[1] “Uka qhipatsti yaqha thakhinjam Basán tuqir sarapxtan, ukampis Edrei sat chiqar purisasti Basán marka apnaqir Og sutin reyipax taqpach ejercitopampiw jiwasamp nuwasir mistunïna.
[2] “Ukat Tatitux nayar sarakitu: ‘Jan jumax axsaramti, nayaw jupampiru, ejercitopampiru, ukhamarak taqi markaparus amparamar katuyaskäma, ukhamat jumax kunjämtix Hesbón markan jakir amorreonakan Sihón sat reyipar lurkta, uka kipka jupar lurañamataki’ sasa.
[3] “Ukasti ukhamänwa. Tatit Diosasax jiwasan amparanakasaruw Og reyimpiru, taqpach ejercitopampir katuyistu. Ukatsti jupanakarux taqiniruw jan maynin jiwaraytan.
[4] Argob sat chiqankir suxta tunka markanakapsa taqpach katuntapxaraktan, janiw mä markas jan katuntatax uñjaskänti.
[5] Taqi uka markanakasti suma jach'a pirqanakan muyuntatänwa, jach'a punkunakani, hierrot lurat barranakani; ukatsti walja jan uyuchrantat markanaksa t'unjaraktanwa.
[6] Taqi uka markanak t'unjapxtan, kunjämtix Hesbón markankir Sihón reyimpix lurktan ukhama, ukhamarak chachanakarusa, warminakarusa, wawanakarusa jiwarayasa,
[7] jiwasanakatakisti taqi uywanakampi, taqi kunanakatix jila alanïki ukanakampik katuntastanxa.
[8] “Ukhamaw jiwasax khä urunakan uka pä amorreo reyinakan uraqinakap katuntastan, jupanakax Jordán jawirat inti jalsu tuqin jakapxäna, Arnón jawira chiqat Hermón sat qullukama.
[9] (Sidonio jaqinakax uka Hermón sat qullurux Sirión sasaw sutichapxäna, amorreo jaqinakasti Senir sasaw sutichapxarakïna.)
[10] Og reyin apnaqatäkän taqi uka markanak katuntapxäyätan, pata pampanakankir markanakata, Galaad, Basán uraqinakata, Salcá, Edrei chiqakama.
[11] (Og sat reyikiw refaíta sat jach'a tansa jaqinakat qhiparxäna. Ikiñapax hierrot luratänwa; sayt'urux pusi metronïnwa iranarusti pä metronïnwa. Uka ikiñasti jichhakamaw amonitanakan Rabá sat markapan utjaski.)
[12] “Kawkïr uraqinaktix katuntapkäyätan uka uraqinakatsti, Rubén, Gad uka ayllunkirinakaruw churäyäta, Arnón jawir thiyankir Aroer sat chiqata, Galaad chikat qullunakkama, markanakapamppacha.
[13] Ukatsti Manasesan chikat aylluparuxa, Galaad uraqit jilt'askäna, taqi Basán uraqinaka Og reyix apnaqkatayna uka uraqinak churäyäta, Argob uraqinakamppacha; uka uraqinakasti refaíta jaqinakan uraqipat uñt'atänwa.
[14] (Manasesan Jaír sat yuqapaw Argob uraqinak katuntasxäna, Guesur, Maaca uraqinakamp qurpaski uka chiqakama. Jaír chachax Basán uraqirux Havot-jaír sasaw sutichäna pachpa sutipampi, uka sutimpiw jichhürunsa uñt'atäski.)
[15] Maquir chacharusti Galaad uraqi churäyäta,
[16] Rubén, Gad ayllunkirinakarusti Galaad uraqita Arnón jawirkamäkis uka uraqinak churäyäta, chika qhirwata, Jaboc sat jawirkama, amonitanakan uraqipampi qurpäki ukakama.
[17] Inti jalsu tuqirusti Arabá sat uraqi churäyäta, Pisgá sat qullu kayu chiqaru, Jordán jawirampi qurpaski uka uraqi, Quinéret qutat Mar Muerto sat qutäki ukakama.
[18] “Uka urun nayax akham iwxapxaraksma: ‘Jumanakan Tatit Diosamaw aka uraqi jumanakar katuyapxtam. Khitinakatix nuwasiñ yatipkta ukanakax nuwasiñ yänakam apxarusin israelit jilanakam nayräxap sarantapxam.
[19] Churapksma uka markanakansti warminakampi, wawanakampi, walja uywanakamampikiw qhiparani, jumanakan walja uywanakanïpxatam yattwa.
[20] Janiw jumanakax churapksma uka uraqir kuttanipkätati, Tatitux jilanakamar samarañ churkani ukkhakama, kunjämtix jumanakar churapktam ukhama, jupanakan kawkïr uraqtix Tatit Diosamax Jordán jawirat khursar churkani uka uraqinak katuntasiñapkama’ sasa.
[21] “Josué chacharusti aka iwxa churarakta: ‘Taqi kuntix Tatit Diosamax uka pä reyir lurki ukxa kipka nayranakamampiw uñjtaxa. Kawkhanjamtix sarkäta uka markanakarux, uka pachparak lurani.
[22] Uka markanakar jan axsaramti, juman Tatit Diosamaw jumanakat arxatasis nuwasiskani’ sasa.
[23] “Ukapachaw Tatitur achikt'asta:
[24] ‘Dios Tatay, jumaw aka luqtirimar ch'amam uñacht'aytaxa. Janiw jumjam jach'a muspharkañanak lurir yaqha Diosax utjkiti alaxpachansa, akapachansa.
[25] Jordán jawir khurkatar makhatt'ayakitaya, khä suma uraqi uñjañ munta, khä suma qullunaksa, Líbano uraqsa uñjañ munarakta’ sasa.
[26] Ukampis Diosax jumanakan jucha luratanakam laykuw nayatak q'apisïna, janirakiw mayisitaxarux ist'añ munkitänti. Ukat sipan akham sitäna: ‘¡Jan juk'ampi ukxat parlistati!
[27] Jichhasti khä Pisgá sat qullur makhatam, uka patat uñatatam amsta tuqiru, aynach tuqiru, inti jalsu tuqiru, inti jalanta tuqiru, ukampis jumax janiw Jordán jawir khurkatarux makhatkätati.
[28] Jichhasti Josué yanapirimar kunatix iwxañäki ukanak iwxam, ch'aman sayt'añapatak jupar ch'amañcham, jupaw markan nayräxap sarani, uka uraqinaksa katuntarakini, kawkïr uraqtix jichhax uñjkäta ukanaka’ sasa.
[29] “Uka qhipatsti, jiwasax Bet-peor sat qhirwan qhiparapxtan.