[1] ᐁᑲᐧ ᒫᑲ ᐅᐦᐃ ᐁ ᑲᑭᓯᑳᑭ, ᐃᐢᐱ ᐁ ᐊᑎ ᒥᐦᒉᑎᒋᐠ ᑭᐢᑭᓄᐦᐊᒪᐋᐧᑲᓇᐠ, ᑭ ᐸᓯᑯᒪᑲᐣ ᐁ ᓇᔦᑖᐁᐧᔨᒫᒋᐠ ᑲᕒᐃᓯᔮᓂᐃᐧ ᒍᐊᐧᐠ ᐊᓂᐦᐃ ᐃᐸᕒᐅᐊᐧ, ᒋᑫᒫ ᐅ ᓯᑳᐃᐧᐢᑫᐧᒥᐋᐧᐊᐧ ᐁ ᐊᑎᒋᐃᒥᐦᐟ ᑕᐦᑐ ᑭᓯᑳᐤ ᐸᒥᐦᐃᐁᐧᐃᐧᓂᕽ.
[2] ᐊᓂᑭ ᒫᑲ ᒥᑖᑕᐟ ᓂᓱᓵᑊ ᑭ ᓇᑐᒣᐊᐧᐠ ᐁ ᒫᒪᐁᐧᔭᑎᔨᐟ ᑭᐢᑭᓄᐦᐊᒪᐋᐧᑲᓇ, ᐁᑯᓯ ᑭ ᐃᑌᐊᐧᐠ, ᓇᒪᐃᐧᔭ ᓇᐃᓈᑲᐧᐣ ᓂᔭᓈᐣ ᑭᑕ ᓇᑲᑕᒫᕽ ᑭᓭᒪᓂᑐ ᐅᐟ ᐊᔭᒥᐃᐧᐣ, ᐁᑯᓯ ᑭᑕ ᐸᒥᑖᔮᕽ ᒥᒋᓱᐃᐧᓈᑎᑲᐧ.
[3] ᓇᐊᐧᓴᐋᐧᐸᒧᐠ ᒫᑲ, ᐁᐧᒋᐋᐧᒥᔮᕽ, ᑭᔭᐋᐧᐤ ᐅᐦᒋ ᑌᐸᑯᑊ ᓈᐯᐊᐧᐠ ᐁ ᒥᔮᐧᑐᑖᑯᓯᒋᐠ, ᐁ ᒧᐢᑭᓀᒋᐠ ᐊhᒑᐦᑲᐧ ᒥᓇ ᐃᔨᓂᓯᐃᐧᐣ, ᑭᑕ ᑭ ᐅᔭᑭᒫᔮᑭᐠ ᐅᒪ ᑭᑕ ᐸᒥᑖᒋᐠ.
[4] ᒫᑲ ᓂᔭᓈᐣ ᑖᐱᑕᐃᐧ ᓂ ᑲ ᐊᔮᓈᐣ ᐊᔭᒥᐦᐋᐃᐧᓂᕽ, ᒥᓇ ᐁ ᐊᑐᐢᑳᑕᒫᕽ ᐊᔭᒥᐃᐧᐣ.
[5] ᐊᓂᒪ ᒫᑲ ᐃᑌᐧᐃᐧᐣ ᑭ ᓇᐃᐢᑳᑲᐧᐠ ᑳ ᒫᒪᐁᐧᔭᑎᒋᐠ ᐊᔨᓯᔨᓂᐊᐧᐠ: ᐁᑯᓯ ᑭ ᓇᐊᐧᓱᓀᐊᐧᐠ ᐃᐢᑎᐱᓇ, ᓈᐯᐤ ᐁ ᒧᐢᑭᓀᐟ ᑖᐯᐧᔦᔨᑕᒧᐃᐧᐣ ᒥᓇ ᑳ ᑲᓈᑎᓯᔨᐟ ᐊᐦᒑᐦᑲᐧ, ᒥᓇ ᐱᓬᐃᑊ, ᒥᓇ ᐸᕒᐋᑳᕒᐊᐢ, ᒥᓇ ᓂᑫᓇᕒ, ᒥᓇ ᑖᐃᒪᐣ, ᒥᓇ ᓂᑲᓬᐊᐢ ᐅᑫᐧᐢᑭᓯᑖᐧᐤ ᐋᐣᑎᐊᐠ ᐅᐦᒋ:
[6] ᐁᐊᐧᑲᐧᓂ ᑭ ᐅᑎᐢᑲᐊᐧᐱᐢᑕᐁᐊᐧᐠ ᐊᐹᐢᑎᓬᐊ: ᐃᐢᐱ ᒫᑲ ᑳ ᐊᔭᒥᐦᐋᒋᐠ, ᑭ ᓵᒥᒋᐦᒑᒣᐊᐧᐠ.
[7] ᑭ ᔭᑭᐅᒪᑲᓂᔨᐤ ᒫᑲ ᑭᓭᒪᓂᑐ ᐅᐟ ᐃᑌᐧᐃᐧᐣ; ᒥᐢᑕᐦᐃ ᑭ ᐊᑎ ᐅᓵᒣᔭᑎᐊᐧᐠ ᑭᐢᑭᓄᐦᐊᒪᐋᐧᑲᓇᐠ ᒉᕒᐅᓴᓬᐊᒥᕽ; ᒥᓇ ᒥᐦᒉᐟ ᐊᔭᒥᐦᐁᐃᐧᔨᓂᐊᐧᐠ ᑭ ᓇᓇᐃᑕᒪᐧᐠ ᑖᐯᐧᔦᔨᑕᒧᐃᐧᐣ.
[8] ᐃᐢᑎᐱᐣ ᒫᑲ, ᐁ ᒧᐢᑭᓀᐟ ᑭᓭᐋᐧᑎᓯᐃᐧᐣ ᒥᓇ ᑲᐢᑭᐦᐁᐃᐧᓯᐃᐧᐣ, ᑭ ᐃᑐᑕᑦ ᒫᒪᐢᑳᐨ ᐃᓯᐦᒋᑫᐃᐧᓇ ᒥᓇ ᐋᐧᐸᐦᑕᐦᐃᐁᐧᐃᐧᓇ ᒣᑳᐧ ᐊᔨᓯᔨᓂᓈᕽ.
[9] ᒫᑲ ᐋᑎᐦᐟ ᑭ ᐸᓯᑯᐊᐧᐠ, ᑳ ᐅᐦᒋᒋᐠ ᐊᓂᒪ ᐊᔭᒥᐦᐁᐃᐧᑲᒥᐠ ᐅᐟ ᐊᔭᒥᐦᐁᐃᐧᑲᒥᑯᐋᐧᐤ ᓬᐃᐸᕒᑎᓇᐠ ᑳ ᐃᓯᔨᐦᑳᑌᐠ, ᒥᓇ ᓴᐃᕒᐃᓂᔮᓇᐠ ᐅᐦᒋ, ᒥᓇ ᐋᕒᐃᐠᓵᐣᑕᕒᐃᔮᓇᐠ ᒥᓇ ᐊᓂᑭ ᓯᓬᐃᓯᔭ ᒥᓇ ᐁᓯᔭ ᑯᒋᒋᐠ, ᐁ ᐋᔮᓯᑌᒪᒋᐠ ᐃᐢᑎᐱᓇ.
[10] ᓇᒪᐃᐧᔭ ᒫᑲ ᑭ ᓵᑯᒋᑖᐊᐧᐠ ᐃᔨᓂᓯᐃᐧᐣ ᒥᓇ ᐊᐦᒑᐦᑲᐧ ᑳ ᐅᐦᒋ ᐱᑭᐢᑫᐧᔨᐟ.
[11] ᐁᑲᐧ ᒫᑲ ᑭ ᒫᔨᓯᑭᐢᑲᐁᐧᐊᐧᐠ ᐊᔨᓯᔨᓂᐊᐧ, ᐁᐊᐧᑲᐧᓂᐠ ᐁ ᐃᑌᐧᒋᐠ, ᓂ ᑭ ᐯᑕᐋᐧᓈᐣ ᐁ ᐹᐢᑖᒧᐃᐧ ᑭᐢᐋᐧᑖᐟ ᒧᓯᓴ, ᒥᓇ ᑭᓭᒪᓂᑐᐊᐧ.
[12] ᐁᑯᓯ ᑭ ᐅᐯᐧᐁᐊᐧᐠ ᐊᔨᓯᔨᓂᐊᐧ, ᒥᓇ ᑳ ᓂᑳᓀᔨᑖᑯᓯᔨᐟ, ᒥᓇ ᒪᓯᓇᐦᐃᑫᐃᐧᔨᓂᐊᐧ, ᐁᑯᓯ ᑭ ᐯ ᓈᑌᐊᐧᐠ, ᐁ ᑭ ᐅᑎᑎᓈᒋᐠ, ᒥᓇ ᐁ ᑭ ᐃᑐᑕᐊᒋᐠ ᐅᔭᓱᐁᐧᐃᐧᓂᕽ,
[13] ᐁᑯᓯ ᑭ ᐅᔭᐱᐁᐊᐧᐠ ᐅᑭᔮᐢᑭᐋᐧᒋᒧᐊ, ᐁᐊᐧᑲᐧᓂ ᐁ ᐃᑌᐧᔨᐟ, ᐊᐊᐧ ᐊᔨᓯᔨᓂᐤ ᓇᒪᐃᐧᔭ ᐳᓂᑕᐤ ᐁ ᒫᔨ ᑭᐢᐋᐧᑕᕽ ᐅᒪ ᑳ ᑲᓈᑕᓂᔨᐠ ᐃᑖᐃᐧᐣ, ᒥᓇ ᐅᔭᓱᐁᐧᐃᐧᐣ:
[14] ᒋᑫᒫ ᓂ ᑭ ᐯᑕᐋᐧᓈᐣ ᐁ ᐃᑌᐧᐟ, ᐊᐊᐧ ᒋᓴᐢ ᓈᓴᕒᐃᑎᕽ ᑯᐦᒋᐟ ᑭᑕ ᓂᓯᐊᐧᓈᒋᑖᐤ ᐅᒪ ᐃᑖᐃᐧᐣ, ᒥᓇ ᑭᑕ ᐋᑕᐢᑖᐤ ᐃᓯᐦᒋᑫᐃᐧᓇ ᒧᓯᐢ ᑳ ᑭ ᒥᔨᑯᔭᕽ.
[15] ᑲᐦᑭᔭᐤ ᒫᑲ ᑳ ᐊᐱᒋᐠ ᐅᔭᓱᐁᐧᐃᐧᓂᕽ, ᓱᐦᑭ ᐁ ᑭᑖᐸᒫᒋᐠ, ᐋᐧᐸᐦᑕᒣᐧᐊᐧᐠ ᐅᑳᐧᑲᓂᔨᐤ ᑖᐱᐢᑯᐨ ᐅᑭᓯᑯ ᐅᑳᐧᑲᐣ.