[1] ᐸᐃᓬᐊᐟ ᒫᑲ ᑭ ᐅᑎᓀᐤ ᒋᓴᓴ ᒥᓇ ᑭ ᐸᐸᓴᐢᑌᐁᐧᐤ.
[2] ᓯᒫᑲᓂᓴᐠ ᒫᑲ ᑭ ᐊᐱᑳᑕᒪᐧᐠ ᑭᐦᒋ ᐅᑭᒫᐊᐧᐢᑐᑎᐣ ᑳᐃᐧᒥᓇᑲᓯᔭ ᐅᐦᒋ, ᐁ ᑭ ᐳᐢᑕᐢᑐᑎᓇᐋᒋᐠ ᒫᑲ, ᒥᓇ ᑭ ᐳᐢᑕᓵᑲᐁᐊᐧᐠ ᒥᑫᐧᑭᓀᐧᓵᑲᐩ:
[3] ᐁᑯᓯ ᑭ ᐯ ᓈᑌᐊᐧᐠ, ᐁ ᐃᑌᐧᒋᐠ, ᐦᐁᓬ, ᐅ ᑭᐦᒋ ᐅᑭᒫᒥᐋᐧᐊᐧ ᒍᐊᐧᐠ? ᐁᑯᓯ ᑭ ᐸᑲᒪᐁᐧᐊᐧᐠ ᐅ ᒋᐦᒋᐋᐧᐊᐧ ᐅᐦᒋ.
[4] ᐸᐃᓬᐊᐟ ᒫᑲ ᒥᓇ ᑭ ᐊᐧᔭᐃᐧᐤ, ᐁᑯᓯ ᐃᑌᐤ, ᒋᐢᐟ, ᑭ ᐯᑕᒫᑎᓈᐋᐧᐤ, ᑭᑕ ᑭᐢᑫᔨᑕᒣᐠ ᐁᑳ ᑫᑲᐧᐩ ᐁ ᒥᐢᑲᒫᐣ ᑭᑕ ᐅᐦᒋ ᐅᔭᓱᐋᐧᑎᐦᐟ.
[5] ᐁᑯᓯ ᒋᓴᐢ ᑭ ᐯ ᐊᐧᔭᐃᐧᐤ, ᐁ ᑭᑭᐢᑲᕽ ᐊᓂᒪ ᒪᓵᓂ ᑭᐦᒋ ᐅᑭᒫᐊᐧᐢᑐᑎᐣ ᒥᓇ ᒥᑫᐧᑭᓀᐧᓵᑲᐩ. ᐸᐃᓬᐊᐟ ᒫᑲ ᑭ ᐃᑌᐤ, ᒋᐢᐟ, ᐁᐊᐧᑳᐧᓇ ᓈᐯᐤ!
[6] ᐃᐢᐱ ᒫᑲ ᑭᐦᒋ ᐊᔭᒥᐦᐁᐃᐧᔨᓂᐊᐧᐠ ᒥᓇ ᐅᑎᓂᐁᐧᐊᐧᐠ ᐃᐧᔮᐸᒫᒋᐠ, ᑭ ᑌᐯᐧᐊᐧᐠ, ᐁ ᐃᑌᐧᒋᐠ, ᒋᐢᑕᐦᐋᐢᑳᐧᐢ, ᒋᐢᑕᐦᐋᐢᑳᐧᐢ, ᐸᐃᓬᐊᐟ ᐃᑌᐤ, ᐅᑎᓂᕽ ᑭᔭᐋᐧᐤ, ᒥᓇ ᒋᐢᑕᐦᐋᐢᑳᐧᑎᕽ; ᒋᑫᒫ ᓂᔭ ᐃᐧᔭ ᓇᒪᐃᐧᔭ ᓂ ᒥᐢᑲᒫᐧᐣ ᑫᑲᐧᐩ ᑭᑕ ᐅᐦᒋ ᐅᔭᓱᐋᐧᑎᐦᐟ.
[7] ᒍᐊᐧᐠ ᑭ ᓇᐢᑫᐧᐊᐧᓯᒣᐊᐧᐠ, ᓂᐟ ᐊᔮᓈᐣ ᐅᔭᓱᐁᐧᐃᐧᐣ, ᐁᑯᓯ ᑭᑕ ᓂᐱᐟ ᐃᑕᐢᑌᐤ ᐁᐊᐧᑯ ᐅᔭᓱᐁᐧᐃᐧᐣ, ᒋᑫᒫ ᑭᓭᒪᓂᑐ ᐅᑯᓯᓴ ᐃᓯᔨᐦᑳᑎᓱ.
[8] ᐃᐢᐱ ᒫᑲ ᐸᐃᓬᐊᐟ ᐱᔦᐦᑕᕽ ᐅᒪ ᐃᑌᐧᐃᐧᐣ, ᐊᐊᐧᓯᒣ ᑭ ᓭᑭᓯᐤ;
[9] ᐁᑯᓯ ᐱᐦᑐᑫᐤ ᒥᓇ ᐅᔭᓱᐁᐧᐃᐧᑲᒥᑯᕽ, ᒥᓇ ᐃᑌᐤ ᒋᓴᓴ, ᑖᓂᑌ ᐁᐧᒋᔭᐣ? ᒫᑲ ᓇᒪᐃᐧᔭ ᓇᐢᑫᐧᐊᐧᓯᒥᐠ ᒋᓴᓴ.
[10] ᐸᐃᓬᐊᐟ ᒫᑲ ᐃᑌᐤ, ᓇᒪ ᒋ ᑭ ᓇᐢᑫᐧᐊᐧᓯᐃᐣ? ᓇᒪ ᒋ ᑭ ᑭᐢᑫᔨᑌᐣ ᐁ ᑲᐢᑭᑖᔮᐣ ᑭᑕ ᐸᑭᑎᓂᑖᐣ, ᒥᓇ ᐁ ᑲᐢᑭᑖᔮᐣ ᑭᑕ ᒋᐢᑕᐋᐢᑲᐧᑎᑖᐣ?
[11] ᒋᓴᐢ ᑭ ᓇᐢᑫᐧᐊᐧᓯᒣᐤ, ᓇᒪᐃᐧᔭ ᑭ ᑲ ᑲᐢᑭᑖᐣ ᓈᐣᑕᐤ ᑭᑕ ᐃᑐᑕᐃᐧᔭᐣ ᑭᐢᐱᐣ ᐁᑳ ᒥᔨᑲᐃᐧᔭᐣ ᐃᐢᐱᒥᕽ ᐅᐦᒋ: ᐁᐊᐧᑯ ᒫᑲ ᐅᐦᒋ ᐊᓇ ᑳ ᐸᑭᑎᓂᐟ ᑭᔭ ᐃᓯ ᐊᔨᐋᐧᐠ ᐊᔮᐤ ᒪᒋᐦᑎᐃᐧᐣ.
[12] ᐁᐊᐧᑫᐧᔨᐤ ᒫᑲ ᐅᐦᒋ ᐸᐃᓬᐊᐟ ᑭ ᓇᑐᓇᑦ ᑭᑕ ᐸᑭᑎᓈᐟ: ᒫᑲ ᒍᐊᐧᐠ ᑭ ᑌᐯᐧᐊᐧᐠ, ᐁ ᐃᑌᐧᒋᐠ, ᑭᐢᐱᐣ ᐸᑭᑎᓇᒋ ᐊᐊᐧ ᓈᐯᐤ, ᓇᒪᐃᐧᔭ ᑭ ᑎᐱᑐᑕᐋᐧᐤ ᓯᓵᕒ: ᑲᐦᑭᔭᐤ ᐊᐃᐧᔭᐠ ᑳ ᑭᐦᒋ ᐅᑭᒫᑳᑎᓱᐟ ᒫᔨ ᑭᐢᐋᐧᑌᐤ ᓯᓴᕒᐊ.
[13] ᐃᐢᐱ ᒫᑲ ᐸᐃᓬᐊᐟ ᐱᔦᐦᑕᕽ ᐅᐦᐃ ᐃᑌᐧᐃᐧᓇ, ᑭ ᐯ ᐊᐧᔭᐃᐧᑕᐁᐤ ᒋᓴᓴ, ᐁᑯᓯ ᑭ ᓇᐦᐊᐱᐤ ᐅᔭᓱᐁᐧᐊᐧᐱᐃᐧᓂᕽ ᐃᑕ ᐊᓯᓂᐃᐧ ᐊᓈᐢᑳᐣ ᑳ ᐃᓯᔨᐦᑳᑌᐠ, ᒫᑲ ᐦᐃᐸᕒᐅᐃᕽ, ᑳᐸᑕ.
[14] ᒣᑳᐧᐨ ᒫᑲ ᐁ ᐊᐧᐁᐧᔨᑲᑕᒥᕽ ᒪᔮᐢᑯᑖᑐᐃᐧᑯᑐᐃᐧᐣ ᓈᐣᑕᐤ ᓂᑯᑖᐧᓯᐠ ᑎᐸᐃᑲᐣ ᐅᑎᐦᒋᐸᔨᐤ. ᐅᒥᓯ ᒫᑲ ᐃᑌᐤ ᒍᐊᐧ, ᒋᐢᐟ, ᑭ ᑭᐦᒋ ᐅᑭᒫᒥᐋᐧᐤ!
[15] ᑭ ᑌᐯᐧᐊᐧᐠ ᒫᑲ, ᓯᐯᐧᑖᐩ, ᓯᐯᐧᑖᐩ, ᒋᐢᑕᐦᐋᐢᑳᐧᐢ. ᐸᐃᓬᐊᐟ ᐃᑌᐤ, ᓂ ᑲ ᒋᐢᑕᐦᐋᐢᑳᐧᑖᐤ ᒋ ᑭ ᑭᐦᒋ ᐅᑭᒫᒥᐋᐧᐤ? ᑭᐦᒋ ᐊᔭᒥᐦᐁᐃᐧᔨᓂᐋᐧᐠ ᑭ ᓇᐢᑫᐧᐊᐧᓯᐃᐁᐧᐊᐧᐠ, ᓇᒪᐃᐧᔭ ᐊᐃᐧᔭᐠ ᑭᐦᒋ ᐅᑭᒫᐤ ᓂᐟ ᐊᔮᐋᐧᓈᐣ ᐱᑯ ᓯᓴᕒ.
[16] ᐁᑲᐧ ᒫᑲ ᑭ ᐸᑭᑎᓇᒪᐁᐧ ᑭᑕ ᒋᐢᑕᐦᐋᐢᑳᐧᑎᒥᐦᐟ. ᑭ ᐅᑎᓀᐊᐧᐠ ᒫᑲ ᒋᓴᓴ:
[17] ᐁᑯᓯ ᑭ ᐊᐧᔭᐃᐧᐤ, ᐁ ᐅᓂᑳᑕᒫᓱᐟ ᐱᒥᑖᐢᑯᐃᑲᐣ, ᐃᑕ ᐊᓂᒪ ᐁᐧᐢᑎᑳᐧᓂᑲᓂᐊᐧᕽ ᑳ ᐃᓯᔨᐦᑳᑌᐠ, ᐦᐃᐸᕒᐅᐃᕽ ᑳ ᐃᓯᔨᐦᑳᑌᐠ ᑳᓬᑳᑕ:
[18] ᐁᑯᑕ ᑭ ᒋᐢᑕᐦᐋᐢᑳᐧᑌᐊᐧᐠ, ᒥᓇ ᐊᓯᒋ ᓂᓱ ᑯᑕᑲ, ᐋᔨᑕᐤ ᐯᔭᐠ, ᒋᓴᐢ ᒫᑲ ᑕᐢᑕᐃᐧᐨ.
[19] ᐸᐃᓬᐊᐟ ᒫᑲ ᑭ ᒪᓯᓇᐦᐊᑦ ᐃᑕᑭᒋᑳᓱᐃᐧᐣ, ᐁᑯᓯ ᑭ ᐊᐢᑖᐤ ᐱᒥᑖᐢᑯᐃᑲᓂᕽ. ᐁᑯᑕ ᒫᑲ ᑭ ᒪᓯᓇᐃᑳᑌᐤ, ᒋᓴᐢ ᓈᓴᕒᐃᑎᕽ ᐁᐧᐦᒋᐟ, ᒍᐊᐧᐠ ᐅ ᑭᐦᒋ ᐅᑭᒫᒥᐋᐧᐊᐧ.
[20] ᐅᒪ ᒫᑲ ᐃᑕᑭᒋᑳᓱᐃᐧᐣ ᑭ ᐊᔭᒥᑖᐊᐧᐠ ᒥᐦᒉᐟ ᒍᐊᐧᐠ: ᒋᑫᒫ ᐃᑕ ᒋᓴᐢ ᑳ ᒋᐢᑕᐦᐋᐢᑳᐧᑎᐦᐟ ᑭᓯᐋᐧᐠ ᐅᑌᓈᕽ ᑭ ᐊᔮᐤ: ᐁᑯᓯ ᑭ ᒪᓯᓇᐃᑳᑌᐤ ᐦᐃᐸᕒᐅᐃᕽ, ᒥᓇ ᓬᐋᑎᓂᕽ, ᒥᓇ ᑲᕒᐃᑭᕽ.
[21] ᐅ ᑭᐦᒋ ᐊᔭᒥᐦᐁᐃᐧᔨᓂᒥᐋᐧᐊᐧ ᒫᑲ ᒍᐊᐧᐠ ᑭ ᐃᑌᐊᐧᐠ ᐸᐃᓬᐊᑕ, ᐁᑳᐃᐧᔭ ᐃᑕᓯᓇᐊ ᒍᐊᐧᐠ ᐅ ᑭᐦᒋ ᐅᑭᒫᒥᐋᐧᐊᐧ; ᒫᑲ ᐁ ᑭ ᐃᑌᐧᐟ, ᓂᔭ ᐁᐊᐧᑯ ᒍᐊᐧᐠ ᐅ ᑭᐦᒋ ᐅᑭᒫᒥᐋᐧᐊᐧ.
[22] ᐸᐃᓬᐊᐟ ᑭ ᓇᐢᑫᐧᐊᐧᓯᒣᐤ, ᐊᓂᒪ ᑳ ᑭ ᒪᓯᓇᐦᐊᒫᐣ ᓂ ᑭ ᒪᓯᓇᐁᐣ.
[23] ᓯᒫᑲᓂᓴᐠ ᒫᑲ ᐃᐢᐱ ᑳ ᒋᐢᑕᐦᐋᐢᑳᐧᑖᒋᐠ ᒋᓴᓴ, ᑭ ᐅᑎᓇᒣᐧᐊᐧᐠ ᐅ ᑭᑭᐢᑳᒋᑲᓇᔨᐊᐧ, ᐁᑯᓯ ᑭ ᓀᐅᑖᐊᐧᐠ, ᐹᐸᑭ ᑭᑕ ᐊᔮᒋᐠ ᐁ ᐃᐦᑕᓯᒋᐠ; ᐊᓯᒋ ᐅᐢᑯᑖᑳᔨᐤ: ᒥᐢᑯᑖᑲᐩ ᒫᑲ ᓇᒪᐃᐧᔭ ᑭ ᐱᒥᑳᐧᑌᐤ, ᐁ ᐊᐱᑳᑎᐠ ᒥᓯᐁᐧ ᒥᓴᑳᒣ.
[24] ᑭ ᐃᑎᑐᐊᐧᐠ ᒫᑲ, ᐁᑳᐃᐧᔭ ᔮᔨᑭᐱᑕᑖᐠ, ᒫᑲ ᐊᐢᑖᐧᑐᑖᐠ, ᐊᐁᐧᓇ ᑫ ᐋᔮᐟ: ᑭᑕ ᑎᐱᐸᔨᐠ ᑭᐦᒋ ᒪᓯᓇᐦᐃᑫᐃᐧᐣ ᑳ ᐃᑌᐧᒪᑲᕽ, ᑭ ᓇᓈᓂᐢᒋᑖᐧᑐᐊᐧᐠ ᓂ ᑭᑭᐢᑳᒋᑲᓇ, ᒥᓇ ᓂᐢᑯᑖᑲᐩ ᑭ ᐊᐢᑖᐧᑐᐊᐧᐠ. ᐅᐦᐃ ᒫᑲ ᑖᐯᐧ ᓯᒫᑲᓂᓴᐠ ᑭ ᐃᑐᑕᒪᐧᐠ.
[25] ᐁᑯᑕ ᒫᑲ ᐅ ᐱᒥᑖᐢᑯᐃᑲᓂᕽ ᒋᓴᐢ ᑭ ᓂᐸᐃᐧᔨᐊᐧ ᐅᑳᐃᐧᔭ, ᒥᓇ ᐅᑳᐃᐧᔭ ᐅᒋᐋᐧᒥᐢᑫᐧᒥᔨᐊᐧ, ᒣᕒᐃ ᑲᓬᐅᐹᐢ ᐃᐧᐊᐧ, ᒥᓇ ᒣᕒᐃ ᒫᐠᑕᓬᐃᐣ.
[26] ᐃᐢᐱ ᒫᑲ ᒋᓴᐢ ᐃᐧᔮᐸᒫᐟ ᐅᑳᐃᐧᔭ, ᒥᓇ ᑭᐢᑭᓄᐦᐊᒪᐋᐧᑲᓇ ᑳ ᓵᑭᐋᐟ, ᐁᑯᑕ ᐁ ᓂᐸᐃᐧᔨᐟ, ᐃᑌᐤ ᐅᑳᐃᐧᔭ, ᐃᐢᑫᐧᐤ, ᒋᐢᐟ, ᑭ ᑯᓯᐢ!
[27] ᐁᑲᐧ ᐃᑌᐤ ᐊᓂᐦᐃ ᑭᐢᑭᓄᐦᐊᒪᐋᐧᑲᓇ, ᒋᐢᐟ, ᑭᑳᐃᐧ! ᐁᑯᐢᐱ ᒫᑲ ᐅᐦᒋ ᐊᓇ ᑭᐢᑭᓄᐦᐊᒪᐋᐧᑲᐣ ᑭ ᐃᑐᑕᐁᐤ ᐃᐧᔭ ᐃᐧᑭᕽ.
[28] ᒣᐧᐢᑕᐢ ᐅᒪ ᒋᓴᐢ, ᐁ ᑭᐢᑫᔨᑕᕽ ᑲᐦᑭᔭᐤ ᑫᑲᐧᔭ ᐁᑲᐧ ᐁ ᑭᓯᒋᑲᑌᔨᑭ, ᑭᐦᒋ ᒪᓯᓇᐦᐃᑫᐃᐧᐣ ᑭᑕ ᑎᐱᐸᔨᐠ, ᐅᒥᓯ ᐃᑌᐧᐤ, ᓂ ᓄᑌᔮᐹᑳᐧᐣ.
[29] ᐁᑯᑕ ᒫᑲ ᑭ ᐊᐢᑌᐤ ᐊᓯᐊᐧᒋᑲᐣ ᐁ ᓵᑲᐢᑭᓀᐠ ᓯᐃᐧᑳᐳ: ᐁᑯᓯ ᐹᑯᑫᐧᐅᐣ ᐁ ᒧᐢᑭᓀᔨᐠ ᓯᐃᐧᑳᐳ ᑭ ᐊᐢᑖᐊᐧᐠ ᐋᓂᐢᑲᐊᐧᐢᑯᕽ, ᒥᓇ ᑭ ᐃᑎᓯᓇᒪᐧᐠ ᐅᑐᓂᔨᕽ.
[30] ᐃᐢᐱ ᒫᑲ ᒋᓴᐢ ᑳ ᒥᔨᐦᐟ ᐊᓂᒪ ᓯᐃᐧᑳᐳ, ᑭ ᐃᑌᐧᐤ, ᐁᑲᐧ ᑭᓯᒋᑳᑌᐤ: ᑭ ᓈᒥᐢᑫᐧᔨᐤ ᒫᑲ, ᒥᓇ ᑭ ᐸᑭᑎᓀᐤ ᐅᐟ ᐊᐦᒑᐦᑲᐧ.
[31] ᒍᐊᐧᐠ ᒫᑲ, ᒋᑫᒫ ᐁᑲᐧ ᐊᐧᐁᐧᔨᐃᐧᐣ, ᐁᑳ ᒥᔭᐊᐧ ᑭᑕ ᐊᑯᑌᔨᑭ ᐱᒥᑖᐢᑯᐃᑲᓂᕽ ᐁ ᐊᔭᒥᐦᐁᑭᓯᑳᐠ (ᒋᑫᒫ ᐁᐊᐧᑯ ᐊᔭᒥᐦᐁᑭᓯᑳᐤ ᑭ ᑭᐦᒋ ᑭᓯᑳᐤ) ᑭ ᑲᑫᐧᒋᒣᐊᐧᐠ ᐸᐃᓬᐊᑕ ᑭᑕ ᑲᐢᑭᑳᑌᐅᒥᐦᐟ, ᐁᑯᓯ ᒫᑲ ᑭᑕ ᓯᐯᐧᑕᐃᒥᐦᐟ.
[32] ᓯᒫᑲᓂᓴᐠ ᒫᑲ ᑭ ᐯ ᐃᑐᑎᐊᐧᐠ, ᐁ ᑭ ᑲᐢᑭᑳᑌᐋᐧᒋᐠ ᒫᑲ ᐊᓂᐦᐃ ᓂᐢᑕᑦ, ᒥᓇ ᐊᓂᐦᐃ ᑯᑕᑲ ᑳ ᑭ ᐊᓯᒋ ᒋᐢᑕᐦᐋᐢᑳᐧᑎᒥᐦᐟ:
[33] ᒫᑲ ᐃᐢᐱ ᐁᐧᑎᑖᒋᐠ ᒋᓴᓴ, ᒥᓇ ᐃᐧᔮᐸᐦᑕᑭᐠ ᓵᓴᐩ ᐁ ᓂᐱᔨᐟ, ᓇᒪᐃᐧᔭ ᑲᐢᑭᑳᑌᐁᐧᐊᐧᐠ:
[34] ᒫᑲ ᐯᔭᐠ ᐊᓂᑭ ᓯᒫᑲᓂᓴᐠ ᑭ ᑕᑯᒣᐤ ᐅᐱᒣᔭᐤ ᑕᑲᒋᑲᐣ ᐅᐦᒋ, ᓭᒫᐠ ᒫᑲ ᐁᑯᑕ ᑭ ᐅᐦᒋᒋᐊᐧᐣ ᓂᐱ ᐊᓯᒋ ᒥᐦᑯ.
[35] ᐊᓇ ᒫᑲ ᑳ ᑭ ᐋᐧᐸᐦᑕᕽ ᑭ ᐋᑐᑕᑦ, ᒥᓇ ᑖᐯᐧᒪᑲᓂᔨᐤ ᐅᐟ ᐋᒋᒧᐃᐧᐣ, ᑭᐢᑫᔨᑕᑦ ᒫᑲ ᐁ ᑖᐯᐧᐟ, ᑭᔭᐋᐧᐤ ᒥᓇ ᑭᑕ ᑖᐯᐧᑕᒣᐠ.
[36] ᒋᑫᒫ ᐅᐦᐃ ᑭ ᐊᔨᑭᓇᐧ, ᑭᐦᒋ ᒪᓯᓇᐦᐃᑫᐃᐧᐣ ᑭᑕ ᑎᐱᐸᔨᐠ, ᓇᒪᐊᐧᐨ ᐯᔭᐠ ᐅᐢᑲᐣ ᑭᑕ ᐱᑯᓇᒫᐧᐣ.
[37] ᒥᓇ ᒫᑲ ᑯᑕᐠ ᑭᐦᒋ ᒪᓯᓇᐦᐃᑫᐃᐧᐣ ᐃᑌᐧᒪᑲᐣ ᑭᑕ ᑲᓇᐋᐧᐸᒣᐊᐧᐠ ᐊᓂᐦᐃ ᑳ ᑭ ᑕᑲᒫᒋᐠ.
[38] ᒣᐧᐢᑕᐢ ᐃᔨᑯᕽ ᒫᑲ ᐅᒪ, ᒍᓯᑊ ᐋᕒᐃᒫᑎᔭ ᐅᐦᒋ, ᐃᐧᔭ ᒥᓇ ᒋᓴᐢ ᐅ ᑭᐢᑭᓄᐦᐊᒪᐋᐧᑲᓇ, ᒫᑲ ᑭᒧᐨ ᐁ ᑯᐢᑖᐟ ᒍᐊᐧ, ᑭ ᑲᑫᐧᒋᒣᐤ ᐸᐃᓬᐊᑕ ᑭᑕ ᐅᑎᓇᒫᐧᐟ ᐃᐧᔭᐃᐧᔨᐤ ᒋᓴᓴ: ᑭ ᐸᑭᑎᓇᒫᐠ ᒫᑲ ᐸᐃᓬᐊᑕ. ᐁᑯᓯ ᑭ ᐯ ᐃᑐᐦᑌᐤ, ᐁ ᑭ ᓯᐯᐧᑕᑖᐋᐧᐟ ᐃᐧᔭᐃᐧᔨᐤ.
[39] ᑭ ᐯ ᐃᑐᐦᑌᐤ ᐃᐧᐢᑕ ᓂᑯᑎᒪᐢ, ᐊᓇ ᓂᐢᑕᑦ ᑳ ᑭ ᐯ ᓈᑖᐟ ᓂᐹᑎᐱᐢᐠ, ᐁ ᐯᑖᐟ ᐁ ᑭᔨᑲᐃᐧᓂᑳᑎᔨᐠ ᒪᕒ ᒥᓇ ᐋᓬᐅᐢ, ᓈᐣᑕᐤ ᒥᑖᑕᐦᑐᒥᑕᓇᐤ ᑕᐦᑐ ᑯᓯᑲᐧᐣ.
[40] ᐁᑯᓯ ᑭ ᐅᑎᓇᒣᐧᐊᐧᐠ ᐃᐧᔭᐃᐧᔨᐤ ᒋᓴᓴ, ᐁ ᑭ ᐁᐧᐁᐧᑭᓇᑭᐠ ᐋᐧᐱᐢᑫᑭᓄᕽ ᐊᓯᒋ ᐊᓂᐦᐃ ᐃᐧᑭᒫᑯᐅᐃᐧᓇ, ᐁ ᐃᓯᐦᒋᑫᒋᐠ ᒫᓇ ᒍᐊᐧᐠ ᐁ ᓇᐃᓂᐁᐧᒋᐠ.
[41] ᐃᑕ ᒫᑲ ᑳ ᑭ ᒋᐢᑕᐦᐋᐢᑳᐧᑎᐟ ᑭ ᐊᔮᐤ ᑭᐢᑎᑳᐣ; ᐁᑯᑕ ᒫᑲ ᑭᐢᑎᑳᓂᕽ ᑭ ᐊᔮᐤ ᐅᐢᑭ ᓇᐦᐃᓂᑐᐃᐧᑲᒥᐠ ᐁᑳ ᐃᐧᑳᐨ ᒉᐢᑲᐧ ᐊᔨᓯᔨᓂᐤ ᐁᑯᑕ ᐁ ᐱᒥᓯᒥᐦᐟ.
[42] ᐁᑯᑕ ᒫᑲ ᒍᐊᐧᐠ ᐅ ᐊᐧᐁᐧᔨᐃᐧᓂᐋᐧᐤ ᐅᐦᒋ (ᒋᑫᒫ ᐊᓂᒪ ᓇᐦᐃᓂᑐᐃᐧᑲᒥᐠ ᑭᓯᐋᐧᐠ ᑭ ᐊᔮᐤ) ᑭ ᐱᒥᓯᒣᐊᐧᐠ ᒋᓴᓴ.