[1] ᓂᐢᑕᑦ ᒫᑲ ᐁ ᑭᓯᑳᐠ ᐁᐊᐧᑯ ᐁ ᐊᑎ ᐃᐢᐸᔨᐠ ᐯ ᐃᑐᐦᑌᐤ ᒣᕒᐃ ᒫᐠᑕᓬᐃᐣ ᐃᐧᐸᐨ ᑫᑭᓭᐹ, ᑫᔮᐱᐨ ᐁ ᐊᐧᓂᑎᐱᐢᑳᐠ, ᐁᑯᑕ ᓇᐦᐃᓂᑐᐃᐧᑲᒥᑯᕽ, ᐁᑯᓯ ᐋᐧᐸᒣᐤ ᐊᓯᓂᔭ ᐁ ᑭ ᐅᑎᓂᒥᐦᐟ ᓇᐦᐃᓂᑐᐃᐧᑲᒥᑯᕽ ᐅᐦᒋ.
[2] ᑭ ᓯᐯᐧᐸᑖᐤ ᒫᑲ, ᒥᓇ ᑭ ᐅᑎᐦᑌᐤ ᓵᐃᒪᐣ ᐱᑕᕒᐊ, ᒥᓇ ᐊᓂᐦᐃ ᑯᑕᑲ ᑭᐢᑭᓄᐦᐊᒪᐋᐧᑲᓇ, ᐊᓂᐦᐃ ᒋᓴᐢ ᑳ ᓵᑭᐋᐟ, ᐁᑯᓯ ᐃᑌᐤ, ᑭ ᐅᑎᓀᐊᐧᐠ ᑳ ᑎᐯᔨᐦᒋᑫᔨᐟ ᓇᐦᐃᓂᑐᐃᐧᑲᒥᑯᕽ ᐅᐦᒋ, ᓇᒪᐃᐧᔭ ᒫᑲ ᓂ ᑭᐢᑫᔨᑌᓈᐣ ᑖᓂᑕ ᑳ ᐱᒥᓯᒫᒋᐠ.
[3] ᐱᑕᕒ ᒫᑲ ᑭ ᓯᐯᐧᑌᐤ, ᐊᓯᒋ ᐊᓇ ᑯᑕᐠ ᑭᐢᑭᓄᐦᐊᒪᐋᐧᑲᐣ, ᐁ ᑭ ᐊᑎ ᐃᑐᐦᑌᒋᐠ ᓇᐦᐃᓂᑐᐃᐧᑲᒥᑯᕽ.
[4] ᑖᐱᐢᑯᐨ ᒫᑲ ᑭ ᐊᑎ ᐱᒥᐸᑖᐊᐧᐠ: ᐁᑯᓯ ᐊᓇ ᑯᑕᐠ ᑭᐢᑭᓄᐦᐊᒪᐋᐧᑲᐣ ᑭ ᐊᑎ ᓇᑲᒋᐸᐁᐤ ᐱᑕᕒᐊ, ᒥᓇ ᓂᑳᐣ ᑭ ᐅᑎᑕᑦ ᓇᐦᐃᓂᑐᐃᐧᑲᒥᐠ;
[5] ᐁᑯᓯ ᐁ ᓇᐊᐧᑭᐟ ᐱᑐᑲᒥᐠ ᐁ ᐃᑖᐱᐟ, ᐋᐧᐸᐦᑕᑦ ᐋᐧᐱᐢᑫᑭᓇᐧ ᐁ ᐊᐢᑌᔨᑭ; ᒫᑲ ᓇᒪᐃᐧᔭ ᐱᐦᑐᑫᐤ.
[6] ᓵᐃᒪᐣ ᐱᑕᕒ ᒫᑲ ᐃᐧᐢᑕ ᑭ ᑕᑯᓯᐣ, ᓈᐋᐧᐩ, ᐁᑯᓯ ᑭ ᐱᐦᑐᑫᐤ ᓇᐦᐃᓂᑐᐃᐧᑲᒥᑯᕽ; ᐋᐧᐸᐦᑕᑦ ᒫᑲ ᐋᐧᐱᐢᑫᑭᓇᐧ ᐁ ᐊᐢᑌᔨᑭ,
[7] ᒥᓇ ᐊᓂᒪ ᐋᐧᐱᐢᑫᑭᓄᐢ ᑳ ᑭ ᐁᐧᐁᐧᑭᐢᑎᑳᐧᓀᐱᓱᔨᐟ, ᓇᒪᐃᐧᔭ ᐁ ᐊᓯᑕᐢᑌᔨᐠ ᐊᓂᐦᐃ ᐋᐧᐱᐢᑫᑭᓇᐧ, ᒫᑲ ᐱᐢᑭᐢ ᐁ ᑎᑎᐯᑭᓂᑳᑌᐠ.
[8] ᐁᑲᐧ ᑭ ᐱᐦᑐᑫᐤ ᐊᓇ ᑯᑕᐠ ᑭᐢᑭᓄᐦᐊᒪᐋᐧᑲᐣ ᒥᓇ, ᐊᓇ ᓂᐢᑕᑦ ᑳ ᑭ ᑕᑯᓯᕽ ᓇᐦᐃᓂᑐᐃᐧᑲᒥᑯᕽ, ᐁᑯᓯ ᑭ ᐋᐧᐸᐦᑕᑦ ᒥᓇ ᑭ ᑖᐯᐧᑕᑦ.
[9] ᒋᑫᒫ ᓇᒣᐢᑲᐧ ᑭᐢᑫᔨᑕᒪᐧᐠ ᑭᐦᒋ ᒪᓯᓇᐦᐃᑫᐃᐧᐣ ᐅᒋᑕ ᐱᑯ ᑭᑕ ᐊᐧᓂᐢᑳᔨᐟ ᒥᓇ ᓂᐳᐃᐧᓂᕽ ᐅᐦᒋ.
[10] ᐁᑯᓯ ᑭᐢᑭᓄᐦᐊᒪᐋᐧᑲᓇᐠ ᑭ ᓯᐯᐧᑌᐊᐧᐠ ᒥᓇ ᐃᐧᔭᐋᐧᐤ ᐃᐧᑭᐋᐧᕽ ᐃᓯ.
[11] ᒣᕒᐃ ᒫᑲ ᑭ ᓂᐸᐃᐧᐤ ᐊᐧᔭᐃᐧᑎᒥᕽ ᓇᐦᐃᓂᑐᐃᐧᑲᒥᑯᕽ ᐁ ᒫᑐᐟ: ᐁᑯᓯ, ᐅᒪ ᐁ ᒫᑐᐟ, ᑭ ᓇᐊᐧᑭᐤ ᐱᐦᒋ ᐁ ᐃᑖᐱᐟ ᓇᐦᐃᓂᑐᐃᐧᑲᒥᑯᕽ;
[12] ᐁᑯᓯ ᐋᐧᐸᒣᐤ ᓂᓱ ᐅᑭᓯᑯᐊᐧ ᐁ ᐋᐧᐱᐢᑭᐅᔨᐟ ᐁ ᐊᐱᔨᐟ, ᐯᔭᐠ ᐅᐢᑎᑳᐧᓂᔨᕽ, ᒥᓇ ᐯᔭᐠ ᐅᓯᑎᔨᕽ, ᐃᑕ ᒋᓴᐢ ᐃᐧᔭᐤ ᐁ ᑭ ᐊᐢᑌᔨᐠ.
[13] ᑭ ᐃᑎᐠ ᒫᑲ, ᐃᐢᑫᐧᐤ, ᑖᓀᑭ ᑳ ᒫᑐᔭᐣ? ᐅᒥᓯ ᐃᑌᐤ, ᒋᑫᒫ ᐁ ᑭ ᐅᑎᓈᒋᐠ ᓄ ᑎᐯᔨᐦᒋᑫᒪ, ᐁᑯᓯ ᓇᒪᐃᐧᔭ ᓂ ᑭᐢᑫᔨᑌᐣ ᑖᓂᑕ ᑳ ᐱᒥᓯᒫᒋᐠ.
[14] ᐃᐢᐱ ᐅᒥᓯ ᑳ ᐃᑌᐧᐟ, ᑭ ᑫᐧᐢᑭᑳᐸᐃᐧᐤ, ᐁ ᐋᐧᐸᒣᐤ ᒋᓴᓴ ᐁ ᓂᐸᐃᐧᔨᐟ, ᓇᒪᐃᐧᔭ ᒫᑲ ᑭᐢᑫᔨᑕᑦ ᐁᐊᐧᑲᐧᓂ ᒋᓴᓴ.
[15] ᒋᓴᐢ ᐃᑌᐤ, ᐃᐢᑫᐧᐤ, ᑖᓀᑭ ᑳ ᒫᑐᔭᐣ? ᐊᐁᐧᓇ ᓀᓈᑐᓇᐊᐧᐟ? ᐃᐧᔭ, ᐁᐊᐧᑯ ᐁᑐᑫ ᑭᐢᑎᑫᐃᐧᔨᓂᐤ ᐁ ᐃᑌᔨᑕᕽ, ᐃᑌᐤ, ᐅᑭᒫᐤ, ᑭᐢᐱᐣ ᑳ ᓯᐯᐧᑕᐋᐊᐧᑌ ᐃᐧᐦᑕᒪᐃᐧᐣ ᑖᓂᑕ ᑳ ᐸᑭᑎᓇᐟ, ᐁᑯᓯ ᓂ ᑲ ᐅᑎᓈᐤ.
[16] ᒋᓴᐢ ᐃᑌᐤ, ᒣᕒᐃ. ᑭ ᑫᐧᐢᑭᑳᐸᐃᐧᐤ ᐅᒥᓯ ᐁ ᐃᑖᐟ, ᐦᐃᐸᕒᐅᐃᕽ, ᕒᐋᐳᓈᐩ; ᐁᐊᐧᑳᐧᓂᒪ ᐁ ᐃᑌᐧᕽ, ᑫᐢᑭᓄᐦᐊᒫᑫᔭᐣ.
[17] ᒋᓴᐢ ᐃᑌᐤ, ᐁᑳᐃᐧᔭ ᓵᒥᓂᐣ; ᒋᑫᒫ ᓇᒣᐢᑲᐧ ᐃᐢᐱᒥᕽ ᓂ ᓈᑖᐤ ᐁᐧᔪᑖᐃᐧᕽ: ᒫᑲ ᓇᑕᐋᐧᐸᒥᐠ ᓂᒋᐋᐧᒪᐠ ᒥᓇ ᐃᓯᐠ, ᐃᐢᐱᒥᕽ ᓂ ᓈᑖᐤ ᓄᑖᐃᐧ ᒥᓇ ᑯᑖᐃᐧᐋᐧᐤ, ᓂ ᑭᓭᒪᓂᑐᑦ ᒥᓇ ᑭ ᑭᓭᒪᓂᑐᒥᐋᐧᐤ.
[18] ᒣᕒᐃ ᒫᐠᑕᓬᐃᐣ ᑭ ᐯ ᐃᐧᐦᑕᒪᐁᐧᐤ ᑭᐢᑭᓄᐦᐊᒪᐋᐧᑳᓇ, ᓂ ᑭ ᐋᐧᐸᒫᐤ ᑳ ᑎᐯᔨᐦᒋᑫᐟ, ᒥᓇ ᐊᓂᐦᐃ ᑳ ᑭ ᐊᔨᑎᑯᐟ.
[19] ᐃᐢᐱ ᒫᑲ ᐁᐧᑖᑯᓯᐠ, ᐁᐊᐧᑯ ᐁ ᑭᓯᑳᐠ, ᓂᐢᑕᑦ ᐁ ᑭᓯᑳᐠ ᐁᐊᐧᑯ ᐁ ᐃᐢᐸᔨᐠ ᓵᓴᐩ ᒫᑲ ᐁ ᑭ ᑭᐸᐦᐃᑳᑌᑭ ᐃᐢᑳᐧᑌᒪ ᐃᑕ ᑭᐢᑭᓄᐦᐊᒪᐋᐧᑲᓇᐠ ᐁ ᐊᔮᒋᐠ, ᐃᐧᔭ ᐁ ᑯᐢᑖᒋᐠ ᒍᐊᐧ, ᒋᓴᐢ ᑭ ᐯ ᓇᑕᐃᐧ ᓂᐸᐃᐧᐤ ᑖᐋᐧᔨᕽ, ᐁᑯᓯ ᐃᑌᐤ, ᐯᔭᑕᑫᔨᒧᐃᐧᐣ ᑭ ᑲ ᐃᐧ ᐊᔮᓈᐋᐧᐤ.
[20] ᐃᐢᐱ ᒫᑲ ᐅᒪ ᑳ ᐃᑌᐧᐟ, ᑭ ᐋᐧᐸᐦᑕᐁᐤ ᐅᒋᐦᒋᔭ ᒥᓇ ᐃᐧᔭᐤ. ᑭ ᒪᒪᐦᑖᑯᓯᐊᐧᐠ ᒫᑲ ᑭᐢᑭᓄᐦᐊᒪᐋᐧᑲᓇᐠ, ᐃᐢᐱ ᐃᐧᔮᐸᒫᒋᐠ ᑳ ᑎᐯᔨᐦᒋᑫᔨᐟ.
[21] ᒋᓴᐢ ᒫᑲ ᑭ ᐃᑌᐤ ᒥᓇ, ᐯᔭᑕᑫᔨᒧᐃᐧᐣ ᑭ ᑲ ᐃᐧ ᐊᔮᓈᐋᐧ: ᑳ ᑭ ᐃᓯ ᓯᐯᐧᑎᓴᐅᐟ ᐁᐧᔪᑖᐃᐧᕽ ᐁᑯᓯ ᓂᐢᑕ ᑭᐟ ᐃᓯ ᓯᐯᐧᑎᓴᐅᑎᓈᐋᐧ.
[22] ᐃᐢᐱ ᒫᑲ ᐅᒪ ᑳ ᐃᑌᐧᐟ ᑭ ᐸᑭᑕᑖᒧᑐᑕᐁᐧᐤ ᒥᓇ ᐃᑌᐤ, ᐅᑎᓂᕽ ᑳ ᑲᓈᑎᓯᐟ ᐊᐦᒑᕽ:
[23] ᐱᑯ ᐊᐃᐧᔭᐠ ᐅ ᒪᒋᐃᑎᐃᐧᓇ ᑫ ᐳᓀᔨᑕᒪᐋᐧᔦᐠ ᐳᓀᔨᑕᒪᐋᐧᐊᐧᐠ, ᒥᓇ ᐱᑯ ᐊᐃᐧᔭᐠ ᑫ ᒥᒋᒥᓇᒪᐋᐧᔦᐠ, ᒥᒋᒥᓇᒪᐋᐧᐊᐧᐠ.
[24] ᒫᑲ ᑖᒪᐢ, ᐯᔭᐠ ᐊᓂᑭ ᒥᑖᑕᐟ ᓂᓱᓵᑊ, ᑎᑎᒪᐢ ᑳ ᐃᓯᔨᐦᑳᓱᐟ, ᓇᒪᐃᐧᔭ ᐃᐧᒉᐁᐧᐤ ᐃᐢᐱ ᒋᓴᓴ ᑳ ᑕᑯᓯᓂᔨᐟ.
[25] ᑯᑕᑲᐠ ᒫᑲ ᑭᐢᑭᓄᐦᐊᒪᐋᐧᑲᓇᐠ ᑭ ᐃᑌᐊᐧᐠ, ᓂ ᑭ ᐋᐧᐸᒫᓈᐣ ᑳ ᑎᐯᔨᐦᒋᑫᐟ. ᒫᑲ ᑭ ᐃᑌᐤ, ᑭᐢᐱᐣ ᐁᑳ ᐋᐧᐸᐦᑕᒪᐧᑭ ᐅᒋᐦᒋᕽ ᐁ ᐁᓯᑎᓂᔨᑭ ᓴᑲᐃᑲᓇ, ᒥᓇ ᐁᑳ ᓂᒋᐦᒋ ᐅᐦᒋ ᒥᐢᑯᓇᒪᐧᑫ ᐁ ᐁᑎᐢᑳᑯᐟ ᓴᑲᐃᑲᓇ, ᒥᓇ ᐁᑳ ᒥᐢᑯᓇᒪᐧᑭ ᐅᐱᒣᔭᐤ, ᓇᒪᐃᐧᔭ ᓂ ᑲ ᑖᐯᐧᑌᐣ.
[26] ᑳ ᐳᓂ ᐊᔨᓈᓀᐅ ᑭᓯᑳᔨᐠ ᒫᑲ ᐅ ᑭᐢᑭᓄᐦᐊᒪᐋᐧᑲᓇ ᒥᓇ ᐱᑐᑲᒥᐠ ᑭ ᐊᔮᔨᐊᐧ, ᑖᒪᐢ ᒫᑲ ᐁ ᐃᐧᒉᐋᐧᐟ. ᒋᓴᐢ ᑭ ᑕᑯᓯᐣ, ᐃᐢᑳᐧᑌᒪ ᐁ ᑭ ᑭᐸᐦᐃᑳᑌᑭ, ᐁᑯᓯ ᑭ ᐃᑌᐤ, ᐯᔭᑕᑫᔨᒧᐃᐧᐣ ᑭ ᑲ ᐃᐧ ᐊᔮᓈᐋᐧ.
[27] ᐁᑲᐧ ᑭ ᐃᑌᐤ ᑖᒪᓴ, ᐯ ᐃᓯᒋᐦᒉᔨ ᐋᐧᐸᐦᑕ ᒥᓇ ᓂᒋᐦᒋᔭ; ᒥᓇ ᐯ ᐃᓯᒋᐦᒉᔨ ᒥᐢᑯᓂᐣ ᐅᐱᒣᔭᐤ: ᐁᑳᐃᐧᔭ ᐅᐟ ᐋᓀᐧᑕᒧᐃᐧᓂ ᒫᑲ ᑖᐯᐧᑕ.
[28] ᑖᒪᐢ ᒫᑲ ᑭ ᓇᐢᑫᐧᐊᐧᓯᒣᐤ ᐅᒥᓯ ᐁ ᑭ ᐃᑖᐟ, ᓄ ᑎᐯᔨᐦᒋᑫᑦ ᒥᓇ ᓂ ᑭᓭᒪᓂᑐᑦ.
[29] ᒋᓴᐢ ᐃᑌᐤ, ᒋᑫᒫ ᐁ ᑭ ᐋᐧᐸᒥᔭᐣ, ᑭ ᑭ ᑖᐯᐧᑌᐣ: ᓴᐁᐧᔨᑖᑯᓯᐋᐧᐠ ᐊᓂᑭ ᐁᑳ ᑳ ᐅᐦᒋ ᐋᐧᐸᒥᒋᐠ, ᐁᔨᐁᐧᕽ ᒫᑲ ᑳ ᑭ ᑖᐯᐧᑕᐦᑭᐠ.
[30] ᒥᐦᒉᐟ ᒫᑲ ᑯᑕᑲ ᑭᐢᑭᓇᐋᐧᒋ ᐃᓯᐦᒋᑫᐃᐧᓇ ᑭ ᐃᑐᑕᑦ ᒋᓴᐢ ᐁ ᐊᐧᐸᒥᑯᐟ ᐅ ᑭᐢᑭᓄᐦᐊᒪᐋᐧᑲᓇ, ᐁᑳ ᑳ ᒪᓯᓇᐃᑳᑌᑭ ᐅᑕ ᒪᓯᓇᐦᐃᑲᓂᕽ,
[31] ᐅᐦᐃ ᒫᑲ ᒪᓯᓇᐃᑳᑌᐊᐧ ᑭᑕ ᑖᐯᐧᑕᒣᐠ ᒋᓴᐢ ᐁᐊᐧᑳᐧᓇ ᙭, ᐅ ᑯᓯᓴ ᑭᓭᒪᓂᑐ; ᐁ ᑖᐯᐧᑕᒣᐠ ᒫᑲ, ᑭᑕ ᐅᐦᒋ ᐊᔮᔦᐠ ᐱᒫᑎᓯᐃᐧᐣ ᐅ ᐃᐧᔪᐃᐧᓂᕽ.