[1] – Ах, не гузельсинъ, ярем, ах, не гузель! Зулюфлеринъ тюбюндеки козьлеринъ гогерджин козьлери киби назик. Сачларынъ Гилад дагъындан тюшип кельген эчкилер киби къара.
[2] Тишлеринъ – къыркъылып ювунгъан беяз къойлар кибидир; эр бирининъ чифти бар, араларында да къысыр сою ёкъ.
[3] Дудакъларынъ ачыкъ къырмызыдыр, агъзынъ да не къадар гузель! Зулюфлеринънинъ тюбюндеки янакъларынъ – санки нар парчасыдыр!
[4] Бойнунъ – юксек ве усталыкънен къурулгъан Давутнынъ къуллеси кибидир, боюндаки ильванларынъ – джесюр аскерлернинъ къулледе асылгъан бинъ къалкъаны кибидир.
[5] Кокюслеринъ – сыгъыннынъ эки уфакъ баласы киби назиктир, занбакълар арасында отлагъан яш гъазельнинъ эгизидир.
[6] Танъ атмаздан, къаранлыкъ гъайып олмаздан эвель, мюр дагъына, темиз къокъулы мискъ байырына бараджагъым.
[7] Баштан-аякъ гузельсинъ, ярем! Ич къусурынъ ёкъ.
[8] Кель манъа Ливандан, джаным, кель манъа Ливандан! Амана тёпелигинден, Сенир ве Хермон дагъ тёпесинден, арсланларнынъ къобаларындан, леопардларнынъ дагъларындан тюш.
[9] Къызкъардашым, келиним! Сен козьлеринънинъ бир бакъышынен, бойнунъдаки герданлыгъынынъ бир алкъасынен юрегимни хырсызладынъ!
[10] Къызкъардашым, келиним! Севгинъ не гузель, севгинъ шараптан да яхшы! Не де аджайип къокъуй мискълеринъ, олар эр бир къокъудан гузель!
[11] Эй, келиним! Дудакъларынъдан бал тамлай, тилинъден бал ве сют тёкюле. Урбаларынъдан кельген къокъу – Ливаннынъ хош къокъусы кибидир!
[12] Меним къызкъардашым, келиним – килитленген багъча, къорчалангъан бир къую, къапалы бир чокъракъ.
[13] Сен – нар багъчасысынъ! Анда энъ яхшы мейвалар, къына ве нард ягълары,
[14] нард ве шафран, тюрлю къокъулы шейлернен шекер къамышы ве тарчын, эр бир хош къокъуларнен мюр ве алоэ.
[15] Багъча чокърагъы – тазе сув къуюсыдыр, Ливандан акъкъан сувлардыр.
[16] – Уян, эй, шималь ели, сен де кель, эй, дженюп ели! Багъчама эс де, онынъ гузель къокъуларыны сач. Севгилим багъчасына кельсин, татлы мейваларыны ашасын!