[1] Moisesasti saskakïnwa: “Kunapachatix Tatit Diosamax taqi markanaka t'unjkani, jupanakan uraqinakapäki ukanak amparamar katuyapxarakïtam, jumanakasti markanakapsa, utanakapsa katuntasipxarakïta ukkhaxa,
[2] Tatit Diosamax churapkätam uka markanakat kimsa markanak yaqhachapxäta,
[3] ukatsti uka markar sarki uka thakhip sum askichapxäta. Ukhamarusa, Tatit Diosamax churapkätam uka uraqinak kimsaruw jaljapxäta, ukhamat taqi khititix jaqi jiwaykani ukaxa, uka markar jaltxañapataki.
[4] Khititix jaqi masipar jiwayki ukax uka markaruw jakañap qhispiyasir jaltxani, nayraqatasti jan munkasin ukham luratap uñacht'ayañapa, ukhamarak jupanak pura jan uñisisiñan sarnaqatap uñacht'ayañaparaki.
[5] Sañäni: Maynitix masipamp lawa ch'iyañatak ch'umir saraspa, ukatsti lawar phat'antasin hachapax katuñapat jalstawayaspa, ukhamat jaqi masipar jiwayaspa ukaxa, uka jaqix uka markanakaruw jaltxani, ukhamat jakañap qhispiyasini.
[6] Ukat sipana, thakhitix jaya sarañächi ukasti, jiwatan wila masipax phuqsusiñ munasin jiwayir jaqir katjasax jiwt'ayaspawa, ukampis uka jiwayir jaqin jiwañapax janiw wakiskänti, jupanakan janipun kunapachas uñisiñan sarnaqapxatap layku.
[7] Ukat jumanakarux uka kimsa markanak yaqhachapxam sapxsma.
[8] Kunapachatix Tatit Diosamax jumanakan uraqinakam jach'aptaykani, ukatsti taqpach uraqinak churapkätam, jumanakan nayra awkinakamar arsutaparjama,
[9] ukapachasti jumanakax yaqha kimsa imantasiñ markanakamp yapxatapxäta, utjki uka kimsa markanakxaru (kunapachatix jumanakax aka kamachi arunakar ist'apxäta, ukarjam sarnaqapxäta, Tatit Diosamarus munapxäta, thakhipanjam sarapxarakïta ukapacha).
[10] Ukhamat Tatit Diosamax churapkätam uka uraqinxa, jan juchan jaqin wilapa jan wartasiskañapataki, uka wila wartatat jumanakan jan juchanïsipkañamataki.
[11] “Ukampis mä jaqitix maynir uñisisina jupar arkanaqani, ukatsti qhipan jiwayxapunini, ukat uka imantasiñ markanakar jaltawayxarakini,
[12] ukapachasti uka markan jilïr jaqinakapax uka jaqirux katuntayapxaniwa, ukatsti jiwat jaqin wila masinakaparuw katuyapxani juchañchasin jiwayatäñapataki.
[13] Jan jumanakax jupat khuyapayasipxamti, ukhamat Israel markax jan juchan jaqin wilap wartasitapat jan juchanïkaniti. Jumanakatakisti taqi kunas walikïskaniwa.
[14] “Tatit Diosamax churapkätam uka uraqinxa, janiw jaqi masiman qurpanakap jithiyapxätati, qurpa uchatäki uk yäqapxapunïtawa. Uka qurpanakax nayratpach ukham uchatapunïnwa.
[15] “Mä taripäwinxa, jaqi jiwayatapat khitir juchañchañatakisa, pani, jan ukax kimsa irkatirin arsutapaw askïni. Janiw mä sapa irkatirin arsutapax juchañchañatak askïkaniti.
[16] “Mä qhuru jaqitix k'ari irkatirit maynitak sayt'asisin mä juchat irkataspa,
[17] ukapachasti ch'axwir jaqinakat panpachaniw Tatitu nayraqatar uñstapxani, ukhamarak sacerdotenakana, taripirinakan nayraqataparu.
[18] Taripirinakasti wali suma amuyumpiw ukanakxat yatxatapxani, ukattix uka irkatirin jilaparu k'arisiñamp irkatatap amuyapxani ukapachasti,
[19] juparuw mutuyapxani, kunjämtix jupax jilapan mutuñap munkäna ukhamarjama.
[20] Ukatsti kunapachatix mayninakax ukham lurasitap yatipxani ukkhax, jaqi masipatak k'arinak arsuñ axsartapxaniwa, janirakiw mayampis uka jan wali luräwinak lurañ munapkaniti.
[21] Ukham jan wal lurir jaqinakat jan khuyapayasipxamti: Jiwayatax jiwayapxarakim; uñkatatax uñkatapxarakim, tuqitax tuqipxarakim, nuwatax nuwapxarakim, takintatasti takintapxarakim.