[1] قوزو یدّئنجی مؤهورو سیندیردیقدا، یاریم ساعات قدرئنجه گؤیده سوکوت اولدو.
[2] و من تارینین حوضوروندا دوران یدّی مله‌یی گؤردوم. اونلارا یدّی شیپور ورئلدی.
[3] آیری بئر ملک گلئب، قوربانگاهین یانیندا دوردو. الئنده قیزیل بئر بوخوردان وار ائدی و اونا چوخلو بوخور ورئلمئشدی، اِله کی، تختئن قاباغیندا اولان قیزیل قوربانگاهین اوستونده بوتون موقدّسلرئن دوعالارینا قاتسین.
[4] بوخورون توستوسو موقدّسلرئن دوعالاری ائله بئرلئکده مله‌یئن الئندن تارینین حوضورونا قالخدی.
[5] او واخت، ملک بوخوردانی گؤتوروب، اونو قوربانگاهین اودو ائله دولدوردو و اونو یره آتدی. بونون دالینجا گؤی گورولتولری و سسلر و شئمشکلر و بئر زلزله باش وردی.
[6] یدّی شیپورو اولان یدّی ملک اؤزلرئنی شیپور چالماغا حاضیرلادیلار.
[7] بئرئنجی ملک چالدی. قانلا قاریشمیش دولو و اود گلدی و یر اوزونه یاغدیریلدی. یرئن اوچده بئری، آغاجلارین اوچده بئری و بوتون یاشیل اوتلار یاندیلار.
[8] ائکئنجی ملک چالدی. اله بئل کی، آلوو کئمی یانان بؤیوک بئر داغ دهنزئن ائچئنه آتیلدی. و دهنزئن اوچده بئری قانا دؤندو.
[9] دهنزده یاشایان مخلوقلارین اوچده بئری اؤلدو. گمئلرئن ده اوچده بئری محو اولدو.
[10] اوچونجو ملک چالدی. مشعل کئمی یانان بؤیوک بئر اولدوز گؤیدن دوشدو. اولدوز چایلارین و سو بولاقلارینین اوچده بئرئنه دوشدو.
[11] او اولدوزون آدی اَفسَنتئندئر. سولارین اوچده بئری اَفسَنتئنه دؤندو و چوخ ائنسان سولاردان اؤلدولر، چونکی سولار آجی اولموشدولار.
[12] دؤردونجو ملک چالدی. گونون، آیین و اولدوزلارین اوچده بئری وورولدو، اِله کی، اونلارین اوچده بئری قارالسین و گوندوزون اوچده بئری ائشیقسیز قالسین، گجه ده اِله.
[13] او زامان گؤیون اورتاسیندا اوچان بئر قارتالی گؤردوم و اشئتدئم کی، اوجا بئر سسله دیئر: «وای، وای، او قالان اوچ مله‌یئن چالاجاق شیپور سسئنئن سببئندن، وای یر اوزونده ساکئن اولانلارین حالینا!»