[1] అప్పుడు నాతో మాట్లాడిన దేవదూత తిరిగి వచ్చి నిద్రపోయినవాణ్ణి లేపినట్టు నన్ను లేపాడు,
[2] “నీకు కనబడుతున్నదేమిటి?” అని నన్ను అడిగాడు. నేను “బంగారు దీపస్తంభం నాకు కనిపిస్తూ ఉంది. దానిమీద నూనె పాత్ర ఉంది. స్తంభానికి ఏడు దీపాలు ఉన్నాయి, దీపాలకు ఏడు గొట్టాలు ఉన్నాయి.
[3] రెండు ఆలీవ్ చెట్లు కూడా కనిపిస్తున్నాయి. దీపస్తంభానికి కుడిప్రక్క ఒకటి, ఎడమప్రక్క మరొకటి” అన్నాను.
[4] నాతో మాట్లాడే దేవదూతను చూచి “స్వామీ! దీని భావమేమిటి?” అని అడిగాను.
[5] ఆయన అన్నాడు “దీని భావమేమిటో నీకు తెలియదా?” “స్వామి! నాకు తెలియద”ని జవాబిచ్చాను.
[6] అప్పుడు ఆయన నాతో ఇలా అన్నాడు: “జెరుబ్బాబెల్ విషయం యెహోవా చెప్పేదేమంటే, నా ఆత్మ చేతనే పని జరుగుతుంది గానీ శక్తిచేత బలంచేత కాదు. ఇది సేనల ప్రభువు యెహోవా వాక్కు.
[7] మహా పర్వతమా! నీవు ఏపాటిదానివి? జెరుబ్బాబెల్ ఎదుట నీవు నేలమట్టం అవుతావు. అప్పుడతడు పైరాయి తీసుకొని ఆలయంమీద పెట్టిస్తాడు, ప్రజలు ‘కృప! కృప!’ అంటూ నినాదాలు చేస్తారు.”
[8] నాకు యెహోవా నుంచి వాక్కు మళ్ళీ వచ్చింది.
[9] “జెరుబ్బాబెల్ తన చేతులతో ఈ ఆలయం పునాది వేశాడు. అతడు ఈ పని ముగిస్తాడు. అప్పుడు సేనల ప్రభువు యెహోవా నన్ను మీదగ్గరికి పంపాడని నీవు తెలుసుకొంటావు.
[10] అల్ప క్రియలు జరిగే కాలాన్ని తృణీకరించేవారెవరు? జెరుబ్బాబెల్ చేతిలో ఆ విశేషమైన రాయి చూచి ప్రజలు సంతోషిస్తారు. ఈ ఏడు లోకమంతటా కలయచూస్తూ ఉన్న యెహోవా కండ్లు.”
[11] నేను ఆ దేవదూతను “దీపస్తంభానికి ఇరు ప్రక్కల ఉన్న ఈ రెండు ఆలీవ్ చెట్ల భావమేమిటి?” అనీ,
[12] “ఆ రెండు ఆలీవ్‌చెట్ల కొమ్మలు ఆ రెండు బంగారు గొట్టాల దగ్గర ఉన్నాయి. వాటిలోనుంచి బంగారు నూనె పారుతూ ఉంది. ఆ కొమ్మల భావమేమిటి?” అనీ అడిగాను.
[13] ఆయన “వీటి భావమేమిటో నీకు తెలియదా?” అనీ అడిగితే, “స్వామీ నాకు తెలియదు” అన్నాను.
[14] ఆయన “అవి అభిషిక్తులైన ఇద్దరు వ్యక్తులను సూచిస్తాయి. వారు సర్వలోక నాథుడైన యెహోవా సన్నిధాన సేవకులు” అన్నాడు.