[1] ኣኅዋትና! ብዛዕባ ጊዜያቱን ወርኃቱን ግና ክንጽሕፈልኩም ኣየድልን እዩ።
[2] ሰራቒ ብለይቲ ኸም ዝመጽእ መዓልቲ ጐይታውን ከምኡ ከም እትመጽእ ንስኻትኩም ብርግጽ ትፈልጡ ኢኹም እሞ።
[3] ሰባት ሰላም እዩ፤ ዘተኣማምን እዩ ክብሉ እንተለዉ ከምቲ ንነፍሰ ፁር ሕማም ሕርሲ ዝሕዛ ብድንገት ጥፍኣት ክመጾም እዩ። ፈጺሞም ከምልጡ ኣይኽእሉን እዮም።
[4] ኣኅዋትና! ንስኻትኩም ግና ኣብ ጸልማት ስለ ዘይትነብሩ እታ መዓልቲ እቲኣ ኸም ሰራቒ ኣይትመጸኩምን እያ።
[5] ንስኻትኩምስ ደቂ ብርሃንን ደቂ መዓልትን ኢኹም። ንሕና ደቂ ለይትን ደቂ ጸልማትን ኣይኮናን።
[6] እምበኣር ንንቃሕ፤ ርእስና ንቖጻጸር ደኣ እምበር ከምቶም ካልኦት ደቀስቲ ኣይንኹን።
[7] እቶም ዝድቅሱስ ብለይቲ እዮም ዝድቅሱ፤ እቶም ዝሰኽሩውን ብለይቲ እዮም ዝሰኽሩ እሞ።
[8] ንሕና ግና ደቂ መዓልቲ ስለ ዝኾንና እምነትን ፍቕርን ከም ድርዒ ለቢስና ናይ ድኅነት ተስፋ ኸዓ ኸም ቁራዕ ርእሲ ደፊእና ርእስና ብምግታእ ንንበር።
[9] እግዚኣብሔር ብጐይታና ኢየሱስ ክርስቶስ ድኅነት ክንረክብ እምበር ንቝጥዓ ኣይጸውዐናን እሞ።
[10] እንተሃሊና ወይ እንተሞይትና ምስኡ ሓቢርና ብሕይወት ምእንቲ ኽንነብር ኢሉ ክርስቶስ ምእንታና ሞተ።
[11] ስለዙይ ከምቲ እትገብርዎ ዘለኹም ንስንሳትኩምውን ተተባብዑ ፤ ንስንሳትኩምውን ተሃናነጹ።
[12] እምበኣር ኣቱም ኣኅዋትና! ነቶም ኣብ ማእኸልኩም ዝፅዕሩን ብጐይታውን ዝመርሑኹምን ዝምዕዱኹምን ክተኽብርዎም ንልምነኩም ኣለና።
[13] ስለቲ ሥራሖም ብፍቕሪ ኣብሊጽኩም ኣኽብርዎም፤ ንስንሳትኩምውን ብሰላም ንበሩ።
[14] ኣቱም ኣኅዋትና! ነቶም ዘይሠርሑ ሃካያት ገሥጽዎም፤ ነቶም ተስፋ ዝቐበጹ ኣተባብዕዎም፤ ነቶም ድኹማት ሓግዝዎም፤ ምስ ኲሉውን ዕጉሣት ክትኮኑ ንምዕደኩም ኣለና።
[15] ሓደኳ ነቲ ኽፉእ ዝገበሮ ብኽፉእ ከይፈድዮ ተጠንቀቁ፤ ግና ዂልሻዕ ንስንሳትኩም ኮነ ምስ ኲሉ ሰብ ሠናይ ንምግባር ፀዓሩ እምበር።
[16] ኲልሻዕ ተሓጐሱ፤
[17] እንተየቋረጽኩም ጸልዩ፤
[18] ብዂሉ ኣመስግኑ፤ ኣብቲ ብክርስቶስ ኢየሱስ ዘለኩም ሕይወት እግዚኣብሔር ካባኻትኩም ዝደልዮ እዙይ እዩሞ።
[19] ሥራሕ መንፈስ ቅዱስ ኣይተዳኽሙ፤
[20] ትንቢት ኣይትንዓቑ።
[21] ንዂሉ መርሚርኩም ነቲ ሠናይ ኃዝዎ።
[22] ካብ ኲሉ ኽፉእ ረኃቑ።
[23] ኣምላኽ ሰላም ባዕሉ ንዂለንትናኹም ይቐድሶ፤ በታ ጐይታና ኢየሱስ ክርስቶስ ዝመጸላ መዓልቲ ኸዓ ብዘይ ነቐፋ ምእንቲ ኽትርከቡ ንመንፈስኩምን ነፍስኹምን ሥጋኹምን የሓልዎ።
[24] እቲ ዝጸውዐኩም እሙን እዩ፤ ንሱውን ክገብሮ እዩ።
[25] ኣቱም ኣኅዋትና! ምእንታና ጸልዩ።
[26] ንዂላቶም ኣኅዋትውን ብቅዱስ ሰላምታ ሰላም በልዎም።
[27] ነዛ መልእኽቲ እዚኣ ኣብ ቅድሚ ዂሎም ኣኅዋት ክተንብብዋ ብእግዚኣብሔር አማኅፅነኩም ኣለኹ።
[28] ጸጋ ጐይታና ኢየሱስ ክርስቶስ ምሳኻትኩም ይኹን። ኣሜን።