[1] او واخت گؤردوم کی، قوزو یدّی مؤهورون بئرئنی سیندیراندا، دؤرد جانلی مخلوقلاردان بئرئنئن سسئنی اشئتدئم کی، گورولتو سسی ائله دیئر: «گل.»
[2] باخدیم، و باخ، بئر آغ آت! و اوستونده اَیلشه‌نئن بئر کامانی وار ائدی. و اونا بئر تاج ورئلمئشدی و او، فاتح کئمی یولا چیخدی کی، فتح اتسئن.
[3] ائکئنجی مؤهورو سیندیراندا، اشئتدئم کی، ائکئنجی جانلی مخلوق دیئر: «گل.»
[4] و باشقا بئری، بئر کهر آت! و اونون اوستونده اَیلَشنه عطا اولموشدو کی، یر اوزوندن صولحو گؤتورسون و بو دا کی، ائنسانلار بئربئرلرئنی اؤلدورسونلر. و بؤیوک بئر قیلینج اونا ورئلمئشدی.
[5] اوچونجو مؤهورو سیندیراندا، اشئتدئم کی، اوچونجو جانلی مخلوق دیئر: «گل.» باخدیم، و باخ، بئر قارا آت! و اونون اوستونده اَیلشه‌نئن الئنده بئر تره‌زی وار ائدی.
[6] و دؤرد جانلی مخلوقون آراسیندان سس کئمی بئر شی اشئتدئم کی، دیئر: «بئر اؤلچو بوغدا بئر دئنارا، اوچ اؤلچو آرپا بئر دئنارا. یاغا و شرابا دا ضرر یتئرمه.»
[7] قوزو دؤردونجو مؤهورو سیندیراندا، دؤردونجو جانلی مخلوقون سسئنی اشئتدئم کی، دیئر: «گل.»
[8] باخدیم، و باخ، بئر ساری آت! و اونون اوستونده اَیلشه‌نئن اؤلوم آدی وار ائدی. اؤلولر دئیاری دا اونون دالینجا گلئردی. یر اوزونون دؤردده بئرئنئن حاکئمئیّتی اونلارا ورئلمئشدی کی، قیلینج، قحطی، وبا و یر اوزونون وحشی حیوانلاری ائله اؤلدورسونلر.
[9] قوزو بشئنجی مؤهورو سیندیراندا، قوربانگاهین آلتیندا او آداملارین جانلارینی گؤردوم کی، تارینین کلامیندان و ساخلادیقلاری شهادتدن اؤتری اؤلدورولموشدولر.
[10] اونلار اوجا بئر سسله باغیریب دیئردئلر: «ای ریئس، ای موقدّس و حقئقی اولان، نه واختا کئمی موحاکئمه اتمه‌یئب، یر اوزونده یاشایانلاردان، قانیمیزین ائنتئقامینی آلمایاجاقسان؟»
[11] و اونلارین هر بئرئنه آغ بئر شئنل ورئلمئشدی و اونلارا دیئلمئشدی کی، داها بئر آز ائستئراحت اتسئنلر؛ او واختاجاق کی، قوللوقدا اونلارلا همکار اولانلار و اونلار کئمی اؤلدورولمه‌لی اولان قارداشلارین سایی تکمئل اولسون.
[12] آلتینجی مؤهورو سیندیراندا باخدیم، و بؤیوک بئر زلزله باش وردی؛ گون ساچدان توخونموش بئر چول کئمی قارالدی و آی باشدان‌‌باشا قان کئمی اولدو.
[13] گؤیون اولدوزلاری دا گؤیدن یره تؤکولدولر، نجه کی، انجئر آغاجی آغیر بئر یلئن الئنده اسئب، کال انجئرلرئنی یره تؤکر.
[14] گؤی بوکولن طومار کئمی چکئلئب گتدی. هر داغ و جزئره ده یرئندن گؤتورولدو.
[15] سونرا یر اوزونون پادشاهلاری، اعیانلاری، حؤکمدارلاری، وارلی‌لاری، گوجلولری، هر قول و هر آزاد اؤزلرئنی ماغارالاردا و داغلارین قایالاری آراسیندا گئزلَتدئلر.
[16] داغلارا و قایالارا ددئلر: «اوستوموزه دوشون و بئزی تختده اوتورانین حوضوروندان و قوزونون قضبئندن گئزله‌دئن.
[17] چونکی اونلارین قضبئنئن بؤیوک گونو گلئب و کئم دایانا بئلر؟!»