[1] mere beṭe, kyā tū apne paṛosī kā zāmin banā hai? kyā tū ne hāth milā kar wādā kiyā hai ki maiṅ kisī dūsre kā zimmādār ṭhahrūṅga?
[2] kyā tū apne wāde se bandhā huā, apne muṅh ke alfāz se phaṅsā huā hai?
[3] aisā karne se tū apne paṛosī ke hāth meṅ ā gayā hai, is lie apnī jān ko chhuṛāne ke lie us ke sāmne aundhe muṅh ho kar use apnī minnat-samājat se tang kar.
[4] apnī āṅkhoṅ ko sone na de, apne papoṭoṅ ko ūṅghne na de jab tak tū is zimmādārī se fāriġh na ho jāe.
[5] jis tarah ġhazāl shikārī ke hāth se aur parindā chiṛīmār ke hāth se chhūṭ jātā hai usī tarah sirtoṛ koshish kar tāki terī jān chhūṭ jāe.
[6] ai kāhil, chiyūṅṭī ke pās jā kar us kī rāhoṅ par ġhaur kar! us ke namūne se hikmat sīkh le.
[7] us par na sardār, na afsar yā hukmrān muqarrar hai,
[8] to bhī wuh garmiyoṅ meṅ sardiyoṅ ke lie khāne kā zaḳhīrā kar rakhtī, fasal ke dinoṅ meṅ ḳhūb ḳhurāk ikaṭṭhī kartī hai.
[9] ai kāhil, tū mazīd kab tak soyā rahegā, kab jāg uṭhegā?
[10] tū kahtā hai, “mujhe thoṛī der sone de, thoṛī der ūṅghne de, thoṛī der hāth par hāth dhare baiṭhne de tāki ārām kar sakūṅ.”
[11] lekin ḳhabardār, jald hī ġhurbat rāhzan kī tarah tujh par āegī, muflisī hathiyār se les ḍākū kī tarah tujh par ṭūṭ paṛegī.
[12] badmāsh aur kamīnā kis tarah pahchānā jātā hai? wuh muṅh meṅ jhūṭ lie phirtā hai,
[13] apnī āṅkhoṅ, pāoṅ aur ungliyoṅ se ishārā karke tujhe fareb ke jāl meṅ phaṅsāne kī koshish kartā hai.
[14] us ke dil meṅ kajī hai, aur wuh har waqt bure mansūbe bāndhne meṅ lagā rahtā hai. jahāṅ bhī jāe wahāṅ jhagaṛe chhiṛ jāte haiṅ.
[15] lekin aise shaḳhs par achānak hī āfat āegī. ek hī lamhe meṅ wuh pāsh pāsh ho jāegā. tab us kā ilāj nāmumkin hogā.
[16] rab chhih chīzoṅ se nafrat balki sāt chīzoṅ se ghin khātā hai,
[17] wuh āṅkheṅ jo ġhurūr se deḳhtī haiṅ, wuh zabān jo jhūṭ boltī hai, wuh hāth jo begunāhoṅ ko qatl karte haiṅ,
[18] wuh dil jo bure mansūbe bāndhtā hai, wuh pāoṅ jo dūsroṅ ko nuqsān pahuṅchāne ke lie bhāgte haiṅ,
[19] wuh gawāh jo adālat meṅ jhūṭ boltā aur wuh jo bhāiyoṅ meṅ jhagaṛā paidā kartā hai.
[20] mere beṭe, apne bāp ke hukm se lipṭā rah, aur apnī māṅ kī hidāyat nazarandāz na kar.
[21] unheṅ yūṅ apne dil ke sāth bāndhe rakh ki kabhī dūr na ho jāeṅ. unheṅ hār kī tarah apne gale meṅ ḍāl le.
[22] chalte waqt wuh terī rāhnumāī kareṅ, ārām karte waqt terī pahrādārī kareṅ, jāgte waqt tujh se hamkalām hoṅ.
[23] kyūṅki bāp kā hukm charāġh aur māṅ kī hidāyat raushnī hai, tarbiyat kī ḍānṭ-ḍapaṭ zindagībaḳhsh rāh hai.
[24] yūṅ tū badkār aurat aur dūsre kī zinākār bīwī kī chiknī-chupṛī bātoṅ se mahfūz rahegā.
[25] dil meṅ us ke husn kā lālach na kar, aisā na ho ki wuh palak mār mār kar tujhe pakaṛ le.
[26] kyūṅki go kasbī ādmī ko us ke paise se mahrūm kartī hai, lekin dūsre kī zinākār bīwī us kī qīmtī jān kā shikār kartī hai.
[27] kyā insān apnī jholī meṅ bhaṛaktī āg yūṅ uṭhā kar phir saktā hai ki us ke kapṛe na jaleṅ?
[28] yā kyā koī dahakte koeloṅ par yūṅ phir saktā hai ki us ke pāoṅ jhulas na jāeṅ?
[29] isī tarah jo kisī dūsre kī bīwī se hambistar ho jāe us kā anjām burā hai, jo bhī dūsre kī bīwī ko chheṛe use sazā milegī.
[30] jo bhūk ke māre apnā peṭ bharne ke lie chorī kare use log had se zyādā haqīr nahīṅ jānte,
[31] hālāṅki use chorī kie hue māl ko sāt gunā wāpas karnā hai aur us ke ghar kī daulat jātī rahegī.
[32] lekin jo kisī dūsre kī bīwī ke sāth zinā kare wuh beaql hai. jo apnī jān ko tabāh karnā chāhe wuhī aisā kartā hai.
[33] us kī piṭāī aur be'izzatī kī jāegī, aur us kī sharmindagī kabhī nahīṅ miṭegī.
[34] kyūṅki shauhar ġhairat khā kar aur taish meṅ ā kar berahmī se badlā legā.
[35] na wuh koī muāwazā qabūl karegā, na rishwat legā, ḳhwāh kitnī zyādā kyūṅ na ho.