[1] ብዝተረፈ ኣኅዋተይ! ንእግዚኣብሔር ምእንቲ ኽተሐጕስዎ ከመይ ገይርኩም ክትነብሩ ኸም ዝግብአኩም ካባና ተምሂርኩም ኢኹም። ድሮ እኳ ትነብርዎ ኣለኹም። ሕዚ ኸዓ ነዙይ ብዝበለጸ ኽትነብርዎ ብጐይታና ኢየሱስ ንልምነኩምን ነተባብዐኩምን ኣለና።
[2] ብጐይታና ኢየሱስ ክርስቶስ እንታይ ዓይነት ትምህርቲ ኸም ዝሃብናኩም ትፈልጡ ኢኹም እሞ።
[3] ፍቓድ እግዚኣብሔር ንስኻትኩም ክትቅደሱን ካብ ዝሙት ክትርኅቑን እዩ።
[4] ነፍስ ወከፍ ሰብ ሰብነቱ ብቕድስናን ብኽብርን ዓቂብካ ምንባር ይፍለጥ።
[5] ከምቶም ንእግዚኣብሔር ዘይፈልጡ ኣሕዛብ ድማ ብፍትወት ሥጋ ኣይትስነፉ።
[6] ሓደኳ በዝ ነገር እዙይ ጥሒሱ ንኃዉ ኣይበድሎን ኣይበለጸሉን። ከምቲ ኣቐዲምና ዝነገርናኩምን ዘጠንቀቕናኩምን ከምዙይ ንዝገብሩ እግዚኣብሔር ፈዳይ ሕነ እዩሞ።
[7] እግዚኣብሔር ንቕድስና እምበር ንርኽሰት ኣይጸውዐናን።
[8] እምበኣር እቲ ነዙይ ዘይቕበል ነቲ ቕዱስ መንፈሱ ዝህበኩም ኣምላኽ እምበር ንሰብ ኣይኮነን ምቕባል ዝኣቢ ዘሎ።
[9] ብዛዕባ ፍቕሪ ኣኅዋት ግና ንስንሳትኩም ምፍቓር ካብ እግዚኣብሔር ተምሂርኩም ኢኹም እሞ ሓደኳ ኽጽሕፈልኩም ኣየድልን ።
[10] ብርግጽ ኣብ ኲላ መቄዶንያ ንዘለዉ ኣኅዋት ትፈትዉ ኢኹም፤ ግና ኣቱም ኣኅዋትና! ነዙይ ብዝበለጸ ኽትገብርዎ ንምዕደኩም ኣለና።
[11] -
[12] ኣብ ናብራኹም ካብ ሰብ ምእንቲ ኸይትደልዩ እቶም ካብ እምነት ወፃኢ ዘለዉ ኸዓ ምእንቲ ከኽብሩኹም ከምቲ ዝኣዘዝናኩም ብህድኣት ክትነብሩን ኣብ ናይ ርእስኹም ጉዳይ ክተተኲሩን ብኢድኩም ክትሠርሑን ድለዩ።
[13] ግና ኣኅዋተይ! ከምቶም ተስፋ ዘይብሎም ካልኦት ምእንቲ ኸይትኃዝኑ ብዛዕባ እቶም ዝሞቱ ኽትፈልጡ እደሊ ኣለኹ።
[14] ኢየሱስ ከም ዝሞተ ካብ ሞትውን ከም ዝተሥአ እንተድኣ ነኣምን ኮይንና እግዚኣብሔር ነቶም ብኢየሱስ ኣሚኖም ዝሞቱ ብኢየሱስ ኣተሢኡ ምስኡ ኸምጽኦም እዩ።
[15] ንሕና ኽሳዕ ምጽኣት ጐይታ ብሕይወት እንጸንሕ ኸዓ ነቶም ዝሞቱ ኸቶ ኸም ዘይንቕድሞም ብቓል ጐይታ ንነግረኩም ኣለና።
[16] ጐይታ ባዕሉ ብብርቱዕ ቃል ትእዛዝን ብድምፂ ሊቀ መላእኽትን ብመለኸት እግዚኣብሔርን ካብ ሰማይ ክወርድ እዩ። እቶም ብክርስቶስ ኣሚኖም ዝሞቱ ኸዓ ቀዲሞም ክትሥኡ እዮም።
[17] ብድኅርዙይ ንሕና ብሕይወት እንጸንሕ ንጐይታ ኣብ ኣየር ክንቅበሎ ምስኣቶም ሓቢርና ብደመና ክንዓርግ ኢና። ንሓዋሩ ድማ ምስ ጐይታ ኽንነብር ኢና።
[18] ደጊም በዘን ቃላት እዚኣተን ንስንሳትኩም ተጸናንዑ ።