[1] سونرا، گؤیده بؤیوک و حیرته سالان باشقا بئر علامت گؤردوم؛ یدّی ملک کی، آخیرکی یدّی بلالاری گتئرئردئلر، چونکی تارینین قضبی اونلارلا قورتاریر.
[2] اودلا قاریشیق شوشه‌دن دهنز کئمی بئر شی گؤردوم. جاناوارا، اونون تئمثالینا و اونون آدینا عایید سایی‌یا قالئب گلنلر، بو شوشه دهنزئن اوستونده دورموشدولار و تارینین چنگلری اللرئنده ائدی.
[3] اونلار، اؤزونو تارییا قول اتمئش موسانین و قوزونون ماهنیسینی اوخویوب، دیئردئلر: ای رب تاری، هر شیه قادئر اولان، سنئن ائشلرئن بؤیوک و حیرته سالاندیر. ای مئلّتلرئن پادشاهی، سنئن یوللارین صالح و دوغرودور!
[4] یارب، کئم سندن قورخماز و سنئن آدینی عئزّتلندئرمز؟! چونکی آنجاق سن موقدّسسن. چونکی بوتون مئلّتلر گلئب، سنئن حوضوروندا پرستئش اده‌جکلر، اونا گؤره کی، سنئن صالح ائشلرئن آشکار اولوب.
[5] بو شیلردن سونرا باخدیم، و گؤیده شهادت خیمه‌سئنئن معبدی آچیلدی،
[6] و یدّی بلانی گتئرن او یدّی ملک معبددن اشئیه چیخدی؛ تمئز و پارلاق بئر کتانا گیئنمئشدئلر و سئنه‌لرئنی قیزیل قورشاقلارلا باغلامیشدیلار.
[7] او واخت دؤرد جانلی مخلوقون بئری، یدّی مله‌یه یدّی قیزیل کاسا وردی کی، ابددن ابده‌جک یاشایان تارینین قضبی‌ائله دولو ائدی.
[8] و معبد تارینین شؤوکت و قودرتئندن چیخان توستو ائله دولدو. و یدّی مله‌یئن یدّی بلاسی تامام اولمایانا قدر، هچ کس معبده گئره بئلمئردی.