[1] ᐊᐠᕒᐃᐸ ᒫᑲ ᑭ ᐃᑌᐤ ᐹᓬᐊ, ᑭᐟ ᐃᔨᓇᒫᑲᐃᐧᐣ ᑭᑕ ᐱᑭᐢᑫᐧᐢᑕᒫᓱᔭᐣ. ᐁᑲᐧ ᐹᓬ ᑭ ᓱᐃᐧᓂᐢᑫᔨᐤ, ᒥᓇ ᑭ ᐱᑭᐢᑫᐧᐢᑕᒫᓱ:
[2] ᓂ ᒪᒪᐦᑖᑯᓯᐣ ᑭᐦᒋ ᐅᑭᒫᐤ ᐊᐠᕒᐃᐸ, ᐁ ᐅᑎᐢᑲᐃᐧᑳᐸᐃᐧᐢᑖᑖᐣ ᐊᓄᐦᐨ ᑳ ᑭᓯᑳᐠ ᑭᑕ ᐱᑭᐢᑫᐧᐢᑕᒫᓱᔮᐣ ᑲᐦᑭᔭᐤ ᐊᓂᐦᐃ ᐅᐦᒋ ᑳ ᐊᑖᒥᒥᒋᐠ ᒍᐊᐧᐠ:
[3] ᐅᓵᑦ ᐅᑎ ᐁ ᓇᑲᒋᑖᔭᐣ ᑲᐦᑭᔭᐤ ᐃᓯᐦᒋᑫᐃᐧᓇ ᒥᓇ ᑲᑫᐧᒋᑐᐃᐧᓇ ᑳ ᐊᔮᒋᐠ ᒍᐊᐧᐠ: ᐁᐊᐧᑯ ᒫᑲ ᐅᐦᒋ ᑭ ᐸᑯᓭᔨᒥᑎᐣ ᓯᐯᔨᑕᒧᐁᐧᓂᕽ ᑭᑕ ᓇᑐᑕᐃᐧᔭᐣ.
[4] ᑳ ᑭ ᐯ ᐃᓯ ᐱᒫᑎᓯᔮᐣ ᐁ ᐅᐢᑳᑎᓯᔮᐣ ᐅᐦᒋ, ᐃᐧᔭ ᒥᒋᒫᐨ ᐅᐦᒋ ᐁ ᑭ ᐃᐧᒋᐊᔮᒪᑭᐠ ᓂ ᐃᐧᑕᐢᑭᒫᑲᓇᐠ, ᒥᓇ ᒉᕒᐅᓴᓬᐊᒥᕽ, ᑭᐢᑫᔨᑕᒪᐧᐠ ᑲᐦᑭᔭᐤ ᒍᐊᐧᐠ;
[5] ᐁ ᑭ ᑭᐢᑫᔨᒥᒋᐠ ᒥᒋᒫᐨ ᐅᐦᒋ, ᑭᐢᐱᐣ ᐃᐧᔭ ᐃᑌᔨᑕᑲᐧᐃᐧ ᑭᑕ ᐋᒋᒧᒋᐠ, ᐊᓂᑭ ᑳ ᒫᐊᐧᒋ ᐊᔮᑳᐧᒥᓯᒋᐠ ᐅᐱᐢᑭᑎᓯᐊᐧᐠ ᓂᐟ ᐊᔭᒥᐦᐋᐃᐧᓂᓈᕽ, ᐹᕒᐃᓯ ᑳ ᐃᑎᐦᐟ ᐁᑯᓯ ᓂ ᑭ ᐃᓯ ᐱᒫᑎᓯᐣ.
[6] ᐁᑲᐧ ᒫᑲ ᐅᑕ ᓂ ᓂᐸᐃᐧᐣ ᑭᑕ ᐅᔭᓱᐋᑎᑲᐃᐧᔮᐣ ᐊᓂᒪ ᐅᐦᒋ ᐁ ᐊᐢᐯᔨᒧᕽ ᐊᓱᑕᒫᑫᐃᐧᐣ ᑭᓭᒪᓂᑐ ᑳ ᑭ ᒥᔮᐟ ᓄᑖᐃᐧᓈᓇ;
[7] ᐁᐊᐧᑯ ᐊᓱᑕᒫᑯᐃᐧᐣ ᒥᑖᑕᐟ ᓂᓱᓵᑊ ᑳ ᐃᑕᑐᑌᐃᐧᓯᔮᕽ, ᐁᔨᑯᑫᐧᔨᒧᐃᐧᓂᕽ ᐁ ᐊᑐᐢᑲᐋᐧᔮᕽ ᑭᓭᒪᓂᑐ ᐁ ᑎᐱᐢᑳᐠ ᒥᓇ ᐁ ᑭᓯᑳᐠ, ᓂ ᐸᑯᓭᔨᒧᓈᐣ ᑭᑕ ᐅᑎᑕᒫᕽ, ᐁᐊᐧᑯᒪ ᐊᐢᐯᔨᒧᐃᐧᐣ ᐅᐦᒋ ᑳ ᒪᒥᓯᒥᒋᐠ ᒍᐊᐧᐠ, ᐋ ᑭᐦᒋ ᐅᑭᒫᐤ!
[8] ᑖᓀᑭ ᐁᑳ ᑳ ᑭ ᑖᐯᐧᑕᒥᕽ ᑭᐢᐱᐣ ᑭᓭᒪᓂᑐ ᐁᐧᓂᐢᑳᓇᑫᐧ ᐅᓂᐱᐊᐧ?
[9] ᑖᐯᐧ ᓂᔭ ᓂ ᑭ ᐃᑌᔨᑌᐣ, ᐁ ᐃᑕᐢᑌᐠ ᒥᐦᒉᐟ ᑫᑲᐧᐩ ᑭᑕ ᐃᑐᑕᒫᐣ ᓇᔦᑖᐤ ᐅ ᐃᐧᔪᐃᐧᓂᕽ ᒋᓴᐢ ᓈᓴᕒᐃᑎᕽ ᑯᐦᒋᐟ.
[10] ᐅᒪ ᒫᑲ ᓂ ᑭ ᐃᑐᑌᐣ ᒉᕒᐅᓴᓬᐊᒥᕽ: ᐁᑯᓯ ᓂ ᑭ ᑭᐸᐊᐧᐊᐧᐠ ᒥᐦᒉᐟ ᐅᑲᓈᑎᓯᐊᐧᐠ ᑭᐸᐦᐅᑐᐃᐧᑲᒥᑯᕽ, ᐁ ᑭ ᐃᓯ ᐸᑭᑎᓇᒪᐃᐧᒋᐠ ᑭᐦᒋ ᐊᔭᒥᐦᐁᐃᐧᔨᓂᐊᐧᐠ, ᐃᐢᐱ ᒫᑲ ᓀᐸᐃᐦᒋᐠ, ᓂᐢᑕ ᓂ ᑭ ᓇᐢᑯᑌᐣ ᐁᐊᐧᑯ.
[11] ᐁᑯᓯ ᓈᐣᑕᐤ ᐁ ᑭ ᐃᑐᑕᐋᐧᑭᐠ ᒥᐦᒉᑖᐧᐤ ᑲᐦᑭᔭᐤ ᐊᔭᒥᐦᐁᐃᐧᑲᒥᑯᕽ, ᓂ ᑭ ᓯᑭᐢᑲᐋᐧᐊᐧᐠ ᑭᑕ ᐹᐢᑖᒧᐃᐧ ᐱᑭᐢᑫᐧᒋᐠ; ᐊᔨᐋᐧᐠ ᒫᑲ ᐁ ᑭᓯᐢᑕᐊᐧᑭᐠ, ᓂ ᑭ ᓄᓱᓀᐋᐧᐊᐧᐠ ᐊᐦᐳ ᐋᐧᔭᐁᐧᐢᑲᒥᐠ ᐅᑌᓈᕽ.
[12] ᐁᐊᐧᑯᒪ ᒫᑲ ᐅᐦᒋ ᐁ ᐃᑐᐦᑌᔮᐣ ᑕᒫᐢᑲᓯᕽ ᐁ ᑭ ᒥᔨᒋᐠ ᑲᐢᑭᐦᐁᐃᐧᓯᐃᐧᐣ ᒥᓇ ᐅᔭᓱᐁᐧᐃᐧᐣ ᑭᐦᒋ ᐊᔭᒥᐦᐁᐃᐧᔨᓂᐊᐧᐠ.
[13] ᐁ ᐋᐱᑖᑭᓯᑳᐠ. ᐋ ᑭᐦᒋ ᐅᑭᒫᐤ, ᓂ ᑭ ᐋᐧᐸᑌᐣ ᒣᑳᐧ ᒣᐢᑲᓈᕽ ᐁ ᐋᐧᓴᐢᑯᑌᐠ ᑭᓯᑯᕽ ᐅᐦᒋ, ᐊᐊᐧᓯᒣ ᐁ ᑭᑳᔮᐢᑌᐠ ᐃᔨᑯᕽ ᐱᓯᑦ, ᐁ ᐋᐧᐢᑳᐢᑳᑯᔮᕽ ᓂᔭ ᒥᓇ ᐊᓂᑭ ᑳ ᐃᐧᒉᐃᐧᒋᐠ.
[14] ᑲᐦᑭᔭᐤ ᒫᑲ ᒧᒋᕽ ᑳ ᐃᓯ ᐸᐦᑭᓯᓂᔮᕽ, ᓂ ᑭ ᐯᐦᑌᐣ ᐃᑌᐧᐃᐧᐣ ᐁ ᐃᑎᑯᔮᐣ ᐦᐃᐸᕒᐅ ᑭᓭᐧᐃᐧᓂᕽ, ᓵᓬ, ᓵᓬ, ᑖᓀᑭ ᑳ ᒫᔨᑐᑕᐃᐧᔭᐣ? ᐋᔨᒪᐣ ᑭᑕ ᑖᑕᑭᐢᑳᑕᒪᐣ ᐁ ᑭᐢᑭᐢᑲᐅᑲᐃᐧᔭᐣ.
[15] ᐁᑯᓯ ᓂ ᑭ ᐃᑖᐧᐣ, ᐊᐁᐧᓇ ᑭᔭ, ᑌᐯᔨᐦᒋᑫᔭᐣ? ᑳ ᑎᐯᔨᐦᒋᑫᐟ ᒫᑲ ᓂ ᑭ ᐃᑎᐠ, ᓂᔭ ᒋᓴᐢ ᑳ ᒫᔨᑐᑕᐃᐧᔭᐣ.
[16] ᒫᑲ ᐊᐧᓂᐢᑳ, ᒥᓇ ᓂᐸᐃᐧ ᑭᓯᑎᕽ ᒋᑫᒪ ᐁᐊᐧᑯ ᐅᒪ ᐅᐦᒋ ᑳ ᓄᑯᐦᐃᓱᐢᑖᑖᐣ, ᑭᑕ ᐅᔭᑭᒥᑖᐣ ᑭᑕ ᐊᑐᐢᑳᑕᒪᐣ ᒥᓇ ᑭᑕ ᐋᑐᑕᒪᐣ ᐊᓂᐦᐃ ᐃᑕ ᑳ ᑭ ᐋᐧᐸᒥᔭᐣ, ᒥᓇ ᐊᓂᐦᐃ ᐃᑕ ᑫ ᓄᑯᐦᐃᓱᐢᑖᑖᐣ;
[17] ᐁ ᐸᐢᐱᐃᑖᐣ ᐊᔨᓯᔨᓂᐊᐧᐠ ᐅᐦᒋ, ᒥᓇ ᒉᐣᑕᐃᓬᐊᐠ ᐅᐦᒋ, ᑭᑕ ᓈᑕᒋᐠ ᑳ ᐃᑎᓴᐅᑖᐣ,
[18] ᑭᑕ ᔪᑌᓇᒪᐊᐧᒋᐠ ᐅᐢᑭᓯᑯᐋᐧᐊᐧ, ᑭᑕ ᑫᐧᐢᑭᒋᐠ ᐊᐧᓂᑎᐱᐢᑳᕽ ᐅᐦᒋ ᐋᐧᓭᔮᕽ ᐃᓯ, ᒥᓇ ᐁ ᑎᐯᔨᒥᑯᒋᐠ ᓭᑕᓇ ᑭᓭᒪᓂᑐᐊᐧ ᑭᑕ ᓈᑖᒋᐠ, ᑭᑕ ᐳᓀᔨᑕᒫᒋᐠ ᐅ ᒪᒋᑎᐃᐧᓂᐋᐧᐊᐧ ᒥᓇ ᑭᑕ ᐊᓯᑕᑭᒥᐦᒋᐠ ᐊᓂᑭ ᑳ ᑲᓈᒋᐃᐦᒋᐠ ᐁ ᑖᐯᐧᔦᔨᒥᒋᐠ.
[19] ᐁᐊᐧᑯ ᐅᐦᒋ ᒫᑲ, ᐋ ᑭᐦᒋ ᐅᑭᒫᐤ ᐊᐠᕒᐃᐸ, ᓇᒪᐃᐧᔭ ᓄᐦᒋ ᐋᓀᐧᑌᐣ ᐊᓂᒪ ᑭᐦᒋ ᑭᓯᑯᐃᐧ ᐃᓯᓇᒧᐃᐧᐣ:
[20] ᒫᑲ ᓂ ᑭ ᑲᑫᐢᑭᒫᐊᐧᐠ ᐊᓂᑭ ᓂᑳᐣ ᑕᒫᐢᑲᓯᕽ, ᐁᑲᐧ ᒉᕒᐅᓴᓬᐊᒥᕽ, ᒥᓇ ᒥᓯᐁᐧ ᐃᑌ ᒍᑎᔭ ᐊᐢᑭᕽ, ᒥᓇ ᒉᐣᑕᐃᓬᐊᐠ, ᑭᑕ ᑫᐧᐢᑳᑎᓯᒋᐠ ᒥᓇ ᑭᑕ ᑫᐧᐢᑭᐢᑕᐋᐧᒋᐠ ᑭᓭᒪᓂᑐᐊᐧ, ᐁ ᐃᑐᑕᐦᑭᐠ ᐊᑐᐢᑫᐃᐧᓇ ᑳ ᓇᐃᐢᑲᒧᒪᑲᑭ ᑫᐧᐢᑭᐱᒫᑎᓯᐃᐧᐣ.
[21] ᐁᐊᐧᑯ ᐅᒪ ᐅᐦᒋ ᒍᐊᐧᐠ ᑳ ᑭ ᐅᑎᑎᓂᒋᐠ ᑭᐦᒋ ᐊᔭᒥᐦᐁᐃᐧᑲᒥᑯᕽ, ᒥᓇ ᑳ ᑭ ᐃᐧ ᓂᐸᐃᒋᐠ.
[22] ᐁ ᑭ ᒥᔨᑯᐃᐧᓯᔮᐣ ᒫᑲ ᓂᓱᑲᒫᑯᐃᐧᐣ ᑭᓭᒪᓂᑐᕽ ᑳ ᐅᐦᒋᐸᔨᐠ, ᓂ ᓂᐸᐃᐧᐣ ᐱᔨᐢ ᐊᓄᐦᐨ ᑳ ᑭᓯᑳᐠ ᐁ ᐋᒋᒧᐢᑕᐊᐧᑭᐠ ᑳ ᐊᐱᐢᑌᔨᑖᑯᓯᒋᐠ ᒥᓇ ᑳ ᑭᐦᒉᔨᑖᑯᓯᒋᐠ, ᐁᑳ ᑫᑲᐧᐩ ᐁ ᐃᑌᐧᔮᐣ ᐱᑯ ᐊᓂᒪ ᐅᑭᐢᑭᐁᐧᐦᐃᑫᐊᐧᐠ ᒥᓇ ᒧᓯᐢ ᑳ ᑭ ᐃᑌᐧᒋᐠ ᑭᑕ ᐅᑎᐦᒋᐸᔨᐠ;
[23] ᒥᓇ ᑖᓂᓯ ᙭ ᑭᑕ ᐃᓯ ᑯᑕᑭᑖᐟ, ᒥᓇ ᑖᓂᓯ ᐃᐧᔭ ᓂᑳᐣ ᐁ ᐋᐱᓯᓯᕽ ᓂᐳᐃᐧᓂᕽ ᐅᐦᒋ, ᑭᑕ ᑌᐹᐧᑕᒪᐋᐧᐟ ᐋᐧᓭᔮᐤ ᐅᐦᐃ ᐊᔨᓯᔨᓂᐊᐧ ᒥᓇ ᒉᐣᑕᐃᓬᐊ.
[24] ᐅᒪ ᒫᑲ ᐁ ᐊᑎ ᐃᓯ ᐱᑭᐢᑫᐧᐢᑕᒫᓱᐟ, ᐯᐢᑕᐢ ᐃᑌᐤ ᐁ ᑭᓯᐁᐧᐟ, ᐹᓬ, ᑭ ᑭᐢᑳᐧᐣ ᒫ ᐃᐧᔭ; ᐅᓵᑦ ᒥᐢᑕᐦᐃ ᑭᐢᑫᔨᑕᒪᐃᐧᐣ ᑭ ᑭᐢᑫᐧᐃᑯᐣ.
[25] ᒫᑲ ᐹᓬ ᐃᑌᐧᐤ, ᓇᒪ ᐃᐧᔭ ᓂ ᑭᐢᑳᐧᐣ, ᒫᒪᐁᐧᔮᐢ ᑳ ᑭᐦᒑᔨᐃᐧᔭᐣ ᐯᐢᑕᐢ; ᒫᑲ ᓂ ᐱᑭᐢᑳᐧᑌᐣ ᑖᐯᐧᐃᐧᓂ ᒥᓇ ᐊᔭᑳᐧᒥᓯᐃᐧ ᐃᑌᐧᐃᐧᓇ.
[26] ᒋᑫᒫ ᑭᐦᒋ ᐅᑭᒫᐤ ᑭᐢᑫᔨᑕᑦ ᐅᐦᐃ, ᐁᐊᐧᑯ ᒥᓇ ᓇᒪᐃᐧᔭ ᓂ ᒪᓈ ᐃᐧᐦᑕᒪᐋᐧᐤ; ᒋᑫᒫ ᓂ ᑫᒋᓈᐅᐣ ᓇᒪᐃᐧᔭ ᐁᑳ ᑭᑕ ᑭᐢᑫᔨᑕᕽ ᐅᐦᐃ; ᓇᒪᐃᐧᔭ ᒫᑲ ᑭᒧᐨ ᐅᒪ ᑳ ᑭ ᐃᑐᒋᑳᑌᐠ.
[27] ᑭᐦᒋ ᐅᑭᒫᐤ ᐊᐠᕒᐃᐸ, ᑭ ᑖᐯᐧᑕᐋᐧᐊᐧᐠ ᒋ ᐅᑭᐢᑭᐁᐧᐦᐃᑫᐊᐧᐠ? ᓂ ᑭᐢᑫᔨᑌᐣ ᐁ ᑖᐯᐧᑕᒪᐣ.
[28] ᑭᐦᒋ ᐅᑭᒫᐤ ᐊᐠᕒᐃᐸ ᒫᑲ ᑭ ᐃᑌᐤ ᐹᓬᐊ, ᓇᒪᐃᐧᔭ ᒥᐢᑕᐦᐃ ᓵᑯᒋᒥᐁᐧᐃᐧᐣ ᐅᐦᒋ ᑲᕒᐃᐢᑎᔭᐣ ᑳ ᐃᐧ ᐃᓯᐃᔭᐣ.
[29] ᐹᓬ ᒫᑲ ᑭ ᐃᑌᐤ, ᐱᑕᓀ ᐃᑌᔨᑕᕽ ᑭᓭᒪᓂᑐ, ᑭᐢᐱᐣ ᐊᐱᓯᐢ ᐊᐦᐳ ᑭᐢᐱᐣ ᒥᐢᑕᐦᐃ, ᓇᒪᐃᐧᔭ ᑭᔭ ᐱᑯ, ᒫᑲ ᒥᓇ ᑲᐦᑭᔭᐤ ᐅᑭ ᑳ ᐯᑕᐃᐧᒋᐠ ᐊᓄᐦᐨ ᑳ ᑭᓯᑳᐠ, ᑭ ᐃᓯ ᐊᔮᒋᐠ ᑖᐱᐢᑯᐨ ᓂᔭ ᐅᐦᐃ ᐱᑯ ᒪᒫᒋᑲᐧᐱᓱᐃᐧᓇ ᓇᒪᐃᐧᔭ.
[30] ᑭᐦᒋ ᐅᑭᒫᐤ ᒫᑲ ᑭ ᐸᓯᑯ, ᐊᓯᒋ ᐅᔭᓱᐁᐧᐃᐧᑭᒫᐤ, ᒥᓇ ᐸᕒᓇᐃᓯ, ᒥᓇ ᐊᓂᐦᐃ ᑳ ᐃᐧᑕᐱᒥᑯᒋᐠ:
[31] ᐃᐢᐱ ᒫᑲ ᐅᐱᒣ ᑳ ᐃᑐᐦᑌᒋᐠ, ᑭ ᑕᓯᑕᒫᑐᐊᐧᐠ, ᐁ ᐃᑌᐧᒋᐠ ᐊᐊᐧ ᓈᐯᐤ ᓇᒪᐃᐧᔭ ᑫᑲᐧᐩ ᐃᑐᑕᑦ ᑭᑕ ᑲᐢᑭᑕᒫᓱᐟ ᓂᐳᐃᐧᐣ ᐊᐦᐳ ᑭᑕ ᒪᒫᒋᑲᐧᐱᑎᐦᐟ.
[32] ᐊᐠᕒᐃᐸ ᒫᑲ ᑭ ᐃᑌᐤ ᐯᐢᑕᓴ, ᐊᐊᐧ ᓈᐯᐤ ᑭᑕ ᑭ ᐸᑭᑎᓈᑕᐩ ᑭᐢᐱᐣ ᐁᑳ ᑭ ᓇᑐᑕᕽ ᑭᑕ ᐅᔭᓱᐋᐧᑎᑯᐟ ᓯᓴᕒᐊ.