤ.
[33] ᑭ ᓇᐢᑫᐧᐊᐧᓯᒣᐊᐧᐠ ᒫᑲ, ᓂᔭᓈᐣ ᐁᑊᕒᐁᐋᑦ ᐅᐟ ᐊᐋᐧᓯᒥᓴ, ᓇᒪᐃᐧᑳᐨ ᓄᐦ ᐊᐊᐧᑳᓂᑳᑎᑯᓈᐣ ᐊᐃᐧᔭᐠ ᐊᔨᓯᔨᓂᐤ; ᑖᓂᓯ ᒫᑲ ᑭᔭ ᐁᑌᐧᔭᐣ, ᑭ ᑳ ᑎᐯᔨᒥᓱᐃᑲᐃᐧᓈᐋᐧᐤ?
[34] ᒋᓴᐢ ᒫᑲ ᑭ ᓇᐢᑫᐧᐊᐧᓯᒣᐤ, ᑖᐯᐧ, ᑖᐯᐧ, ᑭᐟ ᐃᑎᓈᐋᐧᐤ, ᐊᐃᐧᔭᐠ ᒣᒋ ᐃᓯᐦᒋᑫᑫᐧ ᐊᐊᐧᑳᓂᑳᑎᐠ ᒪᒋ ᐃᓯᐦᒋᑫᐃᐧᐣ.
[35] ᓇᒪᐃᐧᔭ ᐊᐊᐧᑳᐣ ᑲᑭᑫ ᐊᔮᐤ ᐋᐧᐢᑳᐦᐃᑲᓂᕽ: ᒫᑲ ᐅᑯᓯᓯᒫᐤ ᑳᑭᑫ ᐊᔮᐤ.
[36] ᑭᐢᐱᐣ ᒫᑲ ᐅᑯᓯᓯᒫᐤ ᑎᐯᔨᒥᓱᐃᑯᔦᑯ, ᑖᐯᐧ ᐃᓴ ᑭ ᑳ ᑎᐯᔨᒥᓱᓈᐋᐧᐤ.
[37] ᓂ ᑭᐢᑫᔨᑌᐣ ᐁᑊᕒᐁᐋᑦ ᐁ ᐅᐟ ᐊᐋᐧᓯᒥᓯᒥᑯᔦᐠ; ᒫᑲ ᑭ ᓇᓈᑐᓀᓈᐋᐧᐤ ᑭᑕ ᓂᐸᐃᔦᐠ, ᒋᑫᒪ ᓂᐟ ᐃᑌᐧᐃᐧᓇ ᓇᒪᐃᐧᔭ ᑭ ᑭᑭᐢᑲᑯᓈᐋᐧᐤ.
[38] ᓂ ᐃᐧᐦᑌᐣ ᑳ ᑭ ᐊᔨᓯᓇᐊᐧᐠ ᓄᑖᐃᐧ; ᑭᐢᑕᐋᐧᐤ ᒫᑲ ᑭᐟ ᐃᓯᒋᑳᓈᐋᐧᐤ ᑳ ᐊᔨᓯᓇᐋᐧᔦᐠ ᑰᑖᐃᐧᐋᐧᐤ.
[39] ᑭ ᓇᐢᑫᐧᐊᐧᓯᒣᐊᐧᐠ ᒫᑲ ᐅᒥᓯ ᐁ ᑭ ᐃᑖᒋᐠ, ᐁᑊᕒᐁᐋᑦ ᓄᔪᑖᐃᐧᓈᐣ. ᒋᓴᐢ ᐅᒥᓯ ᐃᑌᐤ, ᑭᐢᐱᐣ ᐁᑊᕒᐁᐋᑦ ᐅᐟ ᐊᐋᐧᓯᒥᓯᒥᑯᔦᐠ, ᑭ ᑳ ᑭ ᑐᑌᓈᐋᐧᐤ ᐅᐟ ᐊᑐᐢᑫᐃᐧᓇ ᐁᑊᕒᐁᐋᑦ.
[40] ᐊᓄᐦᐨ ᒫᑲ ᑭ ᓇᓈᑐᓀᓈᐋᐧᐤ ᑭᑕ ᓂᐸᐃᔦᐠ, ᐊᔨᓯᔨᓂᐤ ᑳ ᑭ ᐃᐧᐦᑕᒫᑯᔦᐠ ᑖᐯᐧᐃᐧᐣ, ᑳ ᐊᔨᑎᑕᐊᐧᐠ ᑭᓭᒪᓂᑐ; ᓇᒪᐃᐧᔭ ᐁᑯᓯ ᑳ ᑭ ᐃᑐᑕᕽ ᐁᑊᕒᐁᐋᑦ.
[41] ᑭᐟ ᐃᓯᒋᑳᓈᐋᐧᐤ ᐅᐟ ᐃᑐᑕᒧᐃᐧᓇ ᑯᑕᐃᐧᐋᐧᐤ. ᐁᑯᓯ ᑭ ᐃᑌᐊᐧᐠ, ᓇᒪᐃᐧᔭ ᐱᓯᑳᐧᑎᓯᐃᐧᓂᕽ ᑳ ᑭ ᓂᐦᑖᐃᐧᑭᔮᕽ; ᐯᔭᑯ ᓄᑖᐃᐧᓈᐣ, ᐁᐊᐧᑯ ᐊᓇ ᑭᓭᒪᓂᑐ.
[42] ᒋᓴᐢ ᒫᑲ ᑭ ᐃᑌᐤ, ᑭᐢᐱᐣ ᑭᓭᒪᓂᑐ ᑭ ᐅᔪᑖᐃᐧᔦᐠ ᑭ ᑳ ᑭ ᓵᑭᐃᑕᐋᐧᐤ; ᒋᑫᒪ ᑭᓭᒪᓂᑐᕽ ᓂ ᑭ ᐯ ᐅᑐᑖᐣ; ᓇᒪᐃᐧᔭ ᓂᔭ ᑎᐱᔭᐤ ᓂ ᐯ ᐃᑐᐦᑖᐣ, ᒫᑲ ᓂ ᑭ ᐯ ᐃᓯᑎᓴᐦᐅᐠ.
[43] ᑖᓀᑭ ᐁᑳ ᑳ ᓂᓯᑐᐦᑕᒣᐠ ᓂ ᐱᑭᐢᑫᐧᐃᐧᐣ? ᒋᑫᒪ ᐁᑳ ᐁ ᓇᑐᑕᒣᐠ ᓂᐟ ᐃᑌᐧᐃᐧᐣ.
[44] ᑭᔭᐋᐧᐤ ᑯᔪᑖᐃᐧᓈᐋᐧᐤ ᒪᒑᔭ ᒥᓇ ᐅ ᒪᒋ ᓇᑕᐁᐧᔨᑕᒧᐃᐧᓇ ᑯᑖᐃᐧᐋᐧᐤ ᐁᑯᓯ ᐋᐧ ᐃᓯᐦᒋᑫᔦᐠ. ᒥᒋᒫᐨ ᐅᐦᒋ ᑭ ᓂᐸᑖᑫᐢᑭᐤ, ᓇᒪᐃᐧᔭ ᑖᐯᐧᐃᐧᓂᕽ ᐊᔮᐤ, ᒋᑫᒪ ᓇᒪᐃᐧᔭ ᑭᑭᐢᑳᐠ ᑖᐯᐧᐃᐧᐣ. ᐃᐢᐱ ᐃᓴ ᑫᔮᐢᑭᒋ ᐱᑭᐢᑲᐧᑕᑦ ᐊᓂᒪ ᑳ ᑭᑭᐢᑳᑯᐟ: ᒋᑫᒪ ᑭᔮᐢᑭᐢᑭᐤ, ᒥᓇ ᐆᑖᐃᐧᑲᐦᑕᑦ ᑭᔮᐢᑭᐃᐧᐣ.
[45] ᒋᑫᒪ ᐁ ᐃᐧᐦᑕᒫᑕᑯᐠ ᑖᐯᐧᐃᐧᐣ, ᓇᒪᐃᐧᔭ ᑭ ᑖᐯᐧᑌᓈᐋᐧᐤ.
[46] ᑖᓈᓇ ᑭᔭᐋᐧᐤ ᑫ ᑖᐯᐧᒥᐟ ᒪᒋᑐᑕᒧᐃᐧᐣ ᐁ ᐊᑖᒥᒥᐟ? ᑭᐢᐱᐣ ᒫᑲ ᑎᔮᐯᐧᐊᐧᓀ, ᑖᓀᑭ ᐁᑳ ᑳ ᑖᐯᐧᑕᐃᐧᔦᐠ?
[47] ᑭᓭᒪᓂᑐᕽ ᑳ ᑎᐯᔨᑖᑯᓯᐟ ᓇᑐᑕᑦ ᑭᓭᒪᓂᑐᐊᐧ ᐅᐟ ᐃᑌᐧᐃᐧᓂᔨᐊᐧ: ᑭᔭᐋᐧᐤ ᐁᑳ ᐁᐧᒋ ᓇᑐᑕᒣᐠ, ᒋᑫᒫ ᓇᒪᐃᐧᔭ ᑭᓭᒪᓂᑐᕽ ᑭ ᑎᐯᔨᑖᑯᓯᓈᐋᐧᐤ.
[48] ᑭ ᓇᐢᑫᐧᐊᐧᓯᒣᐊᐧᐠ ᒫᑲ ᒍᐊᐧᐠ ᐁ ᑭ ᐃᑖᒋᐠ, ᓇᒪ ᒋ ᑲᐧᔭᐢᐠ ᓂᐟ ᐃᑖᐧᓈᐣ ᐁ ᓴᒫᕒᐃᑕᓂᐃᐧᔭᐣ, ᒥᓇ ᐁ ᐊᔮᐊᐧᐟ ᒪᒋ ᐊᐦᒑᕽ?
[49] ᒋᓴᐢ ᑭ ᓇᐢᑫᐧᐊᐧᓯᒣᐤ, ᓇᒪᐃᐧᔭ ᓂᐟ ᐊᔮᐋᐧᐤ ᒪᒋ ᐊᐦᒑᕽ: ᒫᑲ ᓂ ᑭᐢᑌᔨᒫᐤ ᓄᑖᐃᐧ, ᑭᔭᐋᐧᐤ ᒫᑲ ᑭ ᐱᐁᐧᔨᒥᓈᐋᐧᐤ.
[50] ᓇᒪᐃᐧᔭ ᒫᑲ ᓂ ᓇᑐᓀᐣ ᑎᐱᔭᐤ ᓂ ᑭᐢᑌᔨᑖᑯᓯᐃᐧᐣ: ᐃᑖᐤ ᐊᓇ ᓀᑐᓇᕽ, ᒥᓇ ᑳ ᐅᔭᓱᐋᐧᓯᐁᐧᐟ.
[51] ᑖᐯᐧ, ᑖᐯᐧ, ᑭᐟ ᐃᑎᓈᐋᐧᐤ, ᑭᐢᐱᐣ ᐊᔨᓯᔨᓂᐤ ᑲᓇᐁᐧᔨᐦᑕᐦᑭ ᓂᐟ ᐃᑌᐧᐃᐧᐣ, ᓇᒪᐃᐧᑳᐨ ᑭᑕ ᐋᐧᐸᐦᑕᑦ ᓂᐳᐃᐧᐣ.
[52] ᐁᑯᓯ ᒫᑲ ᒍᐊᐧᐠ ᑭ ᐃᑌᐊᐧᐠ, ᐁᑲᐧ ᓂ ᑭᐢᑫᔨᑌᓈᐣ ᐁ ᐊᔮᐊᐧᐟ ᒪᒋ ᐊᐦᒑᕽ. ᐁᑊᕒᐁᐊᑦ ᑭ ᓂᐱᐤ, ᒥᓇ ᐅᑭᐢᑭᐁᐧᐦᐃᑫᐊᐧᐠ; ᑭᔭ ᒫᑲ ᑭᐟ ᐃᑖᐧᐣ, ᑭᐢᐱᐣ ᐊᔨᓯᔨᓂᐤ ᑲᓇᐁᐧᔨᐦᑕᐦᑭ ᓂᐟ ᐃᑌᐧᐃᐧᐣ, ᓇᒪᐃᐧᑳᐨ ᑭᑕ ᑯᒋᐢᑕᑦ ᓂᐳᐃᐧᐣ.
[53] ᐊᐊᐧᓯᒣ ᒋ ᑭᔭ ᑭᐟ ᐃᑌᔨᑖᑯᓯᐣ ᐃᐢᐱᐨ ᓄᑖᐃᐧᓇᐣ ᐁᑊᕒᐁᐋᑦ, ᑳ ᑭ ᓂᐱᐟ? ᒥᓇ ᐅᑭᐢᑭᐁᐧᐦᐃᑫᐊᐧᐠ ᑳ ᑭ ᓂᐱᒋᐠ; ᐊᐁᐧᓇ ᒫᑲ ᑭᔭ ᐁᑕᑭᒥᓱᔭᐣ?
[54] ᒋᓴᐢ ᑭ ᓇᐢᑫᐧᐊᐧᓯᒣᐤ, ᑭᐢᐱᐣ ᓂᔭ ᑭᐢᑕᑭᒥᓱᔮᓂ ᓇᒪᐃᐧᔭ ᓈᓂᑕᐤ ᐃᑖᐸᑕᐣ ᓂ ᑭᐢᑕᑭᒥᑯᐃᐧᐣ: ᓄᑖᐃᐧ ᑳ ᑭᐢᑕᑭᒥᐟ; ᓂ ᑭᓭᒪᓂᑐᒥᓇᐣ ᑳ ᐃᑖᔦ:
[55] ᑫᔮᐱᐨ ᒫᑲ ᓇᒪᐃᐧᔭ ᑭ ᑭᐢᑫᔨᒪᐋᐧᐤ; ᒫᑲ ᓂᔭ ᓂ ᑭᐢᑫᔨᒫᐤ; ᑭᐢᐱᐣ ᒫᑲ ᓇᒪᐃᐧᔭ ᓂ ᑭᐢᑫᔨᒫᐤ ᐃᑌᐧᔮᓂ, ᓂ ᑳ ᑲᑭᔮᐢᑭᐢᑭᐣ ᑖᐱᐢᑯᐨ ᑭᔭᐋᐧᐤ: ᒫᑲ ᓂ ᑭᐢᑫᔨᒫᐤ, ᒥᓇ ᓂ ᑲᓇᐁᐧᔨᑕᒫᐧᐣ ᐅᐟ ᐃᑌᐧᐃᐧᐣ.
[56] ᑯᑖᐃᐧᐋᐧᐤ ᐁᑊᕒᐁᐋᑦ ᑭ ᒪᒪᐦᑖᑯᓯᐤ ᐁ ᐃᐧ ᐋᐧᐸᐦᑕᕽ ᓂ ᑭᓯᑲᑦ; ᑭ ᐋᐧᐸᐦᑕᑦ ᒫᑲ, ᐁᑯᓯ ᑭ ᒥᔦᐧᔨᑕᑦ.
[57] ᐁᑯᓯ ᒫᑲ ᒍᐊᐧᐠ ᑭ ᐃᑌᐊᐧᐠ, ᓇᒣᐢᑲᐧ ᓂᔮᓇᓄᒥᑕᓇᐤ ᑭᐟ ᐃᑕᐦᑐ ᐱᐳᓇᐧᐣ, ᑭ ᑭ ᐋᐧᐸᒫᐤ ᒋ ᒫᑲ ᐁᑊᕒᐁᐋᑦ?
[58] ᒋᓴᐢ ᒫᑲ ᐅᒥᓯ ᑭ ᐃᑌᐧᐤ, ᑖᐯᐧ, ᑖᐯᐧ, ᑭᐟ ᐃᑎᓈᐋᐧᐤ, ᐁ ᒪᐧᔦ ᐊᔮᐟ ᐁᑊᕒᐁᐋᑦ ᓂ ᑭ ᐊᔮᐣ.
[59] ᑭ ᐅᑎᓀᐊᐧᐠ ᒫᑲ ᐊᓯᓂᔭ ᐁ ᐃᐧ ᐱᒪᐧᐱᐢᑲᐋᐧᒋᐠ; ᒫᑲ ᒋᓴᐢ ᑭ ᑳᓱ, ᒥᓇ ᐁ ᑭ ᐊᐧᔭᐃᐧᐟ ᑭᐦᒋ ᐊᔭᒥᐦᐁᐃᐧᑲᒥᑯᕽ ᐅᐦᒋ.