[1] Hal hayaat Bani Adam fi l-ard ma misil hayaat askari walla ? Wa ayyaamah ma misil ayyaam al-muʼajjar walla ?
[2] Wa misil al-abd al-yinaahij yidoor al-dull wa misil al-khaddaam al-yarja ujurtah,
[3] misil da, ana gaʼadt chuhuur fi l-faadi wa da bas gismi. Wa hasabo leyi layaali hana taʼab.
[4] Wa wakit nargud, nuguul : «Nugumm mata ?» Al-leel tawiil wa ana chibiʼt min gillit al-noom lahaddi fajur.
[5] Jismi ankasa be duud wa gachchar wa farwit jildi jaffat wa algattaʼat.
[6] Wa ayyaami maachiin ajala // min al-mutraara wa yikammulu be surʼa achaan achami angataʼ.
[7] Ya Rabb, azzakkar kadar hayaati misil riih wa uyuuni battaan // ma yichiifu al-kheer.
[8] Wa uyuun al-yichiifuuni, ma yichiifuuni battaan. Wa wakit uyuunak yifattuchuuni, ana ma fiini.
[9] Al-insaan al-yanzil fi l-khabur // ma yigabbil battaan misil sahaabaay al-marrat wa faatat.
[10] Hu ma yigabbil fi maskanah wa naas beetah kula yansooh.
[11] Wa fi chaan da, ana ma nalzam khachmi. Nihajji be diigit ruuhi wa nachki be hizin nafsi.
[12] Ana ma bahar wa la khuul al-bahar lahaddi tukhutt leyi haraasa.
[13] Nuguul : «Fi sariiri, nalga raahti wa fi furaachi, nihaddi chakwiti.»
[14] Wa laakin be hilim, inta tidiss leyi al-ruʼub wa be ruʼya, tabhatni.
[15] Ana azal al-chanagaan wa l-moot akheer leyi // min bigiit udaam !
[16] Khalaas, tammaani ! Ma niʼiich daayman. Khalliini ! Ayyaami zaayliin.
[17] Chunu al-insaan wa maala tikabbirah ? Maala tihimm beyah ?
[18] Maala tiraakhibah ayyi sabaah wa tijarribah kulla wakit ?
[19] Ya Rabb ! Mata tiwaggif nazarak minni ? Wa mata tikhalliini nazrut riigi ?
[20] Ya muraakhib al-insaan, kan ana aznabt, da yisawwi leek chunu ? Maala khatteetni hadaf ? Ana bigiit leek tagiil walla ?
[21] Wa maala ma tamha isyaani wa tisaamih khataayi ? Achaan daahuuni raagid fi l-turaab misil mayyit wa wakit tifattichni, nabga ma fiini.