[1] РАББИ Бецалелнен Охолиавгъа ве башкъа адамларгъа Мукъаддес Ерни ве алетлерини къурмакъ ичюн бильги ве усталыкъны берди. Олар эписи бутюн ишни, РАББИ насыл айткъан олса, тамам ойле де япсынлар.
[2] Муса Бецалелни, Охолиавны, эписи РАББИден усталыкъ алгъанларны ве кимни юреги тартса, эписини ишни башлап чалышмагъа чагъыртты.
[3] Олар Мусадан, ишни беджермек ичюн, Мукъаддес Ернинъ эписи кереклерине исраиллилер кетирген бахшышларны алдылар. Исраиллилер озь истегинен даа чокъ бахшышлар Мусагъа эр саба эп кетире эдилер.
[4] Сонъ Мукъаддес Ернинъ тюрлю ишлерини беджерген эписи усталар, ким насыл иш этсе, ишини ташлап, Мусагъа кельдилер
[5] ве онъа: – РАББИ япмагъа эмир эткен ишлер ичюн халкъ керегинден зияде кетире, – дедилер.
[6] Муса эмир этти, ве ордуда бойле илян этильди: «Мукъаддес Ер ичюн не апайлар, не де акъайлар бахшышлар кетирмесинлер!» Сонъ халкъкъа бахшышларыны башкъа кетирмеге бермедилер.
[7] Эписи шейлерни япмакъ ичюн керегини арткъачынен кетирген эдилер.
[8] Ишнен огърашкъан эписи усталар он дане индже ишленген кетенден ве мор, мавылы къырмызы ве ачыкъ къырмызы юньден япылгъан безлерден Мескенни ясадылар. Оларнынъ устьлерине усталыкънен Керувларны нагъышладылар.
[9] Эр безнинъ узунлыгъы 14 метр эди, кенълиги – эки метр. Эписи безлер бир ольчюде олдылар.
[10] Беш безни бири-бирине тиктилер, къалгъан беш безни де бири-бирине тиктилер.
[11] Бири-бирине тикильген биринджи безлернинъ бир четинден мор безден ильмеклер ясадылар, экинджи бири-бирине тикильген безлернинъ бир четинден де ойле яптылар.
[12] Биринджи тикильген безлерге 50 ильмек ясадылар, экинджи бири-бирине тикильген безлернинъ четине де 50 ильмек ясадылар. Ильмеклер бири-бирине къаршы кельдилер.
[13] 50 дёгмени алтындан япып, дёгмелернен безлерни бири-бирине дёгмеледилер де, Мескен бир бутюн олды.
[14] Мескеннинъ устюни къапатмакъ ичюн, эчки юнюнден безлер яптылар. Безлер он бир дане эдилер.
[15] Бир безнинъ узунлыгъы 15 метр эди, кенълиги эки метр – бу бир без. Эписи он бир безнинъ ольчюси бир эди.
[16] Беш безни бири-биринен айры тиктирди, къалгъан алты безни де бири-бирине айры тиктирди.
[17] Безлерден япылгъан эки парчаны багъламакъ ичюн, биринджи без парчасынынъ четинде 50 ильмек япты, экинджи онен багъланаджакъ парчанынъ четине де 50 ильмек япты.
[18] Орьтюни багъламакъ ичюн, 50 дане тунч дёгме япты, ве бир бутюнлик олды.
[19] Тёпесинден дибагъ этильген ве къырмызы ренкке боялангъан териден орьтю япты, онынъ тёпесинден индже ишленген терилерден даа бир орьтюни япты.
[20] Мескен ичюн акация терегинден дос-догъру тургъан черчиве ясады.
[21] Оларнынъ узунлыгъы беш метр, кенълиги – 0,75 метр эди.
[22] Эр бир черчивенинъ ашагъы къысмында эки багъламалар япты. Мескеннинъ эписи черчивелеринде ойле япты.
[23] Мескеннинъ дженюбий тарафы ичюн 20 черчиве,
[24] бу 20 черчиве тюбюне кумюштен япылгъан 40 темель ясады: бир черчиве тюбюне эки темель, черчивенинъ эки багъламасы тюбюне бирер дане эди.
[25] Мескеннинъ шималь тарафы ичюн де 20 черчиве ясады.
[26] Оларнынъ тюбюне кумюштен япылгъан 40 темель ясады: бир черчиве тюбюне эки темель, черчивенинъ эки багъламасы тюбюне бирер дане эди.
[27] Мескеннинъ арттаки дивары ичюн гъарп тарафтан алты черчиве ясады.
[28] Арттаки тарафынынъ кошелери ичюн даа эки черчиве ясады.
[29] Оларнынъ тюплери бири-бирине багълангъан эдилер, тёпелери бир алкъагъа багъланды, экиси ичюн де ойле эди. Олар эки кошеде турдылар.
[30] Бойлеликнен, секиз черчиве олды, оларнынъ тюплерине кумюштен япылгъан 16 темель ясады: бир черчиве тюбюне эки темель эди.
[31] Акация терегинден сырыкълар ясады. Мескеннинъ бир тарафындаки черчивелери ичюн – беш сырыкъ,
[32] экинджи тарафындаки черчивелери ичюн – беш сырыкъ ве гъарпкъа бакъкъан арттаки тарафы ичюн де – беш сырыкъ ясады.
[33] Черчивелерининъ орталарындан башындан сонъунадже кечеджек ичеридеки сырыкъны ясады.
[34] Черчивелерини алтыннен къаплады. Сырыкъларны кечирмек ичюн алкъаларны алтындан япты. Сырыкъларны алтыннен къаплады.
[35] Мор, мавылы къырмызы, ачыкъ къырмызы юньден ве индже ишленген кетенден перде япып, онынъ устюне усталыкънен Керувларны нагъышлады.
[36] Акация терегинден перде ичюн алтын ченгеллери олгъан дёрт дирек япып, оларны алтыннен къаплады. Диреклер тюбюне дёрт кумюш темель япты.
[37] Мескеннинъ къапусы ичюн мор, мавылы къырмызы, ачыкъ къырмызы юньден ве индже ишленген кетенден нагъышлангъан перде япты.
[38] Перде ичюн ченгеллери олгъан беш дирек япып, оларнынъ тёпелерини ве багъламаларыны алтыннен къаплады. Диреклер ичюн беш тунч темель япты.