[1] mere beṭe, merī bāt qabūl karke mere ahkām apne dil meṅ mahfūz rakh.
[2] apnā kān hikmat par dhar, apnā dil samajh kī taraf māil kar.
[3] basīrat ke lie āwāz de, chillā kar samajh māṅg.
[4] use yūṅ talāsh kar goyā chāṅdī ho, us kā yūṅ khoj lagā goyā poshīdā ḳhazānā ho.
[5] agar tū aisā kare to tujhe rab ke ḳhauf kī samajh āegī aur allāh kā irfān hāsil hogā.
[6] kyūṅki rab hī hikmat atā kartā, usī ke muṅh se irfān aur samajh nikaltī hai.
[7] wuh sīdhī rāh par chalne wāloṅ ko kāmyābī farāham kartā aur be'ilzām zindagī guzārne wāloṅ kī ḍhāl banā rahtā hai.
[8] kyūṅki wuh insāf pasandoṅ kī rāhoṅ kī pahrādārī kartā hai. jahāṅ bhī us ke īmāndār chalte haiṅ wahāṅ wuh un kī hifāzat kartā hai.
[9] tab tujhe rāstī, insāf, diyānatdārī aur har achchhī rāh kī samajh āegī.
[10] kyūṅki tere dil meṅ hikmat dāḳhil ho jāegī, aur ilm-o-irfān terī jān ko pyārā ho jāegā.
[11] tamīz terī hifāzat aur samajh terī chaukīdārī karegī.
[12] hikmat tujhe ġhalat rāh aur kajrau bāteṅ karne wāle se bachāe rakhegī.
[13] aise log sīdhī rāh ko chhoṛ dete haiṅ tāki tārīk rāstoṅ par chaleṅ,
[14] wuh burī harkateṅ karne se ḳhush ho jāte haiṅ, ġhalat kām kī kajrawī dekh kar jashn manāte haiṅ.
[15] un kī rāheṅ ṭeṛhī haiṅ, aur wuh jahāṅ bhī chaleṅ āwārā phirte haiṅ.
[16] hikmat tujhe nājāiz aurat se chhuṛātī hai, us ajnabī aurat se jo chiknī-chupṛī bāteṅ kartī,
[17] jo apne jīwansāthī ko tark karke apne ḳhudā kā ahd bhūl jātī hai.
[18] kyūṅki us ke ghar meṅ dāḳhil hone kā anjām maut, us kī rāhoṅ kī manzil-e-maqsūd pātāl hai.
[19] jo bhī us ke pās jāe wuh wāpas nahīṅ āegā, wuh zindagībaḳhsh rāhoṅ par dubārā nahīṅ pahuṅchegā.
[20] chunāṅche achchhe logoṅ kī rāh par chal phir, dhyān de ki tere qadam rāstbāzoṅ ke rāste par raheṅ.
[21] kyūṅki sīdhī rāh par chalne wāle mulk meṅ ābād hoṅge, āḳhirkār be'ilzām hī us meṅ bāqī raheṅge.
[22] lekin bedīn mulk se miṭ jāeṅge, aur bewafāoṅ ko ukhāṛ kar mulk se ḳhārij kar diyā jāegā.