[1] Ukxarusti Moisesax markaruw akham säna: “Taqi aka kamachinakarjama, arsutanakarjamaw jakañanakaman jumanakax sarnaqapxäta, kawkïr uraqtix awkinakaman Tatit Diosapax utjäwinakamatak churapkätam uka uraqina.
[2] “Kawkha markanaktix katuntapkäta uka markanakanxa, diosanakapar yupaychañ chiqanakxa q'al t'unjapxäta: qullunakana, jisk'a qullunakana, ukhamarak jach'a quqa manqhanakansa.
[3] Altaranakap t'unthapipxäta, qalanakapsa jisk'a jisk'a tukjapxarakïta; kawkïr lawanakarutix yupaychapki ukanaksa phichhantapxätawa, uka kunayman uñtan diosanakapsa, jan mayampitakiw t'unjapxarakïta.
[4] “Tatit Diosamarux janiw uka markanakan saraparjam yupaychapxätati.
[5] Ayllunakam taypit Diosax mä chiqawja ajllisini sutipan ukankañapataki, jumanakasti uka chiqaruw jupar yupaychir sarapxäta.
[6] Uka chiqan jumanakax uywa wilañchanak jupar yupaychañatak luqtapxäta, sapa tunkat maya churäwinak jupatak aparapipxäta, churäwinakam Diosar churasa, arsut phuqhañ luqtanaka, chuymamatjam luqta katuyañanaka, ukhamarak vacanakamana, ovejanakaman nayrïr qallunakap churañanaka.
[7] Uka chiqan Tatit Diosaman nayraqatapan manq'apxäta, ukatsti wila masinakamamp chikaw kusisipxarakïta, irnaqäwinakamamp jikxatat achunakata, Diosaman aski waxt'äwinak jumanakar churatapata.
[8] “Uraqinakaman jakxapxäta ukkhaxa, janiw khitis jupan munañapar kuns lurkaniti, akanxa sapa maynis munañaparuw kuns luri.
[9] Chiqpachansa janïraw jumanakax samarañ uraqir puripktati, Diosax churapkätam uka uraqiru.
[10] Ukampis Jordán jawir khurkatar makhatxapxäta, ukatsti Tatit Diosamax churapkätam uka uraqin jakapkäta, ukhamarak uñisirinakamat qhispita, jan kunar axsarasa uñjasipkäta,
[11] ukapachaw jumanakax kawkha chiqarutix Tatit Diosamax sutipan utjasiñapatak ajlliskani, uka chiqan taqi kunanaktix sapksma ukanak luqtapxäta: jupar yupaychañatak nakt'at uywa wilañchanak luqtasa, sapa tunkat maya churäwinak luqtasa, taqi kuntix sum ajllisin Tatit Diosamar churañ arsupkta ukanak luqtasa.
[12] Ukatsti mä jach'a kusisiñ uru jumanakax Tatit Diosaman nayraqatapan lurapxäta taqi wawanakamampi, uywatanakamampi chika, jumanak taypin jakir levita jaqinakamp chika, jupanakasti janiw jumanak taypin kuna uraqinaksa katuqapkiti.
[13] “Ukatsti sum amuyasipxam, uywa wilañcha luqtäwi Tatitur katuyañ munapkäta ukapachasti, janiw jumanakax kawkhantix munapkta uka chiqan luqtapxätati.
[14] Jan ukasti ukxa Tatit Diosamax ayllunakam taypit ajlliskani uka chiqanak lurapxäta. Uka chiqan jumanakax taqi kuntix sapksma ukanak phuqhapxäta.
[15] “Ukampisa, munapxät ukapachaxa, markanakaman uywanak jiwayasin aycha manq'asipkasmawa, Tatit Diosamax aski waxt'äwinak churapktam ukhamarjama. Uka aychsti taqi jumanakaw manq'apxäta, gacelana, tarujana aychapäkaspas ukhama, q'umachatäpxamsa janis q'umachatäpxam.
[16] Ukampis janiw wilxa manq'apxätati jan ukasti uraqiruw waranukupxäta umäkaspas ukhama.
[17] “Jumanakasti janiw markanakaman jakañamkamaxa, trigomata, vinomata, aceitemat sapa tunkat maya churañanakatxa manq'apxätati, janirakiw vacanakamana, ovejanakaman nayrïr qallunakapatsa, Tatitur churañ arsupkta ukanakatsa, chuymanakamat waxt'anak churä sapkta ukanakatsa manq'apxätati.
[18] Jan ukasti Tatit Diosaman nayraqatapana, jupan ajllisita chiqawjanak manq'apxäta; Tatit Diosaman nayraqatapan wawanakamampi, taqi uywatanakamampi, jumanak taypin jakir levitanakamp chikaw taqi irnaqäwiman achunakapat kusisipxäta.
[19] Uka uraqin jakkasasti janipuniw levitanakarux apanukupxätati.
[20] “Ukampisa, kunapachatix jumanakan Tatit Diosamax jupan arsutaparjam uraqinakam jach'aptaykani, ukatsti aycha manq'añatix jumanakar munasipxätam ukkhaxa, kuna pachas manq'asipkätawa.
[21] Tatit Diosamax ajlliskani uka chiqatix jumanakan utjäwinakamat jayankani ukapachaxa, nayax sapksma ukhamarjam uka utjäwinakaman Tatitux churapktam uka vacama, ovejama kharsusin qawqtix munapkta uk jumanakax manq'apxam.
[22] Kamisatix gacelana, tarujana aychap manq'apkta ukhama, jumanakax q'umachatäpxamsa, janis q'umachatäpxam.
[23] Ukampis janiw kuna laykus wilap manq'apxätati, wilax jakañawa; ukhamasti janiw jakañxa wilampi chika manq'antapkasmati.
[24] Jan ukasti uraqiruw umäkaspas ukham waranukupxäta.
[25] Janipun wila manq'apxamti, ukat jumanakas wawanakamas suman jakapxäta, Diosan nayraqatapan suma luräwinak chiqap uñacht'ayapxatamata.
[26] Ukampisa kawkïr yänaktix Diosar luqtä sapkta ukanakxa, kawkha chiqarutix Diosax ajlliski ukaruw apapxäta,
[27] uka chiqansti, Tatit Diosaman altarap patxaruw nakt'at wilañchanakam luqtapxäta, ukatsti kawkïr uywanaktix luqtañatak churapkäta ukanakan wilap Tatit Diosaman altarap patxaruw warakipapxäta, ukat aychap manq'apxäta.
[28] “Ist'apxam, phuqhapxarakim, taqi kuntix sapksma uka arunaka, ukhamat jumanakasa, wawanakamas sum sarnaqapxañamataki, kunatix Diosan nayraqatapan askïki, chiqäki ukanak luratamata.
[29] Moisesasti markar saskakïnwa: “Kunapachatix Tatit Diosamax kawkïri uraqinaktix katuntapkäta uka markanak t'unjkani, ukatsti uka t'unjat uraqinakan jumanakax utjantasin jakasxapxäta ukkhasti, jumanakax amuyasipxam uka markanakan sarnaqäwinakaparjam jakañata, jupanakan utjir diosanakapar yupaychañatsa.
[31] Jan jumanakax Tatit Diosamar ukham lurapxamti, kunjämtix uka markanakax diosapar waqaychapki ukax Diosar axtasiyiwa. Jupanakax ninampi phichhantasaw kipka wawanakapsa wilañcha luqtapxi.
[32] “Ukhamasti, taqi aka kamachinak phuqhapxam, ukhamarjam sarnaqapxarakim, jan kunsa k'ichxatasa, janirak kuns k'ichiqasa.