[1] ᐃᐢᐱ ᒫᑲ ᑳ ᑭᓭᔨᑕᒥᕽ ᐃᑕᓬᐃᐃᕽ ᑭᑕ ᐃᑖᓯᔮᕽ, ᐹᓬᐊ ᒥᓇ ᐋᑎᐦᐟ ᑯᑕᑲ ᑭᐸᐋᐧᑲᓇ ᑭ ᐸᑭᑎᓇᒪᐁᐧᐊᐧᐠ ᓯᒫᑲᓂᓯᐃᐧᑭᒫᐊᐧ ᒍᓬᐃᔭᐢ ᐁ ᐃᓯᔨᐦᑳᓱᐟ, ᐋᑲᐢᑕᐣ ᓯᒫᑲᓂᓴᐠ ᑳ ᐃᑎᐦᒋᐠ.
[2] ᐁ ᐳᓯᔮᕽ ᒫᑲ ᓈᐱᑳᐧᓂᕽ ᐋᐟᕒᐊᒥᑎᔭᑦ ᐁ ᑭ ᐯ ᐅᐦᒋᐸᔨᐠ, ᐁ ᐃᐧ ᐊᑎ ᐃᑖᐢᑕᕽ ᐹᐱᑐᐢ ᐃᑕ ᐋᐧᓴᑳᑦ ᐁᓯᔭᐃᕽ, ᓂ ᑭ ᓂᒥᑖᐁᐧᔮᓯᓈᐣ, ᐋᕒᐃᐢᑖᕒᑲᐢ, ᒫᓯᑖᓂᔭᐃᐧᔨᓂᐤ ᑌᓴᓬᐊᓇᐃᑲ ᐅᐦᒋ, ᐁ ᐃᐧᒉᐃᐧᑯᔮᕽ.
[3] ᐁᑯᓯ ᐃᐧᔮᐸᕽ ᓂ ᑭᐱᑕᑯᒧᓈᐣ ᓴᐃᑕᓂᕽ: ᒍᓬᐃᔭᐢ ᒫᑲ ᒥᑐᓂ ᑭ ᒥᔪᑐᑕᐁᐧᐤ ᐹᓬᐊ, ᑭ ᐸᑭᑎᓀᐤ ᑭᑕ ᓇᑕᐋᐧᐸᒫᔨᐟ ᐅᑐᑌᒥᔨᐊᐧ ᐁᑯᓯ ᑭᑕ ᒥᔪᐸᒥᐃᐦᐟ.
[4] ᐁᑯᑕ ᒫᑲ ᐁ ᐅᐦᒋ ᓂᒥᑖᐊᐧᐊᒫᕽ, ᓂ ᑭ ᐊᑎ ᐃᑖᓯᓈᐣ ᐁ ᑎᐱᓇᐊᐧᑯᑎᕽ ᓴᐃᐸᕒᐊᐢ, ᒋᑫᒫ ᐁ ᓇᔨᒪᕽ.
[5] ᐃᐢᐱ ᒫᑲ ᑳ ᐊᓱᐊᐧᑳᒣᔮᓯᔮᕽ ᑭᐦᒋᑲᒥ ᑖᐃᐧᐨ ᐃᓯ ᓯᓬᐃᓯᔭ ᒥᓇ ᐹᑦᐱᓬᐃᔭ, ᓂ ᑭ ᑕᑳᐧᓯᓈᐣ ᒪᐃᕒᐊ, ᐅᑌᓇᐤ ᓬᐃᓯᔭᐃᕽ.
[6] ᐁᑯᑕ ᒫᑲ ᓯᒫᑲᓂᓯᐃᐧᑭᒫᐤ ᑭ ᒥᐢᑲᑦ ᓈᐱᑳᐧᐣ ᐋᓬᐃᐠ ᓵᐣᑕᕒᐃᔭ ᐅᐦᒋ ᐃᑕᓬᐃᐃᕽ ᐁ ᐃᐧ ᐃᑖᐢᑕᓂᔨᐠ; ᐁᑯᓯ ᐁᑯᑕ ᓂ ᐳᓯᐃᑯᓈᐣ.
[7] ᐃᐢᐱ ᒫᑲ ᐯᔭᑕᐠ ᑳ ᐱᒫᓯᔮᕽ ᒥᒉᑐᑭᓯᑳᐤ, ᒥᓇ ᐊᑳᐋᐧᐨ ᐁ ᑭ ᐃᑖᓯᔮᕽ ᑎᐱᐢᑯᐨ ᓇᐃᑕᐢ, ᐁᑳ ᐊᐊᐧᓯᒣ ᐁ ᑭ ᓇᐃᑎᕽ, ᐁ ᑎᐱᓇᐊᐧᐠ ᑲᕒᐃᐟ ᓂ ᑭ ᐊᑎ ᐃᑖᓯᓈᐣ, ᑎᐱᐢᑯᐨ ᓵᓬᒪᓂ;
[8] ᐊᑳᐋᐧᐨ ᒫᑲ ᐁᐊᐧᑯ ᐁ ᑭ ᔮᔭᑳᒣᔮᓯᔮᕽ ᓂ ᑭ ᐅᑎᑕᐁᓈᐣ ᐃᑕ ᐁ ᐃᓯᔨᐦᑳᑌᐠ ᑳ ᒥᔮᐧᓯᐠ ᑎᐱᓇᐋᐧᓯᒧᐃᐧᐣ, ᑭᓯᐊᐧᐠ ᐁᑯᑕ ᓬᐊᓯᔭ ᐅᑌᓇᐤ ᐁ ᐊᔮᐠ.
[9] ᐃᐢᐱ ᒫᑲ ᒥᑐᓂ ᑭᓀᐧᐢ ᐁ ᐊᑎ ᐊᔮᕽ, ᐁᑯᓯ ᐱᒧᐦᑌᐅᐃᐧᐣ ᐁ ᐊᑎ ᑲᑫᐧᐢᐸᓈᑕᕽ, ᒋᑫᒫ ᐃᔨᐊᐧᓂᓯᐃᓱᐃᐧ ᑭᓯᑳᐊᐧ ᓵᓴᐩ ᐁ ᒪᔮᐢᑲᒧᐸᔨᑭ, ᐹᓬ ᑭ ᐊᔮᑳᐧᒥᒣᐤ,
[10] ᒥᓇ ᑭ ᐃᑌᐤ, ᐅᑭᒫᑎᐠ, ᓂ ᐋᐧᐸᑌᐣ ᐅᒪ ᐱᒧᐦᑌᐅᐃᐧᐣ ᒥᐢᑕᐦᐃ ᓇᔦᑖᐃᐧᐸᔨᐃᐧᐣ ᒥᓇ ᐊᐧᓂᒋᑫᐃᐧᐣ ᑭᑕ ᐊᔮᐠ, ᓇᒪᐃᐧᔭ ᐱᑯ ᐳᓱᑖᓱᓇ ᒥᓇ ᓈᐱᑲᐧᐣ, ᒫᑲ ᑭ ᐱᒫᑎᓯᐃᐧᓂᓇᐊᐧ ᒥᓇ.
[11] ᒫᑲ ᐊᓇ ᓯᒫᑲᓂᓯᐃᐧᑭᒫᐤ ᓇᐊᐧᐨ ᑭ ᓇᑐᑕᐁᐧᐤ ᓈᐱᑳᐧᓂᑭᒫᐊᐧ ᒥᓇ ᐊᓂᐦᐃ ᑳ ᑎᐯᔨᑕᒥᔨᐟ ᓈᐱᑳᐧᐣ ᐃᔨᑯᕽ ᐃᐧᔭ ᐊᓂᐦᐃ ᑳ ᐃᑌᐧᔨᐟ ᐹᓬᐊ.
[12] ᐁᑯᓯ ᐊᓂᒪ ᑎᐱᓇᐋᐧᓯᒧᐃᐧᐣ ᐁᑳ ᓈᐢᐱᐨ ᐁ ᒥᔮᐧᓯᐠ ᐁᑯᑕ ᑭᑕ ᐱᐳᓂᓯᕽ, ᐅᓴᑦ ᐱᑯ ᑭ ᐃᑌᐧᐊᐧᐠ ᑭᑕ ᓂᒥᑖᐊᐧᐊᒥᕽ ᐁᑯᑕ ᐅᐦᒋ, ᑭᐢᐱᐣ ᓈᐣᑕᐤ ᐃᓯ ᑲᐢᑭᑖᒋᐠ ᑭᑕ ᐅᑎᑕᐊᑭᐠ ᐱᓂᐠᐢ, ᐁᑯᑕ ᒫᑲ ᑭᑕ ᐱᐳᓂᓯᒋᐠ; ᐁᐊᐧᑳᐧᓂᒪ ᑎᐱᓇᐋᐧᓯᒧᐃᐧᐣ ᑲᕒᐃᐟ ᒥᓂᐢᑎᑯᕽ, ᐁ ᓵᑲᐢᑌᐠ ᐃᑌᑫ ᑭᓵᐢᑕᐤ ᒥᓇ ᑭᐁᐧᑎᓄᕽ ᒥᓇ ᓵᐊᐧᓄᑖᕽ.
[13] ᐃᐢᐱ ᒫᑲ ᓇᐃᔨᑯᕽ ᐁ ᓵᐊᐧᓇᐊᕽ, ᓂ ᑲ ᓇᐃᐸᔨᓈᐣ ᐁᑐᑫ ᐁ ᐃᑌᔨᑕᐦᑭᐠ, ᑭ ᐅᑎᓇᒪᐧᐠ ᒋᐢᑖᐸᓱᐣ ᒥᓇ ᑭ ᔮᔭᑲᒣᔮᓯᐊᐧᐠ ᑲᕒᐃᐟ, ᒋᑲᑳᑦ.
[14] ᒫᑲ ᓇᒪᐃᐧᔭ ᑭᓀᐧᐢ ᑭ ᐸᑲᒥᐸᔨᐤ ᐁ ᒥᐢᑕᐦᐃ ᑳᑭᐢᑎᓄᐃᐧ ᔪᑎᕽ, ᔪᕒᐊᑭᐧᓬᐅ ᑳ ᐃᓯᔨᐦᑳᑌᐠ:
[15] ᐃᐢᐱ ᒫᑲ ᓈᐱᑳᐧᐣ ᐁ ᑳᒋᑖᐢᑕᕽ, ᐁᑳ ᒫᑲ ᐁ ᑭ ᓇᔨᒪᑯᑎᕽ, ᓂ ᑭ ᓈᒧᐊᐧᓂᐸᔨᐅᓈᐣ, ᐁᑯᓯ ᐁ ᐊᑎ ᐱᒫᐅᑯᔮᕽ.
[16] ᐁ ᑎᐱᓇᐋᐧᐸᔨᐅᔮᕽ ᒫᑲ ᒥᓂᐢᑎᑯᐢ ᑳᑕ ᐁ ᐃᓯᔨᐦᑳᑌᐠ, ᓂ ᑭ ᑲᐢᑭᑖᓈᐣ, ᐋᔨᒫᐨ, ᑭᑕ ᐋᔮᑕᐱᑕᒫᕽ ᒥᐢᑎᑯᒋᒫᓂᐢ:
[17] ᐃᐢᐱ ᒫᑲ ᑳ ᐃᐢᑳᐧᐱᑫᐱᑕᑭᐠ, ᑭ ᐃᓯᐦᒋᑫᐊᐧᐠ ᑭᑕ ᐃᓯ ᐃᐧᒋᑖᒋᐠ, ᐁ ᓯᐸᑕᑯᐱᑕᑭᐠ ᓈᐱᑳᐧᐣ; ᐁᑯᓯ, ᐁ ᐊᐢᑖᓯᒋᐠ ᑭᑕ ᓭᐢᑳᓯᔮᕽ ᐊᓂᒪ ᓴᕒᑎᐢ, ᑭ ᓂᑌᑭᐱᒋᑫᐊᐧᐠ, ᐁᑯᓯ ᓂ ᑭ ᒧᐦᒋ ᐱᒫᐅᑯᓈᐣ.
[18] ᐁᑯᓯ ᒥᐢᑕᐦᐃ ᐁ ᒫᑳᐧᐅᑯᔮᕽ, ᐃᐧᔮᐸᕽ ᑭ ᒫᒋ ᐹᐸᑲᐢᑕᐁᐧᐁᐧᐱᓇᒪᐧᐠ ᐳᓯᑖᓱᓇ;
[19] ᐁᑯᓯ ᐁ ᐊᑎ ᓂᐢᑐ ᑭᓯᑳᐠ ᑭ ᐸᑲᐢᑕᐁᐧᐁᐧᐱᓇᒪᐧᐠ ᐃᐧᔭᐋᐧᐤ ᐅᒋᐦᒋᐋᐧᐊᐧ ᐅᐦᒋ ᓈᐱᑳᐧᓂ ᐋᐸᒋᐦᒋᑲᓇ.
[20] ᐁᑳ ᒫᑲ ᐱᓯᑦ ᐊᐦᐳ ᐊᒐᐦᑯᓴᐠ ᐁ ᓄᑯᓯᒋᐠ ᐱᔨᐢ ᒥᒉᑐᑭᓯᑳᐤ, ᒥᓇ ᐁᑳ ᐱᑯ ᐊᐱᓯᐢ ᐁ ᐅᓴᒥ ᒪᔨᑭᓯᑲᓂᓯᔮᕽ, ᐱᔨᐢ ᑭ ᓇᒪᑕᑲᐧᐣ ᐸᑯᓭᔨᒧᐃᐧᐣ ᑭᑕ ᑭ ᐱᒫᒋᐦᐅᔮᕽ.
[21] ᐃᐢᐱ ᒫᑲ ᑭᓀᐧᐢ ᐁᑳ ᑳ ᒥᒋᓱᒋᐠ, ᐹᓬ ᑭ ᓇᑕᐃᐧ ᓂᐸᐃᐧᐤ ᒣᑳᐧ ᐃᑕ ᐁ ᐊᔮᔨᐟ, ᐁᑯᓯ ᑭ ᐃᑌᐤ, ᐅᑭᒫᑎᐠ, ᑭ ᑲ ᑭ ᓇᑐᑕᐃᐧᑖᐋᐧᐤ, ᐁᑳ ᒫᑲ ᑭᑕ ᓯᐯᐧᔮᓯᔦᐠ ᑲᕒᐃᐟ ᐅᐦᒋ, ᐁᑯᓯ ᐅᒪ ᓇᔦᑖᐃᐧᐸᔨᐃᐧᐣ ᒥᓇ ᐊᐧᓂᒋᑫᐃᐧᐣ ᓇᒪᐃᐧᔭ ᑭ ᑲ ᑭ ᐊᔮᑖᐋᐧᐤ.
[22] ᒫᑲ ᐁᑲᐧ ᑭ ᓯᑭᒥᑎᓈᐋᐧᐤ ᐁᑳ ᑭᑕ ᑳᒫᐧᑎᓯᔦᐠ ᒋᑭᒫ ᓇᒪᐃᐧᔮ ᐊᐃᐧᔭᐠ ᑳ ᐃᑕᓯᔦᐠ ᑭᑕ ᐊᐧᓂᑖᐤ ᐅ ᐱᒫᑎᓯᐃᐧᐣ, ᓈᐱᑳᐧᐣ ᐱᑯ ᑭᑕ ᓂᓯᐊᐧᓈᑕᐣ.
[23] ᒋᑫᒫ ᐊᓄᐦᐨ ᑎᐱᐢᑯᕽ ᓂ ᑭ ᓂᐸᐃᐧᐢᑖᑯᔨᐊᐧ ᐅᑭᓯᑯᒪ ᐊᓇ ᑭᓭᒪᓂᑐ ᑳ ᑎᐯᔨᒥᐟ, ᑳ ᐊᑐᐢᑲᐊᐧᐠ ᒥᓇ,
[24] ᐁ ᐃᓯᐟ, ᐁᑳᐃᐧᔭ ᑳᒫᐧᑎᓯ, ᐹᓬ; ᑭ ᑲ ᐅᑎᐢᑲᐃᐧᑳᐸᐃᐧᐢᑕᐋᐧᐤ ᓯᓴᕒ, ᒋᐢᐟ ᒫᑲ, ᑭᓭᒪᓂᑐ ᑭ ᑭ ᐸᑭᑎᓇᒫᐠ ᑲᐦᑭᔭᐤ ᐊᓂᑭ ᑳ ᐃᐧᒋᐱᒫᓯᒪᒋᐠ.
[25] ᐁᑯᓯ ᒫᑲ ᐅᑭᒫᑎᐠ, ᐁᑳᐃᐧᔭ ᑳᒫᐧᑎᓯᐠ, ᒋᑫᒫ ᓂ ᑖᐯᐧᑕᐋᐧᐤ ᑭᓭᒪᓂᑐ, ᑭᑕ ᐃᑭᕽ ᒣᐧᐦᒋ ᐊᓂᒪ ᑳ ᑭ ᐃᑎᑲᐃᐧᔮᐣ.
[26] ᒫᑲ ᐃᐧᔭ ᓈᐣᑕᐤ ᒥᓂᐢᑎᑯᕽ ᑭ ᑲ ᐊᑳᐧᔮᐦᐅᑯᓈᓇᐤ.
[27] ᐃᐢᐱ ᒫᑲ ᒥᑖᑕᐟ ᓀᐅᓴᑊ ᑕᐦᑐ ᑎᐱᐢᑳᐤ ᐁᐧᑎᒋᐸᔨᐠ, ᑳᑫᐧᑯᐢᐠ ᐁ ᐃᑖᐅᑯᔮᕽ ᐁᐟᕒᐃᔭ ᑭᐦᒋ ᐃᐧᓂᐯᑯᕽ, ᓈᐣᑕᐤ ᐁ ᐋᐱᑖᑎᐱᐢᑳᐠ ᓈᐱᑳᐧᓂᔨᓂᐊᐧᐠ ᑭ ᒧᔦᔨᑕᒪᐧᐠ ᑭᓯᐋᐧᐠ ᓈᐣᑕᐤ ᐊᐢᑭᕽ ᐁ ᐊᑎ ᐊᔮᔮᕽ;
[28] ᐁᑯᓯ ᐁ ᑯᑕᐢᑫᐊᑭᐠ, ᐳᑎ ᓂᓯᑕᓇᐤ ᑕᐦᑐᓂᐢᐠ; ᓈᑫᐢ ᐃᔨᑯᕽ ᒫᑲ, ᒥᓇ ᑭ ᑯᑕᐢᑫᐊᒪᐧᐠ, ᐁᑯᓯ ᐳᑎ ᐁᑲᐧ ᒥᑖᑕᐟ ᓂᔮᓇᓄᓵᑊ ᑕᐦᑐᓂᐢᐠ.
[29] ᐁ ᐊᐢᑖᓯᒋᐠ ᒫᑲ ᐃᑕ ᐁ ᐊᓯᓂᐢᑳᐠ ᑭᑕ ᐊᑳᐧᔮᐅᑯᔮᕽ, ᑭ ᐸᑭᑎᓇᒪᐧᐠ ᓀᐤ ᒋᐢᑖᐹᓱᓇ ᐅᑖᑫᑕᑯᕽ ᐅᐦᒋ, ᐁᑯᓯ ᑭ ᒥᑐᓂ ᓇᑕᐁᐧᔨᑕᒪᐧᐠ ᑭᑕ ᑭᓯᑳᔨᐠ.
[30] ᓈᐱᑳᐧᓂᔨᓂᐊᐧᐠ ᒫᑲ ᐁ ᐃᐧ ᓇᑲᑖᒧᑐᑕᐦᑭᐠ ᓈᐱᑳᐧᐣ, ᐁᑯᓯ ᓂᐱᕽ ᐁ ᑭ ᐃᓯ ᐸᑭᑖᐯᑭᓇᑭᐠ ᒥᐢᑎᑯᒋᒫᓂᐢ ᑖᐱᐢᑯᐨ ᐁ ᐃᐧ ᐊᐢᑖᒋᐠ ᒋᐢᑖᐹᓱᓈ ᓂᐢᑖᒧᑕᑯᕽ ᐅᐦᒋ,
[31] ᐹᓬ ᑭ ᐃᑌᐤ ᐊᓂᐦᐃ ᓯᒫᑲᓂᓯᐃᐧᑭᒫᐊᐧ ᒥᓇ ᓯᒫᑲᓂᓴ, ᑭᐢᐱᐣ ᐁᑳ ᐅᑭ ᐊᔮᑖᐧᐃᐧ ᓈᐱᑳᐧᓂᕽ, ᓇᒪᐃᐧᔭ ᑭ ᑲ ᑭ ᐱᒫᒋᐦᐅᓈᐋᐧᐤ.
[32] ᐁᑲᐧ ᓯᒫᑲᓂᓴᐠ ᑭ ᐸᐢᑭᓴᒪᐧᐠ ᐱᒪᓇᑳᐧᓇ ᒥᐢᑎᑯᒋᒫᓂᓯᕽ ᐅᐦᒋ, ᑭᔮᑦ ᑭᑕ ᐁᐧᐹᐅᑌᔨᐠ.
[33] ᐁ ᐃᐢᐱᒋ ᒫᑲ ᐯ ᑭᓯᑳᔨᐠ, ᐹᓬ ᑭ ᑳᑭᓯᒧᑐᑕᐁᐧᐤ ᑲᐦᑭᔭᐤ ᑭᑕ ᐅᑎᓇᒥᔨᐟ ᒥᒋᐃᐧᐣ, ᐁ ᐃᑌᐧᐟ, ᐁᑲᐧ ᐅᒪ ᑳ ᑭᓯᑳᐠ ᒥᑖᑕᐟ ᓀᐅᓵᑊ ᑭᓯᑳᐤ ᐁ ᐯᐅᔦᐠ ᒥᓇ ᐁ ᐃᑕᓯ ᐃᔨᐊᐧᓂᓯᐦᐃᓱᔦᐠ, ᐁᑳ ᑫᑲᐧᐩ ᐁ ᐅᑎᓇᒣᐠ.
[34] ᐁᑯᓯ ᒫᑲ ᑭ ᑳᑭᓯᒧᑐᑖᑎᓈᐋᐧᐤ ᑭᑕ ᐅᑎᓇᒣᐠ ᒥᒋᐃᐧᐣ: ᒋᑫᒫ ᐁᐊᐧᑯᒪ ᑭᑕ ᐅᐦᒋ ᐱᒫᑎᓯᔦᐠ: ᒋᑫᒫ ᓇᒪᐋᐧᐨ ᐯᔭᐠ ᑭᐢᑕᑳᐋᐧᐤ ᑭᐢᑎᑳᐧᓂᐋᐧᕽ ᑭᑕ ᐅᐦᒋ ᓂᓯᐊᐧᓈᑕᐣ ᐅᒪ ᑳ ᐃᑕᓯᔦᐠ.
[35] ᐃᐢᐱ ᒫᑲ ᐅᒪ ᑳ ᐃᑌᐧᐟ, ᒥᓇ ᑳ ᐅᑎᓈᐟ ᐸᑫᐧᓯᑲᓇ, ᑭ ᓇᓈᐢᑯᒣᐤ ᑭᓭᒪᓂᑐᐊᐧ ᑲᐦᑭᔭᐤ ᐁ ᑲᓇᐋᐧᐸᒥᑯᐟ; ᐁᑯᓯ ᑭ ᐸᑫᐧᓀᐤ ᒥᓇ ᑭ ᐊᑎ ᒥᒋᓱ.
[36] ᐁᑲᐧ ᒫᑲ ᑲᐦᑭᔭᐤ ᑭ ᐳᓂ ᑳᒫᐧᑎᓯᐊᐧᐠ, ᐃᐧᔭᐋᐧᐤ ᒫᑲ ᒥᓇ ᑭ ᐅᑎᓇᒪᐧᐠ ᒥᒋᐃᐧᐣ.
[37] ᑲᐦᑭᔭᐤ ᒫᑲ ᒫᒪᐃᐧ ᓈᐱᑳᐧᓂᕽ ᓂᓵᐧᐤ ᒥᑖᑕᐦᑐᒥᑕᓇᐤ ᒥᓇ ᑌᐸᑯᐦᐳᒥᑕᓇᐤ ᓂᑯᑖᐧᓯᐠ ᐊᔨᐋᐧᐠ ᓂ ᑭ ᐃᑕᓯᓈᐣ ᐊᐦᒑᐦᑲᐧᐠ.
[38] ᐃᐢᐱ ᒫᑲ ᐁᑯᔨᑯᕽ ᑳ ᒥᒋᓱᒋᐠ, ᑭ ᔮᑭᓇᒪᐧᐠ ᒥᓇ ᓈᐱᑳᐧᐣ, ᐸᑫᐧᓯᑲᓂᑳᓇ ᐁ ᐸᑲᐢᑕᐁᐧᐁᐧᐱᓈᒋᐠ.
[39] ᐃᐢᐱ ᒫᑲ ᐁ ᑭᓯᑳᐠ, ᓇᒪᐃᐧᔭ ᓂᓯᑕᐃᐧᓇᒪᐧᐠ ᐊᐢᑭ: ᒫᑲ ᐋᐧᐸᐦᑕᒪᐧᐠ ᐁ ᐋᐧᓴᐋᔨᐠ ᐁ ᓯᑳᓈᐊᐧᑳᐠ, ᐁᑯᓯ ᑭ ᐅᔭᓱᐁᐧᐊᐧᐠ ᒫᐦᑎ ᑭᑕ ᑭ ᓭᐢᑳᐢᑕᑖᒋᐠ ᓈᐱᑳᐧᐣ ᐁᑯᑕ.
[40] ᐁ ᐸᑭᑎᓇᑭᐠ ᒫᑲ ᒋᐢᑖᐹᓱᓇ, ᑭᔮᑦ ᐁᑯᓯ ᑭ ᐃᓯ ᓇᑲᑕᒪᐧᐠ ᓂᐱᕽ, ᓭᒫᐠ ᒫᑲ ᐁ ᐋᐱᑯᓇᑭᐠ ᑕᑯᐃᑲᓀᔮᐱᔭ; ᒥᓇ ᐁ ᐃᐢᑳᐧᐱᑫᐱᑕᑭᐠ ᓂᐢᑖᒧᑕᑯᕽ ᔭᑳᐢᑎᒧᐣ, ᑭ ᓈᑖᐢᑎᒧᑐᑕᒪᐧᐠ ᐃᑕ ᐁ ᓯᑳᓈᐊᐧᑳᐠ.
[41] ᒫᑲ ᐁ ᒣᑳᐧᐊᑭᐠ ᐃᑕ ᓂᓯ ᓂᐱᔭ ᐁ ᓇᑭᐢᑯᑖᑐᒪᑲᑭ, ᑭ ᓭᐢᑳᐢᑎᑖᐊᐧᐠ ᓈᐱᑳᐧᐣ; ᐁᑯᓯ ᓂᐢᑖᒧᑕᐠ ᑭ ᒥᒋᒧᑎᐣ ᒥᓇ ᓇᒪᐃᐧᔭ ᑭ ᐊᐧᐢᑲᐋᐧᐊᐣ, ᒫᑲ ᐅᑖᑫᑕᐠ ᑭ ᐊᑎ ᐱᑳᐧᐊᐣ ᐁ ᐃᓯ ᓱᑫᐸᔨᐠ ᐁ ᒫᒪᑳᐊᕽ.
[42] ᓯᒫᑲᓂᓴᐠ ᒫᑲ ᐃᐧ ᐃᑕᓱᐁᐧᐊᐧᐠ ᑭᑕ ᓂᐸᐦᐋᒋᐠ ᑭᐸᐋᐧᑲᓇ, ᐁ ᐊᐢᑖᓯᒋᐠ ᑭᑕ ᔮᔮᓇᒥᔨᐟ ᐁᑯᓯ ᑭᑕ ᑭᑎᐢᑭᐸᐃᑯᒋᐠ.
[43] ᒫᑲ ᓯᒫᑲᓂᓯᐃᐧᑭᒫᐤ, ᐁ ᐃᐧ ᐱᒫᒋᐦᐋᐟ ᐹᓬᐊ, ᑭ ᑭᐱᑎᓀᐤ ᑳ ᐃᐧ ᐃᑐᑕᒥᔨᐟ; ᐁᑯᓯ ᑭ ᐃᑕᓱᐁᐧᐤ ᐊᓂᑭ ᐁ ᑲᐢᑭᑖᒋᐠ ᑭᑕ ᔮᔮᓇᑭᐠ ᑭᔮᑦ ᑭᑕ ᐸᑲᐢᑕᐁᐧᐸᔨᐅᒋᐠ, ᒥᓇ ᓂᑳᐣ ᑭᑕ ᑲᐹᒋᐠ:
[44] ᐁᑯᓯ ᐊᓂᑭ ᑯᑕᑲᐠ, ᐋᑎᐦᐟ ᓇᐸᑭᑕᑲᐧ, ᐋᑎᐦᐟ ᒥᓇ ᐁ ᐱᐋᐧᐅᑌᔨᐠ ᓈᐱᑳᐧᐣ ᐁ ᒥᒋᒥᒋᐠ. ᐁᑯᓯ ᒫᑲ ᑭ ᐊᔨᐢᐸᔨᐤ, ᑲᐦᑭᔭᐤ ᐁ ᑭ ᑲᐹᒋᐠ ᐁᑳ ᓈᐣᑖᐤ ᐁ ᐃᓯ ᐊᔮᒋᐠ.