[1] ብሓርነት ምእንቲ ኽንነብር ክርስቶስ ሓራ ኣውፂኡና እዩ። ስለዙይ ጽንዑ ፤ መሊስኩም በርዑ ት ባርነት ኣይትቈረኑ።
[2] እንሆ ኣነ ጳውሎስ እነግረኩም ኣለኹ፦ እንተ ተገረዝኩም ግርዘት ኣብ ክርስቶስ ፈጺሙ ኣይጠቕመኩምን እዩ።
[3] ኲሉ እቲ ዝግረዝ ሰብ ከዓ ነቲ ሕጊ ብምሉኡ ክፍጽሞ ግቡኡ ከም ዝኾነ ደጊመ አጠንቅቕ ኣለኹ።
[4] ኣቱም ሕጊ ብምፍጻም ክትጸድቁ እትደልዩ ካብ ክርስቶስ ተፈሊኹም ኢኹም፤ ካብ ጸጋ ኸዓ ርሒቕኩም ኢኹም።
[5] ንሕና ግና ብእግዚኣብሔር መንፈስ ብእምነት ክንጸድቕ ተስፋ ጌርና ንጽበ ኣለና።
[6] ኣብ ክርስቶስ ኢየሱስ እንተ ደኣ ኣሊና እታ ብፍቕሪ እትሠርሕ እምነት እምበር ምግራዝ ኮነ ዘይምግራዝ ጥቕሚ የብሉን እሞ።
[7] ቅድም ጽቡቕ ትጐዩ ኔርኩም፤ ንሓቂ ኸይትእዘዝዋ ደኣ መን አዐንቀፈኩም?
[8] እዛ ምኽሪ እዚኣ ኻብቲ ዝጸውዐኩም እግዚኣብሔር ኣይመጸትን።
[9] እዙይ ከዓ ውሑድ ማይ ብሒቝ ንዂሉ እቲ ብሒቝ የብኲዖ ከም ዝብሃል እዩ።
[10] ካብዙይ ዝተፈልየ ኻልእ ከምዘይትሓስቡ ብጐይታ እተኣማመን እየ። እቲ ዘደናግረኩም ዘሎ ግና ዝኾነ ይኹን ፍርዱ ኽቕበል እዩ።
[11] ኣኅዋተይ! ኣነ ግርዘት የድሊ እዩ እናበልኩ ዝሰብኽ እንተ ኾይነ ደኣ ንምንታይ የሳጕጉኒ ኣለዉ? እቲ ዕንቅፋት ኮይኑ ዘሎ ናይ መስቀል ስብከት ከዓ ምተወገደ ነይሩ።
[12] እቶም ተገረዙ እናበሉ ዘደናግርኹም ሰባት እንተደለዩ ይሰለቡ።
[13] ኣኅዋተይ! ንስኻትኩም ሓራ ኽትኮኑ ኢኹም ዝተጸዋዕኹም፤ ንስንሳትኩም ደኣ ብፍቕሪ ኣገልግሉ እምበር እዛ ሓርነትኩምስ ንሥጋዊ ድልየትኩም መፈጸሚ ኣይትግበርዋ።
[14] ሕጊ ብምሉኡ ኣብቲ ንብጻይካ ኸም ነፍስኻ ኣፍቅር ዝብል ትእዛዝ ተጠቕሊሉ ኣሎ እሞ።
[15] ንስንሳትኩም እንተ ተናኸስኩምን እንተ ተባላዕኹምን ግና ከይትዋድኡ ተጠንቀቑ።
[16] ኣነ ግና ብመንፈስ ንበሩ፤ ድልየት ሥጋ ኸዓ ኣይትፈጽሙ እብለኩም ኣለኹ።
[17] ትምኒት ሥጋ ምስ መንፈስ መጻርርቲ እዩ፤ መንፈስ ከዓ ምስ ድልየት ሥጋ መጻርርቲ እዩ። ስለዙይ ነቲ እትደልይዎ ምእንቲ ኸይትገብሩ ክልቲኦም መጻርርቲ እዮም።
[18] ብመንፈስ እንተ ተመሪሕኹም ግና ተገዛእቲ ሕጊ ኣይኮንኩምን።
[19] ተግባር ሥጋ ግሁድ እዩ፤ ንሱ ኸዓ ዝሙት ርኽሰት ስድነት
[20] ኣምልኾ ጣዖት ጥንቖላ ጽልኢ ክርክር ቅንኢ ቊጥዓ ርእስኻ ምፍታው ምፍልላይ መናፍቕነት
[21] መንቀኝነት ምቅታል ስኽራን ስድነት ዘለዎ ጓይላ ነዙይ ዝመስል ኲሉን እዩ። ከምቲ ኣቐዲመ ዘጠንቀቕኩኹም እቶም ነዙይ ዝመስል ዝገብሩ ዂሎም ንመንግሥቲ እግዚኣብሔር ኣይወርስዋን እዮም።
[22] ፍረ መንፈስ ቅዱስ ግና ፍቕሪ ሓጐስ ሰላም ትዕግሥቲ ልግሲ ሕያዋይነት እሙን ምዃን
[23] ለውሃት ርእስኻ ምግዛእ እዩ። ከም ዚኣቶም ንዝመሰሉ ዝቃረን ሕጊ የለን።
[24] እቶም ናይ ኢየሱስ ክርስቶስ ዝኾኑ ነቲ ሥጋ ምስ ክፉእ ፍትወቱን ድልየትን ሰቒሎምዎ እዮም።
[25] ብመንፈስ እንነብር እንተድኣ ዄንና ብመንፈስ ንመራሕ።
[26] ንስንሳትና እናተነቓቐፍናን እናተቐናናእናን ብኸንቱ ኣይንመካሕ።