[1] ᐃᐢᐱ ᒫᑲ ᐊᓂᒪ ᐯᐣᑎᑲᐢᐟ ᑭᓯᑳᐤ ᐁᐧᑎᒋᐸᔨᐠ, ᑲᐦᑭᔭᐤ ᐯᔭᑲᐧᓄᕽ ᑭ ᒫᒪᐃᐧ ᐊᔮᐊᐧᐠ.
[2] ᓯᓯᑯᐨ ᒫᑲ ᑭᓯᑯᕽ ᑭ ᐅᐦᒋ ᐯᐦᑖᑲᐧᐣ ᑖᐱᐢᑯᐨ ᐁ ᒥᐢᑕᐦᐃ ᐱᒣᐧᐁᐧᐢᑎᕽ, ᐁᑯᓯ ᒥᓯᐁᐧ ᑭ ᑌᐱᑖᑲᐧᐣ ᐋᐧᐢᑳᐦᐃᑲᓂᕽ ᐃᑕ ᐁ ᐊᐱᒋᐠ.
[3] ᐁᑯᓯ ᑭ ᓄᑯᐦᐃᓱᐢᑖᑲᐧᐠ ᒥᑌᔭᓂᔭ ᐁ ᐸᐯᐢᑭᒋ ᐊᔭᑭ, ᑖᐱᐢᑯᐨ ᐃᐢᑯᑌᐤ; ᐁᑯᓯ ᑲᐦᑭᔭᐤ ᑭ ᐅᑎᐦᑎᑲᐧᐠ.
[4] ᑲᐦᑭᔭᐤ ᒫᑲ ᑭ ᒧᐢᑭᓀᐢᑳᑲᐧᐠ ᑳ ᑲᓈᑎᓯᔨᐟ ᐊᐦᒑᐦᑲᐧ, ᒥᓇ ᑭ ᒫᒋ ᐱᑭᐢᑫᐧᐊᐧᐠ ᑯᑕᑲ ᐱᑭᐢᑫᐧᐃᐧᓇ, ᐊᐦᒑᐦᑲᐧ ᐁ ᐃᓯ ᒥᔨᑯᒋᐠ ᐃᑌᐧᐃᐧᐣ.
[5] ᐁᑯᑕ ᒫᑲ ᑭ ᐊᔮᐊᐧ ᒉᕒᐅᓴᓬᐊᒥᕽ, ᒍᐊᐧᐠ, ᐊᔭᒥᐦᐋᐋᐧᑎᓯᐃᐧ ᐊᔨᓯᔨᓂᐊᐧᐠ, ᑲᐦᑭᔭᐤ ᐁ ᐃᑕᐢᑳᓀᓯᒋᐠ ᐊᔨᓯᔨᓂᐊᐧᐠ ᓯᐹ ᑭᓯᑯᕽ ᐅᐦᒋ.
[6] ᐃᐢᐱ ᒫᑲ ᐅᒪ ᐁ ᐯᒋᑳᑌᐠ, ᐁ ᐅᓴᒣᔭᑎᒋᐠ ᐊᔨᓯᔨᓂᐊᐧᐠ ᑭ ᐯ ᒫᒪᐃᐧ ᐃᑐᐦᑌᐊᐧᐠ, ᐁᑯᓯ ᑭ ᐊᐧᐋᐧᓀᔨᑕᒪᐧᐠ, ᒋᑫᒫ ᑲᐦᑭᔭᐤ ᐊᐃᐧᔭᐠ ᐯᑕᐁᐧᐤ ᐁ ᐱᑭᐢᑫᐧᔨᐟ ᐃᐧᔭ ᐅᐟ ᐃᓯ ᐱᑭᐢᑫᐧᐃᐧᓂᕽ.
[7] ᐁᑯᓯ ᑲᐦᑭᔭᐤ ᑭ ᒫᒪᐢᑳᑕᒪᐧᐠ ᒥᓇ ᑖᓂᓯ ᐃᐧᔭ ᐅᒪ ᑭ ᐃᑌᔨᑕᒪᐧᐠ, ᐁ ᐃᑌᐧᒋᐠ, ᒋᐢᐟ, ᓇᒪ ᒋ ᑲᐦᑭᔭᐤ ᐅᑭ ᑳ ᐱᑭᐢᑫᐧᒋᐠ ᑳᓬᐊᓬᐃᐃᐧᔨᓂᐊᐧᐠ?
[8] ᑖᓂᓯ ᒫᑲ ᐁᓯ ᐯᑕᐋᐧᔭᑯᐠ, ᑲᐦᑭᔭᐤ ᐊᔨᓯᔨᓂᐤ ᑭᐟ ᐃᓯ ᐱᑭᐢᑫᐧᐃᐧᓂᓈᕽ, ᐃᑕ ᑳ ᑭ ᓂᐦᑖᐃᐧᑭᔭᕽ?
[9] ᐹᓬᑎᔭᓇᐠ ᒥᓇ ᒥᑕᐠ ᒥᓇ ᐁᓬᐊᒪᐃᑕᐠ, ᒥᓇ ᑳ ᐅᐟ ᐊᐢᑭᒋᐠ ᒣᓱᐳᑌᒥᔭ, ᒍᑎᔭ ᒥᓇ ᑳᐸᑖᓯᔭ, ᐹᐣᑕᐢ ᒥᓇ ᐁᓯᔭ.
[10] ᐸᕒᐃᒋᔭ ᒥᓇ ᐸᑦᐱᓬᐃᔭ, ᐃᒋᑊᐟ ᒥᓇ ᐸᑭ ᓬᐃᐱᔭ ᒋᑭ ᓵᐃᕒᐃᓂ ᑳ ᐊᔮᐠ, ᐅᑲᐯᓯᐊᐧᐠ ᕒᐅᑦ ᐅᐦᒋ, ᒍᐊᐧᐠ ᐋᑎᐦᐟ ᒥᓇ ᑫᐧᐢᑭᓈᑲᓇᐠ.
[11] ᑲᕒᐃᑕᐠ ᒥᓇ ᐊᕒᐁᐱᔮᓇᐠ, ᒥᑐᓂ ᑭ ᐯᑕᐋᐧᓇᐊᐧᐠ ᑭᔮᓇᐤ ᑭᐟ ᐃᓯ ᐱᑭᐢᑫᐧᐃᐧᓂᓈᕽ, ᐁ ᑕᓯᑕᑭᐠ ᑭᓭᒪᓂᑐ ᐅ ᑭᐦᒋ ᐃᓯᐦᒋᑫᐃᐧᓇ.
[12] ᑲᐦᑭᔭᐤ ᒫᑲ ᑭ ᒫᒪᐢᑳᑕᒪᐧᐠ, ᒥᓇ ᐁ ᑭ ᐊᐧᐋᐧᓀᔨᑕᐦᑭᐠ, ᐅᒥᓯ ᐁ ᐊᔨᑎᑐᒋᐠ, ᑫᑲᐧᐩ ᐃᐧᔭ ᐅᒪ ᑳ ᐊᔨᑭᕽ?
[13] ᑯᑕᑲᐠ ᒫᑲ ᐃᐧᔮ ᐁ ᐹᐱᓄᑕᑭᐠ ᑭ ᐃᑌᐧᐊᐧᐠ, ᐅᐢᑭ ᓱᒥᓈᐳ ᓵᑲᐢᑭᓀᐢᑳᑲᐧᐠ.
[14] ᒫᑲ ᐱᑕᕒ, ᐁ ᓂᐸᐃᐧᐟ ᐊᓯᒋ ᐊᓂᑭ ᒥᑖᑕᐟ ᐯᔭᑯᓵᑊ, ᓱᑭ ᑭ ᐱᑭᐢᑫᐧᐤ, ᒥᓇ ᑭ ᑭᑐᑌᐤ ᐁᐊᐧᑲᐧᓂ, ᐁ ᐃᑌᐧᐟ, ᑭᔭᐋᐧᐤ ᒍᑎᔭ ᐊᔨᓯᔨᓂᑎᐠ, ᒥᓇ ᑲᐦᑭᔭᐤ ᑭᔭᐋᐧᐤ ᑳ ᐅᐟ ᐃᑖᐃᐧᓂᔦᐠ ᒉᕒᐅᓴᓬᐊᒥᕽ, ᑭᐢᑫᔨᑕᒧᐠ ᐅᒪ ᒥᓇ ᓇᑐᐦᑕᒧᐠ ᓂᐟ ᐃᑌᐧᐃᐧᓇ.
[15] ᒋᑫᒫ ᓇᒪᐃᐧᔭ ᐅᑭ ᑭᐢᑫᐧᐯᐊᐧᐠ ᑳ ᐃᑌᔨᑕᒣᐠ; ᐃᐧᔭ ᐱᒉᔭᐠ ᓂᐢᑐ ᑎᐸᐃᑲᐣ ᐊᓄᐦᐨ ᑳ ᑭᓯᑳᐠ;
[16] ᒫᑲ ᐁᐊᐧᑯ ᐅᒪ ᑳ ᑭ ᐃᑌᐧᐠ ᐅᑭᐢᑭᐁᐧᐦᐃᑫᐤ ᒍᐃᓬ;
[17] ᑭᑕ ᐊᔨᑭᐣ ᒫᑲ ᐃᐢᑳᐧᔮᐨ ᐊᑎ ᑲᑭᓯᑳᑭ ᐃᑌᐧᐤ ᑭᓭᒪᓂᑐ, ᓂ ᑲ ᓯᑭᓇᒪᐋᐧᐊᐧᐠ ᓂᐟ ᐊᒑᐦᑲᐧ ᑲᐦᑭᔭᐤ ᑳ ᐅ ᐃᐧᔮᓯᐟ: ᐁᑯᓯ ᑭᑯᓯᓯᐋᐧᐊᐧᐠ ᒥᓇ ᑭᑖᓂᓯᐋᐧᐊᐧᐠ ᑭᑕ ᑭᐢᑭᐁᐧᐦᐃᑫᐊᐧᐠ, ᒥᓇ ᑯᐢᑭᓂᑭᒥᐋᐧᐊᐧᐠ ᑭᑕ ᐋᐧᐸᐦᑕᒪᐧᐠ ᐃᓯᓇᒧᐃᐧᓇ, ᒥᓇ ᑭ ᑭᓭᔨᓂᒥᐊᐧᐊᐧᐠ ᑭᑕ ᐸᐊᐧᒥᐊᐧᐠ ᐸᐋᐧᒥᐃᐧᓇ:
[18] ᐁᐦᐁ ᒥᓇ ᓂᐟ ᐊᑐᐢᑫᔮᑲᓇᐠ ᒥᓇ ᓂᐟ ᐊᑐᐢᑫᔮᑲᓂᐢᑫᐧᒪᐠ ᐁᐊᐧᑯ ᑲᑭᓯᑳᑭ ᓂ ᑲ ᓯᑭᓇᒪᐊᐧᐊᐧᐠ ᓂᐟ ᐊᒑᐦᑲᐧ ᐁᑯᓯ ᑭᑕ ᑭᐢᑭᐁᐧᐦᐃᑫᐊᐧᐠ.
[19] ᐁᑯᓯ ᓂ ᑲ ᐋᐧᐸᐦᑕᐃᐋᐧᐣ ᑳ ᒫᒪᐢᑳᑌᔨᑖᑲᐧᑭ ᑭᓯᑯᕽ ᐃᐢᐱᒥᕽ, ᒥᓇ ᑭᐢᑭᓇᐋᐧᒋ ᐃᓯᐦᒋᑫᐃᐧᓇ ᐊᐢᑭᕽ ᓂᒑᔨᕽ. ᒥᐦᑯ, ᒥᓇ ᐃᐢᑯᑌᐤ. ᒥᓇ ᐁ ᐱᑭᓭᔮᐸᑌᐠ:
[20] ᑭᓯᑳᐃᐧ ᐱᓯᑦ ᑭᑕ ᐊᐧᓂᑎᐱᐢᑭᐋᐤ, ᒥᓇ ᑎᐱᐢᑳᐃᐧ ᐱᓯᑦ ᑭᑕ ᒥᐦᑯᓯᐟ, ᒪᐧᔦᐢ ᐅ ᑭᓯᑳᑦ ᑳ ᑎᐯᔨᐦᒋᑫᐟ ᐅᑎᐦᒋᐸᔨᔨᐠ, ᐊᓂᒪ ᑭᐦᒋ ᒥᓇ ᐃᔮᑐᑖᑲᐧᕽ ᑭᓯᑳᐤ:
[21] ᑭᑕ ᐊᔨᑭᐣ ᒫᑲ, ᐱᑯ ᐊᐃᐧᔭᐠ ᑫ ᒪᐃᐧᒧᐢᑕᒧᑫᐧ ᐅ ᐃᐧᔪᐃᐧᓂᔨᐤ ᑳ ᑎᐯᔨᐦᒋᑫᔨᐟ ᑭᑕ ᐱᒫᒋᐦᐋᐤ.
[22] ᑭᔭᐋᐧᐤ ᐃᐢᕒᐁᐃᓬ ᐊᔨᓯᔨᓂᑎᐠ, ᓇᑐᐦᑕᒧᐠ ᐅᐦᐃ ᐊᔭᒥᐃᐧᓇ: ᒋᓴᐢ ᓈᓴᕒᐃᑎᕽ ᑯᐦᒋᐟ, ᐊᔨᓯᔨᓂᐤ ᑳ ᑭ ᒥᔪ ᐋᐧᐸᑎᐃᑯᔦᐠ ᑭᓭᒪᓂᑐ ᐁ ᑭᐦᒋ ᐃᓯᐦᒋᑫᐟ ᒥᓇ ᒪᒫᑖᐃᐧ ᐋᐧᐸᐦᑕᐦᐃᐁᐧᐟ ᐁᐊᐧᑲᐧᓂ ᐅᐦᒋ ᒣᑳᐧᐨ ᐃᑕ ᐁ ᐊᔮᔦᐠ, ᑭᔭᐋᐧᐤ ᐊᐦᐳ ᐁᐊᐧᑯ ᐁ ᑭᐢᑫᔨᑕᒣᐠ:
[23] ᐁᐊᐧᑳᐧᓇ, ᐅᔭᐢᒋᑫᐃᐧᓂᕽ ᒥᓇ ᐅ ᓂᑳᓂ ᑭᐢᑫᔨᑕᒧᐃᐧᓂᕽ ᑭᓭᒪᓂᑐ, ᑭᔭᐋᐧᐤ ᐅᒋᐦᒋᐋᐧᕽ ᐅᐦᒋ ᐁᑳ ᐅᔭᓱᐁᐧᐃᐧᐣ ᑳ ᐱᒥᑎᓴᐦᐊᐦᑭᐠ ᐊᔨᓯᔨᓂᐊᐧᐠ, ᑭ ᑭ ᒋᐢᑕᐦᐋᐢᑳᐧᑖᐋᐧᐤ ᒥᓇ ᑭ ᑭ ᓂᐸᐦᐋᐋᐧᐤ
[24] ᐁᐊᐧᑲᐧᓂ ᑭᓭᒪᓂᑐ ᑭ ᐊᐧᓂᐢᑳᓀᐤ, ᐁ ᑭ ᐋᐱᑯᓇᕽ ᑳ ᐋᑲᐧᕽ ᓂᐳᐃᐧᐣ: ᒋᑫᒫ ᓇᒪᐃᐧᔭ ᑭᑕ ᑭ ᐃᐦᑭᐣ ᑭᑕ ᑭ ᒥᒋᒥᓂᑯᐟ.
[25] ᐃᐧᔭ ᑌᐱᐟ ᐃᑌᐧᐤ ᐁᐊᐧᑲᐧᓂ ᐁ ᐃᑖᐟ, ᓂ ᑲᓇᐋᐧᐸᒫᐤ ᑳᑭᑫ ᑳ ᑎᐯᔨᐦᒋᑫᐟ ᐁ ᐅᑎᐢᑲᐃᐧᐢᑲᐃᐧᐟ; ᒋᑫᒫ ᓂ ᑭᐦᒋᓂᐢᑭᕽ ᐊᔮᐤ ᐁᑳ ᑭᑕ ᐊᐧᐢᑲᐃᐧᓂᑲᐃᐧᔮᐣ:
[26] ᐁᐊᐧᑯ ᐅᐦᒋ ᓂᑌᐦ ᑭ ᒪᒪᐦᑖᑯᓯᒪᑲᐣ, ᒥᓇ ᓂ ᑌᔭᓂ ᑭ ᒥᔭᐋᐧᑕᒧᒪᑲᐣ; ᐁᑯᓯ ᒥᓇ ᓂ ᐃᐧᔮᐢ ᑭᑕ ᐊᔦᐧᐱᒪᑲᐣ ᐊᐢᐯᔨᒧᐃᐧᓂᕽ:
[27] ᒋᑫᒫ ᓇᒪᐃᐧᔭ ᑭ ᑲ ᓇᑲᑖᐤ ᓂᐟ ᐊᒑᕽ ᐦᐁᑎᓯᕽ, ᓇᒪᐃᐧᔭ ᒥᓇ ᑭ ᑲ ᐸᑭᑎᓈᐤ ᑭ ᑲᓈᑎᓯᑦ ᑭᑕ ᐋᐧᐸᐦᑕᕽ ᐱᑭᐢᑲᑕᑎᐃᐧᐣ.
[28] ᑭ ᑭ ᑭᐢᑫᔨᑕᒧᐃᐣ ᐱᒫᑎᓯᐃᐧᓂ ᐃᓯᑖᐧᐃᐧᓇ; ᑭ ᑲ ᑌᐱ ᒪᒪᐦᑖᑯᐃᐣ ᑭ ᒥᔪ ᑭᑖᐸᑫᐃᐧᐣ ᐅᐦᒋ.
[29] ᓂᒋᐋᐧᒥᑎᐠ, ᓇᒪᐃᐧᔭ ᑭᑕ ᒪᓈ ᐃᐧᐦᑕᒫᑕᑯᐠ ᐊᓇ ᑲᔮᐢ ᐅᑖᐃᐧᒫᐤ ᑌᐱᐟ, ᐁ ᑭ ᓂᐱᐟ ᒥᓈ ᐁ ᑭ ᓇᐃᓂᐦᐟ, ᐁᑯᓯ ᐅ ᓇᐃᓂᑯᐃᐧᑲᒥᐠ ᐁ ᐊᔮᐋᐧᔭᕽ ᐱᔨᐢ ᐊᓄᐦᐨ ᑳ ᑭᓯᑳᐠ.
[30] ᐃᐧᔭ ᒫᑲ ᐁ ᑭᐢᑭᐁᐧᐦᐃᑫᐃᐧᔨᓂᐃᐧᐟ, ᒥᓇ ᐁ ᑭᐢᑫᔨᑕᕽ ᑭᓭᒪᓂᑐᐊᐧ ᐁ ᑭ ᑭᐦᒋ ᐃᑎᑯᐟ, ᐃᐧᔭᐃᐧᕽ ᐁ ᐅᐦᒋᔨᐟ ᑭᑕ ᐊᐱᔨᐟ ᐅ ᑭᐦᒋ ᐅᑭᒫᐊᐧᐱᐃᐧᓂᕽ;
[31] ᐃᐧᔭ ᓂᔮᐠ ᐁ ᐋᐧᐸᐦᑕᕽ ᐁᐊᐧᑫᐧᔨᐤ ᑭ ᑕᓯᑕᒣᐧᐤ ᐅᐟ ᐋᐱᓯᓯᓄᐃᐧᓂᔨᐤ ᐊᓂᐦᐃ ᙭, ᐁᐃᑌᐧᐟ, ᓇᒪᐃᐧᔭ ᐅᐦᒋ ᓇᑲᑖᐤ ᐦᐁᑎᓯᕽ, ᓇᒪᐃᐧᔭ ᒥᓇ ᐅ ᐃᐧᔮᐢ ᐅᐦᒋ ᐋᐧᐸᐦᑕᒧᒪᑲᓂᔨᐤ ᐱᑭᐢᑲᑕᑎᐃᐧᐣ.
[32] ᐊᐊᐧ ᒋᓴᐢ ᑭᓭᒪᓂᑐᐊᐧ ᑭ ᐊᐧᓂᐢᑳᓂᐠ, ᐁᐊᐧᑯ ᑲᐦᑭᔭᐤ ᓂᔭᓈᐣ ᑳ ᐋᑐᑕᒫᕽ.
[33] ᐁᑯᓯ ᒫᑲ ᐅ ᑭᐦᒋᓂᐢᑭᔨᕽ ᑭᓭᒪᓂᑐᐊᐧ ᐁ ᑭ ᐃᐢᐸᑫᓂᑯᐟ, ᒥᓇ ᐁ ᑭ ᒥᔨᑯᐟ ᐁᐧᔪᑖᐃᐧᕽ ᐊᓂᒪ ᐊᓱᑕᒫᑯᐃᐧᐣ ᑳ ᑲᓈᑎᓯᐟ ᐊᒑᕽ, ᑭ ᓯᑭᓇᒫᑫᐤ ᐅᒪ ᑳ ᐋᐧᐸᐦᑕᒣᐠ ᒥᓇ ᑳ ᐯᐦᑕᒣᐠ.
[34] ᒋᑫᒫ ᑌᐱᐟ ᓇᒪᐃᐧᔭ ᑭᐦᒋ ᑭᓯᑯᕽ ᑭ ᐃᓯ ᐅᐱᐢᑳᐤ: ᒫᑲ ᐃᐧᔭ ᐃᑌᐧᐤ, ᑳ ᑎᐯᔨᐦᒋᑫᐟ ᐃᑌᐤ ᓄᑎᐯᔨᒋᑫᒪ, ᐊᐱ ᓂ ᑭᐦᒋᓂᐢᑭᕽ,
[35] ᐱᔨᐢ ᑭᑕ ᐃᓯᐊᑭᐠ ᑭ ᓄᑎᓈᑲᓇᐠ ᑭᑕ ᐅᐟ ᐊᐢᐱᓯᑌᓯᒧᓂᔭᐣ.
[36] ᑭᔮᑦ ᒫᑲ ᑲᐦᑭᔭᐤ ᐃᐢᕒᐁᐃᓬ ᐃᐧᑭᕽ ᑫᒋᓈ ᑭᑕ ᑭᐢᑫᔨᑕᒪᐧᐠ, ᑭᓭᒪᓂᑐ ᐁ ᑭ ᐃᓯᐋᐟ ᐁᐊᐧᑲᐧᓂ ᒫᒪᐃᐧ ᑳ ᑎᐯᔨᐦᒋᑫᐟ ᒥᓇ ᙭, ᐊᐊᐧ ᒋᓴᐢ ᑳ ᑭ ᒋᐢᑕᐦᐋᐢᑳᐧᑖᔦᐠ.
[37] ᐃᐢᐱ ᒫᑲ ᐅᒪ ᐱᔦᐦᑕᐦᑭᐠ, ᑭ ᒋᐢᑕᐅᑲᐧᐠ ᐅᑌᐃᐋᐧᕽ, ᐁᑯᓯ ᑭ ᐃᑌᐊᐧᐠ ᐱᑕᕒᐊ ᒥᓇ ᑯᑕᑲ ᐊᐸᐢᑎᓬᐊ, ᐁᐧᒋᐋᐧᒥᔮᕽ, ᑖᓂᓯ ᐅᒪ ᑫ ᑐᑕᒫᕽ?
[38] ᐱᑕᕒ ᒫᑲ ᑭ ᐃᑌᐤ, ᑫᐧᐢᑭᐱᒫᑎᓯᐠ ᒥᓇ ᐹᑊᑕᐃᓯᐃᐧᐠ ᑲᐦᑭᔭᐤ ᐁ ᐃᑕᓯᔦᐠ ᐅ ᐃᐧᔪᐃᐧᓂᕽ ᒋᓴᐢ ᙭ ᑭᑕ ᐳᓀᔨᑕᒫᑲᐃᐧᔦᐠ ᑭ ᒪᒋᐃᑎᐃᐧᓂᐋᐧᐊᐧ; ᐁᑯᓯ ᑭ ᑲ ᒥᔨᑲᐃᐧᓈᐋᐧᐤ ᐊᓂᒪ ᒣᑭᐃᐧᐣ ᑳ ᑲᓈᑎᓯᐟ ᐊᐦᒑᕽ.
[39] ᒋᑫᒫ ᑭᔭᐋᐧᐤ ᑭᐟ ᐊᓱᑕᒫᑲᐃᐧᓈᐋᐧᐤ, ᒥᓇ ᑭᐟ ᐊᐋᐧᓯᒥᓯᐋᐧᐊᐧᐠ, ᒥᓇ ᑲᐦᑭᔭᐤ ᐋᐧᔭᐤ ᑳ ᐊᔮᒋᐠ, ᑕᐦᑐ ᐅᑎ ᑳ ᑎᐯᔨᐦᒋᑫᐟ ᑭ ᑭᓭᒪᓂᑐᒥᓇᐤ ᑫ ᓇᑐᒫᐟ.
[40] ᒥᐦᒉᐟ ᒫᑲ ᑯᑕᑲ ᐊᔭᒥᐃᐧᓇ ᐅᐦᒋ ᑭ ᐊᐧᐦᐃᐧᑕᒪᐁᐧᐤ, ᒥᓇ ᑭ ᓴᓯᑭᒣᐤ, ᐁ ᐃᑌᐧᐟ, ᐱᒫᒋᐦᐃᓱᐠ ᐅᑕ ᐅᐦᒋ ᐁᑳ ᑳ ᓂᓯᑕᐋᐧᑳᑎᓯᒋᐠ ᐊᔨᓯᔨᓂᐊᐧᐠ.
[41] ᐁᑲᐧ ᒫᑲ ᐊᓂᐦᐃ ᑳ ᐅᑎᓇᒥᔨᐟ ᐅᐟ ᐊᔭᒥᐃᐧᐣ ᑭ ᐹᑊᑕᐃᓯᐃᐧᐋᐊᐧᐠ: ᐁᑯᓯ ᑭ ᑕᑯᐋᐊᐧᐠ ᐁᐊᐧᑳᐧᓂᒪ ᐁ ᑭᓯᑳᐠ ᓈᐣᑕᐤ ᓂᐢᑖᐧᐤ ᑭᐦᒋ ᒥᑖᑕᑐᒥᑕᓈᐤ ᐊᐦᒑᐦᑲᐧᐠ.
[42] ᑕᐦᑭᓀ ᒫᑲ ᑭ ᑖᐱᑕᐃᐧ ᐊᔮᐊᐧᐠ ᐊᐹᐢᑎᓬᐊ ᐅ ᑭᐢᑭᓄᐦᐊᒫᑫᐃᐧᓂᔨᕽ ᒥᓇ ᐅ ᐃᐧᒉᑐᐃᐧᓂᔨᕽ, ᐁ ᐸᐸᑫᐧᓂᐦᐟ ᐸᑫᐧᓯᑲᐣ ᒥᓇ ᐊᔭᒥᐦᐋᐃᐧᓂᕽ.
[43] ᓭᑭᓯᐃᐧᐣ ᒫᑲ ᑭ ᐸᑲᒥᐢᑳᐠ ᑲᐦᑭᔭᐤ ᐊᐦᒑᕽ: ᒥᐦᒉᐟ ᒫᑲ ᒪᒫᑕᐤ ᒥᓇ ᑭᐢᑭᓇᐋᐧᒋ ᐋᐧᐸᐦᑕᐦᐃᐁᐧᐃᐧᓇ ᑭ ᐃᑐᑕᒪᐧᐠ ᐊᐹᐢᑎᓬᐊᐠ.
[44] ᑲᐦᑭᔭᐤ ᒫᑲ ᐊᓂᑭ ᑳ ᑖᐯᐧᑕᐦᑭᐠ ᑭ ᒫᒪᐃᐧ ᐊᔮᐊᐧᐠ, ᒥᓇ ᑲᐦᑭᔭᐤ ᑫᑲᐧᐩ ᑖᐱᐢᑯᐨ ᑭ ᐋᐸᒋᑖᐊᐧᐠ;
[45] ᐁᑯᓯ ᑭ ᐊᑖᐋᐧᑫᐊᐧᐠ ᐅ ᑎᐱᔭᐁᐧᐃᐧᓯᐃᐧᓂᐋᐧᐊᐧ ᒥᓇ ᐅᐟ ᐊᔮᐃᐧᓂᐋᐧᐊᐧ, ᑲᐦᑭᔭᐤ ᐁ ᒫᑎᓇᒪᐋᐧᒋᐠ, ᐱᑯ ᐁ ᐃᓯ ᑭᐧᑕᒫᐟ ᐱᑯ ᐊᓇ ᐊᔨᓯᔨᓂᐤ.
[46] ᐁᑯᓯ ᑕᐦᑐ ᑭᓯᑳᐤ, ᑕᐦᑭᓀ ᑭ ᑖᐱᑕᐃᐧ ᒫᒪᐃᐧ ᐊᔮᐊᐧᐠ ᑭᐦᒋ ᐊᔭᒥᐦᐁᐃᐧᑲᒥᑯᕽ, ᒥᓇ ᐁ ᓇᔭᐃᐧᓈᒋᐠ ᐸᑫᐧᓯᑲᓇ ᐃᐧᑭᐋᐧᕽ, ᑭ ᐅᑎᓇᒪᐧᐠ ᐅ ᒥᒋᐃᐧᓂᐋᐧᐤ ᒪᒪᐦᑖᑯᓯᐃᐧᓂᕽ ᒥᓇ ᓇᔦᐢᑕᐃᐧ ᒥᑌᐦᐃᕽ,
[47] ᐁ ᒪᒥᒋᒫᒋᐠ ᑭᓭᒪᓂᑐᐊᐧ, ᒥᓇ ᐁ ᒥᔦᐧᔨᒥᑯᒋᐠ ᑲᐦᑭᔭᐤ ᐊᔨᓯᔨᓂᐊᐧ. ᐁᑯᓯ ᑳ ᑎᐯᔨᐦᒋᑫᐟ ᑭ ᑕᑯᑐᐁᐧᐤ ᑕᐦᑐ ᑭᓯᑳᐤ ᐊᓂᐦᐃ ᑳ ᐊᑎ ᐱᒫᒋᐃᐦᒋᐠ.