[1] Wa khalaas, Alifaaz wa Bildad wa Suufar waggafo kalaamhum maʼa Ayyuub achaan hu yichiif nafsah saalih.
[2] Wa be sabab da, Aliihu wileed Barakiil al-min hillit Buuz min khachum beet Raam ziʼil zaʼal chadiid. Wa zaʼalah da didd Ayyuub achaan Ayyuub sawwa nafsah saalih ziyaada min al-Rabb.
[3] Wa Aliihu ziʼil zaʼal chadiid didd al-rufgaan al-talaata kula, achaan humman ma gidro yuruddu le Ayyuub. Wa be misil da, humman sawwo Ayyuub khaati.
[4] Wa Aliihu sabar ma kallam le Ayyuub achaan humman kulluhum kubaar minnah fi l-sinn.
[5] Wa laakin wakit Aliihu chaaf kadar al-rujaal al-talaata dool ma induhum kalaam al-yurudduuh leyah, ziʼil zaʼal chadiid.
[6] Wa khalaas, Aliihu wileed Barakiil al-min hillit Buuz chaal al-kalaam wa gaal : Ana sabi wa intu chiyyaab wa fi chaan da, ana khuft wa rajaft wa ma gidirt nikhabbirku // be maʼrafati.
[7] Wa fi nafsi ana gult : «Al-chiyyaab waajib yihajju awwal wa l-induhum siniin katiiriin // yiʼarrufu be l-hikma.»
[8] Wa laakin fi l-sahiih, al-insaan indah ruuh wa l-nafas al-jaayi min al-Gaadir, yantiih al-fihim.
[9] Al-siniin al-katiiriin bas ma yantu hikma wa ma kulla l-chiyyaab yafhamo al-adaala.
[10] Wa fi chaan da, ana nuguul : // «Asmaʼni ! Ana kula nikhabbir be maʼrafati.»
[11] Ana arrajjeet kalaamku wa khatteet adaani le hujjitku lahaddi intu haggagtu min kalaamku.
[12] Ana khatteet baali foogku wa daahu waahid minku kula ma gidir yuluum Ayyuub wa waahid minku ma gidir yurudd leyah.
[13] Wa laakin ma waajib tuguulu : «Aniina ligiina al-hikma. Al-Rabb bas yagdar foogah, ma insaan.»
[14] Wa Ayyuub ma kalaam kalaamah // leyi ana wa ana kula ma nurudd leyah // be kalaamku intu.
[15] Humman khaafo wa ma yagdaro yuruddu battaan wa l-kalaam kula waddar leehum.
[16] Ana arrajjeet achaan humman // ma hajjo achaan humman wagafo wa sakato // wa abo ma yuruddu.
[17] Wa ja doori ana. Ana kula nurudd wa nikhabbir be maʼrafati.
[18] Achaan ana malaan be kalaam wa ruuh fi daakhili tajburni // le nikallim.
[19] Galbi fi daakhili faar misil khamar masduud aw misil girbe jadiide malaane // al-tidoor tinfajir.
[20] Ana nihajji le nirayyih nafsi wa naftah khachmi wa nurudd.
[21] Ana ma nichiif naadum akheer // min naadum wa ma nukhuchch insaan.
[22] Achaan ana ma naʼarif nukhuchch wa kan khachcheet kula, al-khalagaani yichiilni be surʼa.