[1] Moisesasti markar saskakïnwa: “Abib sat phaxsix purinkani ukkhaxa, jumanakax Pascua uruyapxäta Tatit Diosamar jach'añchasa; uka phaxsin Tatit Diosamax mä aruma Egipto uraqit jumanakar irpsunipxatam layku.
[2] “Pascua urunakanxa vacanakampi, ovejanakampi luqtapxäta, Tatit Diosamar wilañcha luqtasa, kawkha chiqarutix jupax sutipan utjäwipatak ajlliskani uka chiqana.
[3] “Luqtapkäta uka animalxa jan levaduran t'ant'ampiw manq'apxäta. Paqallqu uruw jan levaduran t'ant'a manq'apxäta, t'aqhisiñ t'ant'äki uka, jumanakan Egipto markat jank'aki mistunipxatamata; ukham jumanakax jakkasin Egipto markat mistunipxatam amtasipxäta.
[4] Uka paqallqu urunakan janiw jumanakan uraqinakaman levadurax utjañapäkiti; ukatsti nayrïr uruna jayp'u tuqir wilañcha luqtapkäta uka aychatxa, janiw qhipärmanthitak jilt'ayasipxätati.
[5] Tatit Diosamax churapkätam uka markanakanxa, janiw jumanakax Pascua wilañcha luqtapxañamäkiti,
[6] jan ukasti, kawkïr chiqtix Diosax sutipan utjäwipatak ajlliskani ukawjanak luqtapxäta, jayp'u tuqiru, intix jalantkani ukapacha, Egipto markat jayp'u tuqiru mistunipxatam amtasisa.
[7] Luqtat aychxa qhatiyapxätawa, ukatsti kawkha chiqtix Tatit Diosamax ajlliskani ukan manq'apxarakïta, qhipärmanthi willjtasti utanakamaruw kuttawayxapxäta.
[8] Suxta uruw jan levaduran t'ant'a manq'apxäta, paqallqüri urunsti mä jach'a tantachasïwi lurapxäta, Tatit Diosamar jach'añchañataki, ukürusti janiw jumanakax kuna irnaqäwinaksa lurapxätati.
[9] “Trigo apthapiñ qallta uruta paqallqu semana saraqxipansti,
[10] jumanakax Semananaka sat phunchhäwi uruyapxäta Tatit Diosamar jach'añchañataki, ukatsti chuymanakamatjam waxt'anak luqtapxäta, Tatit Diosamax aski waxt'äwinak churapktam ukhamarjama.
[11] Ukatsti Tatit Diosam nayraqatan uruyapxäta, kawkha chiqarutix jupax sutipan utjäwipatak ajlliski uka chiqana, taqpach wawanakamampi, uywatanakamampi, levitanakampi, yaqha markat jutir jaqinakampi, wajchanakampi, ijmanakampi, khitinakatix jumanak taypin jakapki ukanakamp chika.
[12] Amtasipxam, jumanakas Egipto markan t'aqhisiyat uywatäpxayätawa, ukat taqi aka kamachinakarjam sarnaqapxañamaxa.
[13] “Kunapachatix trigo apthapiñ tukuyxapxäta, uvanak ch'irwsuñsa tukuyxapxarakïta ukkhaxa, paqallqu uruw Chhujllanaka lurañ sat amtasin uruyapxäta.
[14] Uk uruyasasti, wawanakamampi, uywatanakamampi, levitanakampi, yaqha markat jutir jaqinakampi, wajchanakampi, ijmanakampi, taqi jupanakampiw kusisipxäta.
[15] Paqallqu uruw Tatit Diosamar jach'añchas uruyapxäta, kawkha chiqtix jupax ajlliskani uka chiqana, Tatit Diosamax jumanakar yapu apthapitanakamaruw askimpi phuqt'apxätam, ukhamarak taqi irnaqäwinakamarusa, jumanakasti kusisitapuniw sarnaqapxäta.
[16] “Taqi chachaw Tatit Diosam nayraqatan maran kimsa kuti uñstani, kawkha chiqtix jupax ajlliskani uka chiqana, aka urunak uruyañataki: Jan Levaduran T'ant'a manq'añ uruyañ uruna, Semananaka sat uruyañ uruna, ukhamarak Chhujllanakan sat uruyañ uruna. Jupanakasti janiw Tatitun nayraqatapar ch'usa amparaki uñstkaniti,
[17] jan ukasti sapaqat mayniw churäwinak apani, Tatit Diosamax askinak churki ukhamarjama.
[18] “Tatit Diosamax sapa aylluruw markanak churani, jumanakasti sapa markanakan taripirinakampi, jilïri jaqinakamp utt'ayasipxäta, jupanakan suma chiqa kankañampi markar taripañapataki.
[19] Chiqa kankañampiw markar taripapxani, apnaqapxarakini, janiw kuna qullqsa chilltayasipkaniti, qullqi chilltayasiñax jach'a amuyt'an jaqinakarux juykhu tukuyi, chiqa kankañampi parlir jaqinakan arunakapsa maysaruw uñtayi.
[20] Chiqa kankañarukipuniw jumanakax arkapxäta, ukhamat Tatit Diosamax churapkätam uka uraqin utjantasisin jakapxañamataki.
[21] “Jan kuna quqanaksa yaqha diosanakar jach'añchañatak ayrupxamti, janirak Tatit Diosaman altarap jak'arus uka quqa uchapxamti.
[22] Jan jumanakax kuna qalanaksa ukanakar yupaychañatak pirqsusipxamti, taqi ukanakasti Tatit Diosamarux axtasiyiwa.