[1] Wa Ayyuub chaal al-kalaam wa gaal :
[2] Ana simiʼt achya katiiriin misil dool, intu kulluku al-musabbiriin titaʼʼubuuni.
[3] Intu gultu : «Fi nihaaya le l-kalaam al-faadi da walla ? Wa chunu al-khallaak turudd misil da ?»
[4] Wa kan ana kula fi bakaanku, ana zaati nagdar nihajji misilku. Wa nuguul kalaam katiir foogku wa nagdar nihizz raasi wa nichchammat leeku.
[5] Laakin be kalaami ana, nigawwiiku wa be lisaani, nisaaʼidku !
[6] Wa laakin kan ana hajjeet, wajaʼi ma yangus wa kan sakatt, taʼabi ma yibaʼʼid minni.
[7] Wa hassaʼ khalaas, ya Rabb, inta ayyeetni wa dasseet al-hizin fi kulla aayilti.
[8] Wa inta khatteet alam fi jismi // al-yachhad foogi wa batuuli jaab al-tuhma foogi.
[9] Khadab al-Rabb gattaʼni misil haywaan yigattiʼ rimmitah. Wa hu wassaf fawaatrah leyi wa hammarni misil hu khasiimi.
[10] Naas fataho khuchuumhum kubaar diddi wa chaddagooni le yiʼayyubuuni wa lammo sawa diddi.
[11] Al-Rabb sallamaani le l-fasliin. Aywa, sallamaani fi iid al-aasiyiin.
[12] Ana gaaʼid fi raaha wa hu darabni wa karabaani min angarati // wa rihikni. Wa gawwamni wa khattaani hadaf
[13] wa nachaachiibah lihgooni. Hu taʼanni fi naayti bala mahanna wa daffag ammarraarti fi l-turaab.
[14] Hu yatʼanni taʼne wara taʼne wa yajri aleyi misil faaris.
[15] Ana khayyatt chuwaal wa libistah wa raasi fi l-turaab dasseetah.
[16] Wa wijhi dallam min al-hizin wa uyuuni hammaro min al-baki.
[17] Laakin iideeni ma sawwo ayyi unuf ! Wa salaati daayman saafiye !
[18] Ya l-ard ! Ma tilabbidi dammi ! Khalli siraakhi yinsamiʼ // fi ayyi bakaan !
[19] Wa hassaʼ, al-yachhad leyi // gaaʼid fi l-sama wa l-yahmiini gaaʼid fi l-aali.
[20] Rufgaani yichchammato foogi laakin ana niwajjih be dumuuʼi // le l-Rabb.
[21] Khalli al-chaahid yidaafiʼ leyi // giddaam al-Rabb misil naadum yidaafiʼ le akhuuh.
[22] Achaan ayyaam umri gariib yikammulu wa namchi be tariig al-ma naji beyah.