[1] ᒫᐊᐧᒋ ᑭᐦᒋ ᐊᔭᒥᐦᐁᐃᐧᔨᓂ ᒫᑲ ᑭ ᐃᑌᐧᐤ, ᐁᑯᓯ ᒋ ᐅᐦᐃ ᑖᐯᐧ?
[2] ᑭ ᐃᑌᐤ ᒫᑲ, ᓂᒋᐋᐧᒥᑎᐠ ᒥᓇ ᐅᑖᐃᐧᒫᑎᐠ, ᓇᑐᑕᒧᐠ, ᑭᓭᒪᓂᑐ ᑳ ᑭᐢᑌᔨᑖᑯᓯᐟ, ᑭ ᓄᑯᐦᐃᓱᐢᑕᐁᐧᐤ ᑯᑖᐃᐧᓇᐊᐧ ᐁᑊᕒᐁᐋᑦ, ᒣᑳᐧᐨ ᒣᓱᐳᑌᒥᔭᐃᕽ ᐁ ᐊᔮᐟ, ᒪᐧᔦᐢ ᐦᐁᕒᐋᓂᕽ ᐅᐟ ᐃᑖᐃᐧᓂᐟ,
[3] ᐁᑯᓯ ᑭ ᐃᑎᐠ, ᓇᑲᑕ ᑭᐟ ᐊᐢᑭ, ᒥᓇ ᓇᑲᓯᐠ ᑭ ᐋᐧᑯᒫᑲᓇᐠ, ᐁᑯᓯ ᐯ ᐃᑐᐦᑌ ᐊᐢᑭᕽ ᐊᓂᒪ ᑫ ᐋᐧᐸᐦᑕᐦᐃᑖᐣ.
[4] ᐁᑲᐧ ᑖᐯᐧ ᑭ ᓇᑲᑕᑦ ᑳᓬᑎᔭᐣ ᐊᐢᑭ, ᒥᓇ ᑭ ᐅᐟ ᐃᑖᐃᐧᓂᐤ ᐦᐁᕒᐋᓂᕽ:, ᐁᑯᑕ ᒫᑲ ᐅᐦᒋ, ᐃᐢᐱ ᐅᑖᐃᐧᔭ ᐁ ᐳᓂ ᐱᒫᑎᓯᔨᐟ, ᑭᓭᒪᓂᑐᐊᐧ ᑭ ᐋᑐᑕᐃᐠ ᐅᑕ ᐅᒪ ᐊᐢᑭᕽ, ᐃᑕ ᐊᓄᐦᐨ ᑳ ᐅᐟ ᐃᑖᐃᐧᓂᔦᐠ:
[5] ᒫᑲ ᓇᒪᐃᐧᔭ ᑭ ᒥᔨᐠ ᐁᑯᑕ ᑭᑕ ᑎᐱᔭᐁᐧᐃᐧᓯᐟ, ᓇᒪ, ᓇᒪᐋᐧᐨ ᐊᐦᐳ ᐁᐢᐱᒋᓯᑌᐟ ᑭᑕ ᑕᑯᐢᑳᑕᕽ: ᒫᑲ ᑭ ᐊᓱᑕᒫᐠ ᑭᑕ ᒥᔨᑯᐟ ᑭᑕ ᑎᐱᔭᐁᐧᐃᐧᓯᐟ, ᒥᓇ ᐅᐟ ᐊᐋᐧᓯᒥᓴ ᐋᓂᐢᑳᐨ, ᐁᑳ ᒉᐢᑲᐧ ᐁ ᐅᐟ ᐊᐋᐧᓯᒥᓯᐟ.
[6] ᑭᓭᒪᓂᑐᐊᐧ ᒫᑲ ᐅᒥᓯ ᑭ ᐃᑎᐠ, ᐅᐟ ᐊᐋᐧᓯᒥᓴ ᑭᑕ ᐃᑕᓯ ᐊᔮᔨᐟ ᐱᑐᐢ ᐊᐢᑭᕽ, ᐁᑯᑕ ᒫᑲ ᑭᑕ ᐊᐊᐧᑳᑎᒋᐠ, ᒥᓇ ᑭᑕ ᒫᔨᑐᑖᒋᐠ, ᓀᐅᒥᑕᓇᐤ ᑕᐦᑐ ᐊᐢᑭ.
[7] ᐊᓂᐦᐃ ᒫᑲ ᐊᔨᓯᔨᓂᐊᐧ ᑫ ᐊᐊᐧᑳᑎᑯᒋᐠ ᓂ ᑲ ᐅᔭᓱᐋᐧᑖᐊᐧᐠ, ᑭ ᐃᑌᐧᐤ ᑭᓭᒪᓂᑐ: ᒣᐧᐢᑕᐢ ᐃᔨᑯᕽ ᒫᑲ ᑭᑕ ᐯ ᓯᐯᐧᑌᐊᐧᐠ, ᐁᑯᓯ ᐅᑕ ᓂ ᑲ ᐊᑐᐢᑳᑲᐧᐠ.
[8] ᐁᑯᓯ ᑭ ᒥᔦᐤ ᐊᓂᒪ ᑭᐢᑭᓇᐋᐧᒋ ᐊᓱᑕᒫᑫᐃᐧᐣ ᓴᕒᑲᑦᓴᐃᓯᐃᐧᐃᐧ: ᐁᑯᓯ ᐁᑊᕒᐁᐋᑦ ᑭ ᓂᐦᑖᐃᐧᑭᐦᐁᐤ ᐋᐃᓴᑲ, ᒥᓇ ᑭ ᓴᕒᑲᑦᓴᐃᓯᐃᐧᐁᐤ ᐁ ᐊᔨᓈᓀᐅᑭᓯᑳᔨᐠ; ᒥᓇ ᐋᐃᓴᐠ ᑭ ᓂᐦᑖᐃᐧᑭᐦᐁᐤ ᒉᑲᐸ, ᒥᓇ ᒉᑲᑊ ᑭ ᓂᐦᑖᐃᐧᑭᐦᐁᐤ ᐊᓂᐦᐃ ᒥᑖᑕᐟ ᓂᓱᓵᑊ ᐅᑖᐃᐧᒫᐊᐧ.
[9] ᐅᑖᐃᐧᒫᐊᐧᐠ ᒫᑲ, ᐁ ᐅᑌᔨᒫᒋᐠ ᒍᓯᐸ ᑭ ᐊᑖᐋᐧᑳᑌᐊᐧᐠ ᐃᒋᑊᐟ ᐊᐢᑭᕽ: ᒫᑲ ᑭᓭᒪᓂᑐᐊᐧ ᑭ ᐃᐧᒉᐃᐧᐠ,
[10] ᒥᓇ ᑭ ᐸᐢᐱᐦᐃᐠ ᑲᐦᑭᔭᐤ ᐅᐟ ᐊᔨᒥᓯᐃᐧᓂᕽ, ᑭ ᒥᔨᐠ ᒥᓇ ᒥᔦᐧᔨᒥᑯᐃᐧᐣ ᒥᓇ ᐃᔨᓂᓯᐃᐧᐣ ᐁ ᐃᓯ ᐋᐧᐸᒥᑯᐟ ᐯᕒᐋᐊᐧ ᐃᒋᑊᐟ ᑭᐦᒋ ᐅᑭᒫᐊᐧ; ᐁᑯᓯ ᒫᑲ ᑭ ᑎᐯᔨᑕᒧᐃᐠ ᐃᒋᑊᐟ ᐊᐢᑭ ᒥᓇ ᒥᓯᐁᐧ ᐃᐧᑭᔨᐤ.
[11] ᐁᑲᐧ ᒫᑲ ᑭ ᐅᑎᐦᒋᐸᔨᐤ ᓄᑌᑲᑌᐃᐧᐣ ᒥᓯᐁᐧ ᐃᒋᑊᐟ ᒥᓇ ᑫᓇᐣ, ᒥᓇ ᒥᐢᑕᐦᐃ ᑯᑕᑭᑖᐃᐧᐣ: ᑯᑖᐃᐧᓇᐊᐧᐠ ᒫᑲ ᓇᒪᐃᐧᔭ ᑭ ᒥᐢᑲᒪᐧᐠ ᒥᒋᐃᐧᐣ.
[12] ᒫᑲ ᐃᐢᐱ ᒉᑲᑊ ᐱᔦᐦᑕᕽ ᐸᑫᐧᓯᑲᓂᑳᓇ ᐁ ᐃᑖᔨᐟ ᐃᒋᑊᑎᕽ, ᑭ ᐃᓯᑎᓴᐁᐧᐤ ᑯᑖᐃᐧᓇᐊᐧ ᓂᐢᑕᑦ.
[13] ᑭᑖᐧᑦ ᒫᑲ ᐁ ᐃᑐᐦᑌᔨᐟ ᒍᓯᑊ ᑭ ᑭᐢᑫᔨᑖᑯᐃᓱᐢᑕᐁᐤᐧ ᐅᒋᐋᐧᒪ; ᐁᑯᓯ ᒍᓯᑊ ᐃᑌ ᐁᐧᐦᒋᐟ ᑭ ᑭᐢᑫᔨᑕᒧᐋᐤ ᐯᕒᐅ.
[14] ᐁᑲᐧ ᒫᑲ ᒍᓯᑊ ᑭ ᐃᓯᑎᓴᐦᐅᐁᐧᐤ, ᒥᓇ ᑭ ᓇᑐᒣᐤ ᒉᑲᐸ ᐅᑖᐃᐧᔭ, ᐊᓯᒋ ᑲᐦᑭᔭᐤ ᐅ ᐋᐧᑯᒫᑲᓇ, ᑌᐸᑯᐦᐳᒥᑕᓇᐤ ᓂᔮᓇᐣ ᐊᔨᐋᐧᐠ ᐊᐦᒑᐦᑲᐧᐠ.
[15] ᒉᑲᑊ ᒫᑲ ᑭ ᐃᑐᐦᑌᐤ ᐃᒋᑊᑎᕽ; ᐁᑯᓯ ᑭ ᐳᓂ ᐱᒫᑎᓯᐤ, ᐃᐧᔭ, ᒥᓇ ᑯᑖᐃᐧᓇᐊᐧᐠ;
[16] ᑭ ᐃᑐᑕᐋᐊᐧᐠ ᒫᑲ ᐊᓂᑕ ᓯᑫᒥᕽ, ᐁᑯᓯ ᑭ ᐱᒥᓯᒫᐊᐧᐠ ᓇᐦᐃᓂᑐᐃᐧᑲᒥᑯᕽ ᐁᑊᕒᐁᐋᑦ ᑳ ᑭ ᐊᑖᒫᐟ ᐋᐧᐱᐢᑭ ᓱᓂᔮᐋᐧᐱᐢᑲᐧ ᐁ ᑎᐸᐊᒪᐋᐧᐟ ᐅᑯᓯᓯᔨᐊᐧ ᐦᐁᒫᕒᐊ ᓯᑫᒥᕽ.
[17] ᒫᑲ ᐃᔨᑯᕽ ᐊᓱᑕᒫᑫᐃᐧᐣ ᑭᓯᐋᐧᐠ ᐁ ᐊᔮᐠ, ᑭᓭᒪᓂᑐ ᑳ ᑭ ᒥᔮᐟ ᐁᑊᕒᐁᐋᒪ, ᐊᔨᓯᔨᓂᐊᐧᐠ ᑭ ᐅᐱᑭᐊᐧᐠ ᒥᓇ ᑭ ᔭᑭᐃᑐᐊᐧᐠ ᐃᒋᑊᑎᕽ,
[18] ᐱᔨᐢ ᑯᑕᐠ ᑭᐦᒋ ᐅᑭᒫᐤ ᑭ ᑎᐯᔨᑕᑦ ᐃᒋᑊᑎᕽ ᐁᑳ ᐁ ᑭᐢᑫᔨᒫᐟ ᒍᓯᐸ.
[19] ᐁᐊᐧᑯ ᑭ ᑲᑲᔦᔨᓯᐃᐧᑐᑕᐁᐧᐤ ᑭ ᐋᐧᑯᒫᑲᓂᓇᐊᐧ, ᒥᓇ ᑭ ᒫᔨᑐᑕᐁᐧᐤ ᑯᑖᐃᐧᓇᐊᐧ, ᑭᑕ ᐁᐧᐱᓈᔨᐟ ᐅᐟ ᐊᐱᐢᑕᐋᐧᓯᓯᒥᔨᐊᐧ ᐁᑳ ᑭᑕ ᐱᒫᑎᓯᔨᐟ.
[20] ᐁᑯᐢᐱ ᒫᑲ ᒧᓯᐢ ᑳ ᑭ ᓄᑯᓯᐟ, ᐁᑯᓯ ᒥᐢᑕᐦᐃ ᑭ ᑲᑕᐋᐧᓯᓯᐤ; ᒥᓇ ᑭ ᑲᓇᐁᐧᔨᒫᐤ ᓂᐢᑐ ᐱᓯᑦ ᐅᑖᐃᐧᔭ ᐅ ᐋᐧᐢᑳᐦᐃᑲᓂᔨᕽ:
[21] ᐃᐢᐱ ᒫᑲ ᐁ ᐊᐧᔭᐃᐧᐁᐧᐱᓂᐦᐟ, ᐯᕒᐅ ᐅᑖᓂᓴ ᑭ ᐅᑎᓂᐠ, ᐁᑯᓯ ᑭ ᑲᓇᐁᐧᔨᒥᐠ ᐃᐧᔭ ᑭᑕ ᐅᑯᓯᓯᐟ.
[22] ᒧᓯᐢ ᒫᑲ ᑭ ᑭᐢᑭᓄᐦᐊᒪᐋᐧᐤ ᑲᐦᑭᔭᐤ ᐅᐟ ᐃᔨᓂᓯᐃᐧᓂᔨᐤ ᐃᒋᑊᓯᔭᓇ; ᒥᓇ ᑭ ᓱᑳᔭᐃᐧᓯᐤ ᐅᐟ ᐃᑌᐧᐃᐧᓂᕽ ᒥᓇ ᐅᐟ ᐃᓯᐦᒋᑫᐃᐧᓂᕽ.
[23] ᒫᑲ ᐃᐢᐱ ᐁᑎ ᐯᐢᐋᐧᐸᐦᑕᕽ ᓀᒥᑕᓇᐤ ᑭᑕ ᐃᑕᑐᐱᐳᓀᐧᐟ ᑭ ᐃᓯ ᒥᐢᑫᐧᔨᑕᑦ ᐅᑌᐃᕽ ᑭᑕ ᑭᐅᑲᐋᐧᐟ ᐅᒋᐋᐧᒪ ᐃᐢᕒᐁᐃᓬ ᐅᐟ ᐊᐋᐧᓯᒥᓴ.
[24] ᐁ ᐋᐧᐸᒫᐟ ᒫᑲ ᐯᔭᐠ ᓇᐢᐹᐨ ᐁ ᐃᑐᑖᒥᐦᐟ, ᑭ ᓈᑕᒪᐁᐧᐤ, ᑭ ᐋᐯᐁᐤ ᐊᓂᐦᐃ ᑳ ᑭᑎᒪᐃᒥᐦᐟ, ᐁ ᐸᑲᒪᐋᐧᐟ ᐊᓂᐦᐃ ᐃᒋᑊᓯᔭᓇ:
[25] ᒋᑫᒫ ᑭᑕ ᓂᓯᑐᐦᑕᒪᐧᐠ ᐁᑐᑫ ᑭ ᐃᑌᔨᒣᐤ ᐅᒋᐋᐧᒪ ᐊᓂᒪ ᐃᐧᔭ ᐅᒋᐦᒋᕽ ᑭᑕ ᐅᐦᒋ ᐸᐢᐱᐃᑯᔨᐟ ᑭᓭᒪᓂᑐᐊᐧ; ᒫᑲ ᓇᒪᐃᐧᔭ ᑭ ᓂᓯᑐᐦᑕᒥᔨᐊᐧ.
[26] ᐁᑯᓯ ᒥᓇ ᐃᐧᔮᐸᓂᔨᐠ ᑭ ᓄᑯᐦᐃᓱᐢᑕᐁᐧᐤ ᐁ ᒫᓯᐃᑐᔨᐟ, ᐃᐧ ᑭᐱᒋᐁᐤ ᒫᑲ, ᐁ ᐃᑌᐧᐟ, ᐅᑭᒫᑎᐠ, ᑯᒋᐋᐧᒥᑐᓈᐋᐧᐤ ᐅᒪ; ᑖᓀᑭ ᑳ ᒫᔨᑐᑖᑐᔦᐠ?
[27] ᒫᑲ ᐊᓇ ᑳ ᒫᔨᑐᑕᐋᐧᐟ ᐃᐧᒋᐊᔨᓯᔨᓂᐊᐧ ᐅᐱᒣ ᑭ ᐃᓯ ᑲᐧᑯᓂᐠ, ᐁ ᐃᑌᐧᔨᐟ. ᐊᐁᐧᓇ ᑳ ᐃᑕᔨᐢᐠ ᑭᑕ ᑎᐯᔨᒥᔮᕽ ᒥᓇ ᑭᑕ ᐅᔭᓱᐋᐧᓯᔮᕽ?
[28] ᑭ ᐃᐧ ᓂᐸᐃᐣ ᒋ, ᑳ ᑭ ᐃᓯ ᓂᐸᐊᐟ ᐊᓇ ᐃᒋᑊᓯᔭᐣ ᐅᑖᑯᓯᕽ?
[29] ᐁᑲᐧ ᒧᓯᐢ ᑭ ᑕᐸᓯᐤ ᐅᒪ ᐁ ᐃᑌᐧᐃᐧᐦᐟ, ᒥᓇ ᑭ ᐃᑕᓯ ᐊᔮᐤ ᒥᑎᔭᐣ ᐊᐢᑭᕽ, ᐁᑯᑕ ᒫᑲ ᑭ ᓂᓯᔨᐊᐧ ᐅᑯᓯᓴ.
[30] ᐃᐢᐱ ᒫᑲ ᓀᐅᒥᑕᓇᐤ ᐊᐢᑭ ᐁ ᑎᐱᐸᔨᐠ, ᐅᑭᓯᑯᐊᐧ ᑭ ᓄᑯᐦᐃᓱᐢᑖᐠ ᐁ ᐸᑳᐧᑕᐢᑭᐊᐧᕽ ᓴᐃᓇ ᐊᐧᒋ, ᒣᑳᐧ ᐁ ᑳᐧᑯᑌᐠ ᐱᐢᑯᑯᐹᐤ.
[31] ᐃᐢᐱ ᒫᑲ ᒧᓯᐢ ᐃᐧᔮᐸᐦᑕᕽ, ᑭ ᒫᒪᐢᑳᑕᑦ ᐁ ᑲᓇᐋᐧᐸᐦᑕᕽ: ᐁᑯᓯ ᑭᓯᐋᐧᐠ ᐁ ᐃᑐᐦᑌᐟ ᑭᑕ ᑲᓇᐋᐧᐸᐦᑕᕽ ᑭ ᐅᑎᐦᑎᐠ ᐅᐟ ᐃᑌᐧᐃᐧᐣ ᑳ ᑎᐯᔨᐦᒋᑫᔨᐟ,
[32] ᓂᔭ ᐅ ᑭᓭᒪᓂᑐᒥᐋᐧᐊᐧ ᑯᑖᐃᐧᔭᐠ, ᐅ ᑭᓭᒪᓂᑐᒪ ᐁᑊᕒᐁᐊᑦ, ᒥᓇ ᐊᐃᓴᐠ, ᒥᓇ ᒉᑲᑊ. ᒧᓯᐢ ᒫᑲ ᑭ ᓇᓇᒥᐸᔨᐤ, ᐁᑯᓯ ᓇᒪᐃᐧᔭ ᑭ ᐃᑖᐱᐤ.
[33] ᐁᑯᓯ ᒫᑲ ᑳ ᑎᐯᔨᐦᒋᑫᔨᐟ ᐅᒥᓯ ᑭ ᐃᑎᐟ, ᑫᑕᐢᑭᓯᓀ: ᒋᑫᒫ ᐃᑕ ᐊᓂᒪ ᑳ ᓂᐸᐃᐧᔭᐣ ᑲᓈᑕᐣ ᐊᐢᑭ.
[34] ᒥᑐᓂ ᓂ ᑭ ᐋᐧᐸᐦᑕᒫᐧᐣ ᐅ ᑯᑕᑭᑖᐃᐧᓂᐋᐧᐤ ᓂᐟ ᐃᔨᓂᒪᐠ ᐃᒋᑊᑎᕽ ᑳ ᐊᔮᒋᐠ, ᒥᓇ ᓂ ᑭ ᐯᑕᒫᐧᐣ ᐅ ᒫᑐᐃᐧᓂᐋᐧᐤ, ᐁᑯᓯ ᓂ ᐯ ᐃᑐᐦᑖᐣ ᑭᑕ ᐸᐢᐱᐊᑭᐠ: ᐦᐋᐤ ᒫᑲ, ᑭ ᑲ ᐃᓯᑎᓴᐦᐅᑎᐣ ᐃᒋᑊᑎᕽ.
[35] ᐅᐦᐃ ᒧᓯᓴ ᑳ ᑭ ᐋᑕᐁᐧᔨᒫᒋᐠ, ᐁ ᐃᑌᐧᒋᐠ, ᐊᐁᐧᓇ ᑳ ᑭ ᐃᑕᐃᐢᐠ ᑭᑕ ᑎᐯᔨᒥᔮᕽ ᒥᓇ ᑭᑕ ᐅᔭᓱᐋᐧᓯᔮᕽ? ᐁᐊᐧᑲᐧᓂ ᑭᓭᒪᓂᑐ ᑭ ᐃᓯᑎᓴᐁᐧᐤ ᑭᑕ ᓇᐳ ᑎᐯᔨᒥᐁᐧᔨᐟ ᒥᓇ ᐸᐢᐱᐃᐁᐧᔨᐟ ᑭᑭ ᐅᒋᐦᒋᔨᐤ ᐅᑭᓯᑯᐊᐧ ᑳ ᑭ ᓄᑯᐦᐃᓱᐢᑖᑯᐟ ᐱᐢᑯᑯᐹᕽ.
[36] ᐊᐊᐧ ᓈᐯᐤ ᑭ ᓯᐯᐧᑕᐁᐤ, ᐁ ᑭ ᒪᒫᑖᐃᐧ ᐃᓯᐦᒋᑫᐟ ᒥᓇ ᐋᐧᐸᐦᑕᐦᐃᐁᐧᐟ ᐃᒋᑊᑎᕽ, ᒥᓇ ᒥᑳᐧᑲᒥᐃᐧ ᐃᐧᓂᐯᑯᕽ, ᒥᓇ ᐱᑲᐧᑕᐢᑲᒥᑳᕽ ᓀᐅᒥᑕᓇᐤ ᑕᐦᑐ ᐊᐢᑭ.
[37] ᐁᐊᐧᑯ ᐊᓇ ᒧᓯᐢ, ᑳ ᑭ ᐃᑖᐟ ᐃᐢᕒᐁᐃᓬ ᐅᐟ ᐊᐋᐧᓯᒥᓴ, ᐅᑭᐢᑭᐁᐧᐦᐃᑫᐊᐧ ᑭᓭᒪᓂᑐ ᑭ ᑲ ᐸᓯᑯᓇᒫᑯᐋᐧᐤ ᑭᒋᐋᐧᒥᐋᐧᐊᐧᐠ ᐅᐦᒋ, ᑖᐱᐢᑯᐨ ᓂᔭ.
[38] ᐁᐊᐧᑯ ᐊᐊᐧ ᑳ ᑭ ᐊᔮᐟ ᐊᔭᒥᐦᐋᐃᐧ ᒫᐊᐧᒋᐃᑐᐃᐧᓂᕽ ᐱᑲᐧᑕᐢᑭᕽ ᐁ ᐃᐧᒉᐋᐧᐟ ᐅᑭᓯᑯᐊᐧ ᑳ ᑭ ᑭᑐᑎᑯᐟ ᓵᐃᓇ ᐊᐧᒋᕽ, ᒥᓇ ᑯᑖᐃᐧᓇᐊᐧ: ᑳ ᑭ ᐅᑎᓇᕽ ᐱᒫᑎᓯᐃᐧ ᑲᑫᐢᑭᒥᐁᐧᐃᐧᓇ ᑭᑕ ᒥᔨᑯᔭᕽ:
[39] ᐁᐊᐧᑲᐧᓂ ᑯᑖᐃᐧᓇᐊᐧᐠ ᐁᑳ ᑳ ᑭ ᐃᐧ ᓇᓇᐃᑕᐋᐧᒋᐠ, ᒫᑲ ᑳ ᑭ ᐊᓭᓇᒫᓱᒋᐠ, ᐁᑯᓯ ᐁ ᑭ ᑭᐁᐧᒋᐠ ᐅᑌᐃᐋᐧᕽ, ᐃᒋᑊᑎᕽ,
[40] ᐁ ᐃᑖᒋᐠ ᐁᕒᐊᓇ, ᐅᓯᑕᒪᐃᐧᓈᐣ ᒪᓂᑐᐊᐧᐠ ᑭᑕ ᓂᑳᓄᑖᑯᔭᑯᐠ: ᐃᐧᔭ ᐊᐊᐧ ᒧᓯᐢ, ᐃᒋᑊᑎᕽ ᑳ ᑭ ᐯ ᐅᐦᒋ ᓯᐯᐧᑕᐃᑯᔭᕽ, ᓇᒪᐃᐧᔭ ᓂ ᑭᐢᑫᔨᑌᓈᐣ ᑖᓂᑌ ᐁᔮᑫᐧ.
[41] ᑭ ᐅᓯᐁᐊᐧᐠ ᒫᑲ ᒧᐢᑐᓱᓯᓴ ᐁᑯᐢᐱ ᐁ ᑲᑭᓯᑳᐠ, ᒥᓇ ᑭ ᐯᑖᐊᐧᐠ ᐁ ᒪᒍᐢᑌᐊᒪᐋᐧᒋᐠ ᐊᓂᐦᐃ ᒪᓂᑐᑳᓇ, ᒥᓇ ᑭ ᒪᒪᐦᑖᑯᐃᑲᐧᐠ ᐊᓂᒪ ᑳ ᑭ ᐊᑐᐢᑳᑕᐦᑭᐠ ᐅᒋᐦᒋᐋᐧᐊᐧ ᐅᐦᒋ.
[42] ᒫᑲ ᑭᓭᒪᓂᑐ ᑭ ᑫᐧᐢᑭᐤ, ᐁᑯᓯ ᑭ ᐸᑭᑎᓀᐤ ᑭᑕ ᐊᑐᐢᑲᐋᐧᔨᐟ ᑳ ᐅᓵᒣᔭᑐᔨᐟ ᑭᓯᑯᕽ; ᑳ ᐃᑕᓯᓇᐦᐃᑳᑌᐠ ᐅ ᒪᓯᓇᐦᐃᑲᓂᐋᐧᕽ ᐅᑭᐢᑭᐁᐧᐦᐃᑫᐊᐧᐠ, ᑭ ᑭ ᐸᑭᑎᓇᒪᐃᐧᓈᐋᐧᐤ ᒋ ᐁ ᓂᐸᐃᐦᒋᐠ ᐱᓯᐢᑭᐊᐧᐠ ᒥᓇ ᒪᒍᐢᑌᐊᒫᑫᐃᐧᓇ ᓀᐅᒥᑕᓇᐤ ᑕᐦᑐ ᐊᐢᑭ ᐱᑲᐧᑕᐢᑭᕽ, ᐋ ᑭᔭᐋᐧ ᐅ ᐋᐧᐢᑳᐦᐃᑲᓂᕽ ᐃᐢᕒᐁᐃᓬ?
[43] ᒫᑲ ᑭ ᑭ ᐅᑎᓇᒫᐧᓈᐋᐧ ᐅ ᒥᑭᐋᐧᑊ ᒫᓬᐋᐠ, ᒥᓇ ᐅᐟ ᐊᐦᒐᐦᑯᒪ ᐊᓇ ᒪᓂᑐ ᕒᐃᐹᐣ, ᐅᓯᐦᒋᑲᓇᐠ ᑳ ᑭ ᐅᓯᐋᔦᑯᐠ ᑭᑕ ᑳᑭᓯᒧᑐᑕᐋᐧᔦᑯᐠ: ᐁᑯᓯ ᑭ ᑲ ᓯᐯᐧᑕᐃᑎᓈᐋᐧ ᐊᐊᐧᓯᑌ ᐹᐱᓬᐊᓂᕽ.
[44] ᑯᑖᐃᐧᓇᐊᐧᐠ ᑭ ᐊᔮᐊᐧᐠ ᐊᓂᒪ ᐋᒋᒧᐃᐧᓂ ᒥᑭᐋᑊ ᐱᑲᐧᑕᐢᑭᕽ, ᑖᐱᐢᑯᐨ ᑳ ᑭ ᐃᑕᑭᑕᕽ ᑳ ᑭ ᐃᐧᐦᑕᒪᐋᐧᐟ ᒧᓯᓴ, ᑭᑕ ᐃᓯᑖᐟ ᐁ ᐃᓯᓈᑲᐧᓂᔨᐠ ᐊᓂᒪ ᑳ ᑭ ᐋᐧᐸᐦᑕᕽ.
[45] ᐁᐊᐧᑫᐧᔨᐤ ᒥᓇ ᑯᑖᐃᐧᓇᐊᐧᐠ, ᐁ ᑖᐱᐢᑲᒫᑫᒋᐠ, ᑭ ᐱᑐᑲᑖᐊᐧᐠ ᐁ ᐃᐧᒉᐋᐧᒋᐠ ᒑᐢᔪᐊ ᐃᐢᐱ ᐁ ᐯ ᐊᔮᒋᐠ ᐅᐟ ᐃᑖᐃᐧᓂᔨᕽ ᓇᓈᑐᑯᐢᑳᐣ, ᑭᓭᒪᓂᑐ ᑳ ᑭ ᐊᐧᔭᐃᐧ ᑎᓯᓈᐟ ᐅ ᓂᑳᓂᒥᔨᕽ ᑯᑖᐃᐧᓇᐊᐧ, ᐱᔨᐢ ᐁ ᐅ ᑭᓯᑳᒥᐟ ᑌᐱᐟ;
[46] ᑳ ᑭ ᒥᐢᑲᒫᐧᐟ ᐅ ᒥᔪ ᑭᑖᐸᑫᐃᐧᓂᔨᐤ ᑭᓭᒪᓂᑐᐊᐧ, ᐁᑯᓯ ᑳ ᑭ ᑲᑫᐧᒋᑫᒧᐟ ᑭᑕ ᑭ ᒥᐢᑲᒫᐧᐟ ᐃᑕ ᑭᑕ ᐃᐧᑭᔨᐟ ᐅ ᑭᓭᒪᓂᑐᒪ ᒉᑲᑊ.
[47] ᒫᑲ ᓵᓬᐅᒪᐣ ᑭ ᐋᐧᐢᑲᐃᑲᓂᑲᐁᐧᐤ.
[48] ᒫᑲ ᐁᔨᐁᐧᕽ ᒫᒪᐁᐧᔭᐢ ᑳ ᑭᒑᔨᐃᐧᐟ ᓇᒪᐃᐧᔭ ᐃᐧᑭᐤ ᐋᐧᐢᑳᐦᐃᑲᓂᕽ ᒥᒋᐦᒋᔭ ᐁ ᑭ ᐅᐦᒋ ᐅᓯᒋᑳᑌᐠ; ᑳ ᐃᑌᐧᐟ ᐅᑭᐢᑭᐁᐧᐦᐃᑫᐤ,
[49] ᑭᐦᒋ ᑭᓯᐠ ᐁᐊᐧᑯ ᓂ ᑭᐦᒋ ᐊᐱᐃᐧᐣ, ᒥᓇ ᐊᐢᑭ ᓄᑕᐢᐱᓯᑌᓯᒧᓂᐣ: ᑖᓂ ᑐᐃᐧ ᐋᐧᐢᑳᐦᐃᑲᐣ ᑫ ᐅᓯᑕᒪᐃᐧᔦᐠ? ᐃᑌᐧᐤ ᑳ ᑎᐯᔨᐦᒋᑫᐟ: ᐊᐦᐳ ᑖᓇᓂᒪ ᐃᑕ ᐁ ᐊᔦᐧᐱᔮᐣ?
[50] ᓈᒪ ᒋ ᓂᔭ ᓂ ᒋᐦᒋᔭ ᑳ ᑭ ᐅᐦᒋ ᐅᓯᑖᔮᐣ ᑲᐦᑭᔭᐤ ᐅᐦᐃ?
[51] ᑭᔭᐋᐧᐤ ᑳ ᓯᑕᐃᐧᑲᐧᔭᐁᐧᔦᐠ ᒥᓇ ᐁᑳ ᑳ ᓴᕒᑲᐣᓴᐃᓯᐃᐧᔦᐠ ᑭ ᑌᐦᐃᐋᐧᕽ ᒥᓇ ᑭᐦᑕᐊᐧᑳᐋᐧᕽ, ᑳᑭᑫ ᑭ ᓇᑳᐢᑲᐋᐧᐋᐧᐤ ᑳ ᑲᓈᑎᓯᐟ ᐊᐦᒑᕽ: ᑳ ᑭ ᐃᑐᑕᐦᑭᐠ ᑯᑖᐃᐧᐋᐧᐊᐧᐠ ᐁᑯᓯ ᑭᐢᑕᐋᐧᐤ.
[52] ᑖᓈᓂᐃ ᐅᑭᐢᑭᐁᐧᐦᐃᑫᐊᐧ ᑯᑖᐃᐧᐋᐧᐊᐧᐠ ᐁᑳ ᑳ ᑯᑕᑭᐋᒋᐠ? ᐁᑯᓯ ᑭ ᓂᐸᐁᐊᐧᐠ ᐊᓂᐦᐃ ᑳ ᑭ ᐋᐧᐸᐦᑕᐦᐃᐁᐧᔨᐟ ᓂᔮᐠ ᑭᑕ ᑕᑯᓯᓂᔨᐟ ᐅᑲᐧᔭᐢᑭᑖᑎᓯᐊᐧ; ᐊᓇ ᑭᔭᐋᐧᐤ ᐁᑲᐧ ᑳ ᑭ ᐊᐧᔦᓯᐸᑭᑎᓈᔦᐠ ᒥᓇ ᑳ ᑭ ᓂᐸᐦᐋᔦᐠ;
[53] ᑭᔭᐋᐧᐤ ᑳ ᑭ ᒥᔨᑲᐃᐧᔦᐠ ᐅᔭᓱᐁᐧᐃᐧᐣ ᐁ ᑭ ᐃᓯ ᐅᔭᑭᑕᑭᐠ ᐅᑭᓯᑯᐊᐧᐠ, ᐁᑳ ᒫᑲ ᐁ ᑲᓇᐁᐧᔨᑕᒣᐠ.
[54] ᐃᐢᐱ ᒫᑲ ᐅᐦᐃ ᐱᔦᐦᑕᐦᑭᐠ ᑭ ᐃᐧᓴᑲᐅᑲᐧᐠ ᐅᑌᐃᐋᐧᕽ, ᑭ ᑲᑭᒋᐢᑳᐱᑌᐢᑕᐁᐧᐊᐧᐠ ᒫᑲ.
[55] ᐃᐧᔭ ᒫᑲ, ᐁ ᒧᐢᑭᓀᐟ ᑳ ᑲᓈᑎᓯᔨᐟ ᐊᐦᒑᐦᑲᐧ, ᐃᐢᐱᒥᕽ ᓱᐦᑭ ᑭ ᐃᑖᐱᐤ, ᐁᑯᓯ ᑭ ᐋᐧᐸᐦᑕᑦ ᑭᓭᒪᓂᑐᐋᐧ ᐅ ᑭᐢᑌᔨᑖᑯᓯᐃᐧᓂᔨᐤ, ᒥᓇ ᒋᓴᓴ ᐁ ᓂᐸᐃᐧᔨᐟ ᐅ ᑭᐦᒋᓂᐢᑭᔨᕽ ᑭᓭᒪᓂᑐᐊᐧ, ᑭ ᐃᑌᐧᐤ ᒫᑲ,
[56] ᒋᐢᐟ, ᓂ ᐋᐧᐸᐦᑌᐣ ᑭᐦᒋ ᑭᓯᐠ ᐁ ᔪᑌᓂᑳᑌᐠ, ᒥᓇ ᐃᔨᓂᐃᐧᑯᓯᓵᐣ ᐁ ᓂᐸᐃᐧᐟ ᑭᓭᒪᓂᑐᐊᐧ ᐅ ᑭᐦᒋᓂᐢᑭᔨᕽ.
[57] ᒫᑲ ᑭ ᒥᐢᑕᐦᐃ ᑌᐯᐧᐊᐧᐠ, ᒥᓇ ᐁ ᑭ ᑭᐱᑕᐊᐧᑫᓂᓱᒋᐠ ᐁᑯᓯ ᐁ ᑭ ᒫᒪᐃᐧ ᒧᐢᑭᐢᑕᐋᐧᒋᐠ;
[58] ᑭ ᐊᐧᔭᐃᐧᐁᐧᐱᓀᐊᐧᐠ ᒫᑲ ᐅᑌᓈᕽ ᐅᐦᒋ, ᐁᑯᓯ ᐁ ᑭ ᐱᒫᐧᐱᐢᑲᐋᒋᐠ: ᐊᓂᑭ ᒫᑲ ᐅᑖᒋᒧᐊᐧᐠ ᑭ ᐊᐢᑖᐊᐧᐠ ᐅᐢᑯᑖᑳᐋᐧᐊᐧ ᐅᓯᑎᔨᕽ ᐅᐢᑭᓂᑭᐊᐧ ᓵᓬ ᐁ ᐃᓯᔨᐦᑳᓱᔨᐟ.
[59] ᑭ ᐱᒫᐧᐱᐢᑲᐁᐊᐧᐠ ᒫᑲ ᐃᐢᑎᐱᓇ, ᐁ ᒪᐃᐧᒧᐢᑕᐋᐧᔨᐟ ᑳ ᑎᐯᔨᐦᒋᑫᔨᐟ, ᐁ ᐃᑌᐧᔨᐟ, ᑌᐯᔨᐦᒋᑫᔭᐣ ᒋᓴᐢ, ᐅᑎᐣ ᓂᐟ ᐊᐦᒑᕽ.
[60] ᑭ ᐅᒋᐦᒋᑲᐧᓇᐱᐤ ᒫᑲ, ᒥᓇ ᑭ ᐃᓯ ᒪᐃᐧᒧᐢᒋᑫᐤ ᐁ ᑭᓯᐁᐧᐟ, ᑌᐯᔨᐦᒋᑫᔭᐣ, ᐁᑳᐃᐧᔭ ᐅᒪ ᒪᒋᐃᑎᐃᐧᐣ ᐅᑭᑕᒪᐃᐧᐠ. ᐃᐢᐱ ᒫᑲ ᐅᒪ ᑳ ᐃᑌᐧᐟ, ᑭ ᑲᐃᐧᑲᐧᓯᐤ.