[1] ᓂᐢᑕᑦ ᒪᓯᓇᐦᐃᑲᐣ ᓂ ᑭ ᐅᓯᑖᐣ ᐋ ᑎᐋᐱᓬᐊᐢ, ᐁ ᐋᑐᑕᒫᐣ ᑲᐦᑭᔭᐤ ᐊᓂᒪ ᒋᓴᐢ ᑳ ᑭ ᒫᒋ ᐃᑐᑕᕽ ᒥᓇ ᑳ ᑭ ᑭᐢᑭᓇᐊᒫᑫᐟ,
[2] ᐱᔨᐢ ᐊᓂᒪ ᐁ ᑭᓯᑳᐠ ᑳ ᑭ ᐅᑎᓂᐦᐟ ᐃᐢᐱ ᑳ ᐊᐧᐁᐧᔭᓱᐋᐧᑖᐠ ᑳ ᑲᓈᑎᓯᔨᐟ ᐊᐦᒑᐦᑲᐧ ᐅᐦᒋ, ᐊᓂᐦᐃ ᐊᐹᐢᑎᓬᐊ ᑳ ᑭ ᓇᐊᐧᓱᓈᐟ:
[3] ᐁᐊᐧᑲᐧᓂ ᒥᓇ ᑳ ᐳᓂᐸᔨᔨᐠ ᐅ ᑯᑕᑭᑖᐃᐧᐣ ᑳ ᑭ ᐋᐧᐸᑎᔨᓱᐢᑕᐋᐧᐟ ᐁ ᐱᒫᑎᓯᐟ ᒥᒉᑕᐧᔭᐠ ᐁ ᐃᓯ ᑫᒋᓈᔦᔨᑕᒥᐋᐟ, ᓀᒥᑕᓇᐤ ᑭᓯᑳᐊᐧ ᐁ ᑭ ᐋᐧᐸᒥᑯᐟ, ᒥᓇ ᐁ ᑕᓯᑕᕽ ᐊᓂᐦᐃ ᑳ ᐊᑭᑌᑭ ᑭᓭᒪᓂᑐ ᐅᐟ ᐅᑌᓇᐃᐧᐃᐧᓂᕽ:
[4] ᐁᑯᓯ ᒫᑲ ᐁ ᒫᒪᐃᐧ ᒫᐊᐧᒋᐃᑐᒋᐠ, ᑭ ᐊᔮᑳᐧᒥᒣᐤ ᐁᑳ ᑭᑕ ᓯᐯᐧᑌᔨᐟ ᒉᕒᐅᓴᓬᐊᒥᕽ ᐅᐦᒋ, ᒫᑲ ᑭᑕ ᐯᑖᐋᐧᒋᐠ ᐅᐟ ᐊᓱᑕᒫᑫᐃᐧᓂᔨ ᐁᐧᔪᑖᐃᐧᕽ, ᐁᐊᐧᑯ, ᑭ ᐃᑌᐤ, ᑭ ᑭ ᐯᑕᐃᐧᓈᐋᐧᐤ:
[5] ᒋᑫᒫ ᒑᐣ ᑖᐯᐧ ᑭ ᐸᑊᑕᐃᓯᐃᐧᐃᐁᐧᐤ ᓂᐱ ᐅᐦᒋ; ᒫᑲ ᑭᔭᐋᐧ ᑭ ᑲ ᐹᑊᑕᐃᓯᐃᐧᐃᑲᐃᐧᓈᐋᐧᐤ ᑳ ᑲᓈᑎᓯᐟ ᐊᐦᒑᕽ ᐅᐦᒋ ᓇᒪᐃᐧᔭ ᒥᒉᑐ ᑭᓯᑳᐤ ᓂᑳᐣ ᐅᑌ.
[6] ᐃᐧᔭᐋᐧᐤ ᒫᑲ, ᐃᐢᐱ ᐁ ᒫᒪᐃᐧ ᐊᔮᒋᐠ, ᑭ ᑲᑫᐧᒋᒣᐊᐧᐠ, ᐁ ᐃᑌᐧᒋᐠ, ᑌᐯᔨᐦᒋᑫᔭᐣ, ᐊᓄᐦᐨ ᐅᒪ ᑳ ᐃᑭᕽ ᑭ ᑲ ᒥᔮᐊᐧᐠ ᒋ ᐃᐢᕒᐁᐃᓬ ᑭᐦᒋ ᐅᑭᒫᐃᐧᐃᐧᐣ?
[7] ᑭ ᐃᑌᐤ ᒫᑲ, ᓇᒪᐃᐧᔭ ᑭᔭᐋᐧᐤ ᑭᑕ ᑭᐢᑫᔨᑕᒣᐠ ᑭᓯᑳᐊᐧ ᒥᓇ ᐁ ᐋᐃᐢᐱᑖᔭᐊᐧᕽ, ᐁᐧᔪᑖᐃᐧᕽ ᐃᐧᔭ ᑳ ᑎᐯᔨᑕᕽ.
[8] ᒫᑲ ᑭ ᑲ ᒥᔨᑲᐃᐧᓈᐋᐧᐤ ᑲᐢᑭᐦᐁᐃᐧᓯᐃᐧᐣ, ᐃᐢᐱ ᑳ ᑲᓈᑎᓯᐟ ᐊᐦᒑᕽ ᐅᑎᐦᑎᑯᔦᑯ: ᐁᑯᓯ ᑭ ᑲ ᐋᒋᒥᓈᐋᐧᐤ ᒉᕒᐅᓴᓬᐊᒥᕽ, ᒥᓇ ᒥᓯᐁᐧ ᒍᑎᔭᐃᕽ ᒥᓇ ᓴᒣᕒᐃᔭᐃᕽ, ᒥᓇ ᐁ ᑳᑭᓯᐸᐢᑲᒥᑳᐠ ᐊᐢᑭ.
[9] ᐃᐢᐱ ᒫᑲ ᐅᐦᐃ ᑳ ᐊᔨᑌᐧᐟ, ᐁ ᒣᑳᐧ ᑭᑖᐸᒫᒋᐠ, ᐃᐢᐱᒥᕽ ᑭ ᐃᓯ ᐅᑎᓈᐤ; ᐁᑯᓯ ᐊᐧᐢᑯᕽ ᐁ ᐊᑎ ᐋᑯᐸᔨᔨᐟ ᓇᒪᐃᐧᔭ ᐋᐧᐸᒣᐊᐧᐠ.
[10] ᒣᑳᐧᐨ ᒫᑲ ᑭᓯᑯᕽ ᓱᑭ ᐁ ᐃᑖᐱᒋᐠ ᐁ ᐊᑎ ᐅᐱᐢᑳᔨᐟ, ᒫᑎᑲ, ᓂᓱ ᓈᐯᐊᐧ ᑭ ᐃᐧᒋᑳᐸᐃᐧᐢᑖᑲᐧᐠ ᐁ ᐋᐧᐱᐢᑭᐅᔨᐟ;
[11] ᐁᐊᐧᑲᐧᓂ ᒥᓇ ᑳ ᐃᑎᑯᒋᐠ ᑭᔭᐋᐧᐤ ᑳᓬᐃᓬᐃᐃᐧᔨᓂᑎᐠ, ᑖᓀᑭ ᑳ ᓂᐸᐃᐧᔦᐟ ᑭᓯᑯᕽ ᐁ ᐃᑖᐱᔦᐠ? ᐊᐊᐧ ᒋᓴᐢ, ᑳ ᓇᑲᑎᑯᔦᐠ ᑭᐦᒋ ᑭᓯᑯᕽ ᐁ ᐃᓯ ᐅᑎᓂᐦᐟ, ᐁᑯᓯ ᒥᓇ ᑫ ᐃᓯ ᑕᑯᓯᕽ ᑳ ᑭ ᐃᓯ ᐋᐧᐸᒫᔦᐟ ᑭᓯᑯᕽ ᐁ ᐃᑐᐦᑌᐟ.
[12] ᐁᑲᐧ ᒫᑲ ᑭ ᐯ ᑭᐁᐧᐊᐧᐠ ᒉᕒᐅᓴᓬᐊᒥᕽ ᐊᓂᑕ ᐊᐧᒋᕽ ᐅᐦᒋ ᐋᓬᐃᐯᐟ ᑳ ᐃᓯᔨᐦᑳᑌᐠ, ᐁᐊᐧᑯ ᑭᓯᐋᐧᐠ ᒉᕒᐅᓴᓬᐊᒥᕽ ᑳ ᐊᔮᐠ, ᐯᔭᐠ ᐊᔭᒥᐦᐁᑭᓯᑳᐤ ᐱᒥᐱᒋᐃᐧᐣ ᐃᔨᑯᕽ.
[13] ᐃᐢᐱ ᒫᑲ ᐱᔨᑐᑫᒋᐠ, ᑭ ᐃᐢᑳᐧᑕᐃᐧᐊᐧᐠ ᐃᐢᐱᒥᕽ ᐋᐧᐢᑳᐦᐃᑲᓂᕽ, ᐃᑕ ᐊᓂᒪ ᐁ ᐊᔮᒋᐠ, ᐱᑕᕒ ᒥᓇ ᒑᐣ ᒥᓇ ᒉᒥᐢ ᒥᓇ ᐋᐣᑕᕒᐅ, ᐱᓬᐃᑊ ᒥᓇ ᑖᒪᐢ, ᐹᕒᑖᓬᐊᒧ ᒥᓇ ᒫᐟᔪ, ᒉᒥᐢ ᐅ ᑯᓯᓴ ᐋᓬᐱᔭᐢ, ᒥᓇ ᓵᐃᒪᐣ ᓯᓬᐋᐟ ᑳ ᐃᑎᐦᐟ, ᒥᓇ ᒍᑕᐢ ᐅᑯᓯᓴ ᒉᒥᐢ.
[14] ᑲᐦᑭᔭᐤ ᐅᑭ ᑭ ᒫᒪᐃᐧ ᐋᑲᒣᔨᒧᐊᐟ ᐁ ᐊᔭᒥᐦᐋᒋᐠ, ᐊᓯᒋ ᐊᓂᐦᐃ ᐃᐢᑫᐧᐊᐧ ᒥᓇ ᒣᕒᐃ ᐅᑳᐃᐧᔭ ᒋᓴᐢ, ᒥᓇ ᐅᒋᐋᐧᒪ.
[15] ᐁᑯᐢᐱ ᒫᑲ ᐁ ᑲᑭᓯᑳᐠ ᐱᑕᕒ ᑭ ᓂᐸᐃᐧᐤ ᒣᑳᐧ ᐊᔨᕽ ᐃᑕ ᐁ ᐊᔮᒋᐠ ᑯᒋᐋᐧᒥᑐᒋᐠ ᐁᑯᓯ ᑭ ᐃᑌᐧᐤ (ᒥᐦᒉᐟ ᐊᔨᓯᔨᓂᐊᐧᐠ ᒫᑲ ᑭ ᒫᐊᐧᒋᐃᑐᐊᐧᐠ, ᓈᐣᑕᐤ ᒥᑖᑕᐦᑐᒥᑕᓇᐤ ᓂᓯᑕᓇᐤ ᐊᔨᐋᐧᐠ),
[16] ᓂᒋᐋᐧᒥᑎᐠ, ᑭ ᐃᑕᐢᑌᐤ ᑭᑕ ᑎᐱᐸᔨᐠ ᑭᐦᒋ ᒪᓯᓇᐦᐃᑫᐃᐧᐣ, ᑳ ᑲᓈᑎᓯᐟ ᐊᐦᒑᕽ ᑲᔮᐢ ᑳ ᑭ ᐃᑌᐧᐟ ᐅᑐᓂᔨᕽ ᐅᐦᒋ ᑌᐱᑕ, ᑳ ᑭ ᐃᑖᐟ ᒍᑕᓴ, ᑳ ᑭᐢᑭᓄᑕᐋᐟ ᐊᓂᐦᐃ ᑳ ᑭ ᐅᑎᓈᔨᐟ ᒋᓴᓴ.
[17] ᒋᑫᒫ ᑭ ᐊᓯᑕᑭᒋᑳᓱ ᑭᔮᓇᐤ, ᒥᓇ ᑭ ᒥᔮᐤ ᐸᐦᑭ ᐅᒪ ᐊᑐᐢᑫᐃᐧᐣ.
[18] (ᐊᐊᐧ ᒫᑲ ᓈᐯᐤ ᑭ ᐋᑖᐁᐧᐤ ᑭᐢᑎᑳᓂᔨᐤ ᐁ ᐅᑎᓯᐟ ᐅ ᒪᒋᐃᑎᐃᐧᐣ; ᐁᑯᓯ ᐁ ᐊᒋᒋ ᐸᐦᑭᓯᕽ, ᐋᐱᑕᐤ ᑭ ᐳᐢᑯᐸᔨᐤ ᐁᑯᓯ ᐅᑕᑖᒥᔭᐊᐧ ᑭ ᑲᐧᔭᑯᐸᔨᔨᐊᐧ.
[19] ᑭ ᑭᐢᑫᔨᑕᒪᐧᐠ ᒫᑲ ᑲᐦᑭᔭᐤ ᑳ ᐊᔮᒋᐠ ᒉᕒᐅᓴᓬᐊᒥᕽ; ᐁᑯᓯ ᐃᐧᔭᐋᐧᐤ ᐅ ᐱᑭᐢᑫᐧᐃᐧᓂᐋᐧᕽ ᐁᐊᐧᑯ ᑭᐢᑎᑳᐣ ᐋᑫᓬᑎᒪ ᑭ ᐃᓯᔨᐦᑳᑌᐤ, ᐁᐊᐧᑳᐧᓂᒪ, ᒥᐦᑯᐃᐧ ᑭᐢᑎᑳᐣ.)
[20] ᒋᑫᒫ ᐃᑕᓯᓇᐦᐃᑳᑌᐤ ᓂᑲᒧ ᒫᓯᓇᐃᑲᓂᕽ, ᑭᔮᑦ ᐅᐟ ᐃᑖᐃᐧᐣ ᑭᑕ ᐱᓯᓯᑲᐧᐢᑌᔨᐤ, ᒥᓇ ᐁᑳᐃᐧᔭ ᐊᔨᓯᔨᓂᐤ ᐁᑯᑕ ᑭᑕ ᐃᐧᑭᐤ: ᒥᓇ, ᐅᐟ ᐃᑕᐱᐃᐧᐣ ᑭᔮᑦ ᑯᑕᑲ ᑭᑕ ᐅᑎᓇᒥᔨᐊᐧ.
[21] ᐊᓂᑭ ᓈᐯᐊᐧᐠ ᒫᑲ ᐅᐦᒋ ᑳ ᑭ ᐃᐧᒉᐃᐧᑯᔭᑯᐠ ᑕᐦᑭᓀ ᒣᑳᐧᐨ ᑳ ᑎᐯᔨᐦᒋᑫᐟ ᒋᓴᐢ ᐁ ᐸᐱᑐᑫᐟ ᒥᓇ ᐁ ᐊᐧᐊᐧᔭᐃᐧ ᐃᐧᒉᐃᐧᑯᔭᕽ,
[22] ᐅ ᐹᑊᑖᐃᓯᐃᐧᐦᐃᐁᐧᐃᐧᐣ ᒑᐣ ᐅᐦᒋ, ᐱᔨᐢ ᐊᓂᒪ ᐁ ᑭᓯᑳᐠ ᑳ ᑭ ᓇᑲᑎᑯᔭᕽ ᐃᐢᐱᒥᕽ ᐁ ᐃᓯ ᐅᑎᓂᐦᐟ, ᐱᑯ ᑭᑕ ᐅᑎᓂᐦᐟ ᐯᔭᐠ ᐁᑯᑕ ᐅᐦᒋ ᑭᑕ ᑭ ᐋᑐᑕᕽ ᐃᐧᐢᑕ ᐅᐟ ᐋᐱᓯᓯᓄᐃᐧᓂᔨᐤ.
[23] ᓂᓱ ᒫᑲ ᑭ ᓂᑳᓇᔦᐊᐧᐠ, ᒍᓯᑊ ᐹᕒᓵᐸᐢ ᑳ ᐃᑎᐦᐟ, ᒐᐢᑕᐢ ᑳ ᐃᓯ ᐊᐢᐱᔨᑳᓱᐟ, ᒥᓇ ᒫᑖᔭᐢ.
[24] ᑭ ᐊᔭᒥᐦᐋᐊᐧᐠ ᒫᑲ, ᐁᑯᓯ ᑭ ᐃᑌᐧᐊᐧᐠ, ᑭᔭ, ᑌᐯᔨᐦᒋᑫᔭᐣ, ᑳ ᑭᐢᑫᔨᑕᒪᐧᐟ ᐅᑌᐃᐋᐧᐊᐧ ᑲᐦᑭᔭᐤ ᐊᔨᓯᔨᓂᐊᐧᐠ, ᐋᐧᐸᐦᑕᐦᐃᐁᐧ ᐅᑭ ᑳ ᐃᓯ ᓂᓯᒋᐠ ᑖᓈᓇ ᑳᐦ ᓇᐊᐧᓱᓇᐟ,
[25] ᑭᑕ ᐅᑎᓇᕽ ᐃᑕᐱᐃᐧᐣ ᐅᒪ ᐊᑐᐢᑫᐃᐧᓂᕽ ᒥᓇ ᐊᐸᐢᑎᓬᐃᐃᐧᐃᐧᓂᕽ, ᐃᑕ ᐅᐦᒋ ᒍᑕᐢ ᑳ ᑭ ᐸᐦᑭᓯᕽ, ᑭᑕ ᐃᑐᐦᑌ ᐃᐧᔭ ᐅᐟ ᐃᑖᐃᐧᓂᕽ.
[26] ᐁᑲᐧ ᒫᑲ ᑭ ᐁᐧᐱᓂᑫᐊᐧᐠ; ᐳᑎ ᒫᑲ ᒫᑖᔭᐢ ᑭ ᐅᑎᓈᐤ; ᐁᑯᓯ ᑭ ᐊᓯᑕᑭᒫᐤ ᐊᓂᐦᐃ ᒥᑖᑕᐟ ᐯᔭᑯᓵᑊ ᐊᐹᐢᑎᓬᐊ.