[1] Wa battaan Ayyuub kallam wa gaal :
[2] Ana nitmanna zamaani al-faat // yigabbil leyi wakit al-Rabb gaaʼid yahfadni.
[3] Wa da wakit barakat al-Rabb gaaʼide foogi misil faanuus wa nuurah gaaʼid yidawwi leyi derbi fi l-dalaam.
[4] Dool ahsan ayyaam hayaati wakit al-Rabb gaaʼid yifakkir fi beeti misil rafiigi.
[5] Fi l-wakit daak, lissaaʼ al-Gaadir // gaaʼid maʼaayi wa awlaadi muhawwigiinni.
[6] Fi l-wakit daak, ana nilbarrad // be l-laban wa assaaraati yisiilu be l-dihin // be katara.
[7] Wa da wakit namrug ale khachum baab al-hille wa nagood fi nagaʼat al-malamma.
[8] Wa wakit yichiifuuni, al-subyaan yitarrufu wa l-chiyyaab yugummu leyi foog.
[9] Wa l-masaaʼiil yiwaggufu kalaamhum wa yukhuttu iideehum // fi khuchuumhum.
[10] Wa hiss al-kubaaraat ma yinsamiʼ wa lisaanhum kula ma yantug. Wa da kulla le yiwassufu leyi ihtiraamhum.
[11] Al-adaan al-tasmaʼni tuguul ana mubaarak wa l-een al-tichiifni tachhad leyi.
[12] Achaan ninajji al-miskiin al-yikoorik leyi le l-fazaʼ wa l-atiim al-ma indah naadum yisaaʼidah.
[13] Wa barakat al-gariib le l-moot // tanzil foogi wa namla galib al-armala be l-farah.
[14] Nalbas al-adaala wa hi taksiini wa l-hagg misil khalag // wa kadmuul leyi.
[15] Ana misil uyuun le l-amyaan wa misil rijle le l-aʼraj.
[16] Ana misil abu le l-masaakiin wa nifakkir adiil fi huguug al-deef.
[17] Wa naksir saalfit al-mujrim wa min khachmah, naglaʼ fariistah.
[18] Wa khalaas, ana gult : «Baʼad ayyaam katiiriin misil ramla hana khachum al-bahar, ana numuut fi lubb aayilti.
[19] Nabga misil chadara al-uruugha rawyaaniin almi wa be leel, al-talaj yanzil fi furuuʼi.
[20] Charafi yiljaddad foogi wa nubbaali yabga gawi fi iidi.»
[21] Wa fi l-wakit daak, al-naas yarjooni wa yaskutu le yasmaʼo wasiiyti.
[22] Baʼad kalaami, humman ma yinaakhuchu wa kalaami yanzil fooghum misil matara.
[23] Humman yarjooni misil yarjo al-matar wa yardo be kalaami misil almi al-richaach.
[24] Wa ana nadhak leehum wa humman ma yisadduguuh wa wakit chaafo wijhi daawi, khalaas yalgo acham.
[25] Ana azalt leehum al-derib wa gaʼadt fi raashum. Wa bigiit misil malik fi lubb askarah wa misil naadum al-yihannis al-taʼbaaniin.