[1] لِكُلَّ شَيّءْ فِي زَمَنْ وَ لِكُلَّ شَيّءْ تِحِتْ السَّمَاءْ، فِي وَكِتْ مُنَاسِبْ.
[2] فِي وَكِتْ لِلْوَالُودَةْ وَ فِي وَكِتْ لِلْمَوْت. فِي وَكِتْ لِلْمَقِّنِينْ وَ فِي وَكِتْ لِمَلِّطِينْ الْمَقَنْ.
[3] فِي وَكِتْ لِلْكَتِلْ وَ فِي وَكِتْ لِلشِّفَاءْ. فِي وَكِتْ لِلْهَدِّمِينْ وَ فِي وَكِتْ لِلْبُنَى.
[4] فِي وَكِتْ لِلْبَكِي وَ فِي وَكِتْ لِلضِّحِكْ. فِي وَكِتْ لِلنُّوَاحْ وَ فِي وَكِتْ لِلِّعِبْ.
[5] فِي وَكِتْ لِزَرِّقِينْ الْحُجَارْ وَ فِي وَكِتْ لِلَمِّينْ الْحُجَارْ. فِي وَكِتْ لِلْمُحَاضَنَةْ وَ فِي وَكِتْ لِخَلِّيِينْ الْمُحَاضَنَةْ.
[6] فِي وَكِتْ لِلْفَتِّشِينْ وَ فِي وَكِتْ لِلْوَدِّرِينْ. فِي وَكِتْ لِلْحَفَضَانْ وَ فِي وَكِتْ لِلزَّقَلَانْ.
[7] فِي وَكِتْ لِلشَّرِّطِينْ وَ فِي وَكِتْ لِلْخِيَاطَةْ. فِي وَكِتْ لِلسُّكُوتْ وَ فِي وَكِتْ لِلْحِجَيْ.
[8] فِي وَكِتْ لِلْمَحَبَّةْ وَ فِي وَكِتْ لِلْكَرَاهِيَّةْ. فِي وَكِتْ لِلْحَرِبْ وَ فِي وَكِتْ لِلسَّلَامْ.
[9] شُنُو الْفَايْدَةْ الْيَلْقَاهَا الْخَدَّامْ // مِنْ خِدِمْتَهْ؟
[10] أَنَا شِفْت الشَّغَلَةْ الْخَطَّاهَا الرَّبّ فِي بَنِي آدَم.
[11] كُلَّ شَيّءْ السَّوَّاهْ الرَّبّ جَمِيلْ فِي وَكْتَهْ وَ خَطَّ عَشَمْ الدَّوَامْ فِي قُلُوبْهُمْ. لَاكِنْ الْإِنْسَانْ مَا يَقْدَرْ يَعَرِفْ الْخِدْمَةْ السَّوَّاهَا الرَّبّ مِنْ الْبِدَايَةْ لِلنِّهَايَةْ.
[12] أَنَا نَعَرْفَهْ مَا فِي شَيّءْ عَدِيلْ لِلْإِنْسَانْ إِلَّا الْفَرْحَةْ وَ الْخَيْر فِي حَيَاتَهْ.
[13] وَ وَاجِبْ لِأَيِّ إِنْسَانْ يَاكُلْ // وَ يَشْرَبْ وَ يَلْقَى الْخَيْر فِي كُلَّ خِدِمْتَهْ. وَ دِي هَدِيَّةْ مِنْ الرَّبّ.
[14] وَ أَنَا نَعَرِفْ كُلَّ شَيّءْ السَّوَّاهْ الرَّبّ دَا دَايِمْ. مَا فِي الْيَنْقُصَهْ وَ لَا يِزِيدَهْ. وَ الرَّبّ سَوَّى كُلَّ شَيّءْ أَشَانْ يَخَافَوْا مِنَّهْ.
[15] الْقَاعِدْ هَسَّعْ، كَانْ مِنْ أَوَّلْ وَ الْيُكُونْ كُلَ، كَانْ مِنْ زَمَانْ. وَ الرَّبّ يِقَبِّلْ الشَّيّءْ الْفَاتْ.
[16] وَ دَاهُو بَتَّانْ الشَّيّءْ الْأَنَا شِفْتَهْ فِي الْأَرْض. فِي بَكَانْ الْعَدَالَةْ، الظُّلُمْ قَاعِدْ! وَ فِي بَكَانْ الشَّرِيعَةْ، الظُّلُمْ قَاعِدْ!
[17] وَ أَنَا قُلْت فِي نَفْسِي: «الرَّبّ يِحَاسِبْ الصَّالِحْ وَ الْعَاصِي كُلَ أَشَانْ لِكُلَّ شَيّءْ فِي وَكِتْ مُنَاسِبْ وَ كُلَّ عَمَلْ بِوَكْتَهْ.»
[18] وَ أَنَا قُلْت فِي نَفْسِي: «كَنْ لِبَنِي آدَم، خَلِّي الرَّبّ يِجَرِّبْهُمْ لِيَعَرْفُوا كَدَرْ هُمَّنْ ذَاتْهُمْ // مِثِلْ بَهَايِمْ.»
[19] أَشَانْ الْيُكُونْ لِبَنِي آدَم، يُكُونْ لِلْبَهَايِمْ كُلَ. الْوَاحِدْ يُمُوتْ مِثِلْ الْآخَرْ. عِنْدُهُمْ نَفْس الرُّوحْ وَ الْإِنْسَانْ مِثِلْ الْبَهِيمَةْ. خَلَاصْ، دَا كُلَ زَايِلْ سَاكِتْ.
[20] كُلُّهُمْ كَيْ يَمْشُوا لِبَكَانْ وَاحِدْ. كُلُّهُمْ مِنْ التُّرَابْ وَ يِقَبُّلُوا فِي التُّرَابْ.
[21] يَاتُو يَعَرِفْ كَنْ رُوحْ الْإِنْسَانْ تَمْشِي فَوْق فِي السَّمَاءْ وَ كَنْ رُوحْ الْبَهِيمَةْ تَنْزِلْ تِحِتْ فِي الْأَرْض؟
[22] وَ أَنَا شِفْت كَدَرْ مَا فِي شَيّءْ أَحْسَنْ // لِلْإِنْسَانْ مِنْ يَفْرَحْ بِعَمَلَهْ أَشَانْ دَا بَسْ قِسْمَهْ. يَاتُو يِحَيِّيهْ بَتَّانْ لِيِشِيفْ الشَّيّءْ الْيُكُونْ بَعَدْ مَوْتَهْ؟