[1] Fiyah raajil waahid usmah Ayyuub al-gaaʼid fi balad Uus. Wa l-raajil da adiil wa saalih wa khaayif min Allah wa mubaʼʼid min al-fasaala.
[2] Wa hu jaab sabʼa awlaad wa talaata banaat.
[3] Wa indah 7 000 khanam wa 3 000 jumaal wa 500 jooz hana bagar le l-hiraate wa 500 hamiir anaati wa khaddaamiin katiiriin. Wa l-raajil da muhimm min kulla naas al-sabaah le bahar al-Urdun.
[4] Wa fi l-aade, awlaadah yisawwu aazuuma fi beet hana ayyi waahid minhum wa yaʼazumu akhwaathum al-talaata le yaakulu wa yacharbo sawa.
[5] Wa wakit ayyaam al-aazuuma yikammulu, Ayyuub yugumm be fajur badri wa yigaddim dahiiye muharraga le ayyi waahid min iyaalah le yisawwiihum taahiriin. Achaan hu yuguul : «Akuun iyaali sawwo zanib wa kafaro be l-Rabb !» Wa Ayyuub yisawwi misil da fi kulli marra.
[6] Wa yoom waahid, malaaʼikat al-Rabb macho le yigaabulu Allah wa l-Khasiim Ibliis kula macha maʼaahum.
[7] Wa Allah gaal le Ibliis : «Inta jaayi min ween ?» Wa Ibliis radda le Allah wa gaal : «Laffeet fi kulla l-ard wa rukht foogha.»
[8] Wa Allah saʼalah le Ibliis wa gaal leyah : «Inta ma chift abdi Ayyuub walla ? Ma fi naadum mislah fi l-ard. Hu naadum kaamil wa adiil wa khaayif minni ana al-Rabb wa mubaʼʼid min al-fasaala.»
[9] Wa Ibliis radda le Allah wa gaal : «Khoof Ayyuub minnak da ma saakit.
[10] Achaan inta hawwagtah hu wa beetah wa kulla cheyy al-indah be zariibe. Wa baarakt kulla khidmit iideenah wa bahaaymah gaaʼidiin yiziidu fi l-balad.
[11] Wa laakin kan inta tarfaʼ iidak wa tadrub kulla cheyy al-indah, ana muʼakkid kadar hu yaʼasaak giddaamak.»
[12] Wa Allah gaal le Ibliis : «Daahu kulla cheyy al-indah fi iidak wa laakin ma tukhutt iidak foogah hu.» Wa khalaas, Ibliis marag min giddaam Allah.
[13] Wa yoom waahid, awlaad Ayyuub wa banaatah gaaʼidiin yaakulu wa yacharbo khamar fi beet akhuuhum al-bikir.
[14] Wa fajʼatan, mursaal ja le Ayyuub wa gaal leyah : «Al-bagar gaaʼidiin yahartu wa l-hamiir gaaʼidiin yartaʼo jambuhum.
[15] Wa tawwaali, naas min balad Saba jo wagaʼo fooghum wa chaaloohum wa katalo al-khaddaamiin be l-seef. Wa ana wiheedi bas nijiit wa jiit le nikhabbirak.»
[16] Wa wakit hu lissaaʼ gaaʼid yihajji, mursaal aakhar ja wa gaal : «Naar al-Rabb nazalat min al-sama wa haragat al-khanam wa l-khaddaamiin. Wa ana wiheedi bas nijiit wa jiit le nikhabbirak.»
[17] Wa wakit hu lissaaʼ gaaʼid yihajji, mursaal aakhar battaan ja wa gaal : «Talaata majmuuʼaat min al-Baabiliyiin jo wagaʼo fi l-jumaal wa chaaloohum wa katalo al-khaddaamiin be l-seef. Wa ana wiheedi bas nijiit wa jiit le nikhabbirak.»
[18] Wa wakit hu lissaaʼ gaaʼid yihajji, battaan mursaal aakhar ja wa gaal : «Awlaadak wa banaatak gaaʼidiin yaakulu wa yacharbo khamar fi beet akhuuhum al-bikir
[19] wa khalaas, riih chadiide jaat min al-sahara wa darabat arkaan al-beet da be chidde wa ramatah. Wa l-beet wagaʼ fi raas al-chabaab wa humman maato. Wa ana wiheedi bas nijiit wa jiit le nikhabbirak.»
[20] Wa khalaas min al-hizin, Ayyuub gamma charrat jallaabiiytah wa zayyan raasah. Wa wagaʼ fi l-ard wa sajad.
[21] Wa gaal : «Ana maragt min batun ammi aryaan wa nigabbil fi l-khabur aryaan. Allah anta. Wa Allah chaal. Mubaarak usum Allah.»
[22] Wa be kulla l-cheyy da, Ayyuub ma aznab wa la hajja kalaam makruuh didd al-Rabb.