[1] Moisesasti sarakïnwa: “Kunapachatix Tatit Diosamax churkätam uka uraqin jikxatasxäta ukapachaxa,
[2] uraqix achuyarapkätam uka taqi apthapitanakamat nayrïr achunak apaqäta, ukatsti mä canastar uchasin kawkha chiqtix Tatit Diosamax sutipan ukankañatak ajlliskani uka chiqaruw apäta.
[3] Ukatsti ukawjan luqtir sacerdoter uñstasin säta: ‘Nayax Tatit Diosaxan nayraqatapan arsta: jichhürunxa, jupan churat uraqiruw purxta, kamisatix Tatitux juramentomp nayra awkinakasar churañ arsuwaykatayna ukhamarjama’ sasa.
[4] Ukatsti sacerdotex amparamat uka canasta katuqätam, ukat Tatit Diosaman altarap nayraqatar uchani;
[5] jumasti aka arunak Diosam nayraqatan qhanañchäta: ‘Nayra awkinakaxax arameo muyuyku jaqinakänwa, juk'anikirakïnwa. Egipto markar jakiriw jupanakax sarxapxatayna, ukansti mä jach'a markaw tukupxatayna, wali ch'amani, waljani tukuñkama.
[6] Ukampis egipcionakax janiw wal uñjapkitänti, jawq'japxitänwa, llakisiyapxitänwa, wal t'aqhisiyapxitäna, ch'ama lurañanak lurayapxitäna.
[7] Ukapachasti nanakax awkinakaxan Tatit Diosaparuw mayipxäyäta nanakar yanapt'añapataki, Diosasti mayisitanakax ist'apxituwa, pist'añan sarnaqatanakaxsa, wali irnaqatanakaxsa, wali t'aqhisitanakaxsa uñjarakiwa.
[8] Diosax jach'a ch'amap uñacht'ayäna, ukatsti muspharkañ luräwinakampi, jach'a axsarkañ luräwinakampiw Egipto markat irpsunxapxitu,
[9] ukhamat aka uraqir irpantanipxitu, lechempi, misk'imp umjam jalaski uka uraqi nanakar churasa.
[10] Ukat jichhax apanta, kawkïr uraqtix Diosax churkitu uka uraqin nayrïr achunakapa’ sasa. “Ukatsti Tatit Diosaman nayraqataparuw uka canasta uchäta, ukat jupan nayräxapar killt'asirakïta.
[11] Uka qhipatsti mä phunchhäwi luräta taqi kuntix Diosamax jumampiru utamankirinakampir churktam ukanakat yuspagarasa. Ukatsti levitanakampi, jumanak taypin jakir jaya markat jutir jaqinakamp chikaw kusisirakïta.
[12] “Sapa kimsa maraw taqpach achunakamat sapa tunkat maya apaqäta, ukatsti uka achunakat levitanakaruw churäta, jumanak taypin jakir yaqha markat jutir jaqinakaru, wajchanakaru, ijmanakarus churarakïta. Ukhamat markanakaman jan khitis manq'atjam t'aqhiskaniti.
[13] Ukapachaw jumax Tatit Diosamar säta: ‘Tatay, jumatak yaqhachat achunakaxat apaqxta, ukatsti levitanakarux churxtwa, yaqha markat jutir jaqinakaru, wajchanakaru, ijmanakarus churxaraktwa. Taqi iwxanakamar phuqhasa, kamachi arunakamarjam jan kun armasisa.
[14] Janiw uka yaqhachat achunakat manq'kti, llakisita, ukhamarak q'añuchat jikxataskäyät ukkhasa, janirakiw jiwatanakarus luqtkti. Tatit Diosaxay, taqi arunakamaruw jaysta, ukhamarjamaw phuqharakta.
[15] Jichhasti alaxpachatpach uñtanim, qullan jakäwimata, Israel markamar aski waxt'äwimp phuqt'am, ukhamarak churapkista uka uraqiru, kawkhantix lechempi, misk'impix umjam jalaski uka uraqiru; nayra awkinakaxar arsuwaykta ukhamarjama’ sasa.
[16] Moisesasti sarakïnwa: “Tatit Diosamaw jichha urun iwxtam juman uka kamachi arunakaparjam jakañamataki; taqi chuymampi, taqi jakañamampiw uka yatichäwinak phuqharakïta.
[17] Jumaw jichhürun qhanañchtaxa, Tatitun juman Diosamätapa, ukatsti arumampiw arsuraktaxa jupan thakhipan arkaña, kamachinakapa, kamachi arunakap wiñayapun phuqhañsa.
[18] Tatitusti jichhüruw qhanañcharaki, juma Israel markan jupan markapätama, kunjämatix arupampi arsuwayktam ukhama, taqi kamachi arunakap phuqhañamataki.
[19] Jupaw jumarux taqi markanakat sipan mä jach'a marka tukuyätam, jach'a kankañani, aytat kankañani; ukhamat Tatit Diosamatak yaqhachat qullan markar tukurakïta, jupax sisktam ukhamarjama.”