[1] РАББИ Мусагъа бойле деп айтты: – Фыравунгъа барып, онъа айт: РАББИ: «Манъа ибадет этмек ичюн, халкъымны йибер, – дей.
[2] – Оларны йибермеге разы олмасанъ, Мен бутюн сенинъ топрагъынъны бакъаларгъа толдурырым.
[3] Нил дерьясынынъ ичи бакъаларгъа толып-ташар, ве олар чыкъып, сенинъ эвинъе, юкълагъан еринъе, тёшегинъе, хызметчилеринънинъ ве халкъынънынъ эвлерине, собаларынъа ве хамыр савутларынъа биле кирерлер,
[4] сенинъ, халкъынънынъ ве эписи хызметчилеринънинъ устюне чыкъарлар».
[5] Сонъ РАББИ Мусагъа бойле деди: – Агъанъ Харунгъа айт, таягъыны алып, къолунъны озенлернинъ, сув акъымларынынъ ве голлернинъ устьлерине узатсын, Мысыр топрагъына бакъаларны чыкъарсын.
[6] Харун къолуны Мысыр сувларынынъ устюне узатып, бакъаларны чыкъарды. Бакъалар чыкъып, Мысыр топрагъыны къапладылар.
[7] Амма Мысыр тылсымджылары да, озьлерининъ тылсымларынен айны шуны япып, Мысыр топрагъына бакъаларны чыкъардылар.
[8] Сонъ фыравун, Мусанен Харунны чагъыртып, оларгъа: – Менден ве халкъымдан бакъаларны ёкъ этсин деп, мен ичюн РАББИге дува этинъиз. Сонъ, РАББИге къурбан чалмакъ ичюн, Исраиль халкъыны йиберерим, – деди.
[9] Муса фыравунгъа: – Бакъалар сенде, халкъынъда, эвлеринъде ёкъ олып, тек дерьяда къалсынлар деп, сен ичюн, хызметчилеринъ ве халкъынъ ичюн дува этеджегимнинъ вакътыны бильдир, – деди.
[10] Фыравун онъа: – Ярын, – деди. Муса онъа: – Айткъанынъ киби олур. Бойледже биль: Алламыз олгъан РАББИ киби кимсе ёкъ.
[11] Бакъалар сенден, эвлеринъден, хызметчилеринъден ве халкъынъдан кетерлер. Олар тек Нил дерьясында къалырлар, – деп джевап берди.
[12] Муса ве Харун фыравундан чыкъкъан сонъ, Муса фыравунгъа ёллангъан бакъалар акъкъында РАББИге дува этти.
[13] РАББИ, Муса сорагъаны киби, этти: бакъалар мысырлыларнынъ эвлеринде, азбарларында, тарлаларында ольдилер.
[14] Оларны обаладылар, ве ер сасып башлады.
[15] Фыравун, енгиллик олгъаныны корип, юрегини таш киби къаттырды ве, РАББИ айткъаны дайын, Мусанен Харунны динълемеди.
[16] Сонъ РАББИ Мусагъа бойле деп айтты: – Харунгъа айт, таягъыны котерип, оны топракъкъа урсун, ве бутюн Мысыр топрагъынынъ тозу боджеклерге айланыр.
[17] Олар ойле де яптылар. Харун, къолундаки таягъыны котерип, топракъкъа урды, ве адамларнен айванларнынъ устю боджеклерге толды. Бутюн Мысыр топрагъы бою топракъ тозу боджеклерге айланды.
[18] Тылсымджылар озь тылсымларынен боджеклерни япмагъа тырыштылар, амма япып оламадылар. Адамларнен айванларнынъ устю-башы исе боджек эди.
[19] Сонъ тылсымджылар фыравунгъа: – Керчектен, Алла Озь къудретини косьтередир, – дедилер. Лякин фыравуннынъ юреги таш киби къатты эди, ве РАББИ айткъаны киби, о, динълемеди.
[20] РАББИ Мусагъа: – Ярын саба эрте турып, фыравун сувнынъ янына келир, – деди. – Онынъ огюне бар ве онъа айт: РАББИ бойле деп айта: «Сахрада Манъа ибадет этсин деп, халкъымны йибер.
[21] Халкъымны йибермесенъ, санъа, хызметчилеринъе, халкъынъа ве эвлеринъе чокътан-чокъ копек чибинлерини ёлларым, ве мысырлыларнынъ эвлеринен яшагъан ерлери чибинлерге толур.
[22] О куню халкъым яшагъан Гошен топрагъыны айырырым, ве анда чибинлер олмаз. О заман, Мен – РАББИ, бу топракъта олгъанымны билирсинъ.
[23] Халкъымны чибинлерден къорчалап, оны сенинъ халкъынъдан фаркълы этеджегим. Бу алямет ярын оладжакъ».
[24] РАББИ ойле де япты: фыравуннынъ эвине, хызметчилерининъ эвлерине ве бутюн Мысыр топрагъына чокътан-чокъ чибинлер учып кельди. Ер юзю чибинлерден харап ола башлады.
[25] Фыравун, Мусанен Харунны озюне чагъыртып, оларгъа: – Бу топракътан кетмейип, сизинъ Алланъызгъа къурбан чалынъыз, – деди.
[26] Лякин Муса онъа: – Буны япмакънынъ чареси ёкъ, – деп джевап къайтарды. – РАББИге къурбан чалсакъ, мысырлылар ичюн бу арам олур. Мысырлылар ичюн арам олгъан къурбанны оларнынъ козьлери огюнде чалсакъ, олар бизлерни ташларнен урмазлармы?
[27] Биз учь куньлюк ёлгъа сахрагъа чыкъайыкъ ве, РАББИ бизге айткъаны киби, Онъа, бизим Алламызгъа къурбан чалайыкъ.
[28] Фыравун: – Сахрада РАББИге, сизинъ Алланъызгъа къурбан чалмакъ ичюн, сизни йиберерим. Тек узакъ кетменъиз. Меним ичюн дува этинъиз, – деди.
[29] – Иште, мен сенден чыкъып кетип, РАББИге дува этерим, ве чибинлер сенден, хызметчилеринъден, халкъынъдан ярын учып кетерлер, – деп джевап берди онъа Муса. – Тек, РАББИге къурбан чалмакъ ичюн халкъны йибермейип, яландан вазгеч.
[30] Сонъ Муса фыравундан чыкъып, РАББИге дува этти.
[31] Муса сорагъаны киби япып, РАББИ фыравундан, онынъ хызметчилеринден ве халкъындан чибинлерни ёкъ этти, бир данеси биле къалмады.
[32] Лякин фыравун юрегини таш киби этти ве кене де халкъны йибермеди.