[1] mere beṭe, merī hidāyat mat bhūlnā. mere ahkām tere dil meṅ mahfūz raheṅ.
[2] kyūṅki in hī se terī zindagī ke dinoṅ aur sāloṅ meṅ izāfā hogā aur terī ḳhushhālī baṛhegī.
[3] shafqat aur wafā terā dāman na chhoṛeṅ. unheṅ apne gale se bāndhnā, apne dil kī taḳhtī par kandā karnā.
[4] tab tujhe allāh aur insān ke sāmne mehrbānī aur qabūliyat hāsil hogī.
[5] pūre dil se rab par bharosā rakh, aur apnī aql par takiyā na kar.
[6] jahāṅ bhī tū chale sirf usī ko jān le, phir wuh ḳhud terī rāhoṅ ko hamwār karegā.
[7] apne āp ko dānishmand mat samajhnā balki rab kā ḳhauf mān kar burāī se dūr rah.
[8] is se terā badan sehhat pāegā aur terī haḍḍiyāṅ tar-o-tāzā ho jāeṅgī.
[9] apnī milkiyat aur apnī tamām paidāwār ke pahle phal se rab kā ehtirām kar,
[10] phir tere godām anāj se bhar jāeṅge aur tere bartan mai se chhalak uṭheṅge.
[11] mere beṭe, rab kī tarbiyat ko radd na kar, jab wuh tujhe ḍānṭe to ranjīdā na ho.
[12] kyūṅki jo rab ko pyārā hai us kī wuh tādīb kartā hai, jis tarah bāp us beṭe ko tambīh kartā hai jo use pasand hai.
[13] mubārak hai wuh jo hikmat pātā hai, jise samajh hāsil hotī hai.
[14] kyūṅki hikmat chāṅdī se kahīṅ zyādā sūdmand hai, aur us se sone se kahīṅ zyādā qīmtī chīzeṅ hāsil hotī haiṅ.
[15] hikmat motiyoṅ se zyādā nafīs hai, tere tamām ḳhazāne us kā muqābalā nahīṅ kar sakte.
[16] us ke dahne hāth meṅ umr kī darāzī aur bāeṅ hāth meṅ daulat aur izzat hai.
[17] us kī rāheṅ ḳhushgawār, us ke tamām rāste puramn haiṅ.
[18] jo us kā dāman pakaṛ le us ke lie wuh zindagī kā daraḳht hai. mubārak hai wuh jo us se lipṭā rahe.
[19] rab ne hikmat ke wasīle se hī zamīn kī bunyād rakhī, samajh ke zarī'e hī āsmān ko mazbūtī se lagāyā.
[20] us ke irfān se hī gahrāiyoṅ kā pānī phūṭ niklā aur āsmān se shabnam ṭapak kar zamīn par paṛtī hai.
[21] mere beṭe, dānāī aur tamīz apne pās mahfūz rakh aur unheṅ apnī nazar se dūr na hone de.
[22] un se terī jān tar-o-tāzā aur terā galā ārāstā rahegā.
[23] tab tū chalte waqt mahfūz rahegā, aur terā pāoṅ ṭhokar nahīṅ khāegā.
[24] tū pāoṅ phailā kar so sakegā, koī sadmā tujhe nahīṅ pahuṅchegā balki tū leṭ kar gahrī nīnd soegā.
[25] nāgahāṅ āfat se mat ḍarnā, na us tabāhī se jo bedīn par ġhālib ātī hai,
[26] kyūṅki rab par terā etimād hai, wuhī tere pāoṅ ko phaṅs jāne se mahfūz rakhegā.
[27] agar koī zarūratmand ho aur tū us kī madad kar sake to us ke sāth bhalāī karne se inkār na kar.
[28] agar tū āj kuchh de sake to apne paṛosī se mat kahnā, “kal ānā to maiṅ āp ko kuchh de dūṅgā.”
[29] jo paṛosī befikr tere sāth rahtā hai us ke ḳhilāf bure mansūbe mat bāndhnā.
[30] jis ne tujhe nuqsān nahīṅ pahuṅchāyā adālat meṅ us par bebunyād ilzām na lagānā.
[31] na zālim se hasad kar, na us kī koī rāh iḳhtiyār kar.
[32] kyūṅki burī rāh par chalne wāle se rab ghin khātā hai jabki sīdhī rāh par chalne wāloṅ ko wuh apne rāzoṅ se āgāh kartā hai.
[33] bedīn ke ghar par rab kī lānat ātī jabki rāstbāz ke ghar ko wuh barkat detā hai.
[34] mazāq uṛāne wāloṅ kā wuh mazāq uṛātā, lekin farotanoṅ par mehrbānī kartā hai.
[35] dānishmand mīrās meṅ izzat pāeṅge jabki ahmaq ke nasīb meṅ sharmindagī hogī.