[1] Moisesampi, Israelan jilïr jaqinakapampix aka arunak taqpach markar sapxäna: “Jichhürun churapksma taqi uka kamachi arunakar phuqhapxam.
[2] Kunapachatix Jordán jawira makhatapkäta, ukatsti Tatit Diosamax churapkätam uka uraqir mantapkarakïta ukapachaxa, jach'a qalanak sayt'ayapxäta, uka qalanakarusti q'atawimpiw llusikipapxäta,
[3] churapksma taqi uka yatichäwinak ukar qillqañataki. Uka uraqir mantapkäta ukspachaw lurapxäta, Tatit Diosamax churapkätam, kawkhantix lechempi, misk'impix umjam jalaski uka uraqir mantasina, nayra awkinakamar arsuwaykän ukhamarjama.
[4] Ukhamasti, Jordán jawira khurkatar makhatapkäta ukapachaxa, Ebal sat qullu patxan qalanak sayt'ayapxäta, sapksma ukhamarjama, ukatsti q'atawimpiw uka qalanak llusikipapxäta.
[5] Uka chiqaruw Tatit Diosamatak qalanakat mä altar lurapxarakïta. Uka qalanakasti maypachäñapawa, janiw k'uthatäñapäkiti. Uka altaran Tatit Diosamarux nakt'ayat wilañchanak luqtapxäta,
[7] sumankañ wilañchanaksa luqtapxarakïta; ukatsti Tatit Diosam nayraqatan manq'apxäta, kusisipxarakïta.
[8] Uka qalanakxarusti churapksma taqi uka yatichäwinak suma qhan qillqantapxäta” sasa.
[9] Ukatsti Moisesax levita sacerdotenakamp chikt'ataw israelitanakar säna: “Israelitanaka, jan uxupxamti, ist'apxam; jichhürut jumanakax Tatit Diosaman markapar tukupxtaxa.
[10] Ukhamasti, jupar jaysapxam, jichhürun sapksma uka kamachi arunakaparjamaw sarnaqapxäta.”
[11] Uka pachpa uruw Moisesax markar akham iwxäna:
[12] “Kunapachatix jumanakax taqpachani Jordán jawir makhatxapxäta ukkhaxa, Simeón, Leví, Judá, Isacar, José, Benjamín ukïr ayllunakax Guerizim qullu pataruw sayt'asipxani Israel markar aski waxt'äwi arunak arsuñataki.
[13] Ukatsti Rubén, Gad, Aser, Zabulón, Dan, Neftalí, uka ayllunkirinakax Ebal qullu pataruw sayt'asipxarakini jan ist'asirinakar ñanqhachañataki.
[14] Levitanakasti taqpach israelit jaqinakaruw parlani, ukatsti jach'at arsusaw akanak qhanañchani:
[15] “ ‘Ñanqhachatäpan metal umatatayasin yaqha diosanak lurir jaqixa, ukatsti jan uñjkañ chiqar imantarakini ukaxa; uka lurañasti Diosatakix axtaskayawa.’ Uka arsutarusti taqpach markaw sani: ‘Ukhamäpan’ sasa.
[16] “ ‘Ñanqhachatäpan awkiparu, taykapar jisk'achañ chuymampi uñjir jaqixa.’ Uka arsutarusti taqpach markaw sani: ‘Ukhamäpan’ sasa.
[17] “ ‘Ñanqhachatäpan lunthatañ amtampi jaqi masipan uraqi qurpanakap jithinaqayir jaqixa.’ Uka arsutarusti taqpach markaw sani: ‘Ukhamäpan’ sasa.
[18] “ ‘Ñanqhachatäpan juykhu jaqiru thakhipat maysar irpanukur jaqixa.’ Uka arsutarusti taqpach markaw sani: ‘Ukhamäpan’ sasa.
[19] “ ‘Ñanqhachatäpan yaqha markat jutir jaqiru, mä ijmaru, mä wajcharus jan chiqa kankañampi uñjir jaqixa.’ Uka arsutarusti taqpach markaw sani: ‘Ukhamäpan’ sasa.
[20] “ ‘Ñanqhachatäpan awkipan warmipampi ikintirixa, ukham luratapampix awkiparuw p'inqachayi.’ Uka arsutarusti taqpach markaw sani: ‘Ukhamäpan’ sasa.
[21] “ ‘Ñanqhachatäpan mä uywampi q'añusir jaqixa.’ Uka arsutarusti taqpach markaw sani: ‘Ukhamäpan’ sasa.
[22] “ ‘Ñanqhachatäpan kullakapamp ikintir jaqixa, awkipan phuchhapäpasa, jan ukax taykapan phuchhapäpasa.’ Uka arsutarusti taqpach markaw sani: ‘Ukhamäpan’ sasa.
[23] “ ‘Ñanqhachatäpan taykch'ipampi ikintasir jaqixa.’ Uka arsutarusti taqpach markaw sani: ‘Ukhamäpan’ sasa.
[24] “ ‘Ñanqhachatäpan jaqi masipar ch'uxña lurasin jiwayir jaqixa.’ Uka arsutarusti taqpach markaw sani: ‘Ukhamäpan’ sasa.
[25] “ ‘Ñanqhachatäpan qullqi layku mä jan juchan jaqir jiwayir jaqixa.’ Uka arsutarusti taqpach markaw sani: ‘Ukhamäpan’ sasa.
[26] “ ‘Ñanqhachatäpan aka yatichäwinakar jan yäqirixa, janirak ukhamarjam sarnaqki uka jaqixa.’ Uka arsutarusti taqpach markaw sani: ‘Ukhamäpan’ sasa.