[1] Wa Bildad al-min Chuuha chaal al-kalaam wa gaal :
[2] Lahaddi mata tuguul al-kalaam da ? Wa lahaddi mata kalaam khachmak yamrug misil riih chadiide ?
[3] Hal al-Rabb yiʼawwij al-chariiʼa walla ? Aywa, al-Rabb al-Gaadir yiʼawwij al-adaala walla ?
[4] Achaan awlaadak aznabo wa hu aakhabhum hasab isyaanhum.
[5] Wa laakin kan tifattich al-Rabb wa kan tachhad al-Rabb al-Gaadir
[6] wa kan inta saafi wa adiil, khalaas hu yifakkir foogak wa yisabbitak fi adaaltak.
[7] Wa tichiif al-indak fi l-bidaaya chiyya bas ! Akiid, fi mustakhbalak talga ziyaada minnah !
[8] Asʼal al-zurriiyaat al-faato wa ahfad adiil tajribat juduudhum.
[9] Achaan aniina naas hana amis bas, ma naʼarfu cheyy. Wa ayyaamna fi l-ard yufuutu ajala misil al-dull.
[10] Laakin al-juduud dool yiʼallumuuk wa yikallumu leek. Wa min daakhal galibhum yamrug kalaam al-buguul :
[11] «Hal al-birdi yugumm barra min al-rahad walla ? Al-tibin yagdar yiziid bala almi walla ?
[12] La ! Kan akhdar kula gubbaal // ma yagtaʼooh, bala almi hu yaybas ajala // min kulla l-gechch.»
[13] Wa yukuun misil da, le kulla l-yanso derib al-Rabb. Aywa, acham al-kaafir yingatiʼ.
[14] Hu khatta achamah fi cheyy ma madmuun wa amman nafsah le cheyy khafiif misil beet abunchabach.
[15] Hu yirrakkaz fi beetah wa l-beet da yagaʼ. Hu yilʼallag foogah wa laakin al-beet ma yasbit.
[16] Al-kaafir akhdar misil chadara tihit al-harraay. Hi maddat furuuʼha wa khattat beehum al-jineene.
[17] Wa uruugha yichcharbako // fi koom al-hashas wa yuchuggu al-hujaar.
[18] Wa laakin kan yimallutuuhum min bakaanhum, al-bakaan da yikhaalit wa yuguul : «Ana ma chiftah.»
[19] Daahu farhitah fi hayaatah. Wa min al-turaab da, yugumm nabaat aakhar.
[20] Chiif ! Al-Rabb ma yakrah al-naadum al-adiil wa ma yichajjiʼ al-naas al-fasliin.
[21] Gariib, hu yamla galbak be l-dihik wa halguumak be l-ragraag.
[22] Al-yakrahook al-eeb yikhattiihum, Wa khiyam al-aasiyiin yabgo ma fiihum.